Kapitulo 4

Nalig-on pinaagi sa Gahum sa Espiritu Santo

“Pilia nga magpuyo sa mapaubsanong paagi ug sa paagi nga kanunay nga maanaa kaninyo ang Espiritu sa Ginoo aron mahimo ninyo nga higala.”

Gikan sa Kinabuhi ni Lorenzo Snow

Sa iyang unang pakigpulong sa kinatibuk-ang komperensya isip Presidente sa Simbahan, si Lorenzo Snow mitudlo, “Nagsalig kita sa Espiritu sa Ginoo sa pagtabang kanato ug pagpabati kanato matag karon ug unya kon unsay kinahanglan natong buhaton diha sa dili sagad nga mga panghitabo nga mahimong naglibut kanato.”¹ Si Presidente Snow dili unta makahimo niana nga pamahayag kon wala pa nagsalig sa Espiritu sa Ginoo ang duha niya ka mga higala sa usa ka dili sagad nga panghitabo 34 ka tuig na ang milabay.

Niadtong 1864, sila si Elder Lorenzo Snow ug Ezra T. Benson sa Korum sa Napulog Duha ka mga Apostoles nagmisyon ngadto sa mga Isla sa Hawaii. Kuyog nila ang tulo ka laing mga misyonaryo: sila si Elder Joseph F. Smith, William Cluff, ug si Alma L. Smith. Sa dihang ang ilang barko midunggo sa baybayon sa isla sa Maui, ang tanan gawas ni Joseph F. Smith misakay sa mas gamay nga sakayan aron sa pag-adto sa baybayon. Sa nagkaduol na sila sa isla, ang dagkong mga balud mihampak, nga maoy hinungdan nga ang nagtimon wala na makakontrolar sa sakayan. Ang sakayan natikyaob, ug ang tanan nga nanakay nalabay ngadto sa tubig. Wala madugay ang tanan mitunga gawas ni Elder Snow. Usa ka grupo nga taga-isla midagan aron sa pagtabang, midala nila ni William Cluff ug Alma L. Smith sakay sa lifeboat aron pangitaon ang ilang higala. Si Elder Cluff miasoy:

“Ang una nakong nakita ni Brother Snow mao ang iyang buhok nga naglutaw sa tubig sa pikas tumoy sa natikyaob nga sakayan. Sa dihang napasakay na namo siya sa among gisakyan, gisultihan namo ang mga bangkiro sa pagbugsay padulong sa baybayon sa pinakapaspas nga ilang mahimo. Ang iyang lawas migahi, ug mora na og patay.

“Si Brother A. L. Smith ug ako nagtupad og lingkod. Among gipahigda si Brother Snow sa among paa, ug, sa pagpaingon sa baybayon, hilum kaming nangalagad kaniya ug mihangyo sa Ginoo nga luwason ang iyang kinabuhi, aron makabalik siya sa iyang pamilya ug panimalay.

“Pag-abut sa baybayon, gipas-an namo siya paingon sa pipila ka dagkong mga baril nga naghigda didto sa balason nga baybayon. Gipakulob namo siya sa usa niini, giligid-ligid namo siya hangtud nga milampus kami sa pagpagawas sa tubig nga iyang nainom. …

“Human sa among gihimo kaniya sa pipila ka higayon, nga walay timailhan nga mabuhi og balik, ang mga nanan-aw miingon nga wala nay laing mahimo pa alang kaniya. Apan wala namo batia ang paghunong, ug mipadayon sa pag-ampo ug mipadayon sa pagtabang kaniya, uban sa kasigurohan nga ang Ginoo maminaw ug modungog sa among mga pag-ampo.

“Sa katapusan gidasig kami sa pagbutang sa among ba-ba ibabaw sa iyang ba-ba ug naningkamot sa pagpaginhawa sa iyang mga baga, gipuli-puli ang paghuyop ug pagsuyop sa hangin, gisunod, kutob sa mahimo, ang natural nga paagi sa pagginhawa. Padayon namo kining gihimo hangtud milampus kami sa pagpaginhawa sa iyang mga baga. Pagkataudtaud, among nakita ang gamay kaayong timailhan nga maulian. Gamayng pagpamilok sa mata, nga, hangtud pa gihapon niana, nagbuka ug daw patay, ug gamay kaayong pagkarat sa tutunlan, mao ang unang mga timailhan nga naulian na. Kini nag-anam og kakusog, hangtud hingpit na nga naulian sa panimuot.”

