“Isentro ang Imong Kinabuhi diha ni Jesukristo,” Mga Hilisgotan ug mga Pangutana (2023)

Pagpangita og mga Tubag sa Imong mga Pangutana

Isentro ang Imong Kinabuhi diha ni Jesukristo

Ang hugot nga pagtuo diha ni Jesukristo importante sa atong pagpangita sa mga tubag ngadto sa labing mahagitong mga pangutana sa kinabuhi. Kita kasagaran naghunahuna sa hugot nga pagtuo isip usa ka lig-on nga tinuohan. Apan ang hugot nga pagtuo mas labaw pa kay sa tinuohan. Kini naglakip sa pagsalig, pagkamasaligon, ug pagkamaunungon. Kon kita adunay mahagiton nga mga pangutana o mga kabalaka, kita sa kanunay makaduol ngadto ni Jesukristo. Ang atong hugot nga pagtuo motubo samtang kita maminaw ngadto sa Iyang mga pulong, mosunod sa Iyang mga pagtulon-an, ug maninguha sa paghigugma sa uban sa paagi nga Siya nahigugma.

Gitudlo ni Presidente Russell M. Nelson nga “ang kalinaw mahimong moabot sa inyong kalag samtang nag-ugmad kamo og pagtuo diha sa Prinsipe sa Kalinaw.”¹ Ania ang pipila ka butang nga hinumdoman:

Si Jesukristo mao ang malig-on nga tukoranan alang sa atong hugot nga pagtuo. Sa atong inadlaw nga mga kinabuhi, atong gibutang ang atong hugot nga pagtuo diha sa daghang mga tawo ug mga institusyon. Kini naglakip sa mga sakop sa pamilya, mga higala, mga gobyerno, ug mga agalon. Apan si Jesukristo mao lamang ang tawo nga kita hingpit nga makasalig sa atong paglaom alang sa kalinaw ug kaluwasan. Ang Simbahan gitukod sa pagdala sa mga tawo ngadto Kaniya. Ikaw hingpit nga makasalig ni Jesukristo, bisan kon ikaw nanlimbasog sa ubang mga bahin sa imong hugot nga pagtuo.
Si Jesukristo adunay hingpit nga pagsabot. Ang atong labing malisod nga mga pagsulay mas makapaduol kanato ngadto sa Manluluwas. Walay usa gawas ni Kristo ang makahimo og hingpit nga pagsabot sa atong mga pagpanglimbasog. Mihilak siya uban niadtong Iyang giserbisyohan. Misinati Siya og kamingaw, kasakit sa espiritu, ug gani ang pagpahawa sa presensya sa Iyang Amahan. Ikaw makadangop ngadto Kaniya ug makakaplag sa pagsabot ug kapuangod.
Ang plano sa Dios sa kaluwasan naghatag og panglantaw. Kadaghanan sa atong mga pangutana makita nga lahi kon kita nagbutang sa plano sa Langitnong Amahan sa hunahuna. “Tungod sa atong kahibalo niini nga plano,” gitudlo ni Presidente Dallin H. Oaks, “nagsugod kita sa managlahing mga pangagpas kaysa niadtong kinsa wala makigbahin sa atong kahibalo. Isip usa ka resulta, atong nakab-ot ang lainlaing mga panapos sa daghang importante nga mga hilisgotan.”² Ang pag-eksamen sa atong mga pangutana uban sa plano sa kaluwasan nga anaa sa hunahuna makatabang kanato sa pagkakita sa atong mga kabalaka uban sa mahangturon nga panglantaw.
Adunay nag-una ug ikaduha nga mga pangutana. Usahay kita adunay mga pangutana o mga kabalaka kalabot ngadto sa makasaysayanong mga hitabo, mga pagtulon-an ug mga palisiya sa Simbahan, o tawhanong mga kapakyasan. Ang pagkaplag og kalinaw uban sa maong mga pangutana angay sa atong matinuorong paninguha. Apan importante kini sa pag-ila sa kinauyokan nga mga kamatuoran sa ebanghelyo gikan sa mga butang nga dili ingon ka mahinungdanon. Gitudlo ni Joseph Smith nga “ang tanang uban nga mga butang mga sumpay lamang” ngadto sa mga kamatuoran nga naglibot sa makaluwas nga misyon sa Manluluwas.³
Pilia ang hugot nga pagtuo. Ang pagbaton og espirituhanong kahibalo nagkinahanglan nga “kita magakinabuhi man pinaagi sa pagtuo, dili pinaagi sa atong makita.”⁴ Kon kita maghulat hangtod kita adunay makita nga kalig-onan sa espirituhanong mga butang, kita dili gayod makasugod sa proseso sa pagpalambo og hugot nga pagtuo diha ni Jesukristo. Gitudlo ni Elder Dale G. Renlund, “Aron molambo ang hugot nga pagtuo, ang tawo kinahanglan gayod mopili sa pagbaton og hugot nga pagtuo. Ang usa ka tawo kinahanglan gayod magtinguha nga makabaton og hugot nga pagtuo. Ang usa ka tawo kinahanglan gayod molihok diha sa hugot nga pagtuo.”⁵
Magpabiling tinuod sa unsay imong nahibaloan. Kon gibati nimo ang pagduha-duha sa imong pagtuo, “panggunit og hugot sa unsay inyo nang nahibaloan,” tambag ni Elder Jeffrey R. Holland, “ug barog nga malig-on hangtod dugang nga kahibalo moabot.”⁶ Salig sa imong nanglabay nga espirituhanong mga kasinatian. Kini mga ebidensiya nga ang Dios nagganti sa imong hugot nga pagtuo diha ni Jesukristo uban sa espirituhanong pasalig.

Importanting mga kasulatan: Mga Taga-Roma 8:35, 37–39; 2 Nephi 4:34–35; Mosiah 4:9; Helaman 5:12