Kapitulo 19

Misyonaryong Buhat: “Sa Pagdasig sa Matag Tawhanong Kasingkasing”

“Adunay paagi sa pagdasig sa matag tawhanong kasingkasing, ug kini inyong buluhaton sa pagpangita sa paagi ngadto sa mga kasingkasing niadtong kang kinsa ikaw gitawag.”

Gikan sa Kinabuhi ni Lorenzo Snow

Si Lorenzo Snow gibunyagan didto sa Kirtland, Ohio, diin siya nagtuon og Hebreohanon diha sa klase kauban si Propeta Joseph Smith ug ubang mga lider sa Simbahan. Milaum siya nga sa pipila ka adlaw mopadayon siya og usa ka “klasika nga edukasyon” [edukasyon sa Latin ug Griyego] sa usa ka kolehiyo didto sa silangang bahin sa Estados Unidos.¹ Apan samtang iyang gitrabaho ang iyang tumong, misugod siya sa pagbati og pagbitad ngadto sa lain nga katuyoan. Sa kaulahian siya nahinumdom:

“Akong gidawat [ang mga kamatuoran sa ebanghelyo] uban sa bukas nga kasingkasing, ug ako determinado sa dili paghunong didto. … Misugod ako sa pagkaguol og gamay diha sa akong hunahuna kon, inighuman og dawat niining talagsaon nga kahibalo, angay ba alang kanako sa pagpabilin nga dili magpamatuod kabahin niini. Ang batan-ong mga lalaki kinsa gipadala og mga misyon namalik ug nagpamatuod sa mga panalangin nga gihatag nganha kanila … , ug ako misugod sa paghunahuna nga, kay sa andamon ang akong kaugalingon alang sa kolehiyo o unibersidad sa sidlakan, kinahanglan ako nga mobiya ug mopamatuod sa unsay gihatag kanako sa Ginoo nga kahibalo. Sa samang higayon dili ako buot nga biyaan ang akong mga gipaabut nga edukasyon, tungod kay diha na kini sa akong hunahuna sulod sa dugay nang panahon, ug unya ako diha nay oportunidad ug salapi sa pagtuman niini.”

Nanlimbasog sa iyang mga pagbati, nangayo siya og tambag sa usa ka kasaligan nga higala: “Gisultihan ko siya unsa ang akong gusto, ug siya miingon, ‘Brother Snow, dili ako mohatag ni bisan kinsa pa sa ingon niini nga tambag sama sa akong gihunahuna nga ihatag kanimo, ubos niini nga mga sitwasyon. Kon ako ang anaa sa imong dapit, ipadayon ko ang akong mga tuyo ug moeskwela.’ Kana mao lamang gayud ang gusto nako nga iyang isulti, ug kini nakapahimuot kanako. Nakontento ako sa makadiyut; apan sa panahon sa tingtugnaw, nakadungog niining batan-on nga mga Elder nga nagpamatuod sa ilang kalampusan sa pagsangyaw sa Ebanghelyo, misugod ako sa paghunahuna pa og kadaghan mahitungod niini. Ang Ginoo mihatag kanako og kahibalo nga Siya moanhi dinhi sa yuta, ug nga adunay pagpangandam nga kinahanglang pagahimoon: Siya mihatag kanako sa tanan nga akong gipangayo, ug labaw pa; alang sa bunyag diin akong nadawat ang Espiritu Santo ug ang hingpit nga kahibalo nga gihatag ngari kanako nahimong mas tinuod ug makapatuo kay sa akong bunyag diha sa bugnaw nga tubig; ako mibati nga ako adunay responsibilidad. Busa akong gitak-op ang akong mga libro [ug] giundang ang akong Latin ug Griyego.”²