Sa paghinumdom niini nga kasinatian, si Elder William Cluff nasayud kon ngano nga siya ug si Elder Alma L. Smith nakahimo sa pagluwas sa kinabuhi ni Elder Snow. “Kami wala lamang mohimo sa naandan nga buhaton niana nga panghitabo,” miingon siya, “apan usab sa unsay gihunghong sa Espiritu kanamo.”² [Tan-awa sa sugyot 1 sa pahina 93.]

Mga Pagtulun-an ni Lorenzo Snow

Pinaagi sa gasa sa Espiritu Santo, kita nagiyahan ngadto sa tanang kamatuoran ug nalig-on ang atong pagtuo.

Adunay piho nga panalangin nga konektado lamang sa pagsunod sa ebanghelyo, kana [mao] ang gasa sa Espiritu Santo. … Ang Manluluwas, nga sa walay pagduha-duha nasayud gayud kabahin sa matang ug kinaiya niini nga gasa, miingon nga kini mogiya niadtong kinsa midawat niini ngadto sa tanang kamatuoran ug mopakita kanila sa mga butang nga moabut [tan-awa sa Juan 16:13]. Labaw pa kini kay sa nianang espiritu nga gikan sa Dios, milukop sa kadako sa kawanangan ug midan-ag sa matag tawo nga moanhi sa kalibutan [tan-awa D&P 84:46]; ang gasa sa Espiritu Santo mogiya ngadto sa tanang kamatuoran, ug mopakita kanila sa mga butang nga moabut.

Dugang pa, sa paghisgut kabahin sa mga epekto niini, si Apostol [Pablo] miingon: “Apan ngadto sa matag usa gikahatag ang alamag sa espiritu alang sa kaayohan. Ngadto sa usa gihatag ang pagtuo.” [Tan-awa sa 1 Mga Taga-Corinto 12:7, 9.] Dili ang komon, ordinaryo nga pagtuo, nga gituohan sa ubang mga tawo karong panahona; apan usa ka pagtuo nga naghimo sa aduna niini nga pagaputlon pinaagi sa gabas, itambog ngadto sa langub sa mga leon, nagdilaab nga kalayo, ug moantus sa mga pagdagmal sa tanang matang. Mao kini ang matang sa pagtuo nga ihatag sa Espiritu Santo niadtong aduna niini, nga naghimo sa aduna niini sa pagbarug taliwala sa tanang kalisdanan, sa pagbuntog sa tanang babag ug mohatag sa iyang kinabuhi, kon gikinahanglan, alang sa kawsa nga iyang gihangup. Adunay hilabihan ka makapadasig nga gahum niini nga pagtuo, nga gihatag sa Ginoo pinaagi sa Espiritu Santo, diin walay laing baruganan ang makahatag. Ngadto sa usa gihatag ang pagtuo, ngadto sa usa gihatag ang kahibalo [tan-awa sa 1 Mga Taga-Corinto 12:8], dili kanang maangkon pinaagi sa pagbasa lamang sa mga basahon, apan kahibalo nga gikan sa Labawng Makagagahum. Ang makapadasig sa kaugalingon nga baruganan anaa kanila, nga tinuod, nga naghatag kanila og kahibalo sa kawsa nga ilang giapilan. Sila nasayud pinaagi sa pagpadayag gikan sa Dios nga ang kawsa nga ilang gisunod tinuod, gipadayag kini nganha kanila sa paagi nga dili nila malalis, ug sila nasayud sa ilang kaugalingon mismo. Busa sila natukod … ibabaw sa bato sa pagpadayag. ³

