Kapitulo 12

Ikapulo, usa ka Balaod alang sa Atong Proteksyon ug Kalamboan

“Ang balaod sa ikapulo mao ang usa sa labing importante nga sukad napadayag sa tawo. … Pinaagi sa pagsunod niini nga balaod ang mga panalangin sa pag-uswag ug kalampusan ihatag ngadto sa mga Santos.”

Gikan sa Kinabuhi ni Lorenzo Snow

Sa sayo niadtong Mayo 1899, si Presidente Lorenzo Snow mibati nga naaghat sa pagbisita sa siyudad sa St. George ug sa ubang mga pinuy-anan sa habagatang Utah. Dali siyang misugod sa pag-organisar og grupo sa mga tawo, lakip na sa pipila ka mga General Authority, sa paghimo sa taas nga biyahe uban kaniya.

Sa dihang si Presidente Snow mi-organisar sa pagbiyahe, wala niya sultihi ang tanan nganong moadto sila—siya mismo wala masayud sa rason. “Sa dihang mibiya kami sa Salt Lake,” misulti siya sa kaulahian, “wala kami masayud unsay among buhaton sa pagbisita niining mga pinuy-anan sa habagatan.”¹ Apan pagka-Mayo 17, sa wala madugay human moabut ang mga nagbiyahe didto sa St. George, ang kabubut-on sa Ginoo “klaro nga napakita” ngadto sa Iyang propeta.² Sa usa ka miting nga gipahigayon pagka-Mayo 18, 1899, si Presidente Snow namahayag:

“Kini ang pulong sa Ginoo nganha kaninyo, akong mga kaigsoonan, nga kamo kinahanglang mopahiangay ngadto nianang gikinahanglan gikan kaninyo isip katawhan kinsa aduna niining mahimayaong mga kahigayunan sa kahimayaan ug sa himaya nga anaa sa inyong atubangan. Unsa kini? Dili ba, usa kini ka butang nga gibalik-balik nganha kaninyo matag karon ug unya hangtud mapul-an na kamo og paminaw niini. … Ang pulong sa Ginoo nganha kaninyo dili bag-o nga butang; ingon lamang kini niini: ANG PANAHON MIABUT NA KARON ALANG SA MATAG SANTOS SAULAHING MGA ADLAW, KINSA NAGTINGUHA SA PAGPANGANDAM ALANG SA UMAABUT UG MOBARUG NGA LIG-ON DIHA SA TUKMANG PUNDASYON, SA PAGBUHAT SA KABUBUT-ON SA GINOO UG SA PAGBAYAD SA IYANG IKAPULO SA HINGPIT. Kana ang pulong sa Ginoo nganha kaninyo, ug mao kini ang pulong sa Ginoo ngadto sa tanang lumulupyo sa tibuok yuta sa Zion. Human sa akong pagbiya kaninyo ug hunahunaon ninyo kini, inyong makita sa inyong kaugalingon nga ang panahon miabut na nga ang matag tawo kinahanglang mobarug ug mobayad sa iyang ikapulo sa hingpit. Ang Ginoo mipanalangin kanato ug naluoy kanato sa miagi; apan adunay moabut nga mga panahon nga ang Ginoo momando kanato sa pagbarug ug pagbuhat nianang Iyang gisugo ug dili gayud kini isalikway. Unsay akong gisulti kaninyo niini nga Stake sa Zion mao usab ang akong isulti ngadto sa matag Stake sa Zion nga naorganisar. Walay lalaki o babaye nga nakadungog sa akong gisulti karon ang mobati og kalipay kon siya napakyas sa pagbayad og hingpit nga ikapulo.”³

Sa iyang miaging 50 ka tuig isip Apostol, si Presidente Snow tagsa ra mohisgut sa balaod sa ikapulo diha sa iyang mga pakigpulong. Kana nausab didto sa St. George, Utah, tungod sa pagpadayag nga iyang nadawat. “Ako wala pay mas hingpit nga pagpadayag sukad,” sa kaulahian siya miingon, “kay sa [pagpadayag] nga akong nadawat kabahin niini nga hilisgutan sa ikapulo.”⁴ Gikan sa St. George, siya ug ang iyang mga kauban sa biyahe miadto sa mga kalungsuran sa habagatang Utah ug sa ilang pagpadulong og pauli sa Siyudad sa Salt Lake, mipasiugda og 24 ka mga miting. Si Presidente Snow mipahayag og 26 ka mga pakigpulong. Matag higayon nga namulong siya, mitambag siya sa mga Santos sa pagsunod sa balaod sa ikapulo.

