Kapitulo 5

Ang Maanindot nga Padulngan sa Matinud-anon

“Usa kini ka talagsaong kalipay nga mamulong kalabut sa mahinungdanon nga mga butang nga gitanyag sa Dios nga ihatag nganha sa Iyang anak nga mga lalaki ug anak nga mga babaye, ug nga atong maangkon kon kita matinud-anon.”

Gikan sa Kinabuhi ni Lorenzo Snow

Sa tingpamulak niadtong 1840, si Lorenzo Snow nga didto sa Nauvoo, Illinois, nangandam sa pagbiya alang sa misyon ngadto sa England. Mibisita siya sa panimalay sa iyang higala nga si Henry G. Sherwood, ug mihangyo ni Brother Sherwood sa pagpasabut sa usa ka tudling sa kasulatan. “Samtang naminaw og maayo sa iyang pagpasabut,” si Presidente Snow sa kaulahian nahinumdom, “ang Espiritu sa Ginoo kusog kaayo kanako—ang akong panabut naablihan, ug ako nakakita sama ka klaro sa adlaw sa udtong tutok, uban sa katingala ug kahingangha, sa dalan sa Dios ug sa tawo. Akong nahimo ang mosunod nga panultihon nga nagpahayag sa pagpadayag, ingon nga kini gipakita ngari kanako. …

“Sama nga ang tawo mao karon, ang atong Dios sa kaniadto mao:

“Sama nga ang Dios mao karon, ang tawo mamahimo.”¹

Mibati nga siya nakadawat og “usa ka sagrado nga komunikasyon” nga kinahanglan nga iyang ampingan og maayo, si Lorenzo Snow wala motudlo sa doktrina sa kadaghanan hangtud nga iyang nasayran nga si Propeta Joseph Smith mitudlo niini.² Sa dihang iyang nasayran nga ang doktrina nahibaloan sa kadaghanan, kanunay siya nga nagpamatuod kabahin niini.

Agig dugang sa paghimong tema niini nga kamatuoran sa kadaghanan sa iyang mga pakigpulong, gisunod niya kini isip tema sa iyang kinabuhi. Ang iyang anak nga lalaki nga si LeRoi miingon, “kining gipadayag nga kamatuoran nakapadasig ni Lorenzo Snow labaw sa tanan; mituhop kini og maayo sa iyang kalag nga kini nahimong inspirasyon sa iyang kinabuhi ug mihatag kaniya sa iyang halapad nga panan-awon kabahin sa iyang kaugalingon nga maanindot nga umaabut ug sa dakong misyon ug buhat sa Simbahan.”³ Kini ang iyang “kanunay nga kahayag ug giya” ug “usa ka mahayag, nagdan-ag nga bitoon sa iyang atubangan sa tanang panahon—diha sa iyang kasingkasing, sa iyang kalag, ug sa kinatibuk-an niya.”⁴

Dinhi niini nga kapitulo, si Presidente Snow nagtudlo sa doktrina nga kita mahimong sama sa atong Langitnong Amahan. Sa kapitulo 6, mihatag siya og praktikal nga tambag kon unsaon nato paggamit niini nga doktrina sa atong kinabuhi.

Mga Pagtulun-an ni Lorenzo Snow

Tungod kay kita adunay kabalaan sulod kanato, kita mahimong sama sa atong Amahan sa Langit.

Natawo kita diha sa panagway sa Dios nga atong Amahan; kita iyang gilalang nga sama sa iyang kaugalingon. Anaa ang kinaiya sa pagka-dios nga nasagol sa atong espirituhanong paglalang; diha sa atong espirituhanon nga pagkatawo ang atong Amahan mihatag kanato sa mga kapabilidad, gahum ug mga abilidad nga siya mismo aduna, ingon nga ang usa ka bata diha sa sabakan sa iyang inahan, bisan diha sa wala pa mapalambo nga kahimtang, nakaangkon sa mga kinaiya, mga gahum ug mga pagbati sa iyang ginikanan.⁵