Si Pedro sa pagsangyaw ngadto sa mga tawo miingon, “Paghinulsol kamo ug pabautismo kamo ang matag usa kaninyo sa ngalan ni Jesukristo tungod sa kapasayloan sa inyong mga sala, ug madawat ninyo ang gasa nga Espiritu Santo. Kay ang saad alang kaninyo ug sa inyong mga anak, ug sa tanan nga atua sa halayo, sa matag usa nga pagatawgon sa Ginoo nga atong Dios.” [Mga Buhat 2:38–39.] Kini nga gasa sa Espiritu Santo usa ka lahi nga baruganan kay sa bisan unsa nga atong makita diha sa tinuohan sa kalibutan. Kini usa ka baruganan sa salabutan, ug pagpadayag. Kini usa ka baruganan nga nagpadayag sa mga butang nga nangagi, karon ug sa umaabut, ug kini nga mga gasa sa Espiritu Santo madawat pinaagi sa pagsunod sa mga gikinahanglan sa ebanghelyo sama sa gisangyaw niadtong mga panahona ug sama sa gisangyaw sa mga Elder sa ang Simbahan ni Jesukristo sa mga Santos sa Ulahing mga Adlaw niining mga panahona. Dinhi niini nga bato nga ang ilang pagtuo kinahanglang ibase; gikan niini nga tinubdan nga sila kinahanglan nga makadawat og kahibalo sa doktrina nga ilang gihangup, ug kita giingnan sa Manluluwas “nga ang ganghaan sa impyerno dili makabuntog batok kanila.” [Tan-awa sa 3 Nephi 11:39.] …

… Ang pundasyon diin natukod ang Simbahan ni Jesukristo sa mga Santos sa Ulahing mga Adlaw mao ang bato sa pagpadayag—diha sa bato nga giingon ni Jesus nga Siya motukod sa Iyang simbahan, ug ang ganghaan sa impyerno dili makabuntog batok kaniya [tan-awa sa Mateo 16:17–18]. Wala nato kini madawat pinaagi sa unod ug dugo, wala nato madawat kini nga pagpamatuod gikan sa tawo, wala nato kini madawat pinaagi sa pagbasa sa Biblia … o sa Basahon ni Mormon, apan nadawat nato kini pinaagi sa impluwensya sa Espiritu Santo, nga nagtudlo kabahin sa mga butang sa Dios, mga butang nga nangagi, karon ug sa umaabut, ug nagtudlo sa mga butang sa Dios, naghimo niini nga klarong mabati ngari kanato. Kamo dili makakuha niini nga kahibalo gikan kanamo pinaagi sa pagbilanggo o bisan unsa nga matang sa pagpanggukod. Kami mobarug niini hangtud sa kamatayon. ⁴ [Tan-awa sa sugyot 2 sa pahina 94.]

Matag Santos sa Ulahing mga Adlaw makabaton sa Espiritu Santo isip higala nga mohatag og tambag.

Adunay paagi diin ang mga tawo makapabiling limpyo sa ilang konsensya atubangan sa Dios ug sa tawo, ug kana mao ang paghupot diha kanila sa Espiritu sa Dios, nga mao ang espiritu sa pagpadayag ngadto sa matag lalaki ug babaye. Kini mopadayag kanila, bisan sa labing yano nga butang, kon unsay angay nilang buhaton, pinaagi sa pag-aghat kanila. Kita kinahanglan nga maningkamot sa pagkat-on sa kinaiya niini nga Espiritu, aron atong masabtan ang mga pag-aghat niini, ug dayon kita sa kanunay makahimo sa pagbuhat sa matarung. Mahinungdanon kini nga pribilehiyo sa matag Santos sa Ulahing mga Adlaw. Kita nasayud nga atong katungod nga mobati sa Espiritu matag adlaw sa atong kinabuhi.

