Kapitulo 16

“Nga Unta Kita Mahimo nga Magkahiusa”

“Ang tingog sa Makagagahum mitawag kanato gikan sa taliwala sa kagubot … sa paghimo og panaghiusa ug usa ka nindot nga panag-inigsoonay, diin kita kinahanglan nga managhigugmaay sama sa paghigugma nato sa atong mga kaugalingon.”

Gikan sa Kinabuhi ni Lorenzo Snow

Sa wala pa gipalayas ang mga Santos gikan sa Nauvoo, ang nangulo nga mga Kaigsoonan sa Simbahan nag-abut sa templo. Sila nakigsaad nga sila “dili gayud mohunong sa [ilang] mga paningkamot, sa tanan nga mga paagi ug impluwensya kutob sa [ilang] maabut, hangtud ang tanan nga mga Santos kinsa napugos sa pagbiya sa Nauvoo kinahanglan nga mapahimutang diha sa pundukanang dapit sa mga Santos.” Determinado sa pagtuman niini nga pakigsaad, gitukod ni Presidente Brigham Young ang Perpetual Emigrating Fund kaniadtong 1849. Ubos niini nga programa, ang Simbahan mipahulam og salapi ngadto sa lumalangyaw nga mga Santos uban sa pagsabut nga ang mga tawo mobayad sa ilang mga hulam inig-abut nila sa Utah ug makakita og trabaho.

Gitawag ni Presidente Young si Elder Lorenzo Snow ug ang uban sa pagpangayo og mga donasyon alang niini nga paningkamot. Malisud kini alang ni Elder Snow sa pagpangayo sa mga Santos og mga donasyon—sila mismo mga kabus, ingon nga giabug gikan sa usa ka lugar ngadto sa laing lugar sa wala pa manimuyo sa Walog sa Salt Lake. Gisulat niya sa iyang journal: “Sa pagbuhat sa ilang misyon sa pagpangayo og salapi gikan sa mga Santos kinsa, human makawatan ug malungkaban, mipanaw og sobra sa usa ka libo ug unom ka gatus ka kilometro, ug mao pa lamang ang pagpahiluna diha sa kamad-an, awaaw nga dapit sa dakong ‘Disyerto sa Amerika,’ nakaplagan ko ang akong kaugalingon nga nahimong kabahin sa usa ka malisud nga tahas. Uban sa diyutay kaayo nga walay labut, ang mga tawo adunay gamay kaayo, o wala nga mahimong ilang ikagahin.” Hinoon, bisan asa si Elder Snow miadto, ang mga tawo mihatag sa tanan nga ilang mahimo. Mitaho siya: Ang mga paningkamot ug pagkaandam, bisan asa makita, ang kalisud sa pagkuha og gamay nga bahin—ang pagbati sa pagkamanggihatagon ug kalapad sa kalag, diin akong nakita bisan asa taliwala diha sa kakabus, ang mainitong pag-abi-abi nga akong nadawat bisan sa kasagarang kahimtang sa pagkakabus, misanap sa akong kasingkasing uban sa hilabihang kadako nga kalipay. Usa ka tawo namugos nga akong dad-on ang iyang bugtong baka, nag-ingon nga ang Ginoo miluwas kaniya, ug mipanalangin kaniya sa pagbiya sa yutang natawhan ug miadto sa usa ka yuta sa kalinaw; ug sa paghatag sa iyang bugtong baka, gibati niya nga iyang buhaton lamang ang unsay gipangayo sa katungdanan, ug unsay iyang paabuton gikan sa uban, kon ang sitwasyon balihon.”

