“Sa usa ka Kalibotan nga Puno sa Kabanha, Naggahin Ka Ba og Panahon aron Mabati ang Kalinaw sa Dios?,” Liahona, Hunyo 2024.
Mga Young Adult
Sa Kalibotan nga Puno sa Kabanha, Naggahin Ka Ba og Panahon aron Mabati ang Kalinaw sa Dios?
Samtang naggahin ko og panahon nga magmalinawon, mas napaduol ko ngadto sa Langitnong Amahan ug kang Jesukristo ug nabati ang Ilang panagdait.
The Lord Is My Shepherd [Ang Ginoo Ang Akong Magbalantay], ni Yongsung Kim, sa maayong kabubut-on sa LDSart
Sa dihang anaa ko sa elementarya, kuhaon ko sa akong mama gikan sa eskwelahan matag Miyerkules aron makaehersisyo kami og gamay pinaagi sa magkaubang paglangoy og balik-balik sa usa ka pool. Sa sinugdanan, wala ko malingaw niini. Ako gamay ra o walay atletik nga talento, ug miadto lang ko kay nagpasabot kini nga dili na ko kinahanglang mosakay sa bus pauli gikan sa eskwelahan.
Apan sa wala madugay nakaamgo ko sa mga benepisyo niining sinemana nga appointment. Ang akong mama mitudlo kanako unsaon sa pagpalig-on sa akong mga pangapay, unsaon sa pagpahiangay sa akong lawas diha sa tubig, ug kanus-a moginhawa. Akong nakaplagan ang usa ka makanunayon ug pinahimutang nga kapaspason samtang naglangoy ko.
Bira, bira, bira, ginhawa.
Unsay akong labing gibahandi, hinuon, mao ang dili mabalda nga panahon uban sa akong mama. Wala gayod ko mabalaka mahitungod sa pag-apas sa abilidad sa akong mas talentado nga mga higala o pag-ihap sa gidaghanon sa mga lap nga akong gilangoy. Ako lang ug ang akong mama nga nagpatas ang makanunayon ug pinahimutang nga kapaspason sa paglangoy.
Dili pa lang dugay, nagsugod ko sa paglangoy og usab. Sayon ra ang pagkat-on og usab sa makanunayon ug pinahimutang nga kapaspason sa paglangoy. Bira, bira, bira, ginhawa. Ang kalinaw sa kasinatian nabati nga pamilyar ug nahimong usa ka tambal alang sa akong kasagarang nataranta nga hunahuna. Akong nakaplagan nga pinaagi sa pagpangita og usa ka dapit diin dili kaayo ko makadungog sa kabanha sa palibot nako, ang akong mga hunahuna dili kaayo madani sa mga impluwensiya sa gawas.
Atol niining gipahinungod nga panahon sa akong kaugalinon, sa dihang dili ko kanunanyng mokuha sa akong phone o mokompleto sa mga butang sa akong lista sa mga buhatonon, akong nakita kon unsa ka bililhon ang usa ka malinawon nga kahimtang. Ang pagwagtang sa pipila sa sobra kaayo nga mga kabanha sa akong inadlaw-adlaw nga kinabuhi nakapahimo niining mas sayon gayod sa paghunahuna sa Langitnong Amahan ug kang Jesukristo.
Ug pinaagi sa makanunayon nga pagtinguha niini nga kahilom, nakahimo ko sa pagdapit og mas kanunay nga espirituhanon nga mga kasinatian sa akong kinabuhi. Ang pagpalong sa akong phone o pagbiya og kadiyot sa akong inadlaw nga mga buluhaton mao ang usa ka paagi sa akong pagsulti nga, “Langitnong Amahan, giandam nako ang akong kaugalingon aron mas magpaduol Kanimo. Andam ko nga maminaw.”
Sa daghang panahon, samtang maghulat ko ug maminaw, walay madungog nga tingog o gani usa ka piho nga hunahuna, apan hinuon usa ka pagbati sa kalinaw. Uban sa kalinaw moabot ang kainit, panagdait, ug usa ka kasuod sa Dios ug ni Jesukristo (tan-awa sa Salmo 46:10). Mabati nako nga napalig-on ang akong mga paningkamot nga mahimong mahiangay ngadto Kanila. Sa kataposan, ang pagtinguha sa dili mabalda nga hilom nga mga higayon nga sama niini mao ang mitugot kanako nga mobati nga duol sa akong Langitnong Amahan ug sa akong Manluluwas, si Jesukristo, aron makaila Kanila, ug aron maminaw Kanila.