Ang mga tawo moduol kanako nga gusto kaayo nga makadawat og tambag kalabut sa pipila ka hilisgutan. Dili sila kinahanglan nga moduol kanako kanunay (gawas sa pipila ka kahimtang, siyempre, mao gayud kini ang eksakto), tungod kay ang Espiritu anaa kanila aron mapahinabo ang maayo ug matuman ang mga katuyoan sa Dios. … Dili kinahanglan nga sa kanunay moduol sila sa Presidente sa Simbahan, o ngadto sa Napulog Duha, o sa mga Elder sa Israel, aron mangayo og tambag; anaa na kini kanila; adunay usa ka higala nga nasayud sa hingpit unsay angayang isulti ngadto kanila. Gikan sa higayon nga atong nadawat ang Ebanghelyo, nagpabunyag ug napandongan sa mga kamot human niana alang sa gasa sa Espiritu Santo, kita adunay usa ka higala, kon kita dili mopapahawa niini palayo kanato pinaagi sa pagbuhat og sayop. Kana nga higala mao ang Balaang Espiritu, ang Espiritu Santo, nga mopaambit sa mga butang sa Dios ug mopakita niini ngari kanato. Usa kini ka mahinungdanong paagi nga gihatag sa Ginoo kanato, aron kita masayud sa kahayag, ug dili magpadayong magpangapkap diha sa kangitngit.⁵ [Tan-awa sa sugyot 5 sa pahina 94.]

Ang Espiritu Santo makahatag kanato og kalipay ug kalinaw sa hunahuna.

Ang Ginoo nag-establisar og piho nga natural nga mga tinguha ug mga pagbati sa atong mga kahiladman, ug ingon man usab niana sa tanang katawhan, sa tanang tawhanong pamilya. Nakatisok ug nakaukit sa ilang pagkatawo ang pipila ka mga tinguha sa paglingaw-lingaw, tinguha sa pipila ka mga butang nga ang matang niini gituyo aron sa pagdugang sa atong kalinaw ug kaayohan, nga makatubag sa ilang mga pagbati ug makadugang sa ilang kalipay, apan kon unsaon pag-angkon sa katagbawan niadto nga mga kapasidad ug mga tinguha ang kalibutan wala masayud ni makasabut, apan nakita sa Ginoo nga angayan kita nga ibutang diha sa kahimtang ug diha sa paagi nga masabtan kadto nga mga butang pinaagi sa pagkamatinud-anon ug paglakaw diha sa kahayag sa Balaang Espiritu ug pagdawat sa kamatuoran. ⁶

Kini pribilehiyo sa mga Santos sa Ulahing mga Adlaw nga mosunod sa Ebanghelyo sa ingon nga paagi nga sila mobati nga madawat sa Dios. Siyempre, nagbuhat kita og mga butang usahay nga atong ikaulaw sa higayon nga kita maghunahuna niini, apan naghinulsol na kita niini sa atong mga kasingkasing ug determinado nga dili na kini buhaton og usab. Mao lamang kana ang gihangyo sa Ginoo kanato; ug ang mga lalaki ug mga babaye nga nagsunod niini, magpuyo nga wala gipanghimaraut. Sila makaangkon og kamatarung ug kalipay diha sa Espiritu Santo. ⁷

Kon kita maghupot sa kahayag sa Espiritu ngari sulod kanato, makalakaw gayud kita diha sa ebanghelyo nga hingpit nga makatagamtam sa kalinaw ug kalipay niini nga kalibutan; ug samtang nagpadayon kita sa atong panaw, naningkamot alang sa kalinaw ug kalipay nga anaa sa atong agianan, sa unahan, kita makabaton og kalinaw sa hunahuna nga walay laing makatagamtam gawas lamang niadtong kinsa napuno sa Balaang Espiritu.⁸ [Tan-awa sa sugyot 3 sa pahina 94.]

Nagkinahanglan kita sa tabang sa Espiritu Santo sa atong paglahutay sa mga pagsulay, pagtuman sa atong mga katungdanan, ug pagpangandam alang sa celestial nga himaya.

