Unsaon Nato Pagdawat sa Kapahulayan sa Ginoo?

Si Alma nagtudlo kon sa unsang paagi kita makaandam sa pagsulod ngadto sa kapahulayan sa Ginoo.

Ang Manluluwas midapit sa tanang tawo:

“Umari kanako, kamong tanan nga nabudlay ug nabug-atan, ug papahulayon ko kamo.

“Isangon ninyo ang akong yugo diha kaninyo, ug pagtuon kamo gikan kanako; … ug makakaplag kamog pahulay alang sa inyong mga kalag.

“Kay masayon ang akong yugo, ug magaan ang akong luwan” (Mateo 11:28–30).

Sa may kalabotan nga mga pagtulon-an diha sa Alma 13, si Alma namulong bahin niadtong “kinsa nahimo nga putli ug nakasulod ngadto sa kapahulayan sa Ginoo” (bersikulo 12). Dayon mihimo siya niini nga pagdapit: “Ako manghinaot nga kamo kinahanglan magpaubos sa inyong mga kaugalingon sa atubangan sa Dios, ug magdala og bunga nga gikinahanglan alang sa paghinulsol, nga kamo mahimo usab nga makasulod niana nga kapahulayan” (bersikulo 13).

Kon biyaan nato ang atong mga sala ug maghinulsol, mahimo kitang mapuno sa kalinaw ug makabaton sa makanunayon nga pakig-uban sa Espiritu Santo. Sa mga bersikulo 28 ug 29, si Alma naglista og mga paagi nga kita makaandam sa atong mga kaugalingon nga mosulod ngadto sa kapahulayan sa Dios:

Magpaubos sa atong kaugalingon sa atubangan sa Ginoo.
Motawag sa Iyang balaan nga ngalan.
Magbantay ug mag-ampo kanunay aron sa pagbatok sa tintasyon ug aron magiyahan sa Espiritu.
Magbaton og hugot nga pagtuo sa Ginoo.
Magbaton og paglaom nga makadawat kita og kinabuhing dayon.
Magbaton kanunay sa gugma sa Dios sa atong mga kasingkasing.

Si Presidente Russell M. Nelson mitudlo nga pinaagi sa pagsunod sa mas taas nga mga balaod ni Jesukristo, kita makakaplag og kapahulayan, kahupay, ug kalinaw—dili lang sa kahangtoran apan sa atong mga kinabuhi karon. Siya mipasabot:

“Ang [mga] tigtuman sa pakigsaad adunay katungod sa espesyal nga matang sa kapahulayan nga moabot ngadto nila sa ilang tibuok relasyon sa pakigsaad uban sa Dios. …

“Samtang kita maningkamot sa pagsunod sa mas taas nga mga balaod ni Jesukristo, ang atong mga kasingkasing ug ang atong [mismo nga mga] pagkatawo magsugod sa pagkausab. Ang Manluluwas motabang nato sa pagbuntog sa mga tintasyon niini nga [napukan nga] kalibotan pinaagi sa pagpanalangin nato og mas dako nga gugma nga putli, kamapainubsanon, kamanggihatagon, kamabination, disiplina sa kaugalingon, kalinaw, ug kapahulayan.

“Karon, kamo tingali naghunahuna nga kini morag mas lisod nga espirituhanon nga trabaho kay sa kapahulayan. Apan ania ang dakong kamatuoran: samtang ang kalibotan moinsister nga ang gahom, kabtangan, kainila, ug kagana sa unod makahatag og kalipay, kini dili mohatag og kalipay! Kini dili makahatag og kalipay! Kini walay ikahatag gawas sa haw-ang nga puli alang sa ‘bulahan ug sa malipayon nga kahimtang niadtong [kinsa] naghupot sa mga sugo sa Dios’ [Mosiah 2:41].

“Ang kamatuoran mao nga mas labaw nga makakapoy ang pagpangita og kalipay diin kamo dili gayod makakita niini!”¹