Ang grupo mibalik sa Siyudad sa Salt Lake pagka-Mayo 27. Usa ka reporter sa newspaper nakaobserbar, “Ang Presidente mas lig-on tan-awon ug mas lagsik karon kay sa adlaw nga mibiya siya sa Salt Lake.” Sa pagtubag sa komentaryo nga siya “nakalahutay ra gayud sa biyahe,” ang 85 anyos nga propeta miingon: “Oo, mao kana ang gisulti nilang tanan. … Nakatabang nako ang biyahe. Wala gayud ako sukad mobati og mas nindot sa akong kinabuhi. Akong gibati nga ang Ginoo mipaluyo kanako agig tubag sa mga pag-ampo sa mga Santos.”⁵

Agig dugang sa komentaryo sa iyang kalagsik, iyang gipakigbahin ang iyang mga pagbati mahitungod sa hugot nga pagtuo ug pagkamatarung sa mga Santos didto sa habagatang Utah. Miingon siya nga siya ug ang iyang mga kauban gidawat “uban sa mainitong mga pagpakita og kalipay ug pasalamat.”⁶ Siya miingon nga sa dihang iyang gitambagan ang mga Santos sa pagsunod sa balaod sa ikapulo, “ang Espiritu sa Ginoo mikunsad diha sa mga tawo, ug sila nagmaya sa hilabihan, ug sa ilang kasingkasing sila misaad nga sila motuman niini nga baruganan sa tanan niini ug diha sa diwa niini.”⁷ Agig tubag sa pangutana kabahin sa kinatibuk-ang kahimtang sa mga tawo, miingon siya: “Nagpuyo sila sa komportable nga mga panimalay, nindot kaayo silang magsul-ob og sinina, ug makita nga buhong sa maanindot nga mga butang sa yuta nga makaon ug mainom. Sa Stake sa St. George ang mga tawo nag-antus sa [usa ka] grabe nga huwaw, ang kinagrabihan nga huwaw nga miabut sa nasud, apan sila adunay hugot nga pagtuo nga sa dili madugay moulan ra.”⁸

Pagka-Mayo 29 ug 30, si Presidente Snow mihatag og duha ka mga pakigpulong kabahin sa balaod sa ikapulo, una ngadto sa mga opisyales sa Young Ladies’ Mutual Improvement Association ug dayon sa mga opisyales sa Young Men’s Mutual Improvement Association.⁹ Sa panapos sa ikaduhang pakigpulong, si Elder B. H. Roberts sa Seventy mihatag sa mosunod nga resolusyon, nga gisuportahan sa tanang mitambong: “Nadesisyunan: Nga kami modawat sa doktrina sa ikapulo, sama sa gipresentar ni Presidente Snow, isip pulong ug kabubut-on karon sa Ginoo ngari kanamo, ug kami modawat niini sa tibuok namong kasingkasing; kami mismo mosunod niini, ug buhaton namo kutob sa among mahimo sa pag-awhag sa mga Santos sa Ulahing mga Adlaw sa pagbuhat sa ingon.”¹⁰ Pagka-Hulyo 2, ang tanang mga General Authority ug mga nagrepresentar sa tanang mga stake ug ward sa Simbahan mitambong sa usa ka balaang panagtigum didto sa Templo sa Salt Lake, nagpuasa ug nag-ampo sa pagpangandam sa miting. Didto silang tanan midawat sa resolusyon.¹¹ Si Presidente Snow matinuoron niini nga resolusyon sa iyang kaugalingon, nagtudlo sa balaod sa ikapulo diha sa daghang mga stake ug nagdumala sa samang paningkamot sa ubang mga lider sa Simbahan.