Human mangolekta og mga donasyon didto sa amihanan sa Utah, napanid-an ni Elder Snow, “Bukas ang mga kasingkasing sa mga Santos, ug, kon hunahunaon ang ilang mga kahimtang, sila mahinatagon og mihatag og ubay-ubay, ug dili kinahanglan nga akong isulti nga malipayon.”²

Bisan og ang tagsatagsa ka mga tawo dihay gamay lamang nga mahatag, ang ilang hiniusa nga mga paningkamot mipanalangin og daghang mga kinabuhi. Ang Perpetual Emigrating Fund midako lapas sa orihinal nga katuyoan niini, nagtabang og daghan pa kay sa mga miyembro lamang sa Simbahan kinsa diha kaniadto sa Nauvoo. Mipadayon kini sulod sa 38 ka tuig, nagtabang og linibo ka mga kinabig gikan sa lainlaing yuta nga nagpundok uban sa ilang kaubang mga Santos. [Tan-awa sa sugyot 1 sa pahina 238.]

Mga Pagtulun-an ni Lorenzo Snow

Kon kita maghiusa diha sa ebanghelyo, ang Ginoo magpakita sa kalibutan sa Iyang kinaiya pinaagi kanato.

Nag-ampo si Jesus ngadto sa iyang Amahan nga kadtong iyang [Amahan] gihatag kaniya [Jesus] gikan sa kalibutan mahimong usa sama nga siya ug ang Amahan usa, ug nag-ingon siya, ako nag-ampo nga imo silang hatagan og samang gugma nga ikaw aduna alang kanako, nga ako maanaa kanila ug ikaw diri kanako, nga ang tanan mahimong usa. Adunay usa ka butang nga importante kaayo niini, ug kinahanglan nga bansayon nato ang atong mga kaugalingon hangtud mahisama kita sa Amahan ug sa Anak, usa sa tanan nga mga butang.³

Gikan sa mga bersikulo nga akong nabasa [Juan 17:19–21] ang importansya ug ang panginahanglan sa mga Apostoles nga mahiusa, gipakita, aron nga ang mga katuyoan sa Ginoo mahimo untang epektibo diha sa kalibutan. Kay gawas kon ang mga Apostoles ug kadto nga mituo diha kanila nahiusa, ang kalibutan dili makatuo diha sa misyon ug mga katuyoan sa Manluluwas. Busa si Jesus nag-ampo ngadto sa Amahan nga ang tanan niadtong kinsa gihatag sa Amahan Kaniya unta mahimong usa sama nga Siya ug ang Amahan usa, nga ang kalibutan mahimong motuo nga ang Amahan nagpadala Kaniya. Sa tinuod kini mao ang giplano sa Ginoo nga epekto pinaagi sa Israel sa pagdala kanila paggawas gikan sa Ehiptohanong pagkaulipon; Siya nanghinaut sa paghimo kanila nga usa ka nahiusang katawhan, kaliwatan nga pinili, kaliwatan sa katawhan kinsa ang Dios makapasidungog ug makatahud aron ang kalibutan mahimong motuo, ug nga sila mahimong modawat sa mga panalangin nga Siya nanghinaut sa paghatag diha kanila, tungod kay ang tanang katawhan mga anak sa Dios; ug kon gibuhat sa Israel ang Iyang mga gikinahanglan, ang kalibutan, walay duda nahimo untang nakapahimulos pinaagi niana, ug ang mga katuyoan sa Dios mas labaw ka hingpit nga natuman. Ang Ginoo nanghinaut sa pagpakita sa Iyang kinaiya, ug ang kinaiya sa kalangitan, ug nanghinaut sa pagpakita sa Iyang gugma ug mga panalangin pinaagi sa Israel ngadto sa tibuok pamilya sa katawhan; apan ang Israel dili masulundon ug wala maminaw sa Iyang tingog. …

Kon kita wala magkahiusa, kon kita nagkabahin sa espiritwal o temporal nga paagi, kita dili gayud mahimo nga katawhan nga gusto sa Dios, ni kita mahimo nga mga himan diha sa Iyang mga kamot sa paghimo sa kalibutan sa pagtuo nga ang balaan nga Priesthood napahiuli, ug nga kita adunay mahangturon nga Ebanghelyo. Aron kita makapahinabo sa mga katuyoan sa Dios kinahanglan atong buhaton ang sama sa gibuhat ni Jesus—ipahiuyon ang atong tagsatagsa ka kabubut-on ngadto sa kabubut-on sa Dios, dili lamang diha sa usa ka butang, apan diha sa tanan nga mga butang, ug sa pagpuyo aron ang kabubut-on sa Dios maanaa kanato.⁴ [Tan-awa sa sugyot 2 sa pahina ]

Ang panaghiusa importante diha sa Simbahan ug diha sa atong mga pamilya.

