Kapitulo 10

“Sulod sa mga Templo”

“Ang mga kahigayunan nga gipakita sa Dios talagsaon ug maanindot; walay hunahuna ang makatugkad niini. Sulod sa mga Templo ug among ipakita kaninyo.”

Gikan sa Kinabuhi ni Lorenzo Snow

Wala madugay human sa iyang bunyag ug kumpirmasyon, si Lorenzo Snow misugod og tambong sa mga miting didto sa Templo sa Kirtland. Didto, uban ni Propeta Joseph Smith ug uban nga mga lider sa Simbahan, iyang nadawat ang talagsaong espirituhanong mga panalangin. Sa iyang journal siya miingon: “Didto anaa kanamo ang gasa sa panagna—ang gasa sa mga pinulongan—ang gasa sa paghubad sa mga pinulongan—ang mga panan-awon ug ang kahibulongan nga mga damgo giasoy—ang pag-awit sa langitnong mga koro nadungog, ug talagsaong mga pagpakita sa gahum sa pagpang-ayo, pinaagi sa pagpangalagad sa mga Elder, nasaksihan. Ang mga masakiton naayo—ang mga bungol nakadungog—ang mga buta nakakita ug ang mga bakol nakalakaw, diha sa daghang mga higayon. Klaro kaayo nga makita nga ang sagrado ug balaanong gahum—usa ka espirituhanon nga palibut anaa nianang balaang building.”¹

Si Lorenzo Snow ganahan kaayo sa Templo sa Kirtland, nasayud nga “ang Anak sa Dios, diha sa Iyang himaya, mipasidungog niini sa Iyang halangdong presensya.” Busa, natandog siya sa unang higayon nga siya mibarug sa pulpito didto aron motudlo. “Walay pulong ang makahulagway sa akong mga pagbati,” miingon siya, “sa dihang, sa kinaunhang higayon, mibarug ko sa usa niadto nga mga pulpito aron mamulong sa mga tawo—usa ka pulpito diin sa barandilya niini, dili pa lamang dugay, kining balaan nga Personahe mibarug—‘ang buhok sa iyang ulo puti sama sa lunsay nga yelo, ang iyang mga mata ingon sa usa ka siga sa kalayo’—diin usab sila si Moises, Eliseo ug Elijah miabut ug mihatag sa mga yawe sa ilang mga dispensasyon ngadto kang Joseph Smith.” [Tan-awa sa D&P 110.]²

Daghang katuigan ang milabay, niadtong Abril 6, 1892, si Presidente Lorenzo Snow mibarug atubangan sa laing panagpundok, niining higayuna atubangan sa hapit na mahuman nga Templo sa Salt Lake. Mga 40,000 ka mga Santos sa Ulahing mga Adlaw ang nagtapok sa dapit nga naglibut sa Temple Square, ug mga sobra sa 10,000 “nagpundok sa ibabaw sa mga balay ug mga dapit aron makakita sila.”³ Ang katawhan nagpundok alang sa usa ka seremonya diin ang capstone ibutang sa kinatas-an nga spire sa templo. Wala madugay nianang adlawa ang estatuwa ni anghel Moroni gitungtong sa capstone. Pinaagi sa mando sa Unang Kapangulohan, si Presidente Snow, kinsa nianang higayuna mao ang Presidente sa Korum sa Napulog Duha ka mga Apostoles, mao ang mopasiugda sa mga Santos sa Pagsinggit og Hosanna. Samtang iyang gipasabut ang pundok sa katawhan sa Pagsinggit og Hosanna, siya mipahayag sa iyang gugma ug kadasig alang sa buhat sa templo.

