Kapitulo 15

Matinud-anon, Makugihon nga Serbisyo diha sa Gingharian sa Dios

“Nahibalo nga ang atong relihiyon tinuod kinahanglan unta nga kita ang labing maunungon nga mga tawo sa tibuok kalibutan ngadto sa kawsa nga atong gidawat.”

Gikan sa Kinabuhi ni Lorenzo Snow

Hinapos sa tuig 1851, ang Unang Kapangulohan mimantala og sulat diin sila mihangyo nga ang tanan nga mga sakop sa Korum sa Napulog Duha ka mga Apostoles “motapos sa mga buluhaton sa ilang nagkalainlaing mga misyon” ug mobalik ngadto sa Salt Lake inigka Abril 1853.¹ Busa ang misyon ni Elder Lorenzo Snow sa Italya hapit na nga matapos. Sa Pebrero 1852, iyang gihatag ang trabaho didto ubos sa pagpangulo ni Brother John Daniel Malan, usa ka bag-ong kinabig , ug mipanaw uban ni Elder Jabez Woodard ngadto sa isla nga nasud sa Malta. Gikan sa Malta, nanghinaut si Elder Snow nga makasakay og bapor ngadto sa India. Ang unang mga misyonaryo niana nga yuta mitrabaho ubos sa iyang pagdumala, ug mibati og dako nga tinguha sa pag-uban kanila. Gikan didto nagplano siya sa “pagtuman sa pagbiyahe tuyok sa kalibutan,” mopauli sa panimalay pinaagi sa Dagat Pasipiko ngadto sa kasadpan sa Estados Unidos.²

Ang mga plano ni Elder Snow nausab sa dihang siya ug si Elder Woodard miabut sa Malta. Nahibaloan niya nga siya malangan diha sa isla sulod sa daghang mga semana tungod kay may usa ka bapor nga naguba diha sa Pulang Dagat. Kay sa magmulo mahitungod sa kalangan, mihukom siya sa pagtrabaho. Sa usa ka sulat nga gipetsahan og Marso 10, 1852, misulat siya, “Ako nagtuo nga daghang maayo ang moresulta gikan sa paagi nga ang Ginoo mogiya sa paggamit sa oras nga karon ania kanako, ingon nga ako giliyokan og makapaikag nga mga tawo, ug diha sa labing importante nga natad sa trabaho, nga ang usa ka importante kaayong trabaho matuman, naglugway ngadto sa duol nga mga nasud.” Mitaho siya nga iyang gipakuha si Elder Thomas Obray, usa ka misyonaryo sa Italya, “sa pag-anha diha dayon, ug sa pagdala og daghang mga pamphlet ug mga basahon.” Samtang si Elder Snow wala mahibalo sa eksakto kon unsay buhaton niya ug sa iyang mga kauban diha sa Malta, mipahayag siya og tinguha sa pagtukod og branch sa Simbahan didto. Kini nga lihok, miingon siya, “mopahinay sa espirituhanong mga babag sa daghang mga nasud, sama sa mga Maltese sa ilang relasyon sa negosyo, nga mikatap ngadto sa mga kabaybayonan sa Uropa, Asya, ug Afrika.”³

Kaniadtong Mayo 1, 1852, si Elder Snow mipadala og sulat nga nagtaho sa pag-uswag sa trabaho sa Malta. Misulat siya: “Ang mga tawo karon kanunay nga nagbisita sa pagpakisayud kalabut niining ‘katingad-ang relihiyon;’pipila ka mga gabii ang milabay, usa ka higayon kami dihay, sa among pribadong mga sak-anan, mga maayong tawo gikan sa walo ka naglainlaing mga nasud, nagagikan sa nagkalainlaing mga bahin sa siyudad sa pagpakigsulti mahitungod sa atong mga doktrina: pipila sa mga tawo mao kadtong gikan sa Poland ug Greece, kinsa karon nagbasa sa atong mga basahon uban sa dakong interes. Duha ka intelihente ug kugihan nga batan-ong mga lalaki, ang unang bunga sa among pangalagad dinhi niini nga isla, makahimo sa pagtabang sa pagpadayon sa kawsa nga atong gibuhat; ang usa kinsa atong gi-orden og Elder larinong mosulti og daghang mga pinulongan.”³