Ako nagtuo nga kita anak nga mga lalaki ug anak nga mga babaye sa Dios, ug Siya mihatag kanato og kapasidad alang sa walay kinutuban nga kaalam ug kahibalo, tungod kay Siya mihatag kanato og tinipik sa Iyang kaugalingon. Kita giingnan nga kita gilalang sa Iyang kaugalingong panagway, ug atong nasayran nga adunay kinaiya sa pagka-imortal diha sa kalag sa tawo. Adunay usa ka espiritu sulod niini nga tabernakulo [ang pisikal nga lawas], ug ang espiritu adunay pagkabalaan mismo niini, bisan tuod og dili pa hingkod ang kahimtang; apan anaa sulod mismo niini ang abilidad sa paglambo ug pag-uswag, sama sa masuso nga modawat og pagkaon gikan sa iyang inahan. Bisan og ang masuso wala gayuy alamag, apan kini adunay mga posibilidad nga pinaagi sa pagsinati sa nagkalainlaing nga pagsulay sa pagkabata ngadto sa pagkahingkod makapahimo niini sa pagtubo ngadto sa pagkahalangdon nga talagsaon gayud kaayo, itandi sa pagkawalay alamag sa bata.⁶

Adunay pagkabalaan sulod sa atong kaugalingon; adunay pagka-imortal sulod sa atong kaugalingon; ang atong espiritu imortal; dili kini magun-ob; dili kini mawala. Mabuhi kita hangtud sa kahangturan.⁷

Usa kini ka talagsaong kalipay nga mamulong kalabut sa mahinungdanon nga mga butang nga gitanyag sa Dios nga ihatag nganha sa Iyang anak nga mga lalaki ug anak nga mga babaye, ug nga atong maangkon kon kita matinud-anon. … Ang atong panaw niining dalan sa kahimayaan magdala kanato sa kahingpitan sa atong Ginoong Jesukristo, sa pagbarug sa presensya sa atong Amahan, sa pagdawat sa Iyang kahingpitan, sa pagbaton og kalipay sa pagsanay sa atong kaliwatan sa mga kalibutan nga walay katapusan, sa pagtagamtam niadtong malipayon nga mga pakig-uban nga kita aduna niini nga kinabuhi, nga makauban ang atong anak nga mga lalaki ug atong anak nga mga babaye, atong mga bana ug atong mga asawa, gilibutan sa tanang kalipay nga mahatag sa langit, ang atong lawas gihimaya sama sa Manluluwas, gawasnon gikan sa sakit ug tanang kasakitan sa kinabuhi, ug gawasnon gikan sa kasagmuyo ug mga kahasol ug sa kapoy nga mga sakripisyo nga atong gihimo dinhi.⁸

Pinaagi sa padayon nga dalan sa pag-uswag ang atong Langitnong Amahan nakadawat og kahimayaan ug himaya ug siya mitudlo kanato sa sama nga dalan, ingon nga siya gisul-oban og gahum, awtoridad ug himaya, siya miingon, “pagmata ug angkuna ang sama nga himaya ug kalipay nga akong naangkon.”⁹

Ang katawhan sa Dios bililhon sa Iyang panan-aw; ang Iyang gugma alang kanila molahutay kanunay, ug sa Iyang gahum ug kusog ug pagbati, sila modaug ug pagadad-on nga labaw pa sa magmadaugon. Sila Iyang mga anak, gilalang diha sa Iyang panagway ug giplano pinaagi sa pagsunod sa Iyang mga balaod nga mahimong sama Kaniya. …

… Kini ang kinatas-an nga padulngan sa anak nga mga lalaki sa Dios, sila kinsa nakabuntog, kinsa nagmasulundon sa Iyang mga sugo, kinsa nagputli sa ilang kaugalingon ingon nga Siya putli. Sila mahimong sama Kaniya; sila makakita Kaniya ingon nga Siya mao; sila makakita sa Iyang panagway ug maghari uban Kaniya diha sa Iyang himaya, mahimong sama Kaniya diha sa tanang paagi.¹⁰ [Tan-awa sa sugyot 1 sa pahina 106.]

