Kapitulo 21

Naghigugma sa Dios Labaw Pa Kay sa Atong Paghigugma sa Kalibutan

“Kinahanglan kitang mokab-ut … og mas taas nga ang-ang: kinahanglan nga atong higugmaon ang Dios labaw pa kay sa atong paghigugma sa kalibutan.”

Gikan sa Kinabuhi ni Lorenzo Snow

Human dayon si Lorenzo Snow nabunyagan ug nakumpirmahan didto sa Kirtland, Ohio, pipila ka mga Santos sa Ulahing mga Adlaw, lakip ang pipila ka mga lider sa Simbahan, mibatok ni Propeta Joseph Smith. Sumala ni Lorenzo Snow, kini nga apostasiya gisugnuran pinaagi sa pagpangagpas, o sa lain nga pagkasulti, dili sagad nga risgo sa negosyo sa paglaum nga madato og dali. Gibutaan sa tinguha alang sa temporaryong mga butang sa kalibutan, ang mga katawhan mibiya gikan sa mahangturon nga mga panalangin sa ebanghelyo.

Mga 50 ka tuig ang milabay, si Presidente Snow, nagserbisyo isip Presidente sa Korum sa Napulog Duha ka mga Apostoles, namulong ngadto sa usa ka grupo sa Santos sa Ulahing mga Adlaw sa Logan, Utah. Misulti siya kanila mahitungod sa kalisdanan nga iyang nasaksihan didto sa Kirtland ug mipahimangno kanila nga sila sa dili madugay makasinati sa samang mga pagsulay. “Adunay usa ka butang nga daling moabut nga mosulay kaninyo, tingali wala pa ninyo sukad masulayi,” miingon siya. “Ang tanan, hinoon, nga kinahanglan natong buhaton karon, mao ang pagtan-aw kon asa ang atong mga sayop ug mga kahuyang nahimutang, kon kita aduna. Kon kita wala magmatinud-anon sa nangagi, atong bag-uhon ang atong mga pakigsaad sa Dios ug maghukom, pinaagi sa pagpuasa ug pag-ampo, nga kita mangayo og kapasayloan sa atong mga sala, nga ang Espiritu sa Makagagahun maanaa kanato, nga unta kita mapalayo niadtong makusog nga tintasyon nga nagsingabut. Adunay mga tintasyon nga moabut. Inyong nakita unsa ang mga resulta didto sa Kirtland niining diwa sa pagpangagpas. Busa, pagmatngon.”¹

Tungod kay ang pasidaan ni Presidente Snow padayon nga magamit sa mga Santos sa Ulahing mga Adlaw, kadaghanan sa iyang wali ngadto sa mga Santos sa Logan gilakip niini nga kapitulo. Miingon siya, “Tingali pipila ka mga pulong kalabut sa atong kondisyon niana nga panahon [sa Kirtland] mahimong makatabang kanato sa umaabut—mahimong makahatag kanato og pipila ka mapuslanong mga leksyon.”² [Tan-awa sa sugyot 1 sa pahina 300.]

Mga Pagtulun-an ni Lorenzo Snow

Kon ang mga tawo motugot sa pagkakalibutanon sa paglukop sa ilang mga hunahuna ug mga kasingkasing, sila nagpalayo sa mahangturon nga mga baruganan.

Tataw kaayo nakong nahinumduman ang samok nga mga panahon nga nahitabo didto sa Kirtland … , diin ang Propeta sa Dios mipuyo, diin ang Dios Mismo, gani si Jesus, ang Anak sa Dios, mitungha ug mipakita Mismo diha sa Iyang himaya. Siya mibarug diha sa kilid sa barandilya sa pulpito sa Templo, nga gitukod pinaagi sa sugo. Diha ubos sa Iyang tiil ang usa ka butang nga hinulma sa lunsay nga bulawan, ang kolor sama sa amber. Ang Iyang buhok puti sama sa lunsay nga snow. Ang Iyang panagway mihayag sama sa kahayag sa adlaw. Ang Iyang tingog sama sa dahunog sa mga tubig. [Tan-awa sa D&P 88:104.] Kining katingalahang pagpakita diha sa templo nga gitukod sa pagpasidungog Kaniya. Didto ako sa Kirtland niana nga panahon, diin misinati kami og mga panghitabo nga, ako usahay naghunahuna , nga karon among gisugdan na pagsinati og usab. Ang mga kahigayunan nga naglibut sa mga Santos sa Ulahing mga Adlaw niana nga panahon dili sagad nga matang; sa labing minos, ang mga epekto diha sa mga tawo katingad-an og kinaiya. … Niana nga panahon ang diwa sa pagpangagpas milukop sa mga hunahuna sa mga katawhan sa nasud. Dihay mga pangagpas og kwarta, mga pangagpas sa banko, mga pangagpas og mga yuta, mga pangagpas og mga yuta nga anaa sa siyudad, mga pangagpas og daghang uban nga mga butang. Ang diwa sa pagpangagpas milapas sa mga hunahuna, ug milukop sa mga kasingkasing sa mga Santos sama sa usa ka gamhanan nga balud o naghaguros nga tubig, ug daghan ang nawala, ug mi-apostasiya.³