Wala gayud matuman ni Elder Snow ang iyang damgo sa pagserbisyo sa India ug sa paglibut sa kalibutan. Hinoon, makugihon niyang gisunod ang kabubut-on sa Ginoo sa panahon sa iyang wala damha nga pagpuyo sa Malta, nagtukod og pundasyon alang sa misyonaryong buhat didto. Sa diha nga siya sa katapusan nakasakay na og bapor kaniadtong Mayo 1852, mipaingon siya sa kasadpan imbis sa silangan, nagsunod sa mga sugo sa iyang mga lider sa pagbalik ngadto sa Salt Lake. Paglabay sa mga duha ka bulan, sila si Elder Woodard ug Obray mitukod og branch sa Simbahan didto sa Malta.⁵ [Tan-awa sa sugyot 1 sa pahina 226.]

Mga Pagtulun-an ni Lorenzo Snow

Tungod kay kita nakadawat sa kahingpitan sa ebanghelyo, nagserbisyo kita isip mga sinugo ni Kristo.

Nagpamatuod kita ngadto sa tibuok kalibutan nga kita nahibalo, pinaagi sa balaanong pagpadayag, gani pinaagi sa mga pagpaila sa Espiritu Santo, nga si Jesus mao ang Kristo, ang Anak sa buhing Dios, ug nga siya mipadayag sa iyang kaugalingon ngadto ni Joseph Smith sama ka personal nga paagi sama sa iyang gihimo ngadto sa iyang mga apostoles sa karaan, human siya mabanhaw gikan sa lubnganan, ug nga gipahibalo niya [ang] langitnong mga kamatuoran diin mao lamang ang makaluwas sa katawhan. Kini … nagbutang og labing importante ug may tulubagon nga katungdanan, nahibalo, ingon nga kita nahibalo, nga kita may tulubagon sa Dios sa pagtagad nga atong gihimo niining sagradong pagsalig nga iyang gisalig ngari kanato.

Samtang ang mga apostoles mipakita sa kalibutan, human ilang nadawat ang ilang pagkatinugyanan gikan sa nabanhaw nga Manunubos, sa pagsangyaw sa ebanghelyo sa gingharian ngadto sa tanang kanasuran, nagsaad sa tanan kinsa mituo sa ilang pulong, sa Gasa sa Espiritu Santo pinaagi sa pagpandong sa mga kamot, busa kita nagtuo. Samtang sila pinaagi sa ilang tawag, mipahayag uban sa tanan nga pasalig, taliwala sa panggukod ug pagbatok, sa ebanghelyo nga mao ang gahum sa Dios ngadto sa kaluwasan sa tanan niadtong kinsa mituo ug misunod, busa kita nagpahayag sa ingon. Samtang sila nagsangyaw og hugot nga pagtuo diha ni Ginoong Jesukristo, pagbunyag alang sa kapasayloan sa mga sala, ug sa pagpandong sa mga kamot, pinaagi niadtong gihatagan og awtoridad, aron madawat ang Espiritu Santo, isip gikinahanglan sa kaluwasan, busa kita nagsangyaw sa ingon. Samtang sila pinaagi sa gahum sa Espiritu Santo nahimong mga saksi ni Ginoong Jesukristo, ug matinud-anong mga tigdala sa iyang mensahe sa ebanghelyo ngadto sa tibuok kalibutan sa Hentil, busa, pinaagi ug tungod sa samang Balaang Espiritu, kita nahimong mga saksi kaniya, ug, ingon nga gitawag sa samang balaanon ug sagradong tawag, busa kita mangako sa samang katungdanan.

Busa, ingon nga gipangako kini nga katungdanan, atong akuhon ang tanang mga responsibilidad sa mga sinugo ni Kristo, kita mahimong manubag alang sa atong tagsa-tagsa nga mga lihok ug alang sa paagi nga atong gigamit ang mga talento ug abilidad nga gihatag sa Ginoo kanato. ⁶ [Tan-awa sa sugyot 2 sa pahina 226.]