Ang mga kasulatan nagtudlo mahitungod sa atong balaanong potensyal.

Ang Ginoo nag-andam alang kanato og mga makadasig nga hilabihan kanindot. Diha sa mga pagpadayag nga gihatag sa Dios, atong masayran unsay mahimong makab-ot sa tawo nga mopanaw niini nga dalan sa kaalam ug pagagiyahan sa Espiritu sa Dios. Bag-o pa lamang ako nga miyembro sa Simbahan sa dihang kini klaro nga gipakita kanako unsa ang mahimong makab-ot sa tawo pinaagi sa padayon nga pagsunod sa Ebanghelyo sa Anak sa Dios. Kana nga kahibalo naggiya kanako kanunay, ug mao ang hinungdan nga naningkamot ko sa pagbuhat nianang matarung ug madawat sa Dios. … Mora og, human sa tanan nga atong nakat-unan sa mga butang nga may kalabutan sa celestial nga mga kalibutan, nga adunay pipila ka mga Santos sa Ulahing mga Adlaw nga igo na kaayo nga masayud lamang nga ang buhat tinuod nga kon mohisgut ka kanila kalabut sa atong maanindot nga umaabut daw mahingangha sila, ug maghunahuna nga kini walay kalabutan kanila. Si Juan ang Tigpadayag, diha sa ikatulong kapitulo sa iyang unang sinulat, miingon:

“Kita karon mga anak sa Dios.” [1 Juan 3:2.]

… Ug siya mipadayon:

“Kon maunsa unya kita, kini wala pa ipakita: apan kita nasayud nga sa igapadayag na Siya, kita mahisama Kaniya; kay kita magasud-ong man unya Kaniya sa Iyang pagkamao.

“Ug ang tanan nga nagabaton sa maong paglaum kaniya nagaputli sa ilang kaugalingon, maingon nga kadto Siya putli man.” [Tan-awa sa 1 Juan 3:2–3.]

… Ang Espiritu sa Dios mipadangat ngari kanato nga adunay lig-on ug balaanong mga kamatuoran sa mga pagpahayag nga sama niini. Si Pablo, sa pakigsulti ngadto sa mga taga-Filipos, miawhag nga sila mougmad og pangandoy nga daw dili pamilyar sa mga tawo nianang higayuna, bisan og dili ingon niana sa mga Santos sa Ulahing mga Adlaw, ilabi na niadtong wala natagbaw kay mora pa og gagmayng mga bata diha sa mga butang sa Dios. Siya nag-ingon:

“Batoni diha kaninyo kining hunahunaa, nga mabatonan ninyo diha kang Kristo Jesus:

“Nga, bisan tuod siya naglungtad diha sa kinaiya sa Dios, siya wala mag-isip sa iyang pagkasama sa Dios ingon nga usa ka butang nga pagailogan.” [Mga Taga-Filipos 2:5–6.]

… Kini [mao] ang gitudlo ni Pablo, ug siya nakasabut sa unsay iyang gipangsulti. Siya gisakgaw dala ngadto sa ikatulong langit ug hingdunggan ang mga pamulongpulong nga dili arang malitok, siya miingon kanato, nga ginadili ang paglitok sa tawo [tan-awa sa 2 Mga Taga-Corinto 12:1–7]. … Sayop ba kita nga moawhag sa mga tawo dinhi sa pag-ugmad og pangandoy sama niining butanga? Adunay daghang nga panultihon diha sa Biblia, ilabi na diha sa Bag-ong Tugon, nga daw dili pamilyar sa mga tawo nga wala makabaton sa Espiritu sa Ginoo.

“Ang magamadaugon makapanag-iya niining maong panulundon.” [Pinadayag 21:7.]