Sa mga bulan human sa pagbisita ni Presidente Snow sa habagatang Utah, nakadawat siya og balita nga ang mga Santos sa Ulahing mga adlaw mibag-o sa ilang pasalig sa pagsunod sa balaod sa ikapulo. Kini nga balita nakahatag kaniya og “hilabihan nga kalipay ug kamaya,”¹² kay nasayud siya nga pinaagi sa padayon nga pagsunod niini nga balaod, “ang mga panalangin sa Labawng Makagagahum [i]bu-bu niini nga mga tawo, ug ang Simbahan [mo]uswag sa gikusgon ug gipaspason nga wala gayud masinati sukad.”¹³

Si Presidente Snow balik-balik nga mipaniguro sa mga Santos nga sila panalanginan tagsa-tagsa, sa temporal ug sa espiritwal, kon sila mosunod sa balaod sa ikapulo.¹⁴ Kana nga saad sa usa ka bahin natuman niadtong Agosto 1899, sa dihang ang mga tawo sa St. George nakatagamtam og temporaryong kahupayan gikan sa ilang huwaw; ang ilang hugot nga pagtuo gigantihan og 7.44 ka sentimetro nga ulan, labaw kay sa ilang nadawat sa miaging 13 ka bulan.¹⁵ Si Presidente Snow misaad usab nga ang pagkamasulundon sa balaod sa ikapulo makahatag og mga panalangin sa tibuok Simbahan. Gibati niya ang kasigurohan nga ang mga ikapulo siguradong mopalingkawas sa Simbahan gikan sa mga utang niini, nga miabut agig resulta sa pagpanggukod.¹⁶ Kini nga saad natuman niadtong 1906, lima ka tuig human sa iyang kamatayon. Niadtong Abril 1907 nga kinatibuk-ang komperensya, si Presidente Joseph F. Smith mipahibalo:

“Walay panahon sa kasaysayan sa Simbahan sukad, sa akong pagtuo, nga ang balaod sa ikapulo gituman sa mas daghang mga tawo ug sa mas matinuoron nga paagi kay sa pagtuman sa mga Santos sa Ulahing mga Adlaw niining bag-o lang. Ang mga ikapulo sa mga tawo atol sa tuig 1906, mas labaw kay sa ikapulo sa bisan unsang tuig nga miagi. Kini usa ka maayong timailhan nga ang mga Santos sa Ulahing mga Adlaw naghimo sa ilang katungdanan, nga sila adunay hugot nga pagtuo sa Ebanghelyo, nga sila andam sa pagtuman sa mga sugo sa Dios, ug nga sila nagsunod sa mas matinud-anong paagi kay sa kaniadto. Gusto kong mosulti og laing butang nganha kaninyo, ug ako kining buhaton agig pasidungog, ug kana mao, nga kita, pinaagi sa panalangin sa Ginoo ug pagkamatinud-anon sa mga Santos sa pagbayad sa ilang ikapulo, nakabayad sa atong mga utang. Karon ang Simbahan ni Jesukristo sa mga Santos sa Ulahing mga Adlaw walay utang nga dolyar nga dili mabayran sa usa ka higayon. Sa katapusan kita anaa sa kahimtang nga kita makabayad dayon. Dili na kita kinahanglan nga manghulam pa, ug dili kini mahitabo kon ang mga Santos sa Ulahing mga Adlaw mopadayon sa pagsunod sa ilang relihiyon ug motuman niining balaod sa ikapulo.”¹⁷ [Tan-awa sa sugyot 1 sa pahina 193.]

Mga Pagtulun-an ni Lorenzo Snow

Ang balaod sa ikapulo sayon nga sabton ug mahimong masunod sa tanan.

