Kapitulo 22

Nagbuhat og Maayo ngadto sa Uban

“Pagpalambo og kinaiya sa gugmang putli; pag-andam sa pagbuhat alang sa uban labaw kay sa inyong gipaabut gikan kanila kon ang mga kahigayunan mausab.

Gikan sa Kinabuhi ni Lorenzo Snow

Si Lorenzo Snow ug ang iyang pamilya nalakip sa unang pagpanglalin gikan sa Nauvoo, Illinois. Kauban sa grupo sa uban nga mga pamilya, sila mipaingon sa kasadpan sa estado sa Iowa kaniadtong Pebrero 1846. Ang mga kahimtang sa panahon mihimo sa pagpanglakaw nga malisud —matag adlaw nakigbisog sila sa ulan, snow, ug lapok.

Samtang ang pamilyang Snow mibiyahe usa ka adlaw niana, usa ka sakop sa grupo nangayo kanila og panabang. Gisulat ni Lorenzo Snow diha sa iyang journal nga usa ka tawo “mihangyo nga tugutan ko siya sa pagbutang sa iyang kaban sa akong karomata, miingon nga dili na siya makapas-an niini bisan asa pa.” Ang karomata “puno na kaayo sa mga butang ug kutob sa masulod gikarga,” mihinumdom si Lorenzo, apan “sa gihapon gisultihan ko siya sa pagkarga niini ug sa pagkuyog kanamo.

Sa pagkasunod gabii gisinati sa pamilya ang gitawag ni Lorenzo “og ngil-ad kaayo nga hitabo”: ang motuyok sa ligid sa ilang karomata nabuak. Siya miasoy: “Kusog kaayo ang ulan niadtong higayona ug [kini] tugnaw kaayo. Amo dayong gipabarug ang among tolda [ug] nagdaub og gamay nga kahoy sa hickory. … Ang tubig ug ang lapok lawom kaayo ug dili kami makaadto sa karomata nga dili moubog. … Sa pagkakaron kami mga 24 ka kilometro gikan sa kampo ug 14 o 15 ka kilometro ngadto sa unang balay, ug walay usa kanamo nga mekaniko, ang posibilidad nga mapaayo ang among karomata dili kaayo maayo.”

Sa wala damha, ang tabang miabut gikan sa tawo nga ilang gitabangan sa miaging adlaw. “Ako naguol tungod sa dili maayong hitabo,” miingon si Lorenzo, “sa diha nga siya miduol kanako ug mipahibalo nga ang iyang trabaho mao ang paghimo og karomata ug dali ra nga makaayo sa akong karomata. … Sa diha nga mitugot ang panahon, si Brother Wilson (kana mao ang pangalan sa tawo nga gihisgutan sa ibabaw) mitrabaho ug mihimo og mas maayong motuyok sa ligid kay sa usa nga akong nabuak. Ang among karomata ingon nga naayo na, mibiya kami niini nga dapit, nga nakapuyo og daghang mga adlaw tungod sa ulan ug lapok.”

Alang kang Lorenzo Snow, kini nga kasinatian midugang og kalig-on sa usa ka bililhong leksyon mahitungod sa serbisyo ug panaghigala. Gisulat niya sa iyang journal, “Ang paghatag og usa ka tabang sa kasagaran naggiya ngadto sa pag-angkon og lain.”¹ [Tan-awa sa sugyot 1 sa pahina 310.]

Mga Pagtulun-an ni Lorenzo Snow

Kita anak sa sama nga Langitnong Amahan, ug kita gipadala nganhi sa kalibutan sa pagbuhat og maayo ngadto sa usag usa.

