Librarya
Espiritu Santo
Imahe
babaye nga naglakaw sa gawas

Giya sa Pagtuon sa Ebanghelyo

Espiritu Santo

Usa ka mensahero ug saksi sa atong Langitnong Amahan ug ni Jesukristo

Makahunahuna ba kamo og mga higayon sa dihang kamo nakahibalo nga ang Langitnong Amahan nakaila kaninyo o sa dihang kamo mibati og kamapasalamaton tungod sa Pag-ula ni Jesukristo? Tingali kamo nakahinumdom og usa ka higayon diin kamo naminaw ngadto sa buhi nga propeta ug kamo nasayod nga ang iyang gitudlo tinuod. O kamo tingali makahinumdom nga nagbasa sa mga kasulatan ug nakabaton og usa ka gamhanang pagbati nga miabot diha kaninyo. Tingali kamo nakaila og usa ka pag-aghat nga naggiya kaninyo sa paglikay og usa ka butang nga peligro o mibati og kalinaw o kahupay atol sa usa ka malisod nga panahon. Kining tanan mga timailhan sa Espiritu Santo. Ang Dios nagtabang sa Iyang mga anak ug makighinabi ngadto kanila pinaagi sa impluwensiya ug gahom sa Espiritu Santo. Kamo nakadawat sa gasa sa Espiritu Santo sa dihang kamo gibunyagan nga usa ka miyembro sa Ang Simbahan ni Jesukristo sa mga Santos sa Ulahing mga Adlaw. Ang inyong Langitnong Amahan nakapahimo niining posible alang kaninyo aron matagamtam ang Iyang gugma—ug usahay sa Iyang pagkorehir—pinaagi sa Iyang mensahero, ang Espiritu Santo.

Unsa Ang Espiritu Santo?

Ang Espiritu Santo mao ang ikatulong sakop sa Dios nga Kapangulohan. Siya usa ka personahe sa espiritu, walay lawas nga unod ug mga bukog (tan-awa sa Doktrina ug mga Pakigsaad 130:22). Ang Espiritu Santo nanag-iya sa kinaiya sa usa ka balaanon nga binuhat ug sa kanunay gipasabot isip “ang Espiritu.” Ang “gahom” sa Espiritu Santo mahimong masinati sa tanang mga anak sa Dios. Kadtong kinsa mabunyagan makadawat sa “gasa” sa Espiritu Santo, o sa saad nga ang Espiritu Santo kanunayng magauban kanato.

Kinatibuk-ang pagpasabot sa hilisgotan: Espiritu Santo

May kalabotan nga mga giya sa pagtuon sa ebanghelyo: Dios nga Kapangulohan, Gasa sa Espiritu Santo, Personal Pagpadayag

Seksiyon 1

Ang Espiritu Santo Mamahimong usa ka Bililhon kaayo nga Panalangin nganha Kaninyo

Imahe
tawo nga nag-ampo

Kon magkadako ang inyong makat-onan mahitungod sa Espiritu Santo, mas magkadako ang inyong tinguha sa pagdawat ug sa pagsinati sa mga pagpakita sa Espiritu Santo. Ang mga Nephita diha sa templo sa Bountiful nakabaton og usa ka kinasingkasing nga nagtinguha nga mahatagan sa Espiritu Santo (tan-awa sa 3 Nephi 19:8–9). Adunay mga lakang nga inyong mahimo aron madugangan ang inyong tinguha sa pagbati sa Espiritu Santo, o sa Espiritu sa Ginoo (tan-awa sa 1 Nephi 13:37; 2 Nephi 31:12–13; Moroni 7:31–32; 8:26). Tungod kay ang Espiritu Santo gipadala nganha kaninyo aron sa pagpamatuod ug pagsaksi sa Dios nga Amahan ug ni Jesukristo ug modasig kaninyo sa pagsunod Kanila, kini usa ka bililhon kaayo nga panalangin (tan-awa sa 2 Nephi 31:18).