Ang pipila kanila [ang mga Santos sa Kirtland] misugod sa pagpangagpas; gikalimtan nila ang ilang relihiyon, gikalimtan nila ang mga baruganan nga gipadayag ngadto kanila, ug daghan kanila ang misunod sa gipangbuhat niana nga mga panahon ug misugod sa pagpangagpas. Ang mga kalisud miabut—kasina ug panagbangi—ug ang Ginoo, ingon nga wala mahimuot kanila, mipadala og kalaglagan diha kanila ug sila nagkatibulaag isip usa ka pamuy-anan.⁴

Sa hapit na kining dako nga apostasiya ang Ginoo mibu-bu og nindot nga mga panalangin niini nga mga katawhan. Ang mga gasa sa Ebanghelyo gibu-bu sa katingalahan nga gidaghanon—ang bahandi sa kahangturan. Mga anghel mibisita kanila. Ang Anak sa Dios, ingon nga ako misulti kaniadto, nakigsulti sa Iyang mga sulugoon. Sa pagpahinungod sa Templo ang mga panalangin nga nadawat sa mga katawhan mga nindot kaayo. Sulod nianang panahon sa kabuhong sa kalooy sa Dios ako, mismo, mitambong og lainlaing mga miting nga gihimo diha sa Templo. Kami dihay mga miting sa pag-ampo, mga miting sa pagpamatuod, ug ang mga pagpamatuod sa mga kaigsoonan mga nindot kaayo. Sila nanagna, sila namulong uban sa bag-o nga mga pinulongan, ug dihay paghubad sa panultig dila sa hilabihan nga kadaghan. Kini nga mga panalangin hapit anaa sa tanan nga mga katawhan sa Kirtland. Ang ilang mga kasingkasing mga matinud-anon; gibati nila nga ingon og ilang ikasakripisyo ang bisan unsa nga anaa kanila. Ilang gibati nga sila ingon og nagpuyo diha sa presensya sa Dios, ug kini natural nga aduna sila niana nga pagbati ubos sa ingon ka katingalahan nga mga impluwensya.

Ang tanan niini nga mga panalangin, ug daghan pa nga ako walay panahon sa paghingalan, gipahimuslan sa mga Santos sa Ulahing mga Adlaw sa hapit na ang panahon sa dihang ang diwa sa pagpangagpas misugod sa pagpuno sa mga kasingkasing sa mga katawhan. Ang usa ka tawo makahunahuna nga human sa pagdawat niining talagsaon nga mga pagpakita walay tintasyon nga makabuntog sa mga Santos.”Apan kini nahitabo, ug kini nakapatibulaag kanila, sa ingon, ngadto sa upat ka mga direksyon.

Katingalahan ingon nga kini nakita, kini nga diwa sa pagpangagpas mikanap ngadto sa korum sa Napulog duha ka mga Apostoles ug sa korum sa Pito ka mga Presidente sa Seventy; sa tinuod, walay korum diha sa Simbahan nga wala matandog niini nga diwa sa pagpangagpas. Samtang kana nga diwa migrabe, ang pagkawalay panaghiusa misunod. Ang mga kaigsoonan misugod sa pagpamasangil ug pagpakig-away sa usag usa, tungod kay ang ilang interes wala magkauyon.

Kini mao ba ang mahitabo sa mga Santos sa Ulahing mga Adlaw nga ako namulong karon? Ako nahadlok nga kini moabut, apan asa kutob kini makaapekto kaninyo, dili ako ang mosulti. Maangkon ninyo ang kasinatian, hinoon, ug tingali kini gikinahanglan kaayo nga kamo makasinati.