Adunay daghang importante nga mga butang nga gikinahanglan gikan kanato, ug daghang mga butang nga atong mahimo, kon tabangan sa Espiritu sa Ginoo, nga usahay daw imposible kaayo nga atong mahimo. ⁹

Gusto nakong mapahinumduman ang akong mga kaigsoonan … nga kita nagsalig sa atong kasayuran ug salabutan nganha sa Espiritu sa Dios, nga mahimong nagauban kanato, kon giugmad sa tukmang paagi, ang espiritu sa pagdasig, sa pagpadayag, aron klaro natong mabati sa atong mga panabut ang hunahuna ug kabubut-on sa Dios, nga nagtudlo sa atong mga katungdanan ug mga obligasyon, ug kon unsa ang gikinahanglan ngari kanato. … Nanginahanglan kita og tabang. Kita lagmit makabuhat nianang makadala kanato ngadto sa kasamok ug kangitngit, ug niadto nga mga butang nga dili makahatag kanato og kaayohan, apan sa tabang nianang maghuhupay nga gisaad sa Ginoo sa iyang mga Santos, kon kita magmainampingon sa pagpaminaw sa mga paghunghong niini, ug pagsabut sa pamaagi sa pinulongan niini, mahimo natong malikayan ang daghang kasamok ug grabe nga kalisud.¹⁰

Hingpit kita nga nagsalig sa espiritu sa pagdasig, ug kon may panahon man, sukad sa pagpuyo ni Adan sa Tanaman sa Eden, nga ang Espiritu sa Dios mas gikinahanglan kay sa karon, wala ko makahibalo niana. Ang mga timailhan sa panahon, ug ang paspas nga pag-abut sa mga panghitabo nga mosulay sa kasingkasing sa mga Santos sa Ulahing mga Adlaw ug sa ilang kaligdong, nagkinahanglan nga kita karon magtinguha gayud sa Espiritu sa Dios, ug sa Balaanong panabang, tungod kay kinahanglanon gayud kaayo kini sa mga panghitabo nga karon paspas nga moabut. Nasayud kita nga nagkinahanglan kita niini kaniadto. Dali natong makita nga kon wala pa mag-uban ang Espiritu sa Dios sa paggiya kanato diha sa mga panghitabo nga atong giagian, wala unta kita nakatagamtam sa atong gilauman karon nga kahimayaan ug himaya, ug ang atong mga kahimtang dili unta kaayo maayo. Ug kon kita nagkinahanglan sa Balaang Espiritu kaniadto, makasabut gayud kita nga kini kinahanglanon sa umaabut.¹¹

Kinahanglan natong masabtan—ug sa akong pagtuo kitang tanan nakasabut—nga ang buhat nga atong pagabuhaton niining kinabuhia aron paghimaya sa Dios o alang sa katagbawan sa atong kaugalingon dili mahimo pinaagi lamang sa atong kaugalingong yano nga salabutan. Nagsalig kita sa Espiritu sa Ginoo aron sa pagtabang kanato ug sa pagpabati kanato matag karon ug unya kon unsa ang kinahanglan natong buhaton diha sa dili sagad nga mga panghitabo nga mahimong naglibut kanato.¹²

Dili gayud kini maalamon nga magdahum nga ang mga Santos sa Ulahing mga Adlaw niining mga panahona makatuman sa celestial nga balaod, sa balaod nga nagagikan sa Dios, ug sa iyang mga plano sa pagbayaw sa mga tawo ngadto sa iyang presensya, gawas kon sila paluyohan og usa ka balaanon [langitnon] nga gahum. Ang ebanghelyo nagsaad niini. Kini nagsaad sa gasa sa Espiritu Santo, nga balaan sa kinaiya niini, ug dili matagamtam ni bisan kinsa nga laing matang sa mga tawo, ug diin kita giingnan sa Manluluwas, nga mao ang mogiya ngadto sa tanang kamatuoran, ug modasig niadtong aduna niini, ug mohatag kanila og kahibalo kabahin ni Jesus, kahibalo kabahin sa Amahan, ug kabahin sa mga butang nga may kalabutan sa celestial nga kalibutan; nga kini modasig niadtong kinsa aduna niini sa kahibalo kabahin sa mga butang nga moabut, ug sa mga butang nga nangagi; ug modasig kanila hangtud sa punto nga ilang matagamtam ang hilabihan ka talagsaon nga mga gasa—ang gasa sa pinulongan ug panagna, sa pagpandong sa mga kamot ngadto sa masakiton, nga pinaagi niini sila mamaayo.