Ang pagkamiyembro diha sa Simbahan maoy usa ka tawag sa pagtabang sa uban nga dawaton ang kaluwasan.

Kon ang Ginoo motawag og tawo o pundok sa mga tawo gikan sa kalibutan, ang tuyo dili sa kanunay nga mahatagan og kaayohan kana nga tawo o mga tawo. Ang katuyoan sa Ginoo dili lamang ang kaluwasan sa pipila ka mga tawo nga gitawag og mga Santos sa Ulahing mga Adlaw … , apan ang kaluwasan sa tanang mga tawo, ang buhi ug ang patay. Sa diha nga gitawag sa Ginoo si Abraham Siya mihimo og piho nga mga saad kalabut sa himaya nga kinahanglan nga moabut diha kaniya ug sa iyang mga kaliwat, ug diha niini nga mga saad atong makita kining talagsaong panultihon: nga diha kaniya ug sa iyang kaliwat ang tanan nga mga nasud sa yuta mapanalanginan [tan-awa sa Genesis 22:15 –18; Abraham 2:9–11]. … Ang plano sa Ginoo dili lamang sa pagpanalangin kaniya ug sa iyang kaliwat, apan sa tanan nga mga pamilya sa yuta. …

…Sa dihang mianhi si Jesus, Siya mianhi isip usa ka sakripisyo dili lamang sa pagtabang sa Israel, o sa kaliwat ni Abraham, Isaac ug Jacob, apan sa pagtabang sa tibuok tawhanong pamilya, nga pinaagi Kaniya ang tanan nga mga tawo mahimong mapanalanginan, nga pinaagi Kaniya ang tanan nga mga tawo mahimong maluwas; ug ang Iyang misyon mao ang paghimo og pagpangandam pinaagi nga ang tibuok tawhanong pamilya mahimong makadawat og mga kaayohan sa mahangturong Ebanghelyo, dili, sumala sa akong gisulti, ang Israel lamang, apan ang tibuok katawhan; ug dili lamang kadtong nagpuyo sa yuta, apan kadto usab nga anaa sa kalibutan sa espiritu. …

… Kita adunay sama nga Priesthood nga si Jesus aduna, ug kinahanglan nga kita mohimo sama nga Siya mihimo, sa pagbuhat og sakripisyo sa atong kaugalingon nga mga tinguha ug mga pagbati sama nga Siya mihimo, tingali dili magpakamatay nga martir sama sa Iyang gihimo, apan gikinahanglan kitang mohimo og mga sakripisyo aron sa pagpahinabo sa mga katuyoan sa Dios, o dili kita mahimong takus niining balaang Priesthood, ug mahimong mga manluluwas sa kalibutan. Tuyo sa Dios nga kita mahimo nga mga manluluwas dili lamang sa daghan nga sa karon nagpuyo sa yuta, apan sa daghan didto sa kalibutan sa espiritu: Siya dili lamang mobutang kanato sa usa ka kahimtang nga makaluwas sa atong mga kaugalingon, apan Siya mohimo kanato nga sarang sa pagtabang sa katubsanan sa daghang mga anak sa Makagagahum. ⁷ [Tan-awa sa sugyot 3 sa pahina 226.]

Ang matag calling ug responsibilidad importante diha sa buluhaton sa Ginoo.

Karon ang pangutana mao, nasabtan ba nato ang atong katungdanan, nasabtan ba nato sa hingpit ang kinaiyahan sa buhat nga atong giabaga nga humanon? Usahay ako motuo nga ang uban sa atong mga kaigsoonan, mga Elder sa Israel, andam ug gusto kaayong molikay sa mga obligasyon nga sila aduna tungod sa ilang mga pakigsaad, ang hugot nga pagtuo nga kanhi ilang giangkon ingon og hapit na mahanaw, ug ingon nga nagpahiluna sila nga kontento sa ilang pagkamiyembro sa Simbahan sa ngalan lamang.

