“Dios nga Amahan,” Mga Hilisgotan ug Mga Pangutana (2023)
Giya sa Pagtuon sa Ebanghelyo
Dios nga Amahan
Ang Amahan sa atong mga espiritu, kinsa hingpit nga nahigugma sa matag usa kanato
Ang basahon sa Pinadayag naghulagway sa Dios nga naglingkod sa usa ka trono sama sa usa ka hari (tan-awa sa Pinadayag 3:21; 4:2, 10; 5:1). Apan makahunahuna usab kita Kaniya sa personal nga paagi. Isip atong mahigugmaong Langitnong Amahan, Siya nagpakabana gayod kanato: atong mga pagbati, atong mga kasinatian, atong mga paglaom, ug atong mga damgo. Ang mga sakop sa Korum sa Napulog Duha ka Apostoles misulat: “Importante nga sa tanan nga mga titulo sa pagtahod ug pasidungog ug pagdayeg nga gihatag sa [Dios], Siya naghangyo kanato sa pagtawag Kaniya isip Amahan.”
Kinsa Ang Langitnong Amahan?
Ang Dios nga Amahan mao ang Labing Gamhanang Binuhat nga atong gituohan, atong gisimba, ug atong giampo. Siya mao ang tagsulat sa plano sa kaluwasan ug kahimayaan. Ang Dios mao ang Amahan sa atong mga espiritu ug nahigugma kanato. Ang Iyang buhat ug himaya mao “ang pagpahinabo sa pagka-imortal ug kinabuhi nga dayon sa tawo” (Moises 1:39). Siya hingpit, aduna sa tanang gahom, ug nakahibalo sa tanang mga butang. Siya “adunay lawas nga unod ug mga bukog nga mahikap ingon sa tawo” (Doktrina ug mga Pakigsaad 130:22).
Kinatibuk-ang pagpasabot sa hilisgotan: Dios nga Amahan
May kalabotan nga mga giya sa pagtuon sa ebanghelyo: Dios nga Kapangulohan, Mga Anak sa Dios, Kinabuhi sa Wala pa Dinhi sa Yuta, Mosimba sa Dios nga Amahan, Kinabuhing Dayon
Seksiyon 1
Kita Makaila sa Dios
Sa gabii sa pag-antos sa Manluluwas didto sa Getsemani, si Jesukristo nag-ampo ngadto sa Langitnong Amahan: “Ug ang kinabuhing dayon mao kini, ang ilang pagpakaila kanimo nga mao ang bugtong tinuod nga Dios, ug kang Jesukristo nga imong pinadala” (Juan 17:3). Tungod kay ang Dios nahigugma kanato, Siya nagdapit kanato sa pag-ila Kaniya aron kita makapanunod sa kinabuhing dayon. Kon mas magkat-on kita kon unsa ang Langitnong Amahan, mas gusto nato nga mahimong sama Kaniya.
Mga butang nga angay hunahunaon
-
Unsa ang imong nahibaloan mahitungod sa Langitnong Amahan? Mahimo nimong tun-an ang pipila o ang tanan sa mosunod nga mga kasulatan, nga mangita sa mga butang nga gipadayag mahitungod Kaniya:
-
Si Ginoong Jesukristo miingon, “Ako mao ang dalan, ang kamatuoran, ug ang kinabuhi: walay bisan kinsa nga makaadto sa Amahan, gawas kon pinaagi kanako” (Juan 14:6), ug, “Dali ug sunod kanako” (Mateo 19:21). Unsa ang gitudlo niini nga mga tudling nga makatabang nimo sa imong paningkamot aron masayod sa Dios nga Amahan?
Kalihokan alang sa pagkat-on uban sa laing tawo
-
Bisan ang gagmay nga mga bata mahimong makaila sa Dios nga Amahan ug mobati og kasuod uban Kaniya. Mahimo mong manganta og mga awit sama sa “Ako Anak sa Dios” (Mga Himno, nu.189), “Ako Nasayud Akong Amahan Buhi” (Mga Himno, nu. 190), o “Tudloi Ko Paglakaw sa Kahayag” (Mga Himno, nu. 192). Dayon hisgoti kon unsay ilang nakat-onan mahitungod sa Langitnong Amahan gikan niini nga mga kanta.
Pagkat-on pa og dugang
-
“Dios ang Amahan sa Kahangturan,” Mga Pagtulun-an sa mga Presidente sa Simbahan: Joseph Smith (2007), 43–51.