Human himoa kini nga desisyon, si Lorenzo Snow miserbisyo og misyon didto sa estado sa Ohio kaniadtong 1837. Sa kaulahian miserbisyo siya og uban nga mga misyon—una sa mga estado sa Missouri, Illinois, Kentucky, ug Ohio, ug dayon sa England, Italya, sa mga Isla sa Hawaii, sa amihanang kasadpan sa Estados Unidos, ug sa estado sa Wyoming. Samtang didto siya sa England, misulat siya ngadto sa iyang iyaan, nagpasabut kon nganong andam siya sa pagbiya sa panimalay ug sa pagserbisyo isip usa ka misyonaryo: “Ang hunahuna nga ako anaa sa mga 6400 ug 8000 ka kilometro ang gilay-on gikan sa panimalay sa akong pagkabata ug sa akong tanan nga unang, makalingaw nga mga kaila, yano kaayo nga nag-aghat sa pangutana, Nganong ania ako dinhi? …Ania ako dinhi tungod kay ang Ginoo namulong, ug mipatungha og usa ka Propeta, pinaagi kang kinsa Iyang gipahiuli ang kahingpitan sa mahangturon nga Ebanghelyo, uban sa tanan niining mga gasa, mga gahum, mga ordinansa ug mga panalangin; nga may pamahayag ngadto sa tanang katawhan, ‘Paghinulsol, kay ang gingharian sa langit duol na.’ Sa balaang paggiya sa Dios, ako natawag nga sinugo, sa pagdala niini nga mensahe ngadto sa mga nasud sa yuta, nga akong nasabtan naghatag kanako og dako kaayo nga responsibilidad nga dili nako mahimo nga wala ang panabang sa Makagagahum.”³

Si Presidente Snow kanunay nga mapasalamaton sa desisyon nga iyang gihimo sa pagserbisyo sa Ginoo isip usa ka misyonaryo. Sa Septyembre 1901 sa edad nga 87, siya miingon: “Ako adunay kalipay bisan karon sa paghunahuna sa mga adlaw sa akong misyonaryo nga mga kahago. Ang mga pagbati nga nahimo niining espesyal nga mga kasinatian nahimong importante ug makahuluganon sa ako gayud nga pagkatawo.”⁴ [Tan-awa sa sugyot 1 sa pahina 276.]

Mga Pagtulun-an ni Lorenzo Snow

Kay nakadawat sa kahingpitan sa ebanghelyo, kita nagtinguha sa pagtabang sa uban nga malipay diha sa samang mga panalangin.

Kon ang usa ka tawo nakadawat og kahibalo, siya maaghat sa pagpakigbahin niini ngadto sa uban; kon ang usa ka tawo nahimong malipayon, ang espiritu nga naglibut kaniya nagtudlo kaniya sa pagpaningkamot sa paghimo sa uban nga malipayon. … Aduna bay kahigayunan sa usa ka tawo nga mahimong malipayon nga walay kahibalo sa ebanghelyo ni Kristo? … Bisan tuod niining kalibutan [ang mga tawo] naninguha sa paghimo sa ilang mga kaugalingon nga magmalipayon, sa gihapon dili sila malampuson sa unsay ilang gipaninguha nga makab-ot. Sila dili mahimong malipayon, gawas sa usa ka baruganan, ug kana mao ang pagdawat sa kahingpitan sa ebanghelyo, nga nagtudlo kanato sa dili paghulat hangtud kita moabut ngadto sa kahangturan nga dili pa nato sugdan ang paghimo sa atong mga kaugalingon nga malipayon, apan kini nagtudlo kanato sa pagpaninguha dinhi sa paghimo sa atong mga kaugalingon ug kadtong naglibut kanato sa paglipay diha sa mga panalangin sa Makagagahum.

Busa, kini, ang kinahanglan nga mahimong atong katuyoan ug hinungdan: sa pagkat-on sa paghimo sa atong mga kaugalingon nga mapuslanon; nga mahimong mga manluluwas sa atong isigkatawo; sa pagkat-on unsaon sa pagluwas kanila; sa pagtudlo kanila sa kahibalo sa mga baruganan nga mga kinahanglanon sa pagtuboy kanila ngadto sa samang gidak-on sa panabut nga atong naangkon.⁵