Adunay uban kinsa nagtuo tungod kay ang ilang mga pangalan dili inila sa kadaghanan, tungod kay sila tingali … wala makaimpluwensya og daghan nga mga tawo, nga kini dili igsapayan kon unsa nga mga kinaiya ang ilang gisunod, o unsa nga matang sa mga ehemplo ang ilang gipakita atubangan sa ilang mga kaigsoonan. Bisan pa niana, kon sila naghupot og mahinungdanon nga mga katungdanan, sama sa Kapangulohan sa Simbahan, o magtatambag, o kon sila sakop sa Korum sa Napulog duha ka mga Apostoles, o kon sila ba Presidente sa High Council, o sa mga High Priest o sa mga Seventy, nan ilang hunahunaon kini nga importante kon unsaon nila pagdala ang ilang mga kaugalingon. Pinaagi niini sila nagpakita og dakong kahuyang o hilabihan nga pagkawalay alamag, ang ilang lampara mahimong nagkaawop o wala gayud sila makaamgo sa katungdanan nga ilang gihuptan sa pagdala diha sa ilang mga kaugalingon sa mga responsibilidad sa ebanghelyo.

Gisaysayan kita diha sa sambingay sa Manluluwas nga ang gingharian sa langit sama sa usa ka tag-iya og balay kinsa midala sa iyang mga kabtangan ngadto sa iyang mga sulugoon ingon nga siya hapit na mobiyahe ngadto sa usa ka layong nasud. Ngadto sa usa mihatag siya og lima ka talanton, ngadto sa lain duha, ug ngadto sa lain usa. Ang usa kinsa midawat og lima ka talanton milakaw ug nagnegosyo, ug miganansya og laing lima ka talanton, nagdoble sa bahin nga gisalig diha kaniya, ug siya usab nga midawat og duha ka talanton milakaw ug miganansya og laing duha. Apan siya nga midawat og usa ka talanton, milakaw ug mikalot sa yuta, ug gilubong ang kwarta sa iyang agalon. Siya sa walay pagduhaduha mihunahuna nga ang iyang responsibilidad gamay kaayo nga dili siya makahimo og daghan, ug sa ingon dili niya gamiton ang talanton nga gamay. [Tan-awa sa Mateo 25:14–30.] Dili ba kini mahisama sa laktod sa sitwasyon sa uban natong mga elder? Nag-ingon ang usa ka elder, “Usa lamang ako ka panday, o mananahi, o tingali usa lamang ka tighakot og tisa [katabang sa tighan-ay og tisa], busa dili kini igsapayan kon unsay akong pamatasan, kon buhaton ko ba o dili sa tinud-anay ang akong mga katungdanan diha sa akong ubos nga kahimtang. Apan kini mahimong lahi kaayo kon ako anaa sa mas dako ug inila nga katungdanan.”

Hunong, akong igsoon; ayaw itugot ang imong kaugalingon nga malingla sa ingon nga makadani nga mga hunahuna. Kini tinuod nga ikaw usa lamang ka tighakot og tisa, apan hinumdumi nga ikaw usa ka elder sa Israel, ikaw usa ka sinugo ni Ginoong Jesukristo, ug kon ikaw anaa sa pagtuman sa imong katungdanan ikaw naghupot niana nga ang kalibutan dili makahatag ni makakuha; ug ikaw may tulubagon ngadto sa Dios alang sa matinuorong paggamit sa talento diin ikaw gihimo niya nga magbalantay, madako kini o magamay.

Usab, ikaw may pila ka impluwensya sa uban, ug bisan kini gamay kaayo makaapekto kini og pipila ka tawo o mga tawo, ug alang sa mga resulta sa inyong impluwensya kapin o kulang may tulubagon. Ikaw, busa, dawaton mo kini o dili, nakapangako og responsibilidad sa atubangan sa Dios ug sa tawo nga dili mataligam-an ug gikan diin ikaw dili mapapahawa kon gusto ninyong amumahan ang pangalan nga inyong gidala.