-
Jeffrey R. Holland, “Ang Kahalangdon sa Dios,” Liahona, Nob. 2003, 70–73
Seksiyon 2
Kitang Tanan Espiritu nga Anak nga mga Lalaki ug Anak nga mga Babaye sa Dios
Bisan og adunay dakong pagkadaiya sulod sa tawhanong pamilya, usa ka makapahiusa nga kamatuoran mao nga kitang tanan mga anak sa usa ka mahigugmaong Langitnong Amahan (tan-awa sa Mga Hebreohanon 12:9). “Ang tanan nga mga tawo—lalaki ug babaye—gilalang diha sa panagway sa Dios. Ang matag usa hinigugmang espiritu nga anak nga lalaki o babaye sa langitnong mga ginikanan, ug, sa ingon, ang matag usa adunay mga kinaiya sa pagkadios ug kalagmitan nga mahimong usa ka dios” (“Ang Pamilya: Usa ka Pamahayag ngadto sa Kalibotan,” Librarya sa Ebanghelyo).
Gusto sa Dios nga ang matag usa sa Iyang mga anak makabaton og malungtaron nga kalipay niini nga kinabuhi ug makadawat sa panalangin sa pagpuyo uban Kaniya hangtod sa kahangtoran.
Mga butang nga angay hunahunaon
-
Ang Dios nagtanyag og buhong nga gisaad nga mga panalangin ngadto sa mga matinud-anon nga labaw pa sa atong abilidad sa pagsabot (tan-awa sa 1 Mga Taga-Corinto 2:9–10). Siya mipakigbahin og daghang detalye mahitungod niini nga mga panalangin diha sa mga kasulatan. Mahimo nimong tun-an ang Doktrina ug mga Pakigsaad 76:50–70 ug pangitaa ang pipila sa mga panalangin nga naghulat niadtong kinsa nagsunod sa Dios.
-
Ikonsiderar ang pagtan-aw sa “Earthly Father, Heavenly Father” (3:59). Sa unsang paagi ang atong mga tahas sa pamilya dinhi sa yuta makahatag kanato og gamay nga panglantaw kon unsa ang gusto sa Dios nga kita mamahimo?
Kalihokan alang sa pagkat-on uban sa laing tawo
-
Tun-i ang Genesis 1:26–27. Unsa man ang atong pagkasusama sa Dios? Nganong makatabang ang pagkahibalo dili lang nga kita espiritu nga mga anak sa Dios apan usab nga ang atong pisikal nga mga lawas gilalang sa Iyang panagway?
Seksiyon 3
Makapalig-on Ka sa Imong Relasyon ngadto sa Langitnong Amahan
Kasagaran, kon gusto nato nga mobati nga mas duol sa mga sakop sa pamilya o mga higala, atong buhaton ang mga butang uban kanila sama sa pag-istoryahanay, paggahin og panahon nga magkauban, ug pagsabot kanila. Gusto sa Langitnong Amahan nga magpaduol kita ngadto Kaniya—ug gusto Siya nga mahimong suod nato. Ang Iyang imbitasyon kanato mao kini: “Paduol ngari kanako ug Ako mopaduol nganha kaninyo” (Doktrina ug mga Pakigsaad 88:63). Hunahunaa kon unsay ipasabot nga ang labing gamhanang Binuhat sa uniberso gustong makig-istorya kanato ug makigsuod kanato.
Ang panumdoman sa atong kinabuhi sa wala pa dinhi sa yuta uban sa Dios gikuha gikan kanato. Apan gipasabot ni Presidente Ezra Taft Benson nga “wala kitay mas labawng kahadlokan kon motabok na kita sa tabil kay sa kahibalo kon nakaila ba gayod kita sa atong Amahan [sa Langit] ug kon pamilyar ba gayod nato ang Iyang panagway.”
Mga butang nga angay hunahunaon
-
Adunay daghang mga paagi diin kita makasugod ug makapalig-on sa atong relasyon ngadto sa Langitnong Amahan. Mahimo nimong sulayan ang pipila ka mga ideya nga gitudlo niini nga mga tudling sa kasulatan:
Kalihokan alang sa pagkat-on uban sa laing tawo
-
Ikonsiderar ang paghangyo sa uban sa pagpangita og usa ka butang diha sa lawak nga nagrepresentar sa usa ka butang nga makapalig-on sa atong relasyon ngadto sa Langitnong Amahan. Hangyoa sila sa pagpakigbahin kon unsay ilang nakit-an ug unsay girepresentar niini. Hisgoti og dungan ang usa ka butang nga kamo tanan makahimo nga makapaduol ninyo ngadto sa Dios.
Pagkat-on pa og dugang
-
Dale G. Renlund, ““Nga Ako Unta Makadala sa Tanan nga mga Tawo ngari Kanako”,” Liahona, Mayo 2016, 39–42
-
Neill F. Marriott, “Pagpuyo diha sa Dios ug Paghulip sa Kal-ang,” Liahona, Nob. 2017, 10–12