Kinahanglan nga adunay mas dako nga panaghiusa diha taliwala kanato kay sa atong gibuhat karon. Adunay hingpit nga panaghiusa diha sa korum sa Napulog Duha. Kinahanglan ba nga adunay hingpit nga panaghiusa niana nga korum? Labing tinuod, ang tanan moingon og Oo, usa ka hingpit nga panaghiusa diha sa korum sa Napulog Duha ka mga Apostoles. … Ug usab adunay usa ka hingpit nga panaghiusa uban sa Unang Kapangulohan, ug kinahanglan ba nga aduna? Ang tanan moingon, dayag lamang, kinahanglan nga aduna. Ug kinahanglan ba nga adunay usa ka hingpit nga panaghiusa uban sa pito ka mga presidente sa Kapitoan? Ang labing tinuod kinahanglan; kitang tanan moingon og Oo. Kinahanglan ba nga adunay usa ka hingpit nga panaghiusa uban sa mga High Council sa nagkalainlaing mga Stake sa Zion? Dayag nga kinahanglan aduna, ug adunay paagi sa pagtuman niana nga panaghiusa. Ug sa samang paagi uban sa nagkalainlaing uban nga mga organisasyon ug mga korum. Kinahanglan ba nga adunay usa ka hingpit nga panaghiusa uban sa mga kapangulohan sa mga Stake? Dayag lamang, ug kon ako usa ka presidente sa Stake, dili ako mopahulay adlaw ug gabii hangtud ako adunay panaghiusa sa akong mga magtatambag. Kinahanglan ba nga adunay panaghiusa uban sa Bishop ug sa iyang mga Magtatambag? Labing tiunod kinahanglan aduna.

Nan, unsa ang mas importante? Kinahanglan ba nga adunay panaghiusa sa pamilya? … Labing siguro kinahanglan aduna. Ug ngano nga kinahanglang matagbaw ang bisan kinsa nga tawo, ngano nga kinahanglang matagbaw ang bisan kinsa nga bana ug amahan sa pamilya hangtud nga siya makamugna og usa ka hingpit nga panaghiusa, nga mao, kutob lamang nga ang usa ka hingpit nga panaghiusa mahimong matuman? Ug niining butanga ang amahan kinahanglan nga maghimo sa iyang kaugalingon sama lamang ka hingpit nga makahimo ang usa ka tawo niini nga kinabuhi atubangan sa iyang pamilya. Ug ang asawa kinahanglan maghimo sa iyang kaugalingon sama lamang ka hingpit nga ang usa ka babaye posible nga makahimo niini nga kinabuhi. Ug niana sila andam sa paghimo sa ilang mga anak sama lamang ka hingpit nga sila andam ug sarang nga mahimong hingpit. Ug ang amahan ug ang inahan kinahanglan nga magmatngon pag-ayo. Ang asawa kinahanglan dili gayud magsulti og walay pagrespeto sa iyang bana diha sa atubangan sa iyang mga anak. Kon siya nagtuo nga ang iyang bana nakahimo og sayop (tingali siya nakahimo), kinahanglan nga siya dili gayud mosulti kalabut niini diha sa atubangan sa iyang mga anak. Kinahanglan nga iyang ipalayo siya atubangan sa iyang mga anak ug didto sultihan siya sa iyang mga sayop, sa maayo nga paagi, apan dili gayud diha sa atubangan sa mga anak mosulti og walay pagrespeto sa amahan. Ug ang amahan mao usab. Wala siyay katungod sa pagsulti og walay pagrespeto sa iyang asawa diha sa atubangan sa iyang mga anak. Ug ako nag-ampo sa paghatag sa bana ug sa asawa sa tinguha ug sa pagsabut sa pagkorihir sa ilang mga kaugalingon sa ingon niana nga mga butang. Ako nahibalo nga ang daghang dagko nga mga kalisud nga karon anaa, ug ang pagkawalay respeto nga atong makita kalabut ngadto sa Priesthood, taliwala sa mga kabatan-onan, nagagikan sa kamatuoran, nga dihay mga kalisud sa panimalay, ug dihay walay pagrespeto nga gisulti diha sa ilang atubangan, kabahin sa amahan pinaagi sa inahan, o kabahin sa inahan pinaagi sa amahan. Karon ako nahibalo niining mga butanga nga mao.⁵ [Tan-awa sa sugyot 3 sa pahina 239]

