“Pagtudlo sa mga Anak sa Gahom sa mga Relasyon ug Serbisyo,” Liahona, Hunyo 2024.
Pagtudlo sa mga Anak sa Gahom sa mga Relasyon ug Serbisyo
Ang pagtabang sa atong mga anak sa pagserbisyo sa uban diha sa ilang mga pamilya, sa Simbahan, ug sa komunidad nag-ugmad og pundasyon alang sa umaabot nga kalipay pinaagi sa pagtabang kanila nga makasinati ang tinuod nga kalipay karon.
Naandan nakong tawagon ang among siyete anyos nga anak nga babaye nga akong sekreto nga hinagiban. Samtang nagserbisyo ko isip usa ka bishop, ganahan ko nga maapil ang akong mga anak sa akong pagserbisyo. Ang pagdala kaniya uban nako sa pagbisita sa mga miyembro sa ward dili lang kay nakatugot nako nga makagahin og panahon uban niya apan nakapaabli usab kini og mga oportunidad nga sirado kaniadto. Lisod isalikway ang bishop kon ang iyang maanyag nga siyete anyos nga anak nga babaye nagpahiyom kanimo. Ug ingon nga maayo kadto alang sa among mga miyembro sa ward, ako nagtuo nga kini maayo usab alang sa akong gamay nga anak nga babaye. Dili lang nga nakakita siya sa iyang papa nga nagmahal ug nagserbisyo sa uban, apan siya nakakat-on sa linghod nga edad nga siya makahigugma ug makaserbisyo usab sa uban—nakapanalangin kaniya og hingpit nga kalipay sa samang higayon.
Kitang tanan gusto nga ang atong mga anak molambo. Kita gusto nga magpuyo sila og malipayon nga mga kinabuhi puno sa mahigugmaong mga relasyon. Apan ang kalibotan nga atong gipuy-an nakapahimo niining lisod. Daghang moderno nga mga impluwensya ang nag-awhag sa atong mga anak nga mas tutokan ang “ako”. Sila kanunay nga makadawat og mga mensahe nga ang kalipay makaplagan sa pagtutok sa unsay anaa niini alang kanila.
Ang labing maayo nga katilingbanong siyensiya nga nagpakita og kaayohan sa uban nga pamatasan mao ang usa ka yawe sa paglambo. Ang “kaayohan sa uban” mao ang maanindot nga paagi sa paghulagway niini nga pagtulon-an sa Manluluwas: atong makaplagan ang atong kaugalingon (ug ang tinuod nga kalipay) pinaagi sa pagkalimot sa atong kaugalingon diha sa mahigugmaong pagserbisyo (tan-awa sa Mateo 10:39).
Apan adunay usa ka epidemya sa pag-inusara diha sa atong katilingban, gikan sa mga bata ngadto sa mga young adult ngadto sa mga senior. Daghan ang mas nakonektar ngadto sa uban pinaagi sa social media kay sa kaniadto. Apan, subo lang, nga sila mas naputol gikan sa tinuod nga kinabuhi nga relasyon kay sa kaniadto.1
Busa sa unsang paagi kita makatabang sa atong mga anak nga makakat-on nga ang makahuloganon nga mga relasyon ug mapuslanon nga serbisyo makahatag kanila og mas dakong kalipay?
Ikonektar ang Serbisyo ngadto sa Ilang Nag-unang Pagkatawo
Usa ka kritikal nga tahas alang sa mga ginikanan mao ang pagtabang sa ilang mga anak nga makaila kon si kinsa sila. Daghan karon ang nakatutok sa pagkatawo sa mga paagi nga makabulag ug makabahin-bahin kanato. Imbis tutokan ang atong pagkatawo isip kabahin sa pamilya sa Dios, daghan ang mopili og mga label nga wala mag-awhag sa pagsabot ug pag-amuma niadtong naglibot kanato.
Dili ikahibulong nga si Presidente Russell M. Nelson naghatag og gibug-aton kon unsa ka importante nga makahibalo ug iprayoridad ang labing importante nga mga pagkatawo:
“Kinsa man kamo?
“Una ug labing importante, kamo anak sa Dios.
