Librarya
Dios nga Kapangulohan

“Dios nga Kapangulohan,” Mga Hilisgotan ug Mga Pangutana (2023)

Imahe
Langitnong Amahan ug si Jesukristo

Giya sa Pagtuon sa Ebanghelyo

Dios nga Kapangulohan

Pagtuo ngadto sa Dios ang Amahan; sa Iyang Hinigugmang Anak, si Jesukristo, ug sa Espiritu Santo

Kon moingon ang mga tawo, “Nagtuo ako sa Dios,” unsa man ang ilang gipasabot? Tingali nagpasabot sila og daghang lainlaing butang.

Isip Mga Santos sa Ulahing mga Adlaw, “kami nagtuo sa Dios, ang Amahan sa Kahangtoran, ug sa Iyang Anak, si Jesukristo, ug sa Espiritu Santo” (Mga Artikulo sa Hugot nga Pagtuo 1:1). Gitawag nato kini nga pamahayag nga unang artikulo sa atong pagtuo—una tungod kay ang pagsabot niining tulo ka balaan nga binuhat mao ang unang lakang sa pagsabot kon kinsa kita, nganong anaa kita, ug unsa kita mamahimo.

Unsa ang Dios nga Kapangulohan?

Ang Dios nga Kapangulohan naglangkob sa tulo ka balaan nga binuhat: Ang Langitnong Amahan, si Jesukristo, ug ang Espiritu Santo. Bisan managlahi nga mga personahe, Sila magtinabangay sa hingpit nga panaghiusa sa pagpanalangin ug pagbayaw sa mga anak sa Langitnong Amahan.

Kinatibuk-ang pagpasabot sa hilisgotan: Dios nga Kapangulohan

May kalabotan nga mga giya sa pagtuon sa ebanghelyo: Dios nga Amahan, Jesukristo, Espiritu Santo

Seksiyon 1

Sa unsang paagi ang Dios nga Kapangulohan Gihulagway diha sa mga Kasulatan

Imahe
Si Juan Bautista nga nagbunyag ni Jesukristo

Ang Dios nga Amahan, si Jesukristo, ug ang Espiritu Santo gusto nga ikaw masayod bahin Kanila. Dili Nila gusto nga morag layo o misteryoso. Ilang gipadayag ang importante nga mga kamatuoran, pinaagi sa mga kasulatan ug mga pagtulun-an sa ulahing adlaw nga mga propeta, aron matabangan ka nga mas masayod bahin Kanila. Agig dugang, ang Dios nagdapit kanato nga moduol ngadto Kaniya sa tagsa-tagsa ug masayod bahin Kaniya pinaagi sa personal nga mga kasinatian uban Kaniya. Sa gisulti ni Jesus sa usa ka pag-ampo ngadto sa Dios nga Amahan alang sa Iyang mga sumusunod, “Ug ang kinabuhing dayon mao kini, ang ilang pagpakaila kanimo nga mao ang bugtong tinuod nga Dios, ug kang Jesukristo nga imong pinadala”(Juan 17:3).

Mga butang nga angay hunahunaon

  • Sulayi sa pag-usisa sa mga tudling sa kasulatan nga naghisgot og daghang mga sakop sa Dios nga Kapangulohan—pananglitan, Mateo 3:16–17; 17:5; Juan 5:19; 14:6–10, 26; Mga Buhat 7:55–56; 3 Nephi 11:10–11, 25–27, 35–36. Unsa ang gipadayag sa mga tudling sama niini mahitungod sa mga sakop sa Dios nga Kapangulohan? Unsay imong nakat-onan mahitungod sa Ilang relasyon sa matag usa?

  • Ang Dios mipadayag og importanteng mga kamatuoran mahitungod sa Dios nga Kapangulohan sa atong panahon pinaagi ni Propeta Joseph Smith. Pananglitan, basaha ang Joseph Smith—Kasaysayan 1:13–17 uban niini nga pangutana sa hunahuna: Unsa ang gipadayag sa kasinatian ni Joseph mahitungod sa Dios nga Kapangulohan?

  • Mahimo usab nimong basahon kon unsa ang gitudlo ni Propeta Joseph mahitungod sa Dios nga Kapangulohan sa Doktrina ug mga Pakigsaad 130:22. Kini nga mga pagtulun-an lahi sa importante nga mga paagi sa unsay gitudlo sa tradisyonal nga Kristiyanismo. Hunahunaa kon nganong ang mga kamatuoran nga sama niining Dios nga Kapangulohan bililhon kanimo.

Kalihokan alang sa pagkat-on uban sa laing tawo

  • Mahimo nimong basahon ang Doktrina ug mga Pakigsaad 130:22 sa uban ug tan-awon ang litrato sa Unang Panan-awon ni Joseph Smith. Hisgoti og dungan kon unsay gitudlo sa bersikulo ug unsay nakita sa tanan diha sa litrato. Ipunting ang atensiyon ngadto sa kamatuoran nga ang Langitnong Amahan ug si Jesukristo adunay mga lawas nga sama sa atoa—kita gilalang sa Ilang panagway!

Imahe
Si Jesukristo ug ang Langitnong Amahan nagpakita ngadto kang Joseph Smith

Pagkat-on pa og dugang

Seksiyon 2

Nagkahiusa sa Pagpanalangin Kanato

Bisan tuod adunay tulo ka managlahi nga mga sakop sa Dios nga Kapangulohan, Sila “usa ka Dios” sa diwa nga Sila hingpit nga nahiusa sa katuyoan. Ug unsa man kana nga katuyoan? Ang Langitnong Amahan miingon, “Mao kini ang akong buhat ug ang akong himaya—ang pagpahinabo sa pagkaimortal ug sa kinabuhi nga dayon sa tawo” (Moises 1:39). Sa laing pagkasulti, ang Langitnong Amahan, si Jesukristo, ug ang Espiritu Santo magtambayayong sa pagtuman sa plano sa kaluwasan ug kahimayaan. Matag usa adunay piho nga tahas nga pagahimoon niana nga plano, apan ang Ilang tumong pareho ra—aron tabangan ka nga makabalik sa pagpuyo uban ang Dios pag-usab.

Mga butang nga angay hunahunaon

Kalihokan alang sa pagkat-on uban sa laing tawo

  • Mahimo nimong ihulagway ang panaghiusa sa Dios nga Kapangulohan ngadto sa usa ka lingkoranan nga adunay tulo ka tiil, usa ka tripod, o bisan unsa nga lig-on ug magamit tungod kay aduna kini mga tiil. O mahimo nimong ikonsiderar kon sa unsang paagi ang mga sakop sa koponan o orkestra nga magtinabangay aron matuman ang usa ka tumong. Makahunahuna kita nila isip usa ka lingkoranan, usa ka koponan, o usa ka orkestra—sama sa Dios nga Kapangulohan nga usa ka Dios—nga ang matag sakop nagtuman og lainlaing tahas ug nagtrabaho sa uban diha sa panaghiusa.

Pagkat-on pa og dugang

Iprinta