Kadtong midawat niini nga ebanghelyo gisaaran niining hilabihan ka talagsaon nga [mga] gahum ug mga gasa, ug kahibalo alang sa ilang kaugalingon, aron dili sila magasalig ni bisan kinsa nga tawo o grupo sa mga tawo, kalabut sa kamatuoran sa relihiyon nga ilang nadawat; apan sila makadawat og kahibalo gikan sa Amahan nga ang relihiyon nagagikan kaniya, nga ang ebanghelyo nagagikan kaniya, ug nga ang iyang sulugoon adunay katungod ug awtoridad sa pagpahigayon niini nga mga ordinansa, aron walay hangin sa tuloohan ang makatarug o makapukling kanila gikan sa dalan nga ilang gilaktan; aron mahimo silang andam alang sa himaya nga ipadayag, ug mahimong mga partisipante niini; aron sila makalahutay sa bisan unsa nga pagsulay ug kasakitan nga pagbuot sa Dios nga kini ihatag kanila, aron mas maandam sila og maayo alang sa celestial nga himaya; aron sila dili maglakaw sa kangitngit, apan sa kahayag ug gahum sa Dios, ug igapataas ibabaw sa mga butang sa kalibutan, ug mahimong labaw sa mga butang sa ilang palibut, aron maglakaw sila nga wala magsalig ubos sa celestial nga gingharian, ug diha sa panan-aw sa Dios ug sa langit, isip gawasnon nga mga tawo, nga nagpadayon niana nga dalan nga gipasubay kanila pinaagi sa Espiritu Santo, kana nga dalan diin ilang mabayaw ang ilang kaugalingon ngadto sa kahibalo ug gahum, ug sa ingon maandam ang ilang kaugalingon sa pagdawat sa himaya nga gitanyag sa Dios nga ihatag nganha kanila, ug sa pag-angkon sa gihimaya nga luna diin giandam sa Dios aron sa pagbayaw kanila.¹³

Kinahanglan nga kita magpuyo sa ingon aron kita masayud nga ang atong dalan sa kinabuhi madawat sa Dios. Kinahanglan nga kita makasabut sa tingog ug sa hunghong sa Balaang Espiritu. Sa adlaw nga ang langit wala matabuni sa mga kapanganuran, atong makita ang naglibut nga mga butang, ang katahum niini ug katuyoan. Ingon usab niana kon kita nagsalig sa Espiritu sa Dios sa paglamdag diha sa mga baruganan sa kamatuoran ug kaluwasan. Walay nangangkon nga Santos sa Ulahing mga Adlaw ang makatagamtam sa bisan unsang gidak-on sa kalipay gawas kon siya nagpuyo sa ingon, ug sa ingong nagbutang sa iyang kaugalingon ubos sa balaanong giya.¹⁴ [Tan-awa sa sugyot 4 sa pahina 94.]

Kon kita magpuyo sa mapaubsanong paagi, ang Espiritu Santo motabang kanato sa atong dalan nga gilaktan.

Pilia ang pagpuyo sa mapaubsanong paagi ug sa ingon nga paagi nga sa kanunay inyong mabatunan ang Espiritu sa Ginoo nga mahimo ninyong higala, nga moaghat kaninyo matag karon ug unya kon kini gikinahanglan diha sa dili sagad nga mga kahimtang diin kamo nahimutang. …

… Kon kanus-a man ako kutob mabuhi, wala ko masayud, ug wala ko mabalaka niini. Ako nagtinguha, ug kini kinahanglan nga inyong tinguhaon, nga makabaton niana nga pagpaubos, ug niana nga kaaghup, ug niana nga kaligdong aron matagamtam ang espiritu sa pagpadayag. Kini inyong pribilehiyo, matag usa kaninyo, nga makabaton og igong espiritu sa pagpadayag aron hingpit nga masayud kon unsa ang angay ninyong buhaton. Inyong pribilehiyo nga makabaton niini ingon nga kini akong pribilehiyo nga masayud kon unsa ang angayang buhaton ugma, kon ang ugma moabut, alang sa kaayohan sa Simbahan sa kinatibuk-an.¹⁵