Mga anak kita sa samang Amahan didto sa mga kalibutang celestial. … Kon kita nagkailhanay sa usag usa ingon nga kita kinahanglan, … mas mobati kita og mga kalooy kay sa karon nga panahon, ug adunay tinguha sa matag indibidwal sa paghunahuna kon unsaon nila paghimo og kaayohan ang ilang mga kaigsoonan, kon unsaon nila paghupay ang ilang mga kaguol ug paglig-on kanila diha sa kamatuoran, kon unsaon [kaha nila] pagkuha sa kangitngit gikan sa ilang mga hunahuna. Kon kita nakasabut sa usag usa ug sa tinuod nga relasyon nga atong gihuptan ngadto sa usag usa, bation nato ang kalahi sa atong gibuhat; apan kini nga kahibalo mahimo lamang nga maangkon samtang kita nag-angkon sa Espiritu sa kinabuhi, ug samtang kita matinguhaon sa paglig-on sa uban diha sa pagkamatarung.²

Kita gipadala dinhi sa kalibutan sa pagbuhat og maayo ngadto sa uban; ug sa pagbuhat og maayo ngadto sa uban kita naghimo og maayo sa atong mga kaugalingon. Kinahanglan kanunay nato kining hinumduman, ang bana kalabut ngadto sa asawa, ang asawa kalabut ngadto sa bana, ang mga anak kalabut ngadto sa ilang mga ginikanan, ug ang mga ginikanan kalabut ngadto sa ilang mga anak. Kanunay adunay oportunidad sa pagbuhat og maayo ngadto sa usag usa.³

Ako nag-ampo ngadto sa Dios, diha sa pangalan ni Jesus, nga kamo ug ako maninguha kada adlaw nga mahimong mas matinud-anon og gamay, nga unta kita maninguha nga mas mamaayo og gamay karon kay sa kagahapon, nga unta kita maninguha ug magbaton og gamay pa nga gugma ug pagbati ngadto sa atong mga silingan, ingon nga kita gisultihan nga diha niini nagasukad ang balaod ug ang mga propeta, “sa paghigugma sa Ginoo, nga atong Dios, sa tibuok natong kasingkasing, sa tibuok natong kalag ug sa tibuok natong salabutan, ug sa atong mga silingan sama sa atong mga kaugalingon.” [Tan-awa sa Mateo 22:37–40.] “Buhati ang mga tawo sa bisan unsay buot ninyo nga ilang pagabuhaton kaninyo.” Kini sumala sa balaod ug sa mga propeta. [Tan-awa sa Mateo 7:12.] Kini ang mga baruganan nga kinahanglan ug kinahanglan gayud nga atong makat-unan. … Kita kinahanglan nga managhigala bisan asa ug ngadto sa tanan. Walay Santos sa Ulahing mga Adlaw nga nagdumot sa kalibutan: apan kita mga higala sa kalibutan, kita napugos nga mahimo, kutob nga sila may kalabutan. Kita kinahanglan gayud nga makakat-on sa paglugway sa atong gugmang putli ug kahago alang sa kaayohan sa tanang mga katawhan. Kini mao ang misyon sa mga Santos sa Ulahing mga Adlaw— dili lamang kini kutob sa atong mga kaugalingon, apan sa pagpakaylap niini sa lagyong dapit, ingon nga kini gikinahanglan nga ilugway ngadto sa tanang katawhan.⁴

Pagmatinuoron, manggiangayon ug mabination, nagbansay og kinaiya sa pagkahalangdon ug pagkadiosnon sa inyong tanan nga mga katuyoan ug mga panaad—sa inyong tanan nga mga lihok ug mga pakigsabut. Pagpalambo og kinaiya sa gugmang putli; pag-andam sa pagbuhat alang sa uban labaw pa kay sa inyong gipaabut gikan kanila kon ang mga kahigayunan mausab. Pagtinguha nga mahimong halangdon, dili sa panan-aw sa kalibutanong mga hunahuna, apan diha sa mga mata sa Dios, ug sa pagkahalangdon pinaagi niini,“Higugmaa ang Ginoo nga atong Dios, sa tibuok ninyong kasingkasing, kalag ug kusog, ug ang inyong mga silingan sama sa inyong mga kaugalingon.” Kinahanglan nga inyong higugmaon ang mga katawhan tungod kay sila inyong mga kaigsoonan ug mga anak sa Dios. Pag-ampo nga makugihon alang niining kinaiya nga manggihatagon, kini nga pagpalambo sa hunahuna ug pagbati ug alang sa gahum ug abilidad sa paghago sa kinasingkasing alang sa kaayohan sa gingharian sa Mesiyas.⁵ [Tan-awa sa sugyot 2 sa pahina 310.]