“Ikaduha, isip miyembro sa Simbahan kamo anak sa pakigsaad. Ug ikatulo, kamo mga disipulo ni Jesukristo.”2
Kon atong makita ang atong kaugalingon og una isip mga anak sa Dios, atong makat-onan nga matag usa kanato “adunay balaan nga kinaiyahan ug padulngan.”3 Kana nagpasabot nga, ang atong sukaranan nga kinaiyahan balaan, ug kita adunay potensiyal nga mamahimong sama sa Dios. Siya miingon kanato nga, “Kini ang akong buhat ug ang akong himaya—ang pagpahinabo sa pagka-imortal ug sa kinabuhi nga dayon sa tawo.’ (Moises 1:39). Ang tanang butang nga gibuhat sa Dios mao ang paghigugma ug pagpanalangin ug paghimaya kanato. “Dili siya maghimo og bisan unsa gawas kon kini alang sa kaayohan sa kalibotan” (2 Nephi 26:24).
Nakita ninyo, ang Dios nasayod kon unsaon nga magmalipayon labaw pa kay sa atong mahimo. Dili ba ikahibulong nga kon kita magpakabuhi nga nakatutok lang sa kaugalingon, kita misukwahi ngadto sa atong mahangtoron nga kinaiyahan? Kita magsugod sa pagbati og kahaw-ang sa katuyoan ug kalipay. Kadtong kinsa “nahisupak sa kinaiyahan sa Dios … anaa sa kahimtang nga sukwahi sa kinaiyahan sa kalipay” (Alma 41:11). Ang atong mahangtoron nga kinaiyahan makapahimo niining imposible nga makakaplag og kalipay diha sa nakatutok sa kaugalingon, dili matarong nga pagpakabuhi (tan-awa sa Helaman 13:38).
Pinaagi sa pagtutok sa atong tinuod nga pagkatawo isip mga anak sa Dios, kita makakat-on nga kita sa pagkatinuod managsoon. Ang pagkasayod sa atong matuod nga pagkatawo makatabang kanato sa paghatag og dugang nga bili sa pagserbisyo ug sa mga relasyon. Atong maamgohan nga kita“anaa sa panag-uban sa Makagagahom sa pagkab-ot sa katuyoan sa mahangtoron nga plano sa kaluwasan,” sama sa gitudlo ni Elder John A. Widtsoe.4 Kita “[mag]bangutan uban niadto nga nagbangutan; oo, ug sa paghupay niadto nga nagkinahanglan sa kahupayan, ug … mobarog ingon nga mga saksi sa Dios sa tanan nga mga panahon” (Mosiah 18:9).
Pagtabang sa Atong mga Anak nga Mohatag og Bili sa mga Relasyon ug Serbisyo
Isip mga ginikanan, kita makatabang sa atong mga anak nga magpuyo nga malipayon pinaagi sa pagtabang kanila nga mohatag og bili sa mga relasyon. Walay usa nga makalahutay kon walay positibo nga mga relasyon. Ang Dios nasayod niini, busa ang Iyang perpekto nga plano nagbutang kanato diha sa mga pamilya, sa mga ward o mga branch, ug sa mga komunidad. Siya nasayod nga kita nagkinahanglan niini aron makakat-on sa paghigugma ug pagserbisyo sama sa Iyang gihimo. Sama sa gipahinumdom ni Elder Quentin L. Cook sa Korum sa Napulog Duha ka Apostoles: “Si Presidente Russell M. Nelson mihangyo kanato nga ‘magpakita og mas maayong kinaiya, panag-uyon sa kaliwatan ug etniko nga grupo, ug pagtinahoray sa usag usa.’ Nagpasabot kini sa paghigugma sa usag usa ug sa Dios ug sa pagdawat sa tanan isip mga igsoon ug tinuoray nga mahimong usa ka katawhan sa Zion.”5
Hunahunaa kon unsa kaha kini kagamhanan alang sa atong mga anak nga makaamgo nga ang Dios wala lang magmando kanato sa pag-amuma sa usag usa apan nagtanyag usab sa pagpakig-uban kanato diha sa atong mga paningkamot. Wala kita pasagdi sa Dios sa pagbuhat niining pagserbisyo sa atoa lang nga kaugalingon. Siya nagsaad sa paglakaw uban kanato: “Ikaw magpuyo ngari kanako, ug Ako nganha kanimo; busa lakaw uban kanako” (Moises 6:34). Ang resulta sa paglakaw uban sa Dios diha sa mahigugmaong pagserbisyo makapausab sa kinabuhi. Basaha lang kon unsa ang nahimo ni Enoch uban sa tabang sa Dios ug ang kamahinungdanon sa mga relsyon diha sa paghimo og Zion. Kini usa ka gamhanang ehemplo nga atong matan-aw. (Tan-awa sa Moises 6–7.)