Mga butang nga angay hunahunaon

Kalihokan alang sa pagkat-on uban sa laing tawo

  • Ang kinabuhi ni Presidente Lorenzo Snow gitagana tungod kay ang iyang mga higala nagiyahan pinaagi sa Espiritu Santo. Basaha ang istorya nga makit-an diha Mga pagtulun-an sa mga Presidente sa Simbahan: Lorenzo Snow ug maghisgot kon nganong ang iyang mga higala nakaila ug mosunod sa mga pagbati sa Espiritu Santo. Kon kamo nakasinati sa balaan nga panalipod ug tabang nga gipakighinabi pinaagi sa pag-aghat ug mga pagbati gikan sa Espiritu Santo?

Pagkat-on pa og dugang

Seksiyon 2

Ang Espiritu Santo Motabang Kaninyo nga Mahibalo sa Kamatuoran sa Tanang mga Butang

Imahe
babaye nga naggunit og kandila ug nagtan-aw sa langit

Ang Dios gusto nga ang tanan Niyang mga anak makakat-on sa kamatuoran mahitungod sa Iyang plano alang sa ilang kalipay ug kaluwasan. Si Presidente Russell M. Nelson mipasidaan nga ang kaaway nagtrabaho aron sa “pagpahanap sa linya tali sa unsa ang tinuod ug sa unsa ang dili tinuod. Ang pagbaha sa impormasyon nga anaa sa tumoy sa atong mga tudlo, sukwahi lang, nakapahimo niini nga nag-anam kalisod sa pagtino kon unsa ang tinuod.” Ang Dios gusto nga inyong maklaro sa pagsabot ang kamatuoran ug sa unsang paagi kini makatabang kaninyo nga makakaplag og hingpit nga kalipay ug maandam alang sa mahangtoron nga kinabuhi. Ang Espiritu Santo mao ang mensahero sa Ginoo aron sa pagtudlo ug pagpamatuod nganha kaninyo sa kamatuoran. Si propeta Moroni mitudlo, “Pinaagi sa gahom sa Espiritu Santo kamo mahimo nga masayod sa kamatuoran sa tanan nga mga butang” (Moroni 10:5).

Mga butang nga angay hunahunaon

  • Usa sa paagi nga kita makakat-on sa kamatuoran pinaagi sa Espiritu mao kon ang mga propeta ug apostoles mamulong ubos sa impluwensiya sa Espiritu Santo (tan-awa sa Doktrina ug mga Pakigsaad 68:3–4). Nganong importante ang pagpaminaw ug pagpatalinghog ngadto sa mensahe nga gihatod sa mga propeta ug apostoles? Ang Ginoo usab nagsaad sa paglig-on sa inyong mga pulong uban sa Espiritu Santo kon kamo nagbuhat sa buhat sa Ginoo (tan-awa sa Doktrina ug mga Pakigsaad 100:5–8).

  • Diha sa iyang pakigpulong “Ang Kamatuoran sa Tanang mga Butang,” si Elder David F. Evans mipakigbahin og importanteng mga paagi nga kamo mismo makakaplag sa kamatuoran. Kanus-a kamo nakasunod niini nga sundanan sa pagpangita sa kamatuoran gikan sa Espiritu Santo?

Kalihokan alang sa pagkat-on uban sa laing tawo

  • Tingali inyong mahisgotan kon sa unsang paagi kamo naimpluwensiyahan pinaagi sa pagpaminaw o pabasa sa mga mensahe sa kinatibuk-ang komperensiya. Si Presidente Russell M. Nelson misaad nga ang “pagpangalagad sa Espiritu Santo Ghost” “motabang kaninyo nga madungog kon unsa ang gusto sa Ginoo nga inyong madunggan” atol sa kinatibuk-ang komperensiya. Unsa ang pipila ka mga paagi nga kamo makaandam sa pagkat-on gikan sa Espiritu Santo samtang kamo maminaw o magtuon sa mga mensahe sa kinatibuk-ang komperensiya?

Pagkat-on pa og dugang

Uban pang mga Tinubdan mahitungod sa Espiritu Santo

Iprinta