Pasiuna

Ang Unang Kapangulohan ug ang Korum sa Napulog Duha ka mga Apostoles mi-establisar sa han-ay sa Mga Pagtulun-an sa mga Presidente sa Simbahan aron sa pagtabang kaninyo nga madugangan ang inyong pagsabut sa gipahiuli nga ebanghelyo ug mas mapaduol ngadto sa Ginoo pinaagi sa mga pagtulun-an sa mga propeta sa ulahing mga adlaw. Samtang ang Simbahan magdugang og mga basahon dinhi niini nga han-ay, makakolekta kamo og mga basahon sa pakisayran sa ebanghelyo diha sa inyong balay. Ang mga basahon niini nga han-ay gihimo aron gamiton alang sa personal nga pagtuon ug alang sa Dominggo nga pagpanudlo. Kini makatabang usab kaninyo sa pagpangandam og uban nga mga leksyon o mga pakigpulong ug sa pagtubag sa mga pangutana mahitungod sa doktrina sa Simbahan.

Kining libroha naghisgot sa mga pagtulun-an ni Presidente Lorenzo Snow, kinsa nagserbisyo isip Presidente sa Ang Simbahan ni Jesukristo sa mga Santos sa Ulahing mga Adlaw gikan sa Septyembre 13, 1898, hangtud sa Oktubre 10, 1901.

Personal nga Pagtuon

Samtang ikaw magtuon sa mga pagtulun-an ni Presidente Lorenzo Snow, tinguhaa ang inspirasyon sa Espiritu Santo. Ang mga pangutana diha sa katapusan sa matag kapitulo motabang kanimo nga makasabut sa mga pagtulun-an ni Presidente Snow ug magamit kini sa inyong kinabuhi. Samtang ikaw magtuon niining mga pagtulun-an, mahimo usab nga maghunahuna ka og mga pamaagi kon unsaon sa pagpakigbahin niini ngadto sa mga sakop sa pamilya ug mga higala. Kini mopalig-on sa imong pagsabut sa unsay imong gibasa.

Pagtudlo gikan Niini nga Basahon

Kini nga basahon gidesinyo nga gamiton sa panimalay ug sa simbahan. Ang mosunod nga mga sumbanan makatabang kanimo unsaon pagtudlo niini nga basahon.

Pangandam sa Pagtudlo

Tinguhaa ang giya sa Espiritu Santo samtang ikaw nangandam sa pagtudlo. Tun-i sa mainampoong paagi ang kapitulo aron mahimong masaligon diha sa imong pagsabut sa mga pagtulun-an ni Presidente Smith. Makatudlo ka uban sa mas labaw nga sinseridad ug gahum kon ang iyang mga pulong nakaimpluwensya kanimo mismo (tan-awa sa D&P 11:21).

Kon ikaw nagtudlo og usa ka leksyon sa Melchizedek Priesthood o Relief Society, kinahanglan nga ikaw dili mohiklin niini nga basahon o mag-andam og mga leksyon gikan sa uban nga mga materyal. Pagpili sa mainampoong paagi gikan niini nga kapitulo kadtong mga pagtulun-an nga imong gibati nga labing makatabang niadtong imong gitudloan. Ang pipila ka mga kapitulo naglangkob og mas daghan nga materyal kay sa imong mahimo nga hisgutan atol sa oras sa klase.

Awhaga ang mga partisipante sa pagtuon sa kapitulo sa dili pa ang leksyon ug sa pagdala sa libro. Kon ila kining buhaton, sila mas mahimong andam sa pag-apil diha sa panaghisgut ug makahatag og kaayohan sa usag usa.

Pagpaila sa Kapitulo

Samtang imong ipaila ang kapitulo, ug ang tibuok leksyon, paningkamot sa pagmugna og usa ka kahimtang diin ang Espiritu makatandog sa mga kasingkasing ug mga hunahuna niadtong imong gitudloan. Sa pagsugod sa leksyon, tabangi kadtong imong gitudloan nga mo-focus diha sa mga pagtulun-an sa kapitulo. Hunahunaa ang mosunod nga mga ideya:

Pagbasa ug paghisgut sa seksyon nga giulohan og “Gikan sa Kinabuhi ni Lorenzo Snow” diha sa sinugdanan sa kapitulo.
Paghisgut og usa ka litrato o kasulatan gikan sa kapitulo.
Pagkanta nga dungan sa usa ka himno nga may kalabutan sa hilisgutan.
Pagpakigbahin sa daklit og usa ka personal nga kasinatian mahitungod sa hilisgutan.