Lakaw ug pakighigala diha sa mga tawo kinsa naglibut kaninyo; o pagpili og usa ug sulayi sa pagdasig ang iyang mga pagbati, iyang hugot nga pagtuo, iyang mga kahimtang ug ang iyang hunahuna ug sulayi ang pagpasabut kanila ug kon sila mga makasasala, paningkamuti ang pagluwas kanila gikan sa ilang mga sala, ug ipalayo sila sa ilang pagkaulipon nga ilang nahimutangan aron sa pag-apil sa kahayag ug kalingkawasan nga inyong giapilan, kay niini nga paagi ikaw makahimo og maayo pinaagi sa kahibalo nga gihatag diha kanimo sa Ginoo ⁶ [Tan-awa sa sugyot 2 sa pahina 276.]

Ang mga misyonaryo andam nga mosakripisyo sa pagtabang sa uban nga makahibalo sa kamatuoran.

Wala pa gani kaayo mapahimutang ang mga Santos dinhi niini nga mga walog [sa Utah] nga ang mga sulugoon sa Ginoo mihatag na usab og pagtagad ngadto sa dakong misyonaryo nga buhat nga anaa sa responsibilidad sa Simbahan.

Diha kami taliwala sa kakabus ug nanlimbasog sa paghimo sa yuta nga mapuy-an, apan dili namo mabiyaan ang obligasyon nga diha kanamo sa pagsangyaw sa Ebanghelyo sa langyaw nga mga dapit; kay ang Ginoo naghatag sa sugo nga kinahanglan kini nga isangyaw sa tibuok kalibutan. Kini ang usa sa mga ebidensya sa pagkabalaan niini nga buhat nga diha taliwala sa mga pagpang-abug ug mga pagpanggukod ang mga Santos sa Ulahing mga Adlaw matinud-anong naningkamot sa pagtuman niini nga sugo sa Ginoo.

Diha sa kinatibuk-ang komperensya sa Simbahan nga gihimo kaniadtong Oktubre, 1849—duha ka tuig lamang human ang mga pioneer misulod sa walog [sa Salt Lake]—pipila ka mga Elder gitawag sa pag-abli og mga misyon sa lainlaing mga bahin sa yuta. Upat sa Napulog Duha ka mga Apostoles gitudlo sa pagpangulo. Si Apostol Erastus Snow gitawag sa pag-adto sa Scandinavia, si Apostol John Taylor ngadto sa France, ako sa Italya, ug si Apostol Franklin D. Richards ngadto sa England, diin may misyon na nga natukod. Ubos sa kabus kaayo nga kahimtang diin kami napahimutang, uban sa among mga pamilya nga wala gayuy salapi, kini usa ka malisud nga buluhaton alang kanamo; apan ang Ginoo mitawag, ug kinahanglan nga among tubagon, sa walay pagsapayan kon unsa nga sakripisyo ang nalakip.⁷

Gihalad namo ang among mga kinabuhi nga wala hunahunaa nga mahal namo, aron masabtan sa kalibutan nga adunay usa ka Dios diha sa walay katapusan nga mga kalibutan; aron ilang masabtan nga ang Dios adunay kalabutan sa karon nga panahon sa mga kalihokan sa katawhan. Nagkadaghan ang opinyon sa kalibutan nga ang pagkawalay pagtuo dili sayop. Bisan taliwala sa mga Kristiyanong bahin sa tawhanong pamilya, minilyon, bisan tuod sila dili gusto nga mokumpisal niini tungod kay kini wala mabantog, wala motuo nga ang Dios adunay kalabutan sa mga katawhan. Kinahanglan kitang mobarug ug mohimo og mga sakripisyo aron kana nga pagtuo ug kahibalo moabut sa mga katawhan.⁸

Kon kita motawag sa atong batan-ong mga misyonaryo sa pag-adto sa mga nasud sa yuta, ilang hunahunaon kining butanga, ug ingon nga nakadungog sa kasinatian niadtong nakaadto og mga daapit isip mga misyonaryo, kini dili kaayo makalipay nga butang alang sa usa ka tawo sa paghunahuna mahitungod sa mga pagsulay ug mga kalisud nga ilang maagian. Apan ang hiyas makit-an diha sa ilang pagkaandam sa pagsugod, ug sa pagtuman sa mga panginahanglanon. ⁹