Nagtubo ang atong kalipay kon kita motabang sa uban nga makakaplag og kalipay.

Kinahanglan kita adunay lig-on nga tinguha sa paghimo og maayo ngadto sa uban. Ayaw kaayo hunahunaa ang atong mga kaugalingon. Ang maayo moabut kanatong tanan kon dili kita maghunahuna sa atong mga kaugalingon kutob sa mahimo, ug maningkamot sa paghimo sa uban nga mas malipayon ug pag-awhag kanila nga mas maduol sa Ginoo. … Kon gibati ang inyong mga kaugalingon og gamay nga kaguol, lingi sa inyong palibut ug tan-awa ang usa ka tawo nga anaa sa mas malisud nga kahimtang kay kaninyo; adtoa siya ug sutaa unsa ang problema, dayon paninguha sa pagsulbad niini uban sa kaalam nga gihatag sa Ginoo kaninyo, ug ang unang butang nga inyong mahibaloan, ang inyong kaguol nawala, mobati kamo og kahayahay, ang Espiritu sa Dios anaa kaninyo, ug ang tanan ingon og nahayagan.⁶ [Tan-awa sa sugyot 3 sa pahina 310.]

Kon atong pangitaon og una ang mga panginahanglan sa uban, kita mas daling mouswag sa atong mga kaugalingon

Ang usa sa labing maayong mga butang nga ang usa ka batan-ong lalaki o sa usa ka batan-ong babaye nga matan-aw, sa pagpaningkamut nga mahimong halangdon, mao ang paghimo sa uban nga halangdon usab ug dili maghunahuna sa paggahin og gamay nga panahon sa pagpalambo sa uban. Ang labing maayo sa pagpalambo sa atong mga kaugalingon mao ang pagbansay sa pagbuhat og maayo ngadto sa uban. Hinumdumi kini kanunay.⁷

Sa pagpaninguha og bisan unsa nga matang sa pagtuon ang usa ka tawo kinahanglan nga magpadayon sa pagtrabaho, ug human matapos ang usa ka kurso kinahanglan motapos siya og lain, ug magpadayon sa pagtrabaho sa paghimo sa iyang kaugalingon nga mahanas niini, ug dili gayud siya mahanas niini og maayo gawas sa pagpakigbahin sa impormasyon ngadto sa uban samtang nagtuon niini. Patrabahoa siya ug papundoka sa iyang mga higala ug panlimbasog sa paghatag kanila sa samang kahibalo nga iyang nadawat, ug niana siya magsugod sa pagtan-aw sa iyang kaugalingon nga nalamdagan niadtong mga butang nga dili unta niya mahibaloan gawas pinaagi sa pagpaninguha niana nga kurso sa pagtudlo ug paghatag sa impormasyon nga anaa kaniya ngadto sa uban. Ang bisan kinsa nga nahimong magtutudlo sa eskwelahan makasabut kaayo kanako niini nga punto. …

Pahinumduma ang tawo nga adunay uban nga anaa sa pagkawalay alamag ug wala mouswag og layo sa kahibalo, kaalam, ug salabutan, ug pahataga siya niana nga kahibalo, salabutan ug gahum ngadto sa iyang mga higala ug mga kaigsoonan, tungod kay siya miuswag og maayo kay kanila, ug pinaagi sa pagbuhat niini iyang madiskubrehan nga ang iyang hunahuna molambo, ug kana nga kahayag ug kahibalo nga iyang naangkon motubo ug mas dali nga modaghan. …

Kon kamo gusto nga makabaton og panaghigala ug mga pagbati sa inyong mga higala buhata ug hupaya sila uban niana nga kahayag nga inyong nadawat, naghinumdum niadtong mga panalangin nga gikan sa Dios, ug nga sa pagbuhat niini nagbuhat lamang kamo unsay kinahanglan nga buhaton sa matag tawo. …