… Katunga sa korum sa mga Apostoles, sa mga panahon sa Kirtland, nahulog ubos niining dautan nga mga impluwensya. Kini mao ang mga pangagpas, kini nga paghigugma sa bulawan—ang dios sa kalibutan—nga nakahimo niining makaguol kaayo nga epekto. Ug kon kini aduna niini nga epekto diha niadtong naghupot sa labing taas nga priesthood dinhi sa yuta, sa unsa nga paagi kini moapekto kanato kinsa, tingali wala makabaton sa salabutan, sa impormasyon ug sa kasinatian nga ilang naangkon? …

Tan-awa, kamo maayong mga tawo. …Ang Dios nahigugma kaninyo. Siya nahimuot sa inyong pagkamatarung, ug dili Siya buot nga motan-aw nga ang mga hitabo mausab … nga didto sa Kirtland. Wala kini kinahanglana. Ania sa atong mga kamot ang gahum sa pagpanalipod sa atong mga kaugalingon gikan niadtong mga butang nga mibahin sa mga Santos sa Kirtland ug mibuntog sa katunga sa Napulog Duha. Ang Ginoo dili gusto nga, niining ulahing mga adlaw, kini nga mga hitabo masaksihan pag-usab.⁵

Ang mga Santos sa Ulahing mga Adlaw kinahanglan unta nga may dakong kaalam ug salabutan nga dili mahulog ngadto sa mga lit-ag nga sama niini ang matang. Kini walay kaayohan. Dili maayo sa usa ka tawo sa pagtalikod niining mahimayaong mga baruganan ug niadtong mga butang nga nadawat gikan sa mahangturon nga mga kalibutan—sa pagtalikod niining mga butanga ug malibug ug ihalad ang atong mga kaugalingon sa walay pulos nga mga butang sa kalibutan. Kini walay kaayohan kanato. Bisan unsa nga tintasyon ang moabut kanato o sa hain kita mahimutang karon kinahanglan nga atong hinumduman ang kasaysayan sa nangagi ug sa dili pagtugot sa atong mga kaugalingon nga mabuntog o kita magmahay niini pag-ayo.⁶ [Tan-awa sa sugyot 2 sa pahina 301.]

Kita nakigsaad sa pagbulag sa atong mga kaugalingon gikan sa pagkakalibutanon ug sa paghalad sa atong mga kaugalingon ngadto sa gingharian sa Dios.

Ang dios sa kalibutan mao ang salapi. Ang kalibutan nag-ampo niini nga dios. Kini ang labing gamhanan ngadto kanila, bisan tuod sila dili moangkon niini. Tan-awa, kini giplano, diha sa balaang paggiya sa Dios, nga ang mga Santos sa Ulahing mga Adlaw kinahanglan nga magpakita kon sila ba nakabaton og daghan kaayo nga kahibalo, diha sa kaalam ug gahum sa Dios nga sila dili mabuntog sa dios sa kalibutan. Kinahanglan gayud nga kita moabut niana nga punto. Kinahanglan usab nga maabut nato ang lain nga sumbanan, mas maayo nga paagi sa pagpuyo: kinahanglan nga atong higugmaon ang Dios labaw pa kay sa atong paghigugma sa kalibutan, labaw pa kay sa atong paghigugma sa salapi, ug higugmaon ang atong mga silingan sama sa atong mga kaugalingon.⁷

Kon kita … mapakyas sa paghupot sa mga pakigsaad nga atong gihimo, sama sa, sa paggamit sa atong panahon, talento ug abilidad alang sa pagtukod sa gingharian sa Dios dinhi sa yuta, unsay katarungan nato sa pagpaabut mabanhaw diha sa buntag sa unang pagkabanhaw, giila nga kauban sa mahinungdanong buhat sa katubsanan? Kon kita, sa atong pamatasan, mga nabatasan ug pakigsabut[mga], nagsunod sa … kalibutan, sa ingon niana nakig-uban sa atong mga kaugalingon sa kalibutan, sa inyong hunahuna, akong mga kaigsoonan, ang Dios ba mohatag kanato sa mga panalangin nga atong gitinguha sa pagpanunod? Sultihan ko kamo dili, siya dili mohatag! … Kinahanglan gayud nga lig-unon nato ang atong mga kaugalingon diha sa pagkamatarung sa langit ug itanom diha sa atong mga kasingkasing ang pagkamatarung sa Dios. Miingon ang Ginoo pinaagi ni propeta Jeremias, “Ibutang ko ang akong kasugoan sa ilang sulod nga mga bahin, ug diha sa ilang mga kasingkasing kini isulat ko; ug ako mahimong ilang Dios,ug sila mahimong akong katawhan.” [Jeremias 31:33.] Kini mao ang gipaningkamutan sa Dios nga buhaton, ug kini iyang matuman diha kanato kon kita mosunod sa iyang kabubut-on.⁸

Nagpasalamat ako sa Dios nga niining panahon sa korupsyon ug pagkadautan sa kalibutan, kita adunay balaan ug matarung nga mga lalaki ug mga babaye kinsa makahalad niadtong labing maayo nga mga talento nga gihatag sa Dios diha kanila alang sa Iyang pagdayeg ug himaya. Ug ako mosulti og dugang, nga adunay liboan ka mahiyason ug dungganan nga mga lalaki ug mga babaye, kinsa gipundok sa Ginoo gikan sa mga kanasuran, nga andam usab sa paghalad sa ilang panahon ug mga talento sa pagtabang sa katumanan sa buhat sa Dios alang sa kaayohan sa Iyang mga anak.⁹ [Tan-awa sa sugyot 3 sa pahina 301.]