Adunay mga butang mahitungod sa misyon nga dili tanan magustuhan sa atong batan-ong mga Elder. Sila nakaamgo nga kinahanglan ilang isakripisyo ang mga kalipay sa panimalay, ug ilang nasabtan nga sila moadto sa mga katawhan kinsa dili kanunay mobati og pagkamapasalamaton sa unsay ilang isulti ngadto kanila; apan, sa laing bahin, gibati nila nga sila adunay purohan sa mahangturon nga kinabuhi, ug nga kon sila makakaplag og matinuoron nga lalaki o babaye, ang Espiritu sa Ginoo modasig sa ilang mga kasingkasing ug tingali sila modawat niining mahimayaong mensahe nga ilang kinahanglan nga ihatag. Kini naghatag kanila og kalipay ug katagbawan. Ang lain nga butang, ilang makita niini nga kasinatian ang higayon alang kanila sa pagsiguro niana nga mahimong may dako kaayo nga bili ngadto kanila sa ilang umaabut nga mga katungdanan. Kini usa ka katingad-an nga butang nga uban sa liboan ka mga sulat nga akong nadawat gikan niadto kinsa gitawag sa pag-adto og mga misyon—kasagaran batan-ong mga lalaki—nga wala nako hunahunaa gawas sa usa nga mibalibad. Ngano kini? Kini tungod kay ang espiritu sa gugma ug sa pagka-imortal, ang Espiritu sa Makagagahum anaa niining batan-ong mga Elder, ug sila nakadawat og mga pagpadayag nga nagdasig kanila sa pagbuhat niana diin gawas niini walay pag-awhag ang makapaaghat kanila sa pagbuhat.¹⁰ [Tan-awa sa sugyot 3 sa pahina 276.]

Ang mga misyonaryo kinahanglan nga dili gayud makalimot nga sila mga sinugo sa langit, mga tigdala sa maayo ug makalipay nga mga balita.

Kita nagpadala sa atong mga Elder sa pagsangyaw sa Ebanghelyo. Kinsa ang nagpadala kanila? … Ang Dios sa Israel ang nagpadala kanila. Kini Iyang buhat. Walay mortal nga tawo nga interesado kaayo sa kalampusan sa usa ka Elder kon siya nagsangyaw sa Ebanghelyo kon dili ang Ginoo nga mipadala kaniya sa pagsangyaw ngadto sa mga katawhan kinsa mga anak sa Ginoo. Sila mga anak niya sa laing kalibutan, ug sila mianhi dinhi tungod kay ang Ginoo buot nga sila moanhi. ¹¹

Kami nagtuo nga kamo [mga misyonaryo] magmalampuson og maayo, tungod kay among gibati ug nahibaloan nga kamo gitawag sa Dios. Ang kaalam sa tawo dili gayud makahunahuna sa ingon nga buhat sama niini. Ako mahibulong kon akong hunahunaon ang kamahinungdanon niini. Ako makaingon nga kini mao gayud ang buhat nga kinahanglan niini nga panahon: ug ako nagtuo nga kamo moapil diha niini uban sa tibuok ninyong mga kalag. Ipalambo ang Espiritu ni Jesus sa diha nga siya miingon nga siya walay laing buhaton gawas niana diin ang iyang Amahan mihatag kaniya sa pagbuhat [tan-awa sa Juan 5:30].

Ayaw panumbalinga ang inyong mga kalisud ug tataw nga mga kapildihan; biyai ang inyong kaugalingon nga mga interes, ug ang inyong kalampusan mahimong halangdon ug mahimayaon, ug ang tibuok Simbahan mobati sa mga epekto sa inyong mga paghago.