Karon aron makuha sa usa ka tawo ang labing taas ug labing dako nga mga panalangin nganha kaniya, aron sa pag-angkon sa pag-uyon sa Magagahum, ug aron magpadayon nga mouswag sa mga butang kalabut sa pagkamatarung kinahanglan gayud nga siya mobuhat sa tanang mga butang og maayo kutob sa iyang mahimo. Patrabahoa siya ug paandama sa pagsakripisyo alang sa kaayohan sa iyang mga higala. Kon gusto niya nga lig-unon ang iyang kaugalingon, ang labing maayo nga baruganan nga iyang gamiton sa pagbuhat niini mao ang paglig-on sa iyang mga higala. …

… Himoa nga ang inyong mga hunahuna molambo sa pagsabut ug sa pag-amuma sa kaayohan sa inyong mga higala nga naglibut kaninyo, ug kon anaa sa inyong gahum ang pagkuha og mga kaayohan alang sa inyong mga higala buhata ang mao, ug pinaagi sa pagbuhat sa mao, inyong mahibaloan nga kadto nga mga butang nga inyong gikinahanglan mas daling moabut diha kaninyo kay sa inyong trabahoon ang tanan sa pagkuha niini sa inyong kaugalingon nga dili maghunahuna sa kaayohan sa inyong mga higala. Ako nasayud nga kini maayo ug importante nga baruganan.⁸ [Tan-awa sa sugyot 4 sa pahina 311.]

Kon kita magsakripisyo alang sa kaayohan sa uban, mahimo kitang mas matarung.

Kita kinahanglan lamang nga mobati … nga adunay uban nga mga tawo gawas sa atong mga kaugalingon; kinahanglan nga kita motan-aw sa mga kasingkasing ug sa mga pagbati sa uban, ug mahimong mas diosnon kay sa kon unsa kita karon.

… Adunay sakripisyo sa kaugalingon nga pagahimoon alang sa mga kaayohan niadtong kang kinsa kita nakig-uban. Atong nakita kini diha sa Manluluwas, ug ni brother Joseph, ug atong nakita kini sa atong Presidente [Brigham Young]. Si Jesus, si brother Joseph, ug si brother Brigham sa kanunay andam sa pagsakripisyo sa tanan nga anaa kanila alang sa kaayohan sa mga katawhan; kana maoy naghatag ni brother Brigham og gahum sa Dios ug gahum sa mga katawhan, ang pagsakripisyo sa kaugalingon nga pagbati nga iyang gipakita sa tanan nga panahon. Mao usab sa uban; kutob nga sila andam sa pagsakripisyo alang sa uban, busa anaa kanila ang Dios, ug ang mga panalangin sa mahangturon nga mga kalibutan maanaa kanila, ug sila mao ang mag-angkon dili lamang sa mga katungod niini nga kalibutan apan mag-angkon sa mga panalangin sa kahangturan. Kon asa kamo kutob … nagsakripisyo alang sa uban, diha lang usab kutob ang inyong kauswagan diha sa tanang mga butang sa Dios. Karon kon kamo buot nga mokab-ut sa langit ug aron makab-ut ang langit kinahanglang buhaton ninyo kana nga paagi nga gibuhat sa mga anghel nga tua sa langit. Kon buot ninyo nga mahibalo kon sa unsa nga paagi kamo mouswag, sultihan ko kamo, kini pinaagi sa pag-angkon og pagkadiosnon diha kaninyo.

… Ang mga tawo makapahimulos og langit libut kanila sa tanan nga mga dapit. Kita kinahanglan nga motrabaho ug mobuhat niini; kinahanglan gayud nga kita motrabaho ug itukod ang langit dinhi niini nga yuta, bisan pa sa mga dautan nga naglibut kanato, ang mga yawa nga naglibut kanato, ug bisan pa sa pagkaanaay dautan, sa gihapon kinahanglan kita nga motrabaho og maayo ug itukod ang langit dinhi niini nga yuta.