Kita mahimong magkahiusa samtang kita magtinabangay sa usag usa sa pagsiguro sa kalinaw ug sa kalipay.

Nagsulti kita og ubay-ubay kalabut sa baruganan sa paghigugma sa atong mga silingan ingon man sa paghigugma sa atong mga kaugalingon; nagsulti kita mahitungod niini ug usahay kita naghunahuna mahitungod niini, apan unsa gayud kadaghan nga gihimo nato kining mga butanga, ug nakita nga ang kalisud anaa sulod sa atong mga kaugalingon? Kinahanglan nga atong sabton nga kinahanglan gayud nga atong lihokon ang pipila ka mga baruganan diin kita makahiusa sa atong mga kaugalingon isip katawhan, sa pagbugkos sa atong mga pagbati nga mahimo kitang usa, ug kini dili gayud matuman gawas kon pipila ka mga butang gihimo, ug ang mga butang nga nagkinahanglan og sobra nga paningkamot sa atong bahin.

Sa unsang paagi kamo motrabaho sa paghiusa sa inyong mga kaugalingon? Sa unsang paagi ang usa ka tawo motrabaho sa paghiusa sa iyang kaugalingon uban sa iyang silingan? Kon duha ka mga tawo gikuyog kinsa wala pa gayud sukad magkaila, sa unsang paagi sila motrabaho nga makabaton og paghinigalaay, pagkasuod ug pagbati ngadto sa usag usa? Ngano nga usa ka butang ang kinahanglan nga pagahimoon, ug nga dili sa usa lamang ka tawo, apan kinahanglan nga pagabuhaton sa usa ingon man sa lain. Kini dili angay sa usa lamang sa pagbuhat sa gikinahanglan nga trabaho; kini dili mahimo alang sa usa sa pagtubag niadto nga mga pagbati ug buhaton ang trabaho sa iyang kaugalingon, apan aron mahimo isip usa diha sa ilang mga sentimento ug pagbati—ang lihok sa duha kinahanglanon. …

… Usa ka butang ang kinahanglan nga pagabuhaton sa [kada usa] ka tawo nga makabaton sa panaghigalaay sa usag usa ug sa paghiusa isip usa ka komunidad. …

… Himoa nga ang inyong mga hunahuna malamdagan sa pagsabut ug pag-amuma sa mga kabalaka sa inyong mga higala nga naglibut kaninyo, ug diin kamo makahimo sa pag-angkon og mga kaayohan alang sa inyong mga higala buhata ang mao, ug sa pagbuhat sa ingon inyong makita nga kadtong mga butang nga inyong gikinahanglan moabut diha sa inyong mga kamot nga mas dali kay sa kamo mohago og maayo sa pag-angkon niini alang sa inyong mga kaugalingon nga wala maghunahuna kabahin sa mga kabalaka sa inyong mga higala. Ako nahibalo nga kini usa ka maayo ug importante nga baruganan. …