Ug unsa ang umaabut niana nga tawo? Ako moingon nga kon siya mohatag og pagtahud sa iyang calling, ug makaplagan nga matinud-anon sa pagsalig nga gihatag diha kaniya, ang iyang mga pagpaabut alang sa kaluwasan ug kahimayaan diha sa gingharian sa Dios sama lamang ka maayo ni bisan kinsa nga tawo. Kon siya nakasabut sa iyang katungdanan ug nagpuyo subay niini, ang iyang mga pagpaabut sama ka maayo ni bisan kinsa nga tawo nga mipuyo sukad sa mga panahon ni amahang Adan hangtud karon; ug kini ingon usab lamang ka importante nga siya modala sa iyang kaugalingon sa hustong pamatasan sumala sa kahimtang nga iyang gilaktan, sama nga ang ubang tawo gikinahanglan, kinsa mahimong tawgon sa paglihok diha sa usa ka mas taas nga katungdanan; o, sa lain nga pagkasulti, kinsa nahimo nga magbalantay sa usa ka mas dako nga gidaghanon sa mga talento. …

… Ang Ginoo wala magkinahanglan og daghan diha sa tawo kinsa nagbaton og usa lamang ka talento, kay kaniya kinsa nagbaton og labaw pa kay sa usa; apan, sumala niana nga anaa kaniya, busa kini gikinahanglan gikan kaniya. Busa, himoa nga ang tanan, madasig, ug mosiksik sa pagpalambo sa daghang mga talento nga anaa kanila, ug himoa siya kinsa tingali adunay usa ka talento sa paggamit niini ug sa dili paglubong niini sa yuta; nga mao, himoa siya kinsa napanalanginan og gamay nga abilidad sa pagpausbaw sa iyang kaugalingon, ug sa dili pagbagulbol tungod kay ang kinaiyahan mahimong dili kaayo manggihatagon kaniya sama ngadto sa iyang mas swerte nga igsoong mga lalaki. Magpakatagbaw kita sa atong sitwasyon sa kinabuhi, ug kinahanglan nga dili kaayo magmatinguhaon kutob nga kita makapangandoy, kinahanglan kitang maninguha nga mahimong makugihon sa pagpalambo niini, kanunay nga mobati sa pagkamapasalamaton alang sa atong pagkatawo, ug ilabi na alang sa Espiritu sa Dios nga atong nadawat tungod sa pagkamasulundon ngadto sa Ebanghelyo. …

Nahinumdom ako nga nagbasa og istorya … kabahin sa usa ka tawo kinsa, tungod sa iyang kaalam ug gugma sa yutang natawhan, nahimong bantugan kaayo, apan pinaagi sa kasina gihatagan og katungdanan nga gihunahuna nga hilabihan ka ubos. Sa pagsugod sa mga katungdanan niini giingon nga siya mihimo niining importante nga sulti: “Kon ang buhatan dili mopasidungog kanako ako mopasidungog sa buhatan.” Daghan nga mga kalisud ang malikayan, ug ang atong kahimtang ug sitwasyon mahimong mas labaw ka madasigon kon kitang tanan mopasidungog sa buhatan diin kita gitawag sa paglihok. Kita gisultihan nga ang Ginoo mismo mihimo og mga saput alang sa atong unang mga ginikanan, o, sa lain nga pagkasulti, niana nga okasyon milihok isip usa ka mananahi, usab nga si Jesus usa ka karpentero. Karon, ang Manluluwas tingali usa ka talahuron ug matinuoron nga karpentero, o dili gayud unta siya mapahinungdan sa katungdanan nga iyang gihuptan pagkahuman. Kon atong madani ang mga kaigsoonan sa pagsinati sa importansya sa paglihok nga matinuoron ug matinud-anon diha sa ilang tagsa-tagsa ka mga calling, daghan sa mga kasamok ug sa mga kahasol nga kita karon nagsinati malikayan, ug ang buhat sa Ginoo mopadayon uban sa dobleng kakusgon, ug ang tanan niyang mga katuyoan mahimong mas kusog ug dali nga mahuman; ug bisan pa, isip usa ka katawhan, kita mas maandam og maayo kay kanato karon alang sa pagpadayag sa iyang kabubut-on. …

Hinaut nga ang Dios mopanalangin kaninyo, akong mga kaigsoonan, ug makahimo kaninyo sa paglihok kanunay isip maalamong magbalantay uban niana nga gisalig kaninyo.⁸ [Tan-awa sa sugyot 4 sa pahina .]

