“Pakisayod sa Kasaligan nga mga Tinubdan,” Mga Hilisgotan ug mga Pangutana (2023)

Imahe

batang babaye ug batang lalaki nagbasa sa mga kasulatan

Pagpangita og mga Tubag sa Imong mga Pangutana

Pakisayod sa Kasaligan nga mga Tinubdan

Si Elder F. Uchtdorf mitudlo, “Wala pa sukad sa kasaysayan sa kalibotan nga aduna kitay mas sayon nga paggamit sa daghang impormasyon—ang uban niini tinuod, ang uban dili tinuod, ug ang kadaghanan tinuod sa ubang bahin.”¹ Niini nga kahimtang sa walay kasigurohan, ang Simbahan nag-aghat sa mga miyembro nga “mangita ug mopaambit lamang sa katuohan, kasaligan, ug tinuod nga mga tinubdan sa impormasyon.”² Kinahanglan kita nga molikay sa mga tinubdan nga nagagikan sa tabi-tabi o kana nga mopalambo og panagbingkil o kasuko.

Ang pagkat-on sa paghatag og bili sa kalidad sa atong mga tinubdan sa impormasyon naglakip sa espirituhanon ug intelektuwal nga buhat. Ania ang pipila ka mga giya alang sa pagtimbang-timbang sa impormasyon:

Timbang-timbanga ang pagkamasaligan sa mga tinubdan. Dili tanan nga mga tinubdan mga managsama og bili sa tanang mga hilisgotan. Ang labing maayo nga tinubdan adunay direkta nga kahibalo sa usa ka hilisgotan kaysa mosalig sa hungihong, tabi-tabi, o pasumbingay. Sila mosulti gikan sa usa ka kahimtang o direkta nga kahibalo o kahanas. Sila mopakisayod ngadto sa ubang masaligan nga mga tinubdan aron ikaw makasusi sa ilang mga pangangkon. Ang kasaligan nga mga tinubdan dili sa kanunay mopanghimatuod sa unsay imo nang gihunahuna. Kini mahimong mohagit sa imong mga panghunahuna. Kon ikaw adunay mga pangutana mahitungod sa opisyal nga mga pagtulon-an sa Simbahan, tan-awa una ang unsay gikasulti ug wala gikasulti sa karon nga mga lider sa Simbahan. Kini motabang kanimo sa pagtimbang-timbang sa uban, sa nag-una nga mga pahayag.
Pagkat-on sa pag-ila og pagdapig. Hapit tanan nga mga tinubdan adunay pipila ka mga pagdapig. Kini dili dihadiha dayon maghimo niini nga dili kasaligan, apan importante nga mahibalo sa panan-aw sa tigmugna sa tinubdan. Susiha ang mga motibo ug kaagi sa imong tinubdan. Pagmabinantayon sa mga tinubdan nga nag-angkon og walay pagdapig o niana nga nagpahayag og mga hunahuna sa mga paagi nga makapainit.
Ipanghimatuod ang unsay imong nakat-onan. Kini mahinungdanon kon lainlaing masaligan nga mga tinubdan nagkauyon o nagsulti uban ang katin-aw sa usa ka hilisgotan. Kini ilabi nga tinuod kon nagtuon sa mga tinubdan nga naghisgot sa kasaysayan ug mga pagtulon-an sa Simbahan. Bisan tuod kini dili kanunay nga mahimo sa pagkaplag niini nga matang sa pag-uyon taliwala sa mga tinubdan, kini makatabang sa pagtandi og impormasyon gikan sa lainlaing mga tinubdan aron ikaw mas makahatag og bili sa ilang kalidad.
Ilha ang mga tinuod gikan sa interpretasyon. Ang pipila ka mga tipik sa impormasyon mga tinuod. Apan kadaghanan sa atong makita diha sa internet ug sa ubang mga pagmantala naglangkob og interpretasyon sa usa ka tawo sa mga tinuod. Ang labing maayo nga interpretasyon naninguha sa pagsaysay alang sa tanang mga tinuod. Sila naghunahuna sa piho nga mga detalye o mga tinuod diha sa mas lapad nga kinatibuk-ang kahulogan ug naghatag niini og angay nga gibug-aton. Dili nila isalikway ang impormasyon nga wala mouyon sa usa ka piho nga punto sa panghunahuna. Susiha ang mga tinubdan nga gigamit sa paghimo og piho nga interpretasyon sa pagsiguro nga kini nagsuporta sa mga pangangkon nga gihimo ug wala usba ang kahulogan niini.
Pagsinati sa mga kapanguhaan sa Simbahan. Sa mga butang kalabot sa doktrina ug palisiya sa Simbahan, ang labing maayo nga mga tinubdan mao ang mga kasulatan, ang mga pagtulon-an sa buhi nga mga propeta, ug ang Kinatibuk-ang Tamdanan nga Basahon. Ang Simbahan nakamantala usab og dugang nga mga kapanguhaan sa pagtabang kanimo nga mas mamaayo ang pagsabot sa uban nga labing yano nga mga pangutana nga aduna ang Mga Santos sa Ulahing mga Adlaw mahitungod sa kasaysayan ug kultura sa Simbahan. Makaplagan nimo kini nga mahimong mapuslanon nga mga punto sa pagsugod samtang ikaw magduki-duki sa imong mga pangutana.
Tinguhaa ang giya sa Espiritu Santo. Ang bag-o nga impormasyon makahimo usahay nga makalibog. Kana nga pagbati wala magpasabot nga ang impormasyon dili tinuod. Kauban sa mga kahanas nga gihisgotan sa ibabaw, tinguhaa ang impluwensiya sa Espiritu Santo. Makatabang Siya kanimo sa pag-ila sa kamatuoran. Siya “molamdag sa imong panghunahuna”³ ug motabang kanimo sa pag-usab sa imong panan-aw diha sa kahayag sa bag-ong mga kamatuoran. Pag-ampo alang sa tabang. Pagpuyo sa paagi nga ang Espiritu makasulti nganha kanimo. Himoang bukas ngadto sa espirituhanong mga pag-aghat samtang ikaw nagbuhat sa pagsulbad sa imong mga kabalaka.

Importanting mga kasulatan: 2 Timoteo 3:14–16; Jacob 4:13; Doktrina ug mga Pakigsaad 19:38