Unsa man kana nga pamahayag? Kinsa ang motuo niini? Kon ang amahan moingon sa iyang anak nga lalaki, “Akong anak, pagmatinud-anon, ug sunda ang akong mga tambag, ug kon moabut ka na sa saktong edad imong mapanunod ang tanan nga anaa kanako,” aduna kini ipasabut, dili ba? Kon ang amahan nagsulti sa kamatuoran, kanang anak nga lalaki adunay usa ka butang nga makapaawhag kaniya nga magmatinud-anon. Gusto ba ni Jesus nga molingla kanato sa dihang gihimo Niya kini nga pamahayag? Ako mopaniguro kaninyo nga walay pagpanglingla diha sa gisulti. Tinuod gayud ang Iyang gisulti. Usab, si Jesus miingon:

“Ang magamadaugon pagatugutan ko sa paglingkod sa akong trono uban kanako, maingon nga ako usab nagmadaugon, ug milingkod uban sa akong Amahan diha sa Iyang trono. [Pinadayag 3:21.]

Kana usa ka talagsaon nga pagkasulti. Aduna bay kamatuoran niini? Tinuod kining tanan. Ang Ginoo nga Labawng Makagagahum ang misulti niini. Kita giingnan diha sa mga kasulatan pinaagi ni Apostol Pablo:

“Kay kita nasayud nga kon matun-as na kining atong yutan-ong payag, aduna kitay balay gikan sa Dios, usa ka puloy-anan nga dili binuhat sa mga kamot, ug walay pagkatapos.” [2 Mga Taga-Corinto 5:1.]

Nagatuo ako niana. Ug sa dihang siya miingon nga si Jesus “magausab sa atong timawa nga lawas, aron kini mahisama sa Iyang mahimayaong lawas” [Mga Taga-Filipos 3:21] mituo usab ako niana. Mituo ba ang mga Santos sa Ulahing mga Adlaw niining mga butanga nga akong gihisgutan? Siyempre, mituo gayud kamo niini. Usab:

“Kay siya nga modawat sa akong mga sulugoon modawat kanako;

“Ug siya nga modawat kanako modawat sa akong Amahan;

“Ug siya nga modawat sa akong Amahan, makadawat sa gingharian sa akong Amahan; busa ang tanan nga iya sa akong Amahan ihatag ngadto kaniya.” [D&P 84:36–38.]

Aduna bay makahunahuna og labaw pa nga pwedeng ikahatag? … Si Pablo nakasabut kaayo niining mga butanga, kay siya miingon nga siya “nagapadayon paingon sa dauganan ngadto sa ganti nga mao ang langitnong pagtawag kanato sa Dios diha kang Kristo Jesus.” [Tan-awa sa Mga Taga-Filipos 3:14.]

Dinhi niini nga pamahayag nga akong gihimo makakita kita og usa ka butang nga may kalabutan sa pamaagi niining langitnong pagtawag diha kang Kristo Jesus. …

… Wala ko masayud kon pila ka buok ang ania dinhi nga adunay tinuod nga kahibalo kalabut niining mga butanga diha sa ilang mga kasingkasing. Kon kamo aduna, sultihan ko kamo kon unsa ang epekto niini. Sama sa gisulti ni Juan:

“Ang tanan nga nagabaton sa maong paglaum kaniya nagaputli sa ilang kaugalingon, maingon nga kadto Siya putli man.” [Tan-awa sa 1 Juan 3:3.]

… Ang Dios mipasabut sa mga resulta sa pagpanaw niini nga dalan sa himaya ug kahimayaan ug ang mga saad sigurado. Ang Ginoo hingpit nga nasayud kon unsa ang Iyang mahimo. Nasayud Siya kon unsa nga mga materyal ang Iyang gamiton, ug Siya nasayud gayud kon unsa ang Iyang gisulti. Kon buhaton nato ang bahin nga Iyang gisangun kanato, ug motuman sa atong ikaduhang kahimtang, sigurado kita nga atong maangkon kini nga mga saad sa tanang matang, ug labaw pa kay sa inyo ug akong posibleng masabtan.¹¹ [Tan-awa sa sugyot 2 sa pahina 106.]