Pagdumala og Panaghisgut kabahin sa mga Pagtulun-an ni Presidente Snow

Samtang kamo nagtudlo gikan niini nga basahon, dapita ang uban sa pagpakigbahin sa ilang mga hunahuna, sa pagpangutana, ug sa pagtudlo sa usag usa. Kon sila aktibong moapil, sila mas andam nga makat-on ug modawat og personal nga pagpadayag. Ipadayon ang maayo nga mga panaghisgutan kay sa maningkamot nga mahuman ang tanang mga pagtulun-an. Sa pag-awhag aron may panaghisgutan, gamita ang mga pangutana sa matag kapitulo. Ang mubo nga mga sulat sa matag kapitulo nag-refer niadtong mga pangutana. Makahimo usab kamo og inyong kaugalingong mga pangutana alang gayud niadtong inyong gitudloan.

Ang mosunod nga mga opsyon mahimong makahatag kanimo og dugang nga mga ideya:

Hangyoa ang mga partisipante sa pagpakigbahin sa unsay ilang nakat-unan gikan sa ilang personal nga pagtuon sa kapitulo.Kini tingali makatabang sa pagkontak og pipila ka mga partisipante atol sa semana ug sa paghangyo kanila sa pag-anha sa klase nga andam nga mopakigbahin sa unsay ilang nakat-unan.
Sanguni ang mga partisipante sa pagbasa og pinili nga mga pangutana gikan sa katapusan sa kapitulo (mahimong tinagsa o diha sa ginagmay nga mga grupo). Hangyoa sila sa pagpangita sa mga pagtulun-an diha sa kapitulo nga may kalabutan sa mga pangutana. Dayon dapita sila sa pagpakigbahin sa ilang mga hunahuna ug mga ideya ngadto sa uban nga mga grupo.
Basaha og dungan ang pinili nga mga pamahayag ni Presidente Snow gikan sa kapitulo. Hangyoa ang mga partisipante sa pagpakigbahin og mga ehemplo gikan sa mga kasulatan ug gikan sa ilang kaugalingon nga kasinatian nga naghulagway sa unsay gitudlo ni Presidente Snow.
Hangyoa ang mga partisipante sa pagpili og usa ka seksyon ug basahon kini sa hilum. Dapita sila sa pagpundok diha sa mga grupo sa duha o tulo ka mga tawo kinsa mipili sa sama nga seksyon ug hisguti unsay ilang nakat-unan.

I-awhag ang Pakigbahin ug Paggamit

Ang mga pagtulun-an ni Presidente Snow labing makahuluganon alang sa mga partisipante kinsa makigbahin niini ngadto sa uban ug mogamit niini sa ilang kinabuhi. Hunahunaa ang mosunod nga mga ideya:

Pangutan-a ang mga partisipante sa unsa nga paagi sila makagamit sa mga pagtulun-an ni Presidente Snow diha sa ilang mga responsibilidad isip mga ginikanan o isip mga home teacher o visiting teacher.
Awhaga ang mga partisipante sa pagpakigbahin sa pipila ka mga pagtulun-an ni Presidente Snow uban sa mga sakop sa pamilya ug mga higala.
Dapita ang mga partisipante sa paggamit unsa ang ilang nakat-unan ug ipakigbahin ang ilang mga kasinatian sa pagsugod sa sunod nga klase.

Pagtapus sa Panaghisgutan

I-summarize og daklit ang leksyon o paghangyo og usa o duha ka partisipante sa paghimo niini. Ipamatuod ang mga pagtulun-an nga inyong gihisgutan. Mahimo usab ikaw nga modapit sa uban sa pagpakigbahin sa ilang mga pagpamatuod.

Impormasyon mahitungod sa mga Tinubdan nga Gikutloan Niini nga Basahon

Ang mga pagtulun-an niini nga basahon direktang gikutlo gikan sa mga wali, mga sinulat nga gimantala, mga sulat, ug mga journal. Ang tanang mga kinutlo gikan sa iyang mga sulat ug mga journal, ang punctuation, spelling, capitalization, ug paragraphing giparehas. Ang mga kinutlo nga gikan sa gimantala nga mga tinubdan gipabilin ang punctuation, spelling, capitalization, ug paragraphing sa orihinal nga mga tinubdan gawas kon ang editoryal o typographical nga mga kausaban gikinahanglan aron mas sayon basahon. Tungod niini nga katarungan, makamatikod ka og ginagmay nga kausaban diha sa teksto. Pananglitan, ang pulong ebanghelyo anaa sa gamay nga letra diha sa pipila ka mga kinutlo ug anaa sa dagko nga letra sa uban.

Si Presidente Snow usab kasagaran mogamit og mga termino sama sa mga tawo, tawo, o katawhan nga nagpasabut ngadto sa tanang mga tawo, lalaki ug babaye. Kanunay siya nga mogamit sa mga pronoun siya, iya, ug kaniya nga nagpasabut sa lalaki ug babaye. Komon kini sa pinulongan sa iyang panahon. Bisan pa sa kalainan tali niining maong pinulongan ug sa bag-o nga paggamit, ang mga pagtulun-an ni Presidente Snow magamit sa mga babaye ug mga lalaki.