Kita nagsunod sa ehemplo sa Manluluwas kon kita modumili sa pakigbaylo sa kahimayaan sa kahangturan alang sa mga bahandi sa kalibutan.

Kamo mahimo nga magpaabut … nga makasinati og mga kalisud diha sa dalan sa kinabuhi, nga inyong sulbaron sa labing maayo nga inyong mahimo, ug ang pipila kaninyo matintal sa pagtipas sa dalan sa kamatuoran ug dungog, ug, sama ni Esau, mibati nga mobiya sa kahimayaan sa kahangturan alang sa makadiyut nga mga higayon sa katagbawan ug kalipay [tan-awa sa Genesis 25:29–34]; niana … hupti ang inyong oportunidad sa pagsunod sa ehemplo sa atong Manluluwas kon tanyagan sa himaya niini nga kalibutan, kon siya mohimo og binuang; gitubag niya ang iyang maninintal, “Palayo gikan kanako, Satanas!” (Tan-awa sa Lucas 4:5–8.]¹⁰

Akong nahibaloan samtang naghunahuna kabahin sa kinabuhi, ang panahon dinhi sa kalibutan mubo kon itandi sa kahangturan; nga ang atong salabutan, ang pagkabalaan sulod kanato, diha ra sa kanunay, ug wala gayud gilalang, ug sa kanunay maanaa hangtud sa tanang kahangturan [tan-awa sa D&P 93:29]. Tungod niini nga mga kamatuoran, kini maayo alang kanato isip mga tawo nga may salabutan, nga makaamgo nga kini nga kinabuhi matapos sa pipila ka mga adlaw, dayon moabut ang kinabuhi nga walay katapusan; ug sumala sa atong pagsunod sa mga sugo, kita adunay bintaha niadtong napakyas sa paghimo niadtong mga pag-uswag.¹¹

Ang ebanghelyo naghiusa sa mga kasingkasing sa tanan nga sumusunod niini, wala kini maghimo og kalainan, wala kini makaila og kalainan tali sa adunahan ug sa kabus; kitang tanan gihiusa isip usa ka tawo sa paghimo sa mga katungdanan nga gitugyan ngari kanato. … Karon papangutan-a ako, Kinsa [ang] nag-angkon og bisan unsang butanga, kinsa gayud ug sa tinuod makatawag bisan hain niining mga butanga sa kalibutan nga iyang kaugalingon? Ako dili mohunahuna, ako usa lamang ka magbalantay sa usa ka gamay kaayo, ug ngadto sa Dios ako adunay tulubagon alang sa paggamit ug resulta niini Ang mga Santos sa Ulahing mga Adlaw nakadawat sa balaod sa ebanghelyo pinaagi sa pagpadayag sa Dios, ug kini yano kaayo nga pagkasulat nga ang tanan makasabut. Ug kon kita nakasabut ug nakatugkad sa pasalig nga atong gihimo sa diha nga kita mipakigsaad niini pinaagi sa bunyag alang sa kapasayloan sa mga sala, kinahanglan gayud gihapon nga kita mag-amgo sa kamatuoran nga kana nga balaod nagkinahanglan kanato sa pagpangita og una sa gingharian sa Dios, ug nga ang atong panahon, talento ug abilidad kinahanglang monunot sa kaayohan niini [tan-awa sa Mateo 6:33; 3 Nephi 13:33]. Kon kini dili mao, unsaon nato sa pagpaabut ang umaabut, kon kini nga yuta pagahimoon na nga pinuy-anan sa Dios ug sa iyang Anak, sa pagpanunod og kinabuhing dayon ug sa pagpuyo ug paghari uban kaniya?

Kinsa ang moingon nga ang adunahan, o kadtong nag-angkon og daghan nga mga talento, adunay mas maayo nga paglaum o mapaabut sa pagpanunod niini nga mga panalangin kay sa kabus, o niadtong kinsa adunay usa lamang ka talento? Ingon sa akong pagsabut niini, ang tawo nga nagtrabaho diha sa shop, mananahi man nga lalaki, panday, tigbuhat og sapatos o diha sa ubang industriyal nga departamento, ug