Ang usa ka tawo dili gayud makapahimulos sa langit hangtud siya makakat-on unsaon niya pagkab-ut niini, ug sa paglihok sigon sa mga baruganan niini. Karon paghunahuna og mga tawo, ug hunahunaa ang mga kahimtang nga naglibut kanila 20 ka tuig na ang milabay, … sa panahon nga sila dihay pipila nga gidaghanon sa pagmaya, sa kalinaw, sa kalipay niana nga panahon bisan tuod ang mga butang dili hayahay. Karon sila mahimong nakabaton og hayahay nga mga kahimtang ug katigayunan nga motubag sa ilang temporal nga mga panginahanglan ug mga kinahanglanon, apan kon wala sila makaangkon og mga higala, sa nindot nga mga pagbati sa ilang mga kaigsoonan, dili sila magmalipayon, ug labaw pa sila niadtong milabay nga 20 ka tuig .

… Hinaut ang Ginoo mopanalangin kaninyo mga kaigsoonan, ug unta kamo maghunahuna niining mga butanga ug unta maghinigugmaay kita, ug magpuyo sa ingon sa pagbayaw sa atong mga kaugalingon kutob nga ang Dios mohatag kanato og kaalam ug abilidad ug makaangkon og pagsalig sa usag usa.⁹ [Tan-awa sa sugyot 5 sa pahina 311.]

Mga Sugyot alang sa Pagtuon ug Pagtudlo

Hunahunaa kini nga mga ideya samtang kamo nagtuon sa kapitulo o samtang kamo nangandam sa pagtudlo. Alang sa dugang nga tabang, tan-awa sa mga pahina v–viii.

Ribyuha ang istorya sa mga pahina 303–04. Kanus-a kamo nakakita nga ang “paghatag og kaayohan kasagaran naggiya ngadto sa pag-angkon og lain”?
Si Presidente Snow nagpahinumdom kanato nga kitang tanan mga anak sa Dios (mga pahina 304–06). Unsa nga mga oportunidad ang gitanyag sa Relief Society alang sa mga kababayen-an sa pagbuhat og maayo ngadto sa uban? Unsa nga mga oportunidad ang gitanyag sa korum sa priesthood alang sa mga kalalakin-an sa pagbuhat og maayo ngadto sa uban?
Palandonga ang ikaduha nga paragraph sa pahina 306. Ngano nga ang atong kalipay nagtubo kon kita nagtabang sa uban sa pagpangita og kalipay? Sa unsa nga paagi nga ang mga ginikanan nagtabang sa ilang mga anak sa pagkat-on niini nga kamatuoran?
Ngano sa inyong hunahuna kita nagtubo sa kaalam kon kita nakigbahin sa atong kahibalo ngadto sa uban? (Alang sa pipila ka mga ehemplo, tan-awa sa mga pahina 306–08.)Unsa nga mga kasinatian kamo aduna nga nagpakita kaninyo sa kamatuoran niini nga baruganan?
Tun-i ang seksyon sugod sa pahina 309. Ngano sa inyong hunahuna ang yano nga mga buhat sa pagserbisyo adunay gahum sa pagdala nato nga mas maduol sa langit? Samtang inyong palandongon ang mensahe niini nga kapitulo, paghunahuna og mga paagi nga kamo makahimo sa inyong panimalay nga mas langitnon nga dapit.

May Kalabutan nga mga Kasulatan: Mateo 25:31–45; Lucas 6:36–38; Mosiah 2:17; 4:14–27; D&P 81:5; 82:3

Tabang sa Pagtudlo: “Mas maayo pa nga maghisgot og pipila ka maayong ideya ug makahimo og maayong panaghisgutan— ug maayong pagkat-on—kay sa mataranta, maningkamot sa pagtudlo sa matag pulong sa manwal.… Ang dili pagdali-dali importante kaayo kon kamo gusto nga ang Espiritu sa Ginoo maanaa sa inyong klase” (Jeffrey R. Holland, “Teaching and Learning in the Church,” Ensign, Hunyo 2007, 91).

Samtang nagbiyahe tadlas sa estado sa Iowa, ang pamilyang Snow nakadawat og tabang gikan sa usa ka tawo nga ilang natabangan sa naunang adlaw.

“Himoa nga ang inyong mga hunahuna malamdagan aron makasabut ug makaamuma sa mga kabalaka sa inyong mga higala nga naglibut kaninyo.”