“Ang mga pulong sa pagsinggit og, Hosanna!” miingon siya, “isinggit sa higayon, o human, sa pagbutang sa capstone karon, gipahibalo ni Presidente Joseph Smith didto sa Templo sa Kirtland, ug gigamit didto sa balaanong panagtigum diin ang gahum sa Dios gipakita ug ang panan-awon sa Labawng Makagagahum naabli ngadto sa mga kaigsoonan. Dili kini ordinaryo nga mando, apan mao kini—ug nanghinaut kami nga klaro kining masabtan—usa ka sagradong pagsinggit, ug ipahigayon lamang diha sa talagsaong mga okasyon sama sa atong gihimo karon. Nanghinaut usab kami nga klaro kining masabtan nga gusto kami nga ang atong mga kaigsoonan dili lamang mopahayag sa mga pulong, apan ang ilang mga kasingkasing mapuno sa pasalamat sa Dios sa langit, kinsa mihuman, pinaagi sa atong paglihok, niining nindot ug talagsaon nga buluhaton. Traynta ka tuig na ang milabay karon ang pundasyon nga bato—ang sukaranang bato—sa Templo gipahimutang, ug sa paghunahuna ug pamalandong sa maanindot nga mga panalangin nga gihatag sa Dios kanato, Iyang katawhan, panahon niining daghang katuigan nga nanglabay sukad nianang panahona, kami nanghinaut nga bation sa mga Santos nga sa ilang pagsinggit niini nga kini nagagikan sa ilang mga kasingkasing. Pun-a ang inyong mga kasingkasing sa pasalamat.” Iyang gipakita ang Pagsinggit og Hosanna ug dayon miingon, “Karon kon kita moadto atubangan sa Templo, ug kini isinggit na, gusto namo nga ang matag lalaki ug matag babaye mosinggit niini nga mga pulong sa kinakusgan sa ilang mga tingog, aron ang matag balay niini nga siyudad mokurog, ang mga tawo sa tanang bahin niining siyudad makadungog niini, ug kini moabut sa mahangturong mga kalibutan.”⁴

Ang mosunod nga report kabahin sa seremonya sa capstone nagpakita sa balaang pagtahud ug kahinam sa mga Santos atol sa kalihokan:

“Pag-abut sa oras sa kaudtohon, si Presidente Wilford Woodruff mibarug sa atubangan sa entablado, nakita sa tanang nagpundok nga mga tawo, taliwala sa nagharing kahilum. Ang kahinam gibati sa mga kasingkasing sa mga tawo samtang siya namulong:

“‘Paminaw, tibuok balay sa Israel, ug tanang kanasuran sa yuta! Karon ibutang na nato ang kinatumyang bato sa Templo sa atong Dios, diin ang pundasyon niini gipahimutang ug gipahinungod sa Propeta, Manalagna ug Tigpadayag nga si Brigham Young.’

“Si Presidente Woodruff mituplok dayon sa electric button, ug ang capstone sa Templo mainampingong gipahimutang sa posisyon niini. Ang sunod nga nahitabo dili mahulagway sa pulong. Ang tinahud nga Presidente sa Napulog Duha, si Apostol Lorenzo Snow, miadto sa atubangan ug mipasiugda sa liboan ka mga Santos sa pagsinggit og dungan:

“‘Hosanna! hosanna! hosanna! sa Dios ug sa Kordero. Amen, amen, ug amen!

“‘Hosanna! hosanna! hosanna! sa Dios ug sa Kordero. Amen, amen, ug amen!’

“Ang matag singgit giubanan og wara-wara sa mga panyo. … Ang mga mata sa liboan nabasa sa mga luha sa dako nilang kalipay. Ang yuta daw miuyog sa kakusog sa tingog nga mipalanog sa naglibut nga kabungturan. Ang talagsaon o mas nindot nga talan-awon kay sa niini nga seremonya sa pagpahimutang sa capstone sa Templo wala pa marekord sa kasaysayan. Ang mga hosanna mao pa gayud ang paghunong sa dihang ang dakong kongregasyon mikanta sa mahimayaong makapadasig nga himno, ‘Ang Espiritu sa Dios sama sa nagdilaab nga kalayo.’”⁵