… Kinahanglan natong mahibaloan nga kini atong obligasyon ang pagkat-on sa pagsiguro sa kalinaw ug kalipay niadto nga naglibut kanato, ug dili gayud tugutan ang atong kaugalingon sa pagpasakit sa mga pagbati ug mga katungod sa atong mga silingan. Tuguti ang usa ka tawo ug payataki ang mga katungod sa usa ka igsoon ug unsa ka dugay niyang gub-on kana nga pagbati sa pagsalig nga sa kaniadto diha tali kanila? Ug kon maguba na unsa ka dugay ang pagpabalik niana nga pagbati nga kanhi diha tali kanila? Kini mahimong dugay kaayo. Kini mao ang unsay ipunting sa atong atensyon; gibati ko nga kini mao; sa atong tanan nga paghunahuna, sa atong tanan nga mga lihok ug sa atong pribadong mga pagpamalandong gusto nato nga kita mohunahuna sa mga kabalaka sa tanan nga mga tawo nga naglibut kanato; ug sa paghunahuna nga sila adunay mga katungod ug mga pribilehiyo sama usab kanato; kita kinahanglan unta nga lig-on ang atong pagtuo niini.

Karon paghunahuna og usa ka tawo nga kanunay nga naghunahuna sa kaayohan sa mga tawo nga naglibut kaniya, ug himoang mobati siya sa pagpanalangin sa bisan unsa nga butang ug sa tanang mga butang nga gipanag-iya sa iyang mga kaigsoonan , ug siya niini nga paagi siya makahatag og kalipay sa iyang kaugalingon ug sa naglibut kaniya. Ipahimo sa usa ka tawo ang sukwahi nga paagi ug imbis nagpanalangin ug naghago alang sa kaayohan sa uban, nangita og sayop ug gipakaulawan, mahimo ba niya ang sama nga paglambo? Sa tinuod siya dili.

… Kon atong gibati nga atong katungdanan ang pagtrabaho nga mas mapaninguhaon kay sa unsay atong nahimo sa pagsiguro og pagsalig, kita mopadayon kon kini anaa sa atong gahum sa paghatag og kalibutanong mga panalangin ug mga panabang aron sa pag-angkon sa panaghigalaay niadtong naglibut kanato. Niini nga paagi ug walay lain nga kita mahiusa ug mapakita nga kita adunay mabination ug inigsoonay nga pagbati.— Kinahanglan nga atong ipakita kini nga pagbati pinaagi sa atong mga buhat … kay sa makiglamano sa usa ka tawo ug moingon panalanginan ka sa Dios akong maayo nga higala, ug sa sunod nga adlaw wala magtamud ngadto sa unsay nasulti kaniadto apan nagpasakit sa iyang labing nindot nga pagbati.⁶

Kon ang usa ka tawo dili andam nga mosakripisyo alang sa kaayohan sa iyang mga kaigsoonan, ug kon siya nakahibalo nga siya nakapasakit sa mga pagbati sa iyang mga kaigsoonan, … kana nga tawo dili matarung diha sa atubangan sa Ginoo, ug hain ang gugma niana nga tawo alang sa iyang igsoon?

Kon ang usa ka brother dili andam sa pag-antus alang sa iyang brother, unsaon niini diha sa iyang gahum sa pagpakita nga aduna siyay gugma alang sa iyang brother? Sultihan ko kamo nga anaa sa atong kabuang ug kahuyang nga kita dili moantus uban sa atong mga kaigsoonan, apan kon sila molapas sa atong mga katungod kita diha-diha mobalos, ug kon tumban nila ang atong mga tudlo sa tiil diha-diha molukso kita sa pagtunob sa ila. … Kon makakita ako og brother nga gipasakitan, ug mosumbalik ug mobalos sa nakasala, niana ako moingon unsa kalayo kana nga brother gikan sa dalan sa katungdanan, ug ako moingon ngadto kaniya nga ikaw kinahanglan nga makakat-on sa pagkontrolar sa inyong kaugalingon o ikaw dili gayud maluwas ngadto sa gingharian sa Dios.⁷

Ako mobasa og pipila ka mga paragraph diha sa Doktrina ug Mga Pakigsaad:

“Ang akong mga tinun-an, diha sa karaan nga mga adlaw, nangita og higayon sa pakigbingkil batok sa usag usa, ug wala mopasaylo sa usag usa diha sa ilang mga kasingkasing, ug kay tungod niini nga kadautan sila gisakit, ug gipanton sa hilabihan;

“Busa Ako moingon nganha kaninyo, nga kamo kinahanglan gayud nga mopasaylo sa usag usa, kay siya nga dili mopasaylo sa iyang igsoon ang iyang mga kalapasan magpabilin nga gipanghimaraut sa atubangan sa Ginoo, kay magpabilin diha kaniya ang dakong sala.”D&P 64:8–9.] …

Samtang ako nagbasa niini, dihay usa ka butang nga ang mga disipulo sa Manluluwas wala mohimo—wala sila molampos sa paghimo niana nga panaghiusa sa espiritu ug sa pagbati nga sila kinahanglan aduna, ug ang Ginoo mipanton kanila tungod niini. Ang Ginoo nagkinahanglan nga ang mga tawo mopasaylo gayud sa usag usa, gani kapitoan pil-on og kapito. Gani bisan kon ang tawo dili mangayo og pasaylo, gikinahanglan kitang mopasaylo. … Siya nga dili mopasaylo sa iyang igsoon, kita gisultihan, nagpabilin diha kaniya ang mas dako nga sala—nga mao, mas makasasala siya kay sa tawo nga nakasala kaniya. Ang Ginoo nagkinahanglan kanato sa paghigugma sa atong silingan sama sa atong mga kaugalingon—ingon og usa ka malisud nga butang ubos sa daghang mga kahimtang; apan kita kinahanglan nga moabut niana nga bahin sa kahingpitan, ug atong makab-ut kini.⁸ [Tan-awa sa sugyot 4 sa pahina 239.]

Samtang kita mahimong nagkahiusa diha sa ebanghelyo, nagtubo kita sa kahayag ug kaalam ug nag-andam sa pagpuyo sa presensya sa Dios.

Kinahanglan kitang mahiusa ug molihok sama ni David ug Jonathan ingon og usa ka kasingkasing [tan-awa sa 1 Samuel 18:1], ug sa dili madugay ipaputol ang atong bukton gikan sa atong mga lawas kay sa magsinakitay sa usag usa. Unsa ka gamhanan nga katawhan kita mahimo kon kita anaa niini nga kahimtang, ug kinahanglan nga atong makab-ot kini, bisan unsa ka gamay nga pagbati sa panaghigalaay ang atong bation sa pagkakaron nga panahon. Ako makasulti kaninyo nga ang adlaw moabut nga kinahanglan gayud nga magkahiusa niini nga paagi kon kita gusto gayud maanaa sa presensya sa Dios. Kinahanglan lamang nga magkat-on kita sa paghigugma sa atong mga silingan sama sa paghigugma nato sa atong mga kaugalingon. Kinahanglan nga buhaton nato kini, bisan unsa pa kalayo nato gikan niini sa pagkakaron nga panahon, apan dili igsapayan, kinahanglan gayud makat-unan nato kini nga mga baruganan ug ibutang kini sa atong mga kasingkasing. Karon kini akong nakita og klaro, ug kana mao ang rason kon nganong ako namulong mahitungod niining mga butanga sa paagi nga ako naghimo, tungod kay buot nakong itanom kini sa mga hunahuna sa mga Santos, ug sa pagbaton niining mga butanga taliwala sa ilang matag adlaw nga mga pagbati. ⁹

Ang tingog sa Makagagahum nagtawag kanato gikan sa taliwala sa kasamok, nga mao ang Babelon, sa paghimo og panaghiusa ug usa ka maanindot nga panag-inigsoonay, diin kita kinahanglan nga maghigugmaay sa usag usa sama sa atong paghigugma sa atong mga kaugalingon. Kon kita mobiya gikan niini nga katuyoan, ang Espiritu sa Dios mopalayo kanato kutob niana nga pagbiya. Apan kon kita magpadayon sa pagtuman niadto nga mga pakigsaad nga atong gihimo sa diha nga gidawat nato ang Ebanghelyo, adunay katukma nga pagtubo sa kahayag ug kaalam, ug adunay gamhanang pagpangandam alang niana nga moabut. Ug tungod sa atong pagkamatinud-anon ug sa atong pagsunod sa mga pakigsaad nga atong nahimo, ang pundasyon diin kita nagbarug nahimong sama sa mga haligi sa langit—dili matarug.¹⁰ [Tan-awa sa sugyot 5 sa pahina 239.]