Ako nangamuyo kaninyo sa pangalan sa Ginoo, ug ako nag-ampo nga ang matag lalaki, babaye ug bata … mobayad og ikanapulo nga bahin sa ilang kita isip ikapulo.¹⁸

Ang [ikapulo] dili lisud nga balaod. … Kon ang usa ka tawo makadawat og napulo ka dolyar, ang iyang ikapulo usa ka dolyar; kon siya makadawat og usa ka gatus, ang iyang ikapulo diyes. … Sayon ra kaayo kining sabton.¹⁹

[Ang tawo tingali mangutana sa iyang kaugalingon] Pila man niining ikapulo ang akong ihatag? Dili ba ko mahimong mokuha og gamay niini alang sa akong kaugalingon? Ang Ginoo adunahan kaayo ug dili ko motuo nga mahasol Siya kon magkuha ko og gamay para sa akong kaugalingon; ug busa gikuhaan og gamay sa tawo. Apan kanang gamay kaayo nga gikuha mohasol nianang tawhana, kon ang iyang konsensya sama sa mga konsensya sa kadaghanan sa mga Santos sa Ulahing mga Adlaw. Kini mohasol kaniya kon maadlaw, ug usab kon maghunahuna siya inigka-gabii. Dili niya maangkon kanang kalipay nga iyang pribilehiyo nga matagamtam—kini mawala kaniya.²⁰

Ang tinipik sa ikapulo dili na ikapulo, ni ang pagtuslob lamang sa katunga sa lawas sa tawo usa ka pagbunyag.²¹

Walay lalaki o babaye nga dili makabayad sa ikanapulo nga bahin sa unsay iyang nadawat.²²

Mga kaigsoonan, gusto namo nga kini nga butang inyong i-apil diha sa pag-ampo. … Imbis nga magbaton sa ingon nga mga ideya nga dili angay sama sa uban kalabut sa kwarta, kita kinahanglan nga mobayad sa atong ikapulo. … Unsay gikinahanglan sa Ginoo gikan kanato mao ang pagbayad sa atong ikapulo karon. Ug Siya nagpaabut sa matag tawo sa umaabut nga mobayad sa iyang ikapulo. Kita nasayud kon unsa ang ikanapulong bahin; ato kanang ibayad sa Ginoo. Dayon makaadto kita sa Bishop diha sa kamatinuoron ug mangayo og rekomend nga moadto sa templo.²³

Ako moingon kaninyo pinaagi sa pangalan sa Ginoong Dios sa Israel, kon mobayad kamo og ikapulo gikan karon, ang Ginoo mopasaylo sa tanang nanglabay nga [wala pagbayad og ikapulo] ug ang mga panalangin sa Labawng Makagagahum igabu-bu ngadto niini nga katawhan.²⁴

Gusto ko nga kini nga baruganan matisok gayud sa atong mga kasingkasing aron dili gayud nato kini makalimtan. Sama sa akong gibalik-balik og sulti, nasayud ako nga ang Ginoo mopasaylo sa mga Santos sa Ulahing mga Adlaw sa ilang pagbaliwala kaniadto sa pagbayad og ikapulo, kon sila karon maghinulsol ug mabinantayon nga mobayad sa ikapulo sukad karon.²⁵ [Tan-awa sa sugyot 2 sa pahina 193.]

Sa atong pagbayad sa ikapulo, kita nakatampo sa buhat sa Simbahan.

Kini nga Simbahan dili makapadayon gawas kon adunay kinitaan, ug kini nga kinitaan gihatag sa Dios [pinaagi sa balaod sa ikapulo]. Ang atong mga templo, diin atong madawat ang kinatas-an nga mga panalangin nga sukad gihatag sa mortal nga tawo, gitukod pinaagi sa kinitaan. Dili gayud kita makapadala sa … mga Elder ngadto sa kalibutan aron pagsangyaw sa Ebanghelyo, sama sa ato karong gibuhat, gawas kon adunay kinitaan sa pagbuhat niini. … Dayon adunay liboan ka laing mga butang nga kanunayng nahitabo diin gikinahanglan ang maong kwarta. …

Kon ang ubang mga Santos sa Ulahing mga Adlaw wala makabayad sa ikapulo ang atong upat ka mga Templo dinhi [pagka 1899] dili gayud unta matukod, ug ang paghukom ug mga balaod sa Dios kalabut sa kahimayaan ug himaya dili gayud unta mapabilin. Ang unang baruganan sa paglihok ngadto sa mga Santos sa Ulahing mga Adlaw mao ang pagbalaan sa yuta pinaagi sa pagtuman niini nga balaod sa ikapulo ug pagpahimutang kanila sa usa ka kahimtang diin sila makadawat sa mga ordinansa kalabut sa kahimayaan ug himaya sa atong mga nangamatay. ²⁶ [Tan-awa sa sugyot 3 sa pahina 193.]