Kon kita moserbisyo sa Dios uban ang hugot nga pagtuo, kusog, ug kamaya, Siya naglig-on ug nagtabang kanato nga molampos.

Ako moingon, paserbisyoha ang mga tawo sa Dios sa matinud-anon ug makugihon nga paagi, ug pagmaya. … Adunay mga panahon nga kon ang mga tawo anaa sa mga kahimtang diin kini mahimong malisud kaayo, kon dili imposible, ang pagpakita og malipayong panagway. Apan kana nga mga panahon dili kanunay. ⁹

Kon nahibalo kita nga ang atong relihiyon tinuod kinahanglan unta nga kita ang labing maunungon nga mga tawo sa tibuok kalibutan ngadto sa kawsa nga atong gidawat. Ingon nga atong nahibaloan, o kinahanglan nga mahibaloan, nga ang ebanghelyo nga atong nadawat nagsaad sa tanan nga ang atong mga kasingkasing makapangandoy, kon kita matinud-anon, kinahanglan nga kita magmatinud-anon pag-ayo, maunungon, makugihon ug mapaninguhaon sa pagtuman sa mga plano ug sa mga sugo sa Ginoo samtang Siya nagpadayag niini matag karon ug unya pinaagi sa Iyang mga sulugoon. Kinahanglan unta nga kita dili mobaliwala o mopabaya sa pag-atiman sa atong mga katungdanan, apan uban sa atong tanang gahum, kusog, ug mga kalag kinahanglan nga maningkamot kita sa pagsabut sa kahulugan sa atong calling ug ang kinaiya sa buhat nga kita nagbuhat.

Sa panahon nga si Jesus dinhi sa yuta, gimandoan niya ang Iyang mga disipulo sa paglakaw ug pagsangyaw sa ebanghelyo nga walay puntil o sudlanan, nga dili una maghunahuna kon unsa ang ilang kan-on, o imnon, o isul-ob; apan sa paglakaw lamang ug sa pagpamatuod kabahin niadto nga mga butang nga gipadayag ngadto kanila. Sa pagbuhat niini ilang naangkon ang mga panalangin sa Makagagahum, ug ang kalampusan nakita diha sa ilang tanan nga mga paningkamot. Sila siguradong molampus; ug walay gahum nga makababag sa ilang dalan ug makapugong kanila sa pag-ani sa labing gilauman nga kalampusan tungod kay sila nagpadayon diha sa kalig-on sa Makagagahum sa pagbuhat sa Iyang kabubut-on, ug kini Iyang buhat ang pag-amuma ug pagsuporta kanila ug sa paghatag kanila sa tanan nga gikinahanglan sa paglampus. Pinaagi sa pagkamasulundon sa mga sugo sa Ginoo ilang naangkon sa ilang mga kaugalingon ang mga panalangin sa kinabuhi uban ang pribilehiyo sa pagbangon sa buntag sa unang pagkabanhaw, ug sila dihay kasigurohan nga tungod sa ilang mga buhat walay gahum dinhi sa yuta nga makalampus sa pagbabag kanila. Kini mao ang matang sa mga umaabut nga gusto nako, kon diha pa ko sa ilang kahimtang, o sa bisan hain nga kahimtang, tungod kay sa mahunahunaon ang ideya sa katapusan nga kalampusan sa bisan unsa nga paninguha maayo kaayo.