Si Presidente Woodruff mipahinungod sa Templo sa Salt Lake saktong usa ka tuig ang milabay, pagka-Abril 6, 1893, human sa pagtrabaho sa mga Santos og 40 ka tuig sa paghuman niini. Si Presidente Lorenzo Snow gitawag aron moserbisyo isip unang presidente niana nga templo, ug siya mituman niini nga calling hangtud nahimo siya nga Presidente sa Simbahan niadtong Septyembre 1898. Usa ka litrato ni Presidente Snow ang gibitay sa Templo sa Salt Lake karon, agig paghinumdom sa iyang gugma sa unsay iyang gitawag og “mahinungdanon nga buhat nga among gihimo” sa balay sa Ginoo.⁶ [Tan-awa sa sugyot 1 sa pahina .]

Mga Pagtulun-an ni Lorenzo Snow

Diha sa mga templo atong nasayran ang kabahin sa kahibulongan nga mga panalangin sa Dios nga giandam alang sa mga matinud-anon.

Ang mga kahigayunan nga gipakita sa Dios talagsaon ug maanindot; walay hunahuna ang makatukib niini. Sulod sa mga Templo ug among ipakita kaninyo. Daghan kaninyo, sa akong hunahuna, ang nakaadto na didto, ug nakadungog sa kahibulongan nga mga butang nga giandam sa Dios alang niadtong nahigugma Kaniya ug nagpadayong matinud-anon ngadto sa katapusan. …

… Iyang giandam ang tanan alang sa mga Santos sa Ulahing mga Adlaw kanang kutob sa ilang gusto o mahunahunaan aron mapahinabo ang ilang hingpit nga kalipay ngadto sa tanang kahangturan.⁷ [Tan-awa sa sugyot 2 sa pahina 169.]

Pinaagi sa mga ordinansa sa templo kita nag-ugmad og sagradong mga relasyon nga mohiusa sa mga pamilya karon ug sa kahangturan.

Hunahunaa ang mga saad nga gihimo nganha kaninyo diha sa matahum ug mahimayaon nga seremonya nga gigamit diha sa pakigsaad sa kaminyoon sulod sa Templo. Sa higayon nga ang duha ka mga Santos sa Ulahing mga Adlaw gihiusa diha sa kaminyoon, ang mga saad gihimo ngadto kanila kalabut sa ilang mga anak nga moabut sa tanang kahangturan.⁸

Kita nakadawat og dakong kaalam ug kahibalo sa mga butang nga nakapahingangha sa kalibutan kon kita maghisgut kabahin niini. Atong nasayran nga, sa mga templo, nag-ugmad kita og mga relasyon nga dili mohunong sa kamatayon, apan moabut ngadto sa kahangturan; sagrado nga mga relasyon nga mohiusa sa mga pamilya karon ug sa kahangturan.⁹ [Tan-awa sa sugyot 3 sa pahina 169.]

Diha sa mga templo atong madawat ang mga ordinansa sa kahimayaan alang sa atong mga kaliwatan nga namatay na.

Matag anak nga lalaki ug anak nga babaye sa Dios adunay oportunidad nga gikinahanglan sa kahimayaan ug himaya. … Adunay usa lamang ka paagi diin ang kahimayaan ug himaya mahimong maangkon. Kinahanglan nga magpabunyag kita alang sa kapasayloan sa mga sala ug mapandongan kita sa mga kamot aron madawat ang Espiritu Santo. Kini ug ang uban nga mga ordinansa mahinungdanon gayud kaayo alang sa kahimayaan ug himaya; ug kon ang mga tawo nabuhi sa panahon nga wala pa ang Ebanghelyo, kining mga butanga mahimong ipahigayon pinaagi sa ilang mga higala. Ania kita sa kalibutan karon aron sa paghimo niining mga butanga—labing minus, usa kini sa labing mahinungdanong mga katuyoan sa atong pag-anhi. Kita dili makahatag og igong gibug-aton sa kaimportante niini nga buhat.¹⁰