Ang Ginoo mopanalangin kanato sa temporal ug sa espirituhanon nga paagi samtang kita nagtuman sa balaod sa ikapulo.

Ang balaod sa ikapulo mao ang usa sa labing importante nga sukad gipadayag ngadto sa tawo. … Pinaagi sa pagtuman niini nga balaod ang mga panalangin sa kauswagan ug kalampusan ihatag ngadto sa mga Santos.²⁷

Kon kita mosunod niana nga balaod … ang yuta mabalaan, ug kita mahimong takus nga modawat sa mga panalangin sa Ginoo ug paluyohan ug suportahan sa atong pinansyal nga mga panginahanglan ug diha sa tanan nga atong buhaton, sa temporal ingon man usab sa espiritwal.²⁸

Ang temporal nga kaluwasan niini nga Simbahan … nagdepende sa pagsunod niini nga balaod.²⁹

Ang kakabus maanaa taliwala sa mga Santos sa Ulahing mga Adlaw, ug kanunayng maanaa hangtud nga kita mosunod sa balaod sa ikapulo.³⁰

Ako nagtuo gayud nga kon ang mga Santos sa Ulahing mga Adlaw mosunod niini nga balaod kita makapangayo nga maluwas gikan sa matag dautan nga moabut kanato.³¹

Ania ang balaod nga gipadayag alang gayud sa atong proteksyon ug kaluwasan, ingon man usab alang sa atong pag-uswag diha sa dalan sa kamatarung ug kabalaan; usa ka balaod diin ang yuta nga atong gipuy-an mahimong mabalaan; usa ka balaod diin ang Zion mahimong matukod ug ma-establisar nga dili na gayud malumpag o matangtang sa dautan ug dili diosnon nga mga tawo gikan sa nahimutangan niini.³²

Kita adunay mga templo, ug kita nakadawat og mga panalangin nga may kalabutan niini, gani ang labing mahinungdanon nga mga ordinansa nga gihatag ngadto sa tawo dinhi sa yuta sukad, tungod sa atong pagkamasulundon niini nga balaod.³³

Dili gayud kita mahimong andam nga makita ang nawong sa Dios hangtud nga kita mabinantayon sa pagbayad sa mga ikapulo ug ubang mga katungdanan.³⁴

Klaro ang akong gisulti, ug ako moingon nga gikan kini sa Ginoo ang unsay akong gisulti kaninyo kabahin sa ikapulo. Lihok karon sumala sa Espiritu sa Ginoo, ug ang inyong mga mata maabli.³⁵ [Tan-awa sa sugyot 4 sa pahina 193.]

Ang mga ginikanan ug mga magtutudlo adunay responsibilidad sa pagbayad sa ikapulo ug dayon motudlo sa mga anak sa pagbuhat sa ingon.

Tudloi ang [mga anak] sa pagbayad sa ilang ikapulo samtang bata pa sila. Kamo mga inahan, tudloi ang inyong mga anak nga kon sila makadawat og bisan unsa nga kwarta kinahanglan sila nga mobayad og ikapulo ngadto sa Ginoo, bisan unsa pa kini ka gamay. Tudloi sila sa pagbayad og hingpit nga ikapulo.³⁶

Angay ug tukma kini nga … ang mga opisyales ug mga magtutudlo [sa Simbahan] kinahanglang dawaton gayud diha sa ilang mga kasingkasing ug sa ilang mga kalag ang diwa niini nga balaod, aron hingpit sila nga angayan nga mopakigbahin niini, ug mopakita sa bag-ong henerasyon sa kaimportante ug kasagrado niini. Kini gimando kaninyo, akong mga kaigsoonan, nga dili lamang mosunod sa balaod nga kamo lang, apan motudlo niini sa uban, bisan sa bag-ong henerasyon, … ug agig balus sa inyong pagdawat sa espiritu niini, kamo makaawhag niini, ug makatudlo niini. …