Karon kon ang mga apostoles pa unta, kay sa nagbuhat sa unsay gisugo kanila, naghunahuna nga pinaagi sa pagbuhat og lain nga butang sila makatuman gihapon sa sama nga katuyoan, dili unta sila magmalampuson og maayo sa ilang mga buhat, ni sila makabaton niana nga kasigurohan diin ubos sa tanan nga mga pagsulay ug mga pagpanggukod nga ilang naandan sa walay pagduhaduha alang kanila usa ka tinubdan sa kanunay nga kalipay ug katagbawan.

… Kon ang mga apostoles o ang mga seventy sa mga panahon ni Jesus naghanduraw nga sila makatuman sa mga misyon nga gihatag diha kanila pinaagi sa pagtukod og arka sama sa gibuhat ni Noe, o nagtukod og mga kamalig ug nagtipig og mga lugas sama sa gibuhat ni Jose sila dako unta kaayo og kasaypanan.

Si Jose sa yuta sa Ehipto gitawag diha sa pagbuhat og pila ka matang sa mga katungdanan, nga gikinahanglan diha kaniya. Wala siya gitawag sa pagsangyaw sa ebanghelyo nga walay puntil o sudlanan; apan sa pagtukod og mga kamalig, ug sa paggamit sa tanan niya nga impluwensya ngadto sa Hari, mga harianon ug mga katawhan sa Ehipto sa pagtipig og mga lugas sa pagpanalipod sa panahon sa kagutom. … Karon pananglit si Jose mitrabaho ug mitukod og arka, dili unta siya dawaton sa Ginoo, ni makaluwas sa katawhan sa Ehipto ni sa pamilya sa iyang amahan. Sa diha nga si Noe gisugo sa pagtukod og arka, pananglit kon mitukod siya og mga kamalig, siya ug ang iyang pamilya wala unta maluwas. Busa kabahin sa atong mga kaugalingon, kon ang mga katungdanan gikinahanglan diha kanato, … bisan unsa nga gikinahanglan kanato nga ipabuhat sulod sa mga utlanan sa gingharian sa Makagagahum, kinahanglan nga kita maglakaw diha sa kinaiya niini nga mga panginahanglanon ug buhaton kini kon kita makaangkon og gahum ug impluwensya sa atong Dios.¹⁰ [Tan-awa sa sugyot 5 sa pahina 226.]

Ang buhat sa Ginoo usahay malisud, apan kini nagdala og dako nga kalipay.

Masinati nato ang daghan nga mga butang nga may kalabutan niini nga trabaho nga dili maayo, apan adunay dako nga kalipay kauban niini. Kon atong hinumduman ang atong mga determinasyon sa paghalad sa atong mga kaugalingon ngadto sa kawsa sa kamatuoran ug sa paghupot sa atong mga pakigsaad, makabaton kita og dako nga kalipay, tungod kay ang diwa sa atong mga calling ngari kanato, nga kon wala ang mao nga diwa dili kita makaapas sa lakang sa gingharian sa Dios.¹¹

Kinahanglan nga atong bag-ohon ang atong mga pakigsaad diha sa atubangan sa Dios ug sa balaang mga anghel, nga kita mohimo, uban sa Dios isip atong katabang, moalagad kaniya nga mas matinud-anon sa umaabut nga tuig kay sa atong nahimo sa nangagi, nga ang atong dayag ug pribadong kinabuhi, ang atong mga lihok ug diwa ug impluwensya nga atong gigamit mahimong subay sa motto nga, “Ang Gingharian sa Dios o wala.” Ako nagsalig … nga ihalad nato ang atong mga kaugalingon sa bug-os ngadto sa serbisyo sa atong Dios sa pagtukod sa iyang Zion dinhi sa yuta, makugihong nagtrabaho sa katuyoan sa kamatuoran ug sa pagkamatarung dinhi sa yuta, hangtud kini mahimong kalipay ngari kanato nga nagbuhat og maayo, nga kini mahimong kinaiya ngari kanato ang pagserbisyo sa Dios ug sa pagsunod sa iyang mga sugo, ug sa pagsunod sa celestial nga balaod, nga kita mahimong makapahimulos og maayo sa Balaang Espiritu diha sa atong mga kasingkasing nga mahimong mabuntog nato ang kalibutan ug ibutang ang celestial nga balaod diha sa atong mga hunahuna ug ipakita kini diha sa atong mga lihok; nga atong masabtan pag-ayo ang atong mga kaugalingon ug ang atong mga pribilehiyo nga kita niining kinabuhia mahimo nga makabaton og daku-dako nga bahin sa mga panalangin nga kalabut ngadto sa celestial nga balaod, ug pagapahimuslan didto sa celestial nga kahimayaan.¹² [Tan-awa sa sugyot 6 sa pahina 226.]

