Ilha Nga ang Pagpadayag usa ka Proseso

Kini sayon ang paghanduraw nga kon ang Dios gusto nga mosulti og usa ka butang, Siya mokab-ot lamang ngadto sa mga lider sa Simbahan sa pagpahibalo kanila. Ang kasaysayan sa Pagpahiuli nagpakita nga ang pagpadayag usa ka proseso sa pagtinguha nga mahibalo sa kabubut-on sa Dios ug sa labing kasagaran madawat human ang pagpamalandong ug pagpangamuyo. Kini tinuod alang sa mga propeta ug alang sa matag usa kanato. Si Presidente Russell M. Nelson miaghat kanatong tanan nga “palapdan pa ang [atong] kasamtangang espirituwal nga abilidad sa pagdawat og personal nga pagpadayag.”¹

Ania ang pipila ka baroganan nga motabang kanimo samtang ikaw nagtuon sa proseso sa pagpadayag, diha sa Simbahan ug sa imong kaugalingong kinabuhi:

Hinumdomi nga ang pagpadayag kasagaran nagsugod sa mga pangutana. Ang ehemplo ni Joseph Smith nagpakita nga ang atong kabubut-on ug sinsero nga mga pangutana adunay importanting tahas diha sa proseso sa pagpadayag. Hapit tanan nga seksiyon sa Doktrina ug mga Pakigsaad miabot agi og tubag ngadto sa usa ka pangutana. Gitudloan sa Ginoo si Joseph sa pagtuon sa mga butang diha sa iyang hunahuna ug sa pagpaninguha sa espiritu sa pagpadayag. Ang proseso sa pag-atubang og mga problema, pagpaninguha sa pagsabot, pagsulay og lainlaing posible nga mga tubag, ug sa pag-ampo alang sa paggiya nag-andam sa atong mga kasingkasing ug nag-abli sa atong mga hunahuna. Kini nagtabang kanato sa pagdawat, pagsabot, ug sa paglihok diha sa pagpadayag.
Ilha nga ang pagpadayag moabut pagtulon-an human sa usa ka pagtulon-an. “Mga saksi kita sa proseso sa pagpahiuli,” sumala sa gisulti ni Presidente Russell M. Nelson. “Kon maghunahuna kamo nga hingpit na nga napahiuli ang Simbahan, ang sinugdanan pa lamang ang inyong nakita.”² Kini usa ka buhi nga Simbahan. Samtang ang mahinungdanon nga mga kamatuoran sa ebanghelyo dili mangausab, ang mga palisiya sa Simbahan, mga programa, mga organisasyon, ug mga pagtulon-an napadayag nga pagtulon-an human sa usa ka pagtulon-an. Ug ang proseso nagpadayon. Kita dili kanunay nga makakita sa kataposan gikan sa sinugdanan, apan kita makasalig nga ang kabubut-on sa Ginoo mopadayon sa pagbuhat diha sa Iyang mga anak sa pagdala kanila og dugang pa nga kahayag.
Hinumdomi nga ang Dios nakigsulti kanato sumala sa atong pagsabot. Ang tanang tawhanong mga binuhat gihulma pinaagi sa kultura: ang mga tinuohan, mga kinaiya, mga pinulongan ug mga mithi nga atong gipakigbahin. Ang kultura dako kaayo og kalainan gikan sa usa ka lugar ngadto sa laing lugar ug sa dugay nga panahon. Ang pagkaandam sa Dios sa paghatag og pagpadayag nga nagsulti kanato sulod sa atong mga kultura ug sumala sa atong pagsabot usa ka maanindot nga kamatuoran sa Pagpahiuli. Ang paghinumdom niini makatabang kanato sa pagduol sa mga kasulatan ug sa mga pulong sa nangaging mga propeta uban ang pagkamapainubsanon. Ang Dios nakigsulti ngadto sa karaang mga Israelita sumala sa ilang karaang duol sa Silangan nga pagsabot. Nakigsulti Siya ngadto ni Joseph Smith nga naggamit og mga simbolo ug pinulongan gikan sa iyang mga 1800 nga Amerikanong kultura. Ug ang Dios nakigsulti kanato karon sumala sa atong kaugalingong limitado nga kasarang sa mga paagi nga kita makasabot.