Dili aksidente ang atong pag-anhi niining kalibutana. Mianhi kita alang sa espesyal nga katuyoan, ug sa walay pagduhaduha pinaagi sa piho nga mga paghan-ay sa laing kinabuhi nga atong gipuy-an nga kita miabut niining kinabuhia. Hinoon, diha sa mga Templo atong gihimo ang mahinungdanon nga buhat kalabut sa atong kaliwatan nga namatay na. Kita sa matag karon ug unya adunay importante nga mga pagpakita nga ang Dios miuyon niining buhat nga atong gipahigayon sa atong mga Templo. Ang labing talagsaon nga mga pagpakita nasinati sa mga tawo nga nagtrabaho alang sa ilang mga katigulangan. Kini usa ka mahinungdanon nga buhat nga atong gihimo. Liboan ka mga tawo ang gibunyagan alang sa ilang mga patay panahon sa atong pagpadayon sa atong mga buhat diha sa mga Templo. …

Karon, sa atong mga Templo kita motugot sa mga tawo sa pagsulod, human nila masubay ang ilang katigulangan, bisan unsa pa ka layo, ug magpabunyag alang sa ilang namatay nga amahan, apohan nga lalaki, ug apohan sa tuhod ug uban pa, kutob sa ilang masubay. Dayon kita motugot kanila nga ang mga asawa ma-sealed ngadto sa ilang mga bana, tanan nga anaa sa linya sa mga katigulangan, kutob sa ilang masubay. Pananglit ang kaso sa usa ka hiyasnon nga lalaki nga nabuhi sa wala pa ang Ebanghelyo mapaila sa mga anak sa mga tawo. … Naminyo siya, ug nagbaton og pamilya; apan wala gayud siyay kahigayunan nga makadawat sa Ebanghelyo, nga anaa kanako ug kaninyo. Apan, siya mitudlo sa iyang pamilya og mga baruganan sa moralidad, ug siya mahigugmaon ug mabination sa iyang asawa ug mga anak. Unsa pa man ang iyang mahimo? Dili siya mahimong ipanghimaraut tungod kay wala niya madawat ang Ebanghelyo; kay wala pay Ebanghelyo nga dawaton. Dili mahimong kuhaon kaniya ang iyang asawa tungod kay sa dihang siya nakigminyo kaniya dili siya makaadto sa Templo ug ma-sealed kaniya karon ug sa kahangturan. Siya mihimo kutob sa iyang nahibaloan, ug siya naminyo kaniya sa karon, sumala sa pamaagi sa nasud. Kita nagtahud niana nga kaminyoon, gibalaan sumala sa mga balaod sa iyang nasud. … Atong i-sealed ang mga anak ngadto sa ilang mga ginikanan ug mga asawa ngadto sa ilang mga bana, tanan nga nahisubay sa linya.¹¹

Ang Manluluwas miingon sa piho nga okasyon, “Sa pagkatinuod, sa pagkatinuod, magaingon ako kaninyo, nga ang takna nagasingabut, ug karon mao na, nga ang mga patay managpakabati sa tingog sa Anak sa Dios;” ug Siya mipadayon ug mihimo niining talagsaon nga pagpahayag: “ug kadtong magapatalinghug mabuhi.” [Juan 5:25.] Ako nagtuo nga diyutay lamang kaayo ang dili makadawat sa kamatuoran Sila makadungog sa tingog sa Anak sa Dios; sila makadungog sa tingog sa Priesthood sa Anak sa Dios, ug sila makadawat sa kamatuoran ug mabuhi. Kining mga kaigsoonan nga makugihon kaayong mitrabaho diha sa mga templo makaangkon og pasidungog, sama kaniadto, sa pagkahimong mga manluluwas sa ilang kaliwatan ug kahigalaan nga alang kanila sila mipahigayon niini nga mga ordinansa.¹² [Tan-awa sa sugyot 4 sa pahina 169.]