Ayaw panumbalinga ang pagkawalay pagtagad sa uban niadtong kinsa inyong gihagoan, ug ang gagmay nga kahigawad nga inyong masinati, ang Espiritu sa Ginoo maanaa kaninyo ug inyong maawhag ang mga espiritu niadtong kang kinsa kamo nangalagad, ug mabuntog ang ilang pagkawalay pagtagad; … kamo matagbaw nga inyong natuman ang buhat nga kamo gipadala sa pagbuhat. …

Kamo adunay hingpit nga awtoridad nga gitugyan diha kaninyo, apan wala ninyo kinahanglana ang pag-istorya niini. Inyong madiskubrehan nga walay kinahanglan sa pag-istorya mahitungod niini; ang Espiritu sa Ginoo mopanghimatuod niini, ug ang mga tawo mobati nga kamo nagdala niini, ug kini nga panghimatuod ug pagbati mao ang mahimo ninyong awtoridad.

Inyong mahibaloan nga ang uban naghunahuna nga sila mas daghan og nahibaloan kay kaninyo, apan kon kamo mobuhat sa inyong katungdanan sama sa gisugyot, sa dili pa kamo mobiya kanila, mobati sila nga kamo adunay labaw og gamay kay sa ilang nahibaloan, ug nga kamo nakapanalangin kanila ug nakatabang kanila. …

Paningkamuti nga kamo mahimong mauyunon ngadto kang kinsa kamo gipadala. Ang pagkamapainubsanon nga inyong gipakita ug ang Espiritu sa Ginoo nga anaa diha kaninyo, mopakita sa inyong pagkasarang alang sa katungdanan nga kamo gitawag sa pagbuhat. Paningkamuti ang pagsabut sa tawhanong kinaiya ug lihok sumala niana, aron ang tanan magmalipayon ug ang tanan mauyunon. …

Adunay paagi sa pagdasig sa tawhanong kasingkasing, ug kini inyong buluhaton ang pagdasig sa mga kasingkasing niadtong kinsa kamo gitawag. …

Gibati nako sa akong kasingkasing ang pagsulti, Panalanginan kamo sa Dios. Kamo i-set apart sa dili pa kamo molakaw, ug kami mag-ampo alang kaninyo ug kami adunay dako nga kahingawa kaninyo. Pagmaaghup sa kasingkasing ug pagpaubos. Kon kamo motan-aw sa inyong tudloan, duha ka motibo ang mahimong modasig kaninyo; una, nga kamo unta maayong mosulti ug maghimo og maayo nga hunahuna diha sa inyong gitudloan isip usa ka mamumulong; ug, sunod, ang pangutana moabut, nganong ako ania dinhi? Sa pagpugas sa binhi sa kinabuhing dayon niadtong kinsa ania naminaw; ug ang pag-ampo kinahanglan nga motumaw diha sa inyong kasingkasing, “O Ginoo, mahimo unta kini; mahimo ba nga makabaton sa gahum pinaagi sa imong Espiritu sa paghikap sa mga kasingkasing niini nga mga tawo?” Kana nga mubo kaayo nga pag-ampo mao lamang ang gikinahanglan sa elder nga himoon. Kini lamang ang inyong gikinahanglan nga buhaton. Mahimo ba akong mosulti og usa ka butang sa pagluwas niini nga mga kalag?” Kini ang gusto sa Unang Kapangulohan … ug sa tanan ninyong mga kaigsoonan nga inyong buhaton.¹²

Pag-focus sa pag-andam sa inyong espirituhanon nga taming. Akong nahibaloan nga kon ang akong kalibutanong mga butang tanan biyaan, ang akong mata bug-os ngadto sa espirituhanon nga mga butang. Pag-ampo, mga kaigsoonan, ug ayaw paghunahuna nga ang pagpuasa makadaot. … Ayaw kaayo pagtiaw-tiaw, [ug] pagmatngon nga dili makapasilo sa Espiritu. Akong nahibaloan samtang didto sa akong misyon, human sa usa o duha ka semana, nakalimtan ko ang panimalay, ug ang Espiritu sa Dios misuporta kanako. Ang Espiritu nagtumong ngadto sa kagawasan ug kalipay, apan dili magpadala sa tuman nga kalipay. … Padayon sa pagkamainampuon nga ang Espiritu sa Dios maanaa kaninyo gikan sa inyong ulo ngadto sa ubos sa inyong mga tiil.¹³