Ang pagtabang sa atong mga anak sa pagserbisyo sa uban diha sa ilang mga pamilya, sa Simbahan, ug sa komunidad nag-ugmad og pundasyon alang sa umaabot nga kalipay pinaagi sa pagtabang kanila nga makasinati ang tinuod nga kalipay karon. Kita makatabang kanila nga mas mahisama sa Dios ug makasinati sa hingpit nga kalipay nga mahimo sa diosnon nga kinabuhi.
Si Elder David A. Bednar sa Korum sa Napulog Duha ka Apostoles mipasabot nga samtang kita nagpalambo og kinaiya ni Kristo, kita sa natural nga paagi motutok ngadto sa mahigugmaong pagserbisyo sa uban.6 Si Satanas nasayod niini ug gusto nga kita motutok sa atong kaugalingon. Apan kita makatabang sa atong mga anak nga makasabot nga ang mahigugmaong pagserbisyo mas epektibo gayod diha sa pag-ugmad og kalipay kay sa pagtutok sa atong kaugalingon. Ang karaan nga panultihon tinuod gihapon: “Tabangi ang imong igsoon nga makatabok ang iyang sakayan, ug tan-awa, ang imo mismong sakayan miabot na sa baybayon.”7
Sa unsang paagi? Iapil ang Dios ug “Mangusog Diha sa Imong Gibarogan”
Ang pagtabang sa inyong mga anak nga makakat-on sa pagtan-aw sa uban isip mga igsoon mahimong masugdan sa atong pag-ampo sa pamilya. Sulod sa katuigan, ang among pag-ampo sa pamilya naglakip og mga pangamuyo nga ang Dios mopanalangin sa among pamilya. Sa “pamilya,” kami nagpasabot (ug piho nga pag-ampo alang sa) among direkta nga pamilya (mga ginikanan ug mga anak), sa among mga paryente, sa among ward nga pamilya, ug sa among kasilinganan nga pamilya. Kami gusto nga ang among mga anak makakita nga kadtong gibutang sa Dios sa among palibot kabahin sa among pamilya.
Kami dayon motindog ug mosulay sa pagserbisyo niadtong among gilakip sa pag-ampo. Among giapil ang among mga anak diha sa mahigugmaon nga mga relasyon uban sa ilang mga iyaan, mga uyoan, mga ig-agaw, ug mga apohan. Pananglitan, ang among mga anak mitabang kanamo samtang kami miamuma sa akong anghel nga inahan sa nahibiling pipila ka tuig sa iyang kinabuhi. Kami segurado nga wala namo kini mahimo sa hingpit nga paagi, apan ang among mga paningkamot nakahimo og kalainan.
Sa daghang paagi, ang pagbuhat niini labaw pa kay sa “pagpangusog kon asa kami nagbarog,” sa pagkutlo gikan ni Elder Dieter F. Uchtdorf sa Korum sa Napulog Duha ka Apostoles.8 Kasagaran, ang lisod nga mga tumong mahimo ra kon kita magsugod kon asa kita ug mobuhat unsa ang atong mahimo. Ang atong kaugalingong mga pamilya, mga simbahan, ug mga komunidad naghatag og igong mga oportunidad sa pagtabang sa atong mga anak nga makasinati og hingpit nga kalipay sa makahuluganon nga pagserbisyo.
Ang Hingpit nga Kalipay sa Koneksiyon sa Pakigsaad
Lagmit inyong namatikdan nga ang atong mga lider sa Simbahan nagbalikbalik sa pagpasabot sa kaimportante sa pagpabilin diha sa dalan sa pakigsaad. Ang dalan sa pakigsaad labaw pa kay sa hugpong sa mga lagda. Ang mga ordinansa nga atong madawat ug ang mga pakigsaad nga atong gihimo mao ang paagi sa Dios sa pagbugkos kanato ngadto Kaniya ug sa usag usa sa paagi nga makatabang kanato nga mahisama Kaniya. Kini naglakip dili lang sa unang dakong sugo sa paghigugma sa Dios apan usab sa ikaduhang dakong sugo sa paghigugma sa usag usa. Sa pagkatinuod, samtang atong kalimtan ang atong kaugalingon diha sa pagserbisyo, kita ug ang atong mga anak makakaplag sa atong tinuod nga mga kaugalingon.