Kita kinahanglan nga maningkamot sa pagpahigayon sa buhat sa templo ug family history, bisan kon nagkinahanglan kini og pagsakripisyo sa atong bahin.

Karon, kinahanglan nga mao kini ang tumong sa hunahuna sa matag lalaki ug babaye nga moadto sa atong mga Templo ug mopahigayon niini nga buhat. Dako kini nga buhat, ug importante usab. Kon kita moadto na sa laing kinabuhi ug makita ang atong namatay na nga mga higala nga nagpuyo didto, kon wala nato mapahigayon ang buhat nga gikinahanglan alang sa ilang kahimayaan ug himaya dili kaayo kita magmalipayon ug dili kini nindot nga panagkita.

Dili kita kinahanglang maghulat og oportunidad nga nindot ug maayo kanunay; apan kinahanglan nga maningkamot kita, bisan kon nagkinahanglan kini og gamayng sakripisyo sa atong bahin, nga atong ibutang ang atong kaugalingon diha sa kahimtang sa pagpahigayon niini nga buhat. … Kami matinguhaon gayud nga ang mga kaigsoonan dili mobaliwala niining importante nga buhat. Nasayud ba kamo kon unsa ang labing mahinungdanon nga buhat panahon sa liboan ka tuig sa pagpahulay [ang Milenyum]? Mao kining atong gipaningkamutan nga i-awhag nga ipahigayon sa mga Santos sa Ulahing mga Adlaw karong panahona. Ang mga Templo itukod sa tanang bahin niining yuta, ug ang mga kaigsoonan mosulod niini ug tingali motrabaho sa buntag ug gabii aron mapadali ang buhat ug mahuman ang mga buluhaton nga gikinahanglan sa dili pa ang Anak sa Tawo mopresentar sa Iyang gingharian ngadto sa Iyang Amahan. Kini nga buhat kinahanglan nga mahuman sa dili pa ang Anak sa Tawo moabut ug modawat sa Iyang gingharian aron ipresentar kini ngadto sa Iyang Amahan.¹³ [Tan-awa sa sugyot 5 sa pahina 169.]

Kon kita mosulod sa templo nga may putli nga kasingkasing, ang Ginoo mopanalangin kanato sumala sa unsay Iyang nasayran nga labing maayo alang kanato.

Atong bation kon kita mosulod niini nga mga templo nga atong natagamtam ang Epiritu sa Ginoo sa mas hingpit nga paagi kay sa bisan asa nga laing dapit. Kini mga building sa Ginoo, ug ang Iyang labing importante nga buhat gihimo sa sulod niini. …

… Mobati ako og katagbawan nga kon ang mga tawo mosulod niini nga mga templo, dili sila [mobiya] nga dili mobati og mas nindot ug uban sa determinasyon diha sa ilang mga hunahuna sa paghimo og mas maayo kay sa ilang nahimo. Kana ang pagbati nga gusto namong maangkon sa mga Santos. …

… Pagmatinud-anon, mga kaigsoonan, ug magmapadayunon; adto sa templo ug himoa ang inyong buhat didto, ug malingaw kamo, ug mas maandam sa pagbuntog sa kabati sa kalibutan.¹⁴