Kinahanglan kitang maningkamot, kutob sa mahimo, sa paghikalimot sa tanang kalibutanong mga butang nga makapasubo ug makapahasol kanato, ug atong itutok ang atong mga hunahuna nganha sa Ginoo, nga adunay igo sa Iyang Balaang Espiritu aron atong madawat ang ingon nga kahibalo ug mga pag-aghat nga motabang kanato sa atong dalan nga gilaktan.²⁵ [Tan-awa sa sugyot 5 sa pahina 94.]

Mga Sugyot alang sa Pagtuon ug Pagtudlo

Hunahunaa kini nga mga ideya samtang ikaw nagtuon sa kapitulo o samtang ikaw nangandam sa pagtudlo. Alang sa dugang nga tabang, tan-awa sa mga pahina v–viii.

Sa inyong pagribyu sa asoy sa mga pahina 83–85, hunahunaa ang mga higayon nga ikaw napanalanginan tungod kay ang usa ka tawo misunod sa mga pag-aghat sa Espiritu Santo. Paghunahuna usab og mga higayon nga ikaw misunod sa pag-aghat aron sa pagtabang sa usa ka tawo.
Basaha ang seksyon nga nagsugod sa pahina 85. Unsa sa imong hunahuna ang ipasabut sa “natukod … ibabaw sa bato sa pagpadayag”? (Alang sa pipila ka mga ehemplo, tan-awa sa mga pahina 85–88.) Sa unsang paagi nga ang personal nga pagpadayag makahatag kanato og kalig-on sa “pagbarug taliwala sa tanang kalisdanan” ug “pagbuntog sa tanang babag”?
Si Presidente Snow miingon nga ang Espiritu Santo makatabang kanato nga “makatagamtam sa kalinaw ug kalipay niini nga kalibutan” (pahina 90). Kanus-a ang Espiritu Santo mitabang kanimo nga magmalipayon ug mobati og kalinaw? Unsa pa nga mga paagi nga ang Espiritu Santo makatabang kanato? (Alang sa pipila ka mga ehemplo, tan-awa sa mga pahina 90–93.)
Sa imong pagtuon sa seksyon nga nagsugod sa pahina 90, hunahunaa kon sa unsang paagi ka nakakat-on sa pag-ila sa mga pag-aghat sa Espiritu Santo. Unsaon nimo pagtabang ang usa ka sakop sa pamilya o higala nga makakat-on sa pag-ila sa mga pag-aghat sa Espiritu?
Kini nga kapitulo naglakip sa duha ka mga pakisayran kabahin sa Espiritu isip usa ka higala (mga pahina 89 ug 93]). Sa imong hunahuna ngano man nga kita nagkinahanglan og kamapaubsanon ug kaligdong aron mabatunan ang Espiritu Santo isip atong higala?

May Kalabutan nga mga Kasulatan: Lucas 12:12; Juan 14:26–27; Mga Taga-Roma 14:17; 1 Mga Taga-Corinto 12:4–11; Mga Taga-Galacia 5:22–25; 1 Nephi 10:17–19; 2 Nephi 32:5

Tabang sa Pagtudlo: “Sa pagdasig og panaghisgut, gamita ang mga pangutana sa matag kapitulo. … Mahimo usab ikaw nga maghimo og imong kaugalingon nga mga pangutana ilabi na alang niadtong imong tudloan” (gikan sa pahina vii niini nga basahon).

Nag-unang misyonaryo nga buhat didto sa mga Isla sa Hawaii

Sa dihang si Elder Lorenzo Snow nagmisyon sa mga Isla sa Hawaii, ang iyang kinabuhi naluwas pinaagi sa dinasig nga pagpangalagad sa iyang mga kauban.

“Kini atong katungod nga mobati sa Espiritu matag adlaw sa atong kinabuhi.”