Sa atong paghinumdom sa mga panalangin nga giandam sa Ginoo kanato, kita makakaplag og kalipay taliwala sa mga kabalaka ug mga kahasol sa kinabuhi.

Tanang Santos sa Ulahing mga Adlaw nga nakadungog sa akong tingog aduna gayud niini nga potensyal nga mobangon sa buntag sa unang pagkabanhaw ug mahimaya diha sa presensya sa Dios, adunay pribilehiyo nga makaistorya ang atong Amahan sama sa atong pagpakig-istorya sa atong yutan-ong amahan.¹²

Walay giandam alang sa mga tawo nga mas mahimayaon nga mga potensyal kay sa giandam alang sa mga Santos. Walay mortal nga tawo nga makapangayo og butang nga mas mahinungdanon pa o mas makahatag gayud og katagbawan. Ang tanan nga may kalabutan sa hingpit nga kalinaw, kalipay, himaya ug kahimayaan gihatag sa mga Santos sa Ulahing mga Adlaw. Atong pahimuslan ang diwa niini, ug huptan kini kanunay. Dili kita motugot nga ang atong mga potensyal mawala tungod sa pagbuhat nianang dili madawat sa Ginoo.¹³

Ang akong mga paglaum kalabut sa umaabut nga kinabuhi hilabihan kadako ug kamahimayaon, ug naningkamot ko sa paghupot niini nga mga potensyal nga masanagon kanunay; ug kana ang pribilehiyo ug katungdanan sa matag Santos sa Ulahing mga Adlaw.¹⁴

Kitang tanan dili hingpit nga makasabut sa mga panalangin ug mga pribilehiyo nga giandam diha sa ebanghelyo aron atong madawat. Dili nato hingpit nga masabtan ug dili nato makita ang mga butang nga nagpaabut kanato didto sa mahangturon nga mga kalibutan, ni ang mga butang nga nagpaabut kanato niining kinabuhia ug gituyo aron madugangan ang atong kalinaw ug kalipay ug matubag ang mga tinguha sa atong mga kasingkasing. …

Kita kasagaran, sa daghang mga kabalaka nga naglibut kanato, makalimot ug kining mga butanga wala kanato, nan dili nato masabtan nga ang ebanghelyo gihimo ug gituyo sa matang niini aron kita mahatagan niadto nga mga butang nga makahatag og himaya, dungog ug kahimayaan, nga makahatag og kalipay, kalinaw ug himaya. Malagmit kita makalimot niining mga butanga taliwala sa mga kabalaka ug mga kahasol sa kinabuhi, ug dili nato hingpit nga masabtan nga kini atong pribilehiyo, ug nga ang Ginoo mibutang niini nga makab-ot ra nato aron makapadayon niana nga ebanghelyo diin kita makabaton og makanunayon nga kalinaw sa atong kaulingon. …

Aduna bay hinungdan aron magbangutan? Aduna bay hinungdan aron ang mga Santos magmagul-anon ang panagway? Aduna bay hinungdan aron magbakho o magbagulgol? Wala; apan ang kinabuhi ug kamatayon mao ang giandam kanato; ang mga kayutaan ug mga kagamhanan atong maangkon kon kita padayon nga magmatinud-anon; kagul-anan ug kalaglagan kon atong ibaliwala ang ebanghelyo.

Unsa pa man ang atong mas gipangandoy kay sa nianang nalakip na sa atong relihiyon? Kon kita lig-ong mobarug ibabaw sa bato ug mosunod sa Espiritu nga gibutang sa atong kinahiladman, kita mobuhat og matarung diha sa atong mga katungdanan, kita mobuhat og matarung niadtong kinsa gibutang ibabaw kanato, kita mobuhat og matarung diha sa kahayag man o sa kangitngit.