… Ako naghangyo niini kaninyo, dili lamang mosunod niini, apan motudlo niini ngadto sa mga anak sa mga Santos sa Ulahing mga Adlaw, ug motisok niini sa ilang mga panumduman, aron kon moabut na sila sa ilang edad sa pagkamay-tulubagon, kini maingon nga sila natudloan niini, ug sila nagtuman na niini sukad pa sa ilang kabatan-on.³⁷ [Tan-awa sa sugyot 5 sa ubos.]

Mga Sugyot alang sa Pagtuon ug Pagtudlo

Hunahunaa kini nga mga ideya samtang ikaw nagtuon sa kapitulo o samtang ikaw nangandam sa pagtudlo. Alang sa dugang nga tabang, tan-awa sa mga pahina v–viii.

Ribyuha ang asoy ni Presidente Snow sa pagdawat sa pagpadayag kabahin sa ikapulo (mga pahina 183–88). Hunahunaa ang mahitungod sa iyang kaandam nga mobiyahe ngadto sa St. George ug ang kaandam sa mga tawo nga motuman sa balaod sa ikapulo. Unsa ang atong makuha gikan niini nga asoy?
Sa unsang mga paagi nga ang pagbayad sa ikapulo “dili lisud nga balaod”? (Alang sa pipila ka mga ehemplo, tan-awa sa mga pahina 188–89.) Ngano kaha nga ang uban naghunahuna man nga ang balaod sa ikapulo lisud sundon? Sa unsang paagi nga ang mga pagtulun-an ni Presidente Snow makatabang sa tawo nga makabaton og pagpamatuod sa pagbayad og ikapulo?
Tun-i ang seksyon nga nagsugod sa pahina 190. Unsa ang pipila sa mga panalangin nga nadawat nimo ug sa mga minahal pinaagi sa mga building ug mga programa nga gigastuhan pinaagi sa pundo sa ikapulo? Nganong usa man kini ka pribilehiyo nga mobayad og ikapulo?
Si Presidente Snow mipamatuod nga kita panalanginan sa atong pagsunod sa balaod sa ikapulo (mga pahina 190–92). Unsa ang pipila ka mga panalangin ang nahatag sa balaod sa ikapulo nganha sa imong kinabuhi? Sa kinabuhi sa mga sakop sa imong pamilya ug mga higala?
Hunahunaa ang tambag ni Presidente Snow ngadto sa mga ginikanan ug mga magtutudlo (pahina 192). Sa imong hunahuna ngano nga importante nga ang mga anak mobayad sa ilang ikapulo, “bisan unsa pa kini ka gamay”? Unsa ang pipila ka mga paagi sa pagtudlo sa mga anak sa pagbayad sa ikapulo ug mga halad?

May Kalabutan nga mga Kasulatan: Malaquias 3:8–10; D&P 64:23; 119:1–7

Tabang sa Pagtudlo: “Pagbantay nga dili tapuson dayon ang maayong mga panaghisgutan aron lang mahuman ang tanang mga materyal nga imong giandam. Bisan og importante ang paghuman sa materyal, mas importante ang pagtabang sa mga estudyante nga mobati sa impluwensya sa Espiritu, mosulbad sa ilang mga pangutana, mopadugang sa ilang pagsabut sa ebanghelyo, ug mopalig-on sa ilang pasalig sa pagsunod sa mga kasugoan” (Pagtudlo, Walay Labaw ka Mahinungdanon nga Tawag, 64).

Ang Tabernakulo sa St. George. Niini nga building, si Presidente Lorenzo Snow mihatag sa kinaunhan sa iyang mga pakigpulong kabahin sa balaod sa ikapulo.

Si Presidente Snow mitambag sa mga ginikanan ug mga magtutudlo sa pagtudlo sa mga bata sa pagbayad sa ikapulo.

Ang mga pundo sa ikapulo gigamit sa pagbayad sa pagpatukod ug pagmintinar sa mga templo.