Pagpaminaw sa Maayong Magbalantay
Latas sa katuigan akong nakat-onan ang pagpangita sa kalinaw sa Dios sa ubang mga paagi. Sa dakong bahin sa akong pagkahamtong, akong gitun-an ang mga painting, nga espesyal nga nagtutok niadtong adunay sagrado nga kinaiya. Akong nakaplagan ang daghang painting nga tingali dili makita nga relihiyoso ngadto sa kaswal nga tig-obserbar apan bisan pa niana sagrado alang kanako.
Usa ka yano nga painting sa usa ka magbalantay sa karnero nga naggiya sa usa ka panon sa karnero latas sa usa ka dapit nga natabonan og gabon mao ang usa niana nga painting. Ang pamilyar nga simbolo sa magbalantay sa karnero niini nga painting nagpahinumdom sa Juan 10:27: “Ang akong mga karnero mamati sa akong tingog. Nakaila ako kanila ug sila nagsunod kanako.”
Sama sa makadaghang gitudlo sa tibuok mga kasulatan, ang Langitnong Amahan midapit kanato sa pagpaminaw sa tingog sa Iyang Anak, si Jesukristo (tan-awa sa Mateo 17:5; 3 Nephi 11:7; Joseph Smith—Kasaysayan 1:17). Sukad nakakita niini nga painting sa unang higayon, kini nagsilbing usa ka pahinumdom kanako sa unsay mahimong ipasabot sa pagpaminaw sa tingog ni Jesukristo, ang Maayong Magbalantay, sa atong indlaw-adlaw nga mga kinabuhi.
Ang artist niini nga painting, si Granville Redmond, nabungol sa bata nga edad ug, isip resulta, nakapalambo og piho nga abilidad sa pagpinta og mga imahe nga sa usa ka paagi mabati nga hilom.
Sama lang nga ang artist nakamugna og sagrado ug makahuloganon nga palibot pinaagi niining mapadayagon nga painting nga walay mga pulong, mao usab ang Maayong Magbalantay nga makanunayong mamulong ngadto sa Iyang panon sa usa ka tingog nga wala gipamulong apan mabati—alang lamang niadtong adunay “mga dalunggan nga makadungog” (Mateo 13:9). Kini nga imahe, gipinta sa usa ka artist nga nakasabot og maayo sa bili sa pagkadili kalibotanon, mitudlo kanako sa gahom sa lahi nga matang sa pagpaminaw—dili sa pisikal nga gingharian, apan sa espirituwal. Dili sa tingog ngadto sa dalunggan, apan sa kalag ngadto sa kalag.
Usa ka suod nga higala ni Granville Redmond makausa misulti bahin kaniya: “Usahay ako makahunahuna nga ang kahilom diin siya nagpuyo nakaugmad diha kaniya og mga pagbati, mga dako nga kapasidad alang sa kalipay diin ang uban kanato nagkulang. Siya nagpinta og pag-inusara nga walay lain nga makapadayag, ug gani, pinaagi sa kahibulongan nga daw-sumpaki, ang iyang pag-inusara dili gayod kamingaw.”1
Samtang gikonsiderar nako kini nga painting latas sa katuigan, kini nakapasiugda og mga pagbati nga pamilyar sa unsay akong nasinati diha sa kakalma sa swimming pool, nagtinguha nga mobati nga duol sa Dios ug makadungog sa tingog sa Maayong Magbalantay. Niana nga pagtinguha akong nakaplagan nga ang akong personal nga mga hunahuna ug mga aksiyon naimpluwensiyahan pinaagi sa pagbati nga duol sa Langitnong Amahan ug ni Jesukristo, ug dili ko kinahanglang klaro nga makadungog sa Ilang mga tingog aron makabaton og usa ka espirituhanon nga kasinatian uban Kanila.2
Pagpangita og Kalinaw
Si Presidente Russell M. Nelson mitudlo: “Ang pagpaminaw usa ka mahinungdanon nga bahin sa pag-ampo. Ang mga tubag gikan sa Ginoo hilom gayod nga moabot. Mao nga Siya mitambag kanato nga ‘pagmalinawon ug hibaloi nga Ako mao ang Dios’ (D&P 101:16).”3
Ang mga paagi nga atong makaplagan nga mahimong malinawon ug maminaw alang sa tingog sa Ginoo mahimong lahi alang sa tanan. Ug akong nakaplagan nga, depende sa mga kahimtang sa akong kinabuhi, pipila sa mga pamaagi sa pagpangita og kalinaw mahimong mas angay kay sa uban.