Mga Sugyot alang sa Pagtuon ug Pagtudlo

Hunahunaa kini nga mga ideya samtang ikaw nagtuon sa kapitulo o samtang ikaw nangandam sa pagtudlo. Alang sa dugang nga tabang, tan-awa sa mga pahina v–viii.

Ribyuha ang asoy diha sa mga pahina 215–16. Unsa nga mga pulong ang inyong gamiton sa paghulagway sa kinaiya ni Lorenzo Snow mahitungod sa pagserbisyo sa Ginoo? Paghunahuna mahitungod kon unsa ang inyong mabuhat sa pagsunod sa iyang ehemplo.
Hunahunaa ang seksyon nga nagsugod sa pahina 217. Ngano sa inyong hunahuna nga ang pagkamiyembro diha sa Simbahan nagdala og ingon ka dako kaayo nga mga responsibilidad? Unsa ang kahulugan niini diha kaninyo nga mahimong sinugo ni Kristo?
Gitudlo ni Presidente Snow nga ang atong mga calling diha sa Simbahan mga oportunidad sa “pagtabang sa katubsanan” sa mga anak sa Dios (mga pahina ). Sa unsa nga paagi kaha kini nga pagsabut nakaapekto sa paagi nga kita nagserbisyo diha sa Simbahan?
Miingon si Presidente Snow nga kita kinahanglan nga makugihong magserbisyo, dili igsapayan kon unsa ka gamay ang atong responsibilidad (mga pahina 219–23). Kanus-a ka nakakita og usa ka tawo nga nagpasidungog og gamay nga calling o buluhaton?
Basaha ang seksyon nga nagsugod sa pahina 223. Sa unsa nga mga paagi nga ang hugot nga pagtuo, kusog, ug kamaya nag-impluwensya sa atong pagserbisyo?
Basaha ang katapusan nga seksyon sa kapitulo (pahina ). Kanus-a ka nakasinati og hingpit nga kalipay sa pag-serbisyo sa gingharian sa Ginoo? Sa unsa nga paagi kita makakaplag og kalipay sa atong pagserbisyo bisan kon ang atong mga buluhaton dili makapahimuot? Unsa ang atong mabuhat sa pagtabang sa mga kabataan ug mga kabatan-onan sa pagserbisyo sa Ginoo sa matinud-anong paagi?

May Kalabutan nga mga Kasulatan: Salmo 100:2; 1 Mga Taga-Corinto 12:12–31; Jacob 1:6–7; 2:3; Mosiah 4:26–27; D&P 64:33–34; 72:3; 76:5–6; 107:99–100; 121:34–36

Tabang sa Pagtudlo: “Paminaw og maayo sa mga komentaryo sa mga estudyante. Ang inyong ehemplo moawhag kanila sa pagpaminaw og maayo sa usag usa. Kon ikaw wala makasabut sa komentaryo sa usa ka tawo, pangutana. Mahimong moingon ka, ‘Maora og wala ko makasabut. Mahimo ba nga imong ipasabut kana pag-usab?’ o ‘Mahimo ba nga mohatag ka kanako og ehemplo sa unsay imong gipasabut?’” (Pagtudlo Walay Labaw ka Mahinungdanon nga Tawag, 64).

Elder Lorenzo Snow

“Kon ikaw anaa sa pagtuman sa inyong katungdanan ikaw naghupot niana nga ang kalibutan dili makahatag ni makakuha.”