Mga Sugyot alang sa Pagtuon ug Pagtudlo

Hunahunaa kini nga mga ideya samtang ikaw nagtuon sa kapitulo o samtang ikaw nangandam sa pagtudlo. Alang sa dugang nga tabang, tan-awa sa mga pahina v–viii.

Ribyuha ang kasinatian ni Lorenzo Snow sa Perpetual Emigrating Fund (mga pahina 229–30). Sa Simbahan karon, unsa nga mga oportunidad kita aduna sa paghatag og salapi o mga butang aron sa pagtabang sa uban? Sa unsa nga paagi kini nga mga paningkamot makatabang kanato nga mahiusa?
Palandunga ang mga pagtulun-an ni Presidente Snow kon ngano nga ang Ginoo gusto kanato nga magkahiusa (mga pahina 231–32). Ngano sa inyong hunahuna ang uban nga mga tawo may purohan nga makabaton og pagpamatuod kabahin sa Ginoo ug sa Iyang gipahiuli nga Simbahan kon sila makakita nga kita nagkahiusa? Sa unsa nga paagi mahimong mausab ang ilang mga pagbati kon sila makakita nga kita nagkabahin?
Eksamina ang seksyon nga nagsugod sa pahina 232. Sa unsa nga paagi kini nga tambag magamit sa atong mga panimalay? Hunahunaa kon unsa ang inyong mahimo sa pag-awhag og dugang nga panaghiusa sa mga relasyon sa inyong pamilya.
Sa unsa nga paagi kita makasinati og panaghiusa sa atong Relief Society o korum sa priesthood, bisan kon kita adunay lainlaing mga interes ug mga ideya? (Alang sa pipila ka mga ehemplo, tan-awa sa mga pahina 233–37.) Sa unsa nga paagi kamo nahatagan og kaayohan gikan sa panaghiusa sa inyong pamilya? diha sa Simbahan? diha sa komunidad?
Ngano sa inyong hunahuna ang panaghigugmaay makahimo kanato og “usa ka gamhanang katawhan”? Sa unsa nga paagi ang gugma alang sa uban nag-impluwensya sa paagi nga kita nagpuyo? Samtang kamo namalandong o naghisgot niini nga mga pangutana, ribyuha ang duha ka katapusan nga mga paragraph diha sa kapitulo (mga pahina 237–38).

May Kalabutan nga mga Kasulatan: Salmo 133; Juan 13:34–35; Mga Taga-Roma 12:5; Mosiah 18:21; 4 Nephi 1:15–17; D&P 51:9; Moises 7:18

Tabang sa Pagtudlo: “Ang kinahingpitan, makadani, makakabig nga gahum sa pagtudlo sa ebanghelyo makita kon ang dinasig nga magtutudlo moingon, ‘Ako nahibalo pinaagi sa gahum sa Espiritu Santo, pinaagi sa mga pagpadayag sa Balaang Espiritu diha sa akong kalag, nga ang mga doktrina nga akong gitudlo tinuod’” (Bruce R. McConkie, gikutlo sa Pagtudlo, Walay Labaw Ka Mahinungdanon nga Tawag, 43).

Sa wala pa mobiya ang mga Santos sa Nauvoo, ang mga lider sa priesthood mipakigsaad sa pagtabang sa tanang mga Santos kinsa gusto nga mokuyog sa paglalin.

“Kinahanglan ba nga adunay panaghiusa sa pamilya? … Sa labing tinuod kinahanglan aduna.”