Asa man ang tawo nga motalikod ug mosalikway niadto nga mga potensyal nga nahilakip sa ebanghelyo nga atong nadawat? Niini anaa ang katagbawan, anaa ang kalipay, anaa ang kalig-on, anaa ang kabutangan sa atong mga tiil, anaa ang sigurado nga pundasyon nga pagatukuran ug pagatugyanan nianang gikinahanglan kanato.¹⁵

Dili gayud kita motugot nga ang atong mga potensyal magkahanap; himoa nga kini presko atubangan kanato adlaw ug gabii, ug akong ipaniguro kaninyo nga kon kita mohimo niini ang atong paglambo matag adlaw ug matag tuig kahibulongan gayud.¹⁶

Kitang tanan nangandoy alang sa celestial nga himaya, ug sa maanindot nga mga potensyal nga ihatag kanato dili gayud matukib sa pinulongan sa tawo. Kon kamo mopadayon nga matinud-anon sa buhat nga inyong giapilan, inyong makab-ot kini nga himaya, ug magmaya hangtud sa kahangturan didto sa presensya sa Dios ug sa Kordero. Takus kini sa paningkamot; takus kini sa sakripisyo, ug bulahan ang lalaki o babaye nga nagmatinud-anon aron maangkon kini.¹⁷ [Tan-awa sa sugyot 3 sa ubos.]

Mga Sugyot alang sa Pagtuon ug Pagtudlo

Hunahunaa kini nga mga ideya samtang ikaw nagtuon sa kapitulo o samtang ikaw nangandam sa pagtudlo. Alang sa dugang nga tabang, tan-awa sa mga pahina v–viii.

Si Presidente Lorenzo Snow kanunay nga nagtudlo nga kita mga anak sa Dios (mga pahina 98–100). Sa unsang paagi nga kining kamatuoran makaimpluwensya sa paagi sa atong pagbati mahitungod sa atong kaugalingon ug sa uban? Unsaon nato pagtabang ang mga bata ug mga kabatan-onan sa paghinumdom nga sila anak nga mga lalaki ug anak nga mga babaye sa Dios?
Unsa ang imong hunahuna kalabut sa mga kasulatan nga gikutlo ni Presidente Snow aron sa pagtudlo kabahin sa atong balaanong potensyal? (Tan-awa sa mga pahina 100–04.)
Basaha ang seksyon nga nagsugod sa pahina 104. Sa unsang paagi nga ang “mga kabalaka ug mga kahasol sa kinabuhi” mao ang hinungdan nga kita makalimot sa mahangturon nga mga panalangin sa ebanghelyo? Unsa ang atong mahimo aron sa pagpabilin sa atong potensyal nga “presko” ug “aktibo sa atong atubangan”? Sa unsang mga paagi nga ang paghinumdom sa atong padulngan makaapekto sa paagi sa atong pagpuyo?
Samtang ikaw nagtuon niini nga kapitulo, unsa ang imong nakat-unan kabahin sa imong Langitnong Amahan? Unsa ang imong nakat-unan kabahin sa imong padulngan isip anak nga babaye o anak nga lalaki sa Dios?

May Kalabutan nga mga Kasulatan: Mga Taga-Roma 8:16–17; 1 Mga Taga-Corinto 2:9–10; Alma 5:15–16; Moroni 7:48; D&P 58:3–4; 78:17–22; 132:19–24

Tabang sa Pagtudlo: “Pagpamatuod kon ang Espiritu moaghat kanimo sa pagbuhat sa ingon, dili lamang sa katapusan sa matag leksyon. Hatagi og kahigayunan ang imong gitudloan nga mohatag sa ilang pagpamatuod” (Pagtudlo, Walay Labaw ka Mahinungdanon nga Tawag, 45).

“Usa kini ka talagsaong kalipay nga mamulong kalabut sa mahinungdanon nga mga butang nga gitanyag sa Dios nga ihatag nganha sa Iyang anak nga mga lalaki ug anak nga mga babaye.”

Sa atong pagtuon sa mga kasulatan, atong masayran ang mahitungod sa atong diosnong kinaiya.

Sa iyang mga sinulat, si Apostol Pablo mipamatuod kalabut sa atong potensyal nga mahimong sama sa Langitnong Amahan ug ni Jesukristo.