Adunay mga higayon sa dihang nabati nako ang kalinaw pinaagi sa pagtanyag og kahupay ngadto sa usa ka nabalaka nga higala, pagpaminaw sa pagpamatuod sa usa ka minahal, o paglingkod uban sa akong mga sister diha sa usa ka klase sa Relief Society. Sa ubang mga higayon akong nakaplagan ang kalinaw pinaagi sa pagpayano sa akong puno ra kaayo nga eskedyul, paggahin og panahon sa gawas, o pagbukas sa akong mga kasulatan.
Kon maglingkod ko diha sa panagtigom alang sa sakramento ug makadungog sa kanaas sa mga tray ug mga cup ug sa dili mahimutang nga mga bata, ako nahupay sa katinuod nga bisan taliwala sa mga tawo palibot kanako, akong madirekta ang akong mga hunahuna sa kahiladman ug makigsulti sa Dios. Sama sa gipahayag ni Presidente Nelson, ako “[maka]pangita og kapahulayan gikan sa gikusgon, walay kasegurohan, ug kasakit niini nga kalibotan pinaagi sa pagbuntog sa kalibotan pinaagi sa [akong] mga pakigsaad uban sa Dios.”4
Kon ako maglingkod diha sa celestial nga lawak sa templo—bisan kon adunay daghang tawo didto o gamay ra—ako usab mahimong makigsulti sa Dios. Diha kini nianang sagrado nga mga luna nga ako labing makahinumdom nga dili magdali, maghilom, ug magmalinawon. Ug diha kini nianang sagrado nga mga luna nga mobati ako nga labing andam sa pagpahayag gayod sa akong gibati ngadto sa akong Amahan ug makadawat sa sagrado nga kalinaw nga Iyang gitagana alang kanako. (Tan-awa sa Mga Taga-Galacia 5:22–23.)
Pagpaduol ngadto sa Dios
Sa tibuok Niyang pangalagad, ang Manluluwas mipalayo sa Iyang Kaugalingon gikan sa nagkadaghang mga pundok sa Iyang mga disipulo. Diha sa hubad ni Joseph Smith sa Mateo, atong mabasa nga “si Jesus gigiyahan sa Espiritu, ngadto sa kamingawan, aron makig-uban sa Dios” (Hubad ni Joseph Smith, Mateo 4:1). Ang Manluluwas adunay balanse sa mga prayoridad sa Iyang kinabuhi, ug mapasalamaton ko nga nasayod nga taliwala sa Iyang mga milagro ug pagtudlo, migahin Siya og panahon nga mag-inusara uban sa Iyang Amahan.
Wala ko mahibalo kon unsa kaha ang gipakigbahin tali sa Balaang Amahan ug sa Anak niadto nga mga higayon, apan naningkamot ko nga magtinguha niadto nga mga kasinatian alang sa akong kaugalingon. Bisan kon adunay maayo nga butang nga nag-okupar sa akong bisi nga kinabuhi, gamay ra ang nagdapit og dugang nga espirituhanon nga mga kasinatian kay sa pagpangita og panahon nga magmalinawon ug mokonektar sa akong Amahan sa Langit.
Wala ko makahibalo nga sa elementarya pa ko nga sa dihang gidapit ko sa akong inahan nga molangoy uban kaniya matag semana, nagtudlo usab siya kanako kon unsaon sa pagtinguha sa kalinaw ug pagpaminaw sa tingog sa Maayong Magbalantay. Samtang nagdako ko ug nagbansay sa pagtinguha og mga panahon ug mga dapit sa pagpakigsulti sa Dios, mas nakaamgo ko nga ang Dios kanunay nga anaa ug mahinamon nga naghulat kanako nga mas magpaduol ngadto Kaniya.
Ang paggahin og panahon nga makanunayong makigsulti sa Dios mao ang usa ka oportunidad alang kanato nga maminaw sa tingog sa Iyang Hinigugmang Anak. Ug samtang magtinguha kita sa atong Langitnong Amahan ug ni Jesukristo, kita makadawat gikan Kanila og panagdait, kakalma, ug direksiyon. Adunay tam-is nga mga kasinatian nga anaa alang kanato kon kita mopalayo sa atong kaugalingon gikan sa kalibotan. Ug akong nakaplagan nga kon mas buhaton nako, mas mabati nako ang kalinaw sa Dios.