Kadtong [mosulod sa] Templo uban sa putli nga kasingkasing ug mahinulsulon nga espiritu dili mogawas niini nga dili makadawat og talagsaong mga panalangin, bisan kon sa uban, o posible sa kadaghanan, nga mga kahimtang tingali lahi kay sa atong gilauman. … Ang uban nga mga Santos tingali nagpaabut sa pagpakita sa pagpangalagad sa mga anghel … o nagpaabut nga makakita sa dagway sa Dios. Tingali dili kini makatabang kaninyo nga ihatag kana nga mga pagpakita. Ang Ginoo nasayud sa unsay labing maayo alang sa matag tawo, ug mopahiangay sa Iyang mga gasa alang sa kinamaayohan nga kalamboan niadtong modawat niini. Kini mapanglantawan nga ang matag matinud-anon nga mga Santos nga mosulod niana nga Balay makadawat og panalangin nga makahatag og katagbawan sa dumadawat. Sa dili pa kadtong misulod sa Templo [mogawas] niini, adunay [mo]tumaw sa ilang mga kasingkasing ug panabut nga [ma]gamit nila sa ilang umaabut nga kinabuhi. Niini, isip tinuod nga mga Santos sa Ulahing mga Adlaw, sila [paga]hatagan.¹⁵ [Tan-awa sa sugyot 6 sa pahina 169.]

Mga Sugyot alang sa Pagtuon ug Pagtudlo

Hunahunaa kini nga mga ideya samtang ikaw nagtuon sa kapitulo o samtang ikaw nangandam sa pagtudlo. Alang sa dugang nga tabang, tan-awa sa mga pahina v–viii.

Basaha ang asoy kabahin sa seremonya sa capstone alang sa Templo sa Salt Lake (mga pahina 159–163). Kon ikaw nakaapil na sa pagpahinungod sa templo, hunahunaa kon unsa ang imong gibati nianang higayuna. Kon kita moapil sa Pagsinggit og Hosanna, unsa ang atong gipahayag sa Ginoo?
Ribyuha ang pagdapit ni Presidente Snow nga “mosulod sa mga Templo” (pahina ). Hunahunaa kon unsaon nimo pagdawat kini nga pagdapit ug kon unsaon nimo paghatag kini nga pagdapit ngadto sa mga sakop sa pamilya ug mga higala.
Sa imong pagtuon sa ikaduhang seksyon sa pahina 163, pamalandonga ang mga panalangin nga moabut pinaagi sa pagdawat sa mga ordinansa sa templo ug paghimo og mga pakigsaad sa templo. Sa unsang paagi nga kini nga mga panalangin nakaimpluwensya kanimo ug sa imong pamilya?
Basaha ang unang seksyon sa pahina 164. Sa unsang mga paagi nga kita milihok isip “mga manluluwas sa [atong] mga kaliwatan ug kahigalaan” kon kita nagpahigayon niini nga buhat? Unsa nga mga kapanguhaan ang gihatag sa Simbahan aron sa pagtabang kanato?
Unsa ang atong mahimo aron mahatagan og gikinahanglan nga pagtagad ug panahon ang buhat sa templo ug family history? (Ribyuha ang seksyon sa pahina 167.)
Unsa ang pipila ka personal, espirituhanon nga mga panalangin nga atong madawat kon kita moapil sa buhat sa templo? (Alang sa pipila ka mga ehemplo, tan-awa sa pahina 168.)

May Kalabutan nga mga Kasulatan: D&P 97:15–17; 109:1–23; 128:15–18; 132:19; 138:57–59

Tabang sa Pagtudlo: “Makatabang ikaw niadtong imong gitudloan nga mobati nga mas masaligon sa ilang abilidad sa pag-apil sa panaghisgutan kon imong tubagon sa positibo nga paagi ang tanang sinsero nga komentaryo. Pananglitan, mahimo ikaw nga mosulti, ‘Salamat sa imong tubag. Maayo kaayo kadto’ … o ‘Nindot kana nga ehemplo’ o ‘Nagpasalamat ako sa imong tanang gisulti karon’” (Pagtudlo, Walay Labaw ka Mahinungdanon nga Tawag, 64).

Niadtong Abril 6, 1892, liboan ka mga tawo ang nagpundok aron sa pagsaksi sa capstone nga gibutang sa kinatas-an nga spire sa Templo sa Salt Lake.

Ang mga ginikanan makatabang sa ilang mga anak sa pagpangandam sa pagdawat sa pagdapit nga mosulod sa templo.