Pagmatinud-anon ug tuo. Kasagaran ang mga Santos sa Ulahing mga Adlaw nagpahayag “Ako nahibalo” kon sila makigbahin sa ilang mga pagpamatuod. Kining kinasingkasing nga mga panultihon naghulagway og personal espirituwal nga mga kasinatian nga nakuha pinaagi sa pagtuon ug sa pagpuyo sa ebanghelyo. Apan tanan kita naglakaw niini nga kinabuhi pinaagi sa hugot nga pagtuo. Si Jesukristo nangayo lamang kanato sa pagsugod pinaagi sa pagtuo. Kini Ok lang kon ikaw adunay mga pagduhaduha. Kini OK lang kon karon ang tanan nga ikaw aduna mao ang tinguha sa pagtuo. Sama sa amahan kinsa mihangyo ni Jesus sa pag-ayo sa iyang anak ikaw makasulti, “Ginoo, ako nagtuo; tabangi ang akong pagkadili matuohon.”³
Hinumdomi nga ang tanang butang nga maayo nagagikan sa Dios. Sa dihang si anghel Moroni mipakita ngadto ni Joseph Smith, iyang gisulti ang propesiya ni Joel nga ang Ginoo mobu-bu sa Iyang Espiritu diha sa tanang tawo sa kataposang mga adlaw.⁴ Samtang adunay daghang kadaotan sa kalibotan, kini puno usab sa kamaayo ug sa kamatuoran. Kini naglakip sa mga pag-uswag sa siyensya ug medisina ug mga paningkamot sa pagdugang og respeto alang sa mga tawo. Ang mga lider sa Simbahan nakatudlo nga ang Dios nakigsulti ngadto sa mga indibidwal sa matag kultura. Sama lamang nga kita nagdapit sa uban sa pagpakig-uban kanato ug sa “pagdala uban kaninyo sa tanan nga maayo nga kamo aduna,” atong gidawat ang kamatuoran bisan asa kita makakaplag niini.⁵
Hibaloi nga ang pagbaton og pagpadayag makahimo og pakigbisog. Samtang ang mga tubag sa atong mga pangutana usahay dali ug sayon nga moabot, ang pagpadayag mokabat usab og mga tuig sa pagtrabaho. Ang atong sitwasyon sa kinabuhi makahimo og hinungdan kanato sa pakigbisog kon kita nagtinguha og personal nga pagpadayag. Sama pananglit, ang ubang mga tawo nagsinati og mga sakit sama sa depresyon nga naghimo niini nga mas malisod sa pagbati nga naduol sa Dios. Makahimo kita sa atong bahin sa pagtubag niini nga mga hagit samtang nagpadayon sa pagsalig nga ang Ginoo motabang kanato sa pagkaplag og kalinaw. Tungod lamang kay ikaw wala makadawat og mga tubag gikan sa Dios wala magpasabot nga ikaw naghimo og usa ka butang nga sayop. Pagmapailubon ug palamboa ang imong hugot nga pagtuo samtang naghulat ka sa Ginoo.
Padayon sa pagtinguha og pagpadayag. Samtang ikaw nangita alang sa kalinaw kalabot ngadto sa imong mga pangutana, padayon sa pagbuhat sa mga sukaranan: pag-ampo, pagtuon sa mga kasulatan, pag-ambit sa sakramento, paningkamot sa pagsunod sa mga sugo, ug pagsimba ngadto sa templo. Agi og dugang, ikaw makapaningkamot og kasuod ngadto sa Ginoo pinaagi sa pagserbisyo sa uban diha sa imong pamilya, kongregasyon, o komunidad; pinaagi sa paggahin og panahon sa kinaiyahan, o pinaagi sa pagpamalandong sa espirituhanong mga butang. Ang mas magpaduol ngadto sa Dios motabang sa pagsiguro nga ang mga agianan sa pagpadayag magpabilin nga bukas.

Importanting mga kasulatan: Santiago 1:5–6; 2 Nephi 28:30; 31:3; Alma 5:45–47; Doktrina ug mga Pakigsaad 1:24; 88:63