Ang mga Elder nga naghago diha sa ubasan kinahanglan nga dili makalimot sa kamatuoran nga sila mga sinugo sa langit, tigdala sa maayo nga mga balita ngadto sa katawhan kinsa wala makaila sa Ginoo …

Sa diha nga si Presidente Joseph Smith mipadala sa unang mga Elder ngadto sa langyaw nga yuta, iyang nakita kon unsaon sila pagdawat, ug misulti siya kanila nga samtang ang pipila modawat kanila isip mga sulugoon sa Dios, ang kadaghanan mosalikway kanila, og dili manumbaling sa ilang mensahe. Kini mao ang kanunay nga mahitabo sa mga sulugoon sa Dios sukad sa sinugdanan sa panahon, ug kita kinahanglan gayud nga matagbaw sa mga resulta sa matinud-anong mga paghago, bisan pa og diyutay ang nadala pinaagi kanato ngadto sa kahibalo sa kamatuoran. …

Ako nanghinaut ug nag-ampo nga walay Elder nga naghago … makalimot sa iyang kaugalingon nga sa ingon mahulog nga biktima sa mga kahilayan sa kalibutan. Adunay usa lamang nga luwas nga paagi sa paglikay niini, ug kana mao ang pagpalayo sa dautan, oo, bisan gani ang hulagway sa dautan. Ang pipila ka porma sa tintasyon o uban pa itanyag nganha kanila. Kini mao ang buluhaton sa kaaway sa atong kaluwasan; apan buluhaton sa mga Elder sa Israel sa pagsalikway sa tintasyon, ug sa pagbuhat niini sa malampuson nga paagi sila kinahanglan gayud nga walay lama gikan sa kalibutan. … Kutob nga sila nagpalambo ug naghigugma sa diwa sa ilang misyon, ug nakaamgo sa importansya sa ilang dako nga responsibilidad diha ni Jesukristo, ug nagsunod niini nga diwa, sila makahimo sa pagbarug isip mga giya ug mga manluluwas sa mga katawhan, nagdan-ag ngadto kanila sa kahayag sa langit, ug dili mahisama sa uban nga mga lalaki, apan kon sila motunob sa yuta sa kaaway ug modawat sa kinaiya sa kalibutan, sila pagakuhaan sa ilang kalig-on ug mahisama sa ubang mga lalaki, angay lamang papaulion aron bation ang kaguol sa nakasala, ug himoon ang mga kasingkasing sa ilang mga minahal sa pagbangutan tungod sa ilang kondisyon. … Apan kon sila magpadayon sa pagpangayo ngadto sa Ginoo diha sa pagpaubos, nagbaton og mata nga bug-os ngadto sa Iyang kahalangdon ug kahimaya, ug nagtinguha diha sa ilang mga kasingkasing sa pagpahinabo sa kaluwasan sa katawhan, ug sa pagbuhat sa tanan kutob sa ilang mahimo sa pagpahinabo sa ilang kaluwasan, sila maanaay kalipay nga dili mahulagway tungod sa ilang pisikal nga mga kahago, ug sa katapusan mahimo nga mga tig-ambit uban sa Amahan ug sa Anak sa mga butang nga hilabihan ka mahinungdanon ug ka mahimayaon nga dili masabtan o mahunahuna sa katawhan. ¹⁴ [Tan-awa ang mga sugyot 4 ug 5 sa pahina 276.]

Ang atong mga kasingkasing nagmaya samtang kita nagtabang sa uban sa pagdawat sa kahingpitan sa ebanghelyo.

Kita nagdahum … sa atong bahin, aron sa pagtuman niini nga buluhaton, dako nga pailub, hugot nga pagtuo, kakugi, paglahutay, ug pag-antus ang kinahanglan nga pagagamiton ug masinati; apan sa mga siyudad … diin sa katapusan linibo ang modawat sa Ebanghelyo, sa daghan nga higayon daghan nga mga bulan ang gigahin nga ingon og walay resulta ang mga kahago sa wala pa ang angay nga pagtagad ug pagsunod niana nga mga baruganan mahimo. … Kita sa pipila ka [mga hitabo] dili lamang mogahin og mga bulan, apan gani tingali mga tuig; apan kita mobati og kasigurohan, nga pinaagi sa hugot nga pagtuo, pag-ampo, mga buhat, ug sa panalangin sa Ginoo, kita sa katapusan mobuntog ug modaug sa tanan niining mga kalisud ngadto sa kahalangdon ug sa kahimaya sa Dios; ug labot pa, kita sa atong mga kaugalingon mobati og kalipay sa kahibalo nga kita nakahimo sa atong katungdanan, ug nakalimpyo sa atong saput sa dugo sa tanang mga tawo.¹⁵

Diha sa [usa] ka okasyon, sa wala pa mopadayon ngadto sa Italya, mibisita ako sa Manchester, Macclesfield, Birmingham, Cheltenham, London, Southampton ug sa mga Komperensya sa Habagatan [sa England]. … Kalipay ko ang pakighimamat sa daghan niadtong ako ang paagi sa pagdala ngadto sa Simbahan [walo ka tuig ang milabay]; ug ako dili kinahanglan nga mosulti kaninyo nga ang pagkita og usab niining mga tawhana sa tinuod usa ka kalipay nga nindot hunahunaon sa kanunay. Si Apostol Juan misulti sa iyang panahon, “Kita nasayud nga kita nakalabang na gikan sa kamatayon ngadto sa kinabuhi, tungod kay kita nagahigugma man sa mga igsoon.” [1 Juan 3:14.] Kini nga gugma nga namugna diha sa kasingkasing sa misyonaryo nga mga Elder sa atong Simbahan alang sa mga tawo sa kalibutan, nga dili nila kaila, ug ang gugma sa mga tawo alang sa mga Elder kinsa ang nagdala kanila sa mensahe sa Ebanghelyo, niini mismo ang pagpamatuod igo sa pagdani sa matinuorong kasingkasing nga ang tinubdan niini balaanon, ug nga ang Dios uban kanato. Kini nga sagrado ug balaan nga pagbati, napukaw sulod kanato pinaagi sa Espiritu Santo, nakapaila na kanato isip usa ka komunidad gikan sa tanang tawhanong pamilya; ug kini mao ang pagbati nga mousab pa sa tibuok kalibutan, ug modani sa dili matuohon nga tawo nga ang Dios dili lamang ang Amahan kanatong tanan, apan nga kita Iyang mga higala ug mga sulugoon.¹⁶

Ngadto sa pagserbisyo sa Ginoo akong gihalad ang akong kinabuhi; ang akong tanan nabutang diha sa altar sa sakripisyo, nga ako mopasidungog kaniya, mobuhat sa iyang pagbuot nga mauyunon, ug mosangyaw sa mga baruganan sa kinabuhi taliwala sa mga katawhan. Kon ako mamalandong sa kagahapon, ug maniid sa kamot sa Ginoo nga sa milagrosong paagi naggiya kanako, ug nagpalambo kanako sa tanang butang kalabut ngadto niini nga mga misyon nga labaw kaayo kay sa akong gipaabut, gibati ko ang labing kadasig sa pagpadayon sa unahan alang sa umaabut, ang pulong sa tinuod wala makahimo sa pagpahayag sa lawom nga pasalamat sa akong kasingkasing alang sa iyang mga panalangin. Kadtong mga kaigsoonan ug mga Santos kansang manggihatagon nga kalag ug interes alang sa buhat sa Dios nga tataw napakita niini nga mga misyon diha kanila, hinaut nga ang panalangin sa Labing Halangdon mahatag sa samang pagkamanggihatagon, ug human sa mga katuigan madungog nila ang matam-is nga tingog sa liboan, ug sa minilyon niadto nga mga nasud nga nagsinggit og mga pagdayeg sa Makagagahum alang sa kahayag sa pagpadayag, niana ang ilang mga kasingkasing magmaya usab diha sa malipayong kahibalo nga sila usab naapil sa pagpahinabo niining mahimayaong katubsanan. ¹⁷ [Tan-awa ang sugyot 6 sa pahina 276.]

Mga Sugyot alang sa Pagtuon ug Pagtudlo

Hunahunaa kini nga mga ideya samtang ikaw nagtuon sa kapitulo o samtang ikaw nangandam sa pagtudlo. Alang sa dugang nga tabang, tan-awa sa mga pahina v–viii.

Basaha ang mga pahina 265–67, ug hunahunaa ang mga tubag ni Lorenzo Snow sa pangutana “Nganong ania ako dinhi?” Sa unsang paagi nga kining pangutana mahimong moimpluwensya sa tanan nga mga miyembro sa Simbahan sa atong mga oportunidad sa pagpakigbahin sa ebanghelyo?
Palandunga ang tambag ni Presidente Snow diha sa seksyon nga nagsugod sa pahina 267. Hunahunaa kon sa unsa nga paagi kamo mahimong mosunod niini nga tambag sa pagtabang sa usa ka tawo aron tinud-anay magmalipayon.
Si Presidente Snow misulti kalabut sa mga sakripisyo nga siya ug ang uban mihimo aron sila makahimo sa pagpakigbahin sa ebanghelyo (mga pahina 267–70). Unsa nga mga ehemplo ang inyong nakita sa mga tawo nga naghimo og mga sakripisyo sa pagpakigbahin sa ebanghelyo? Ngano sa inyong hunahuna nga ang mga tawo andam sa paghimo niini nga sakripisyo?
Sa unsa nga paagi ang mga kasigurohan diha sa mga pahina 269–72 nagtabang sa usa ka full-time nga misyonaryo? Sa unsa nga paagi kini makatabang sa matag usa kanato samtang kita nakigbahin sa ebanghelyo? Sa unsa nga mga paagi kita mahimong mogamit niini nga mga pagtulun-an sa pagtabang sa usa ka tawo kinsa nagduha-duha sa pagserbisyo og misyon?
Samtang kamo nagribyu sa tambag ni Presidente Snow diha sa mga pahina 270–74, paghunahuna mahitungod kon sa unsa nga paagi kini magamit diha sa mga kinabuhi sa mga miyembro sa Simbahan. Sama pananglit: Unsay inyong hunahuna ang gipasabut sa “biyai ang inyong kaugalingon nga mga interes”? Unsa ang nagkalainlaing mga paagi kita mahimong makakaplag og “pagdasig sa tawhanong kasingkasing”?
Basaha ang katapusan nga paragraph sa kapitulo, diin si Presidente Snow nagsaysay kalabut sa malungtaron nga kalipay sa misyonaryong buhat. Kanus-a ka nakasinati og kalipay sa misyonaryo nga buhat? Ngano nga usahay kita nagkinahanglan nga magpailub sa dili pa nato hingpit masinati kini nga kalipay?

May Kalabutan nga mga Kasulatan: Alma 26:1–8, 35–37; D&P 12:7–8; 18:10–16; 84:88

Tabang sa Pagtudlo: “Hangyoa ang mga partisipante sa pagpili og usa ka seksyon ug sa pagbasa niini sa hilum. Dapita sila sa pagpundok diha sa mga grupo sa duha o tulo ka mga tawo kinsa mipili sa sama nga seksyon ug hisguti kon unsa ang ilang nakat-unan” (gikan sa pahina viii niini nga basahon).

“Kon ang usa ka tawo nakadawat og kahibalo, siya maaghat sa pagpakigbahin niini ngadto sa uban; kon ang usa ka tawo nahimong malipayon, ang espiritu nga naglibut kaniya nagtudlo kaniya sa pagpaningkamot sa paghimo sa uban nga magmalipayon.”

“Biyai ang inyong kaugalingon nga mga interes, ug ang inyong kalampusan mahimong halangdon ug mahimayaon, ug ang tibuok Simbahan mobati sa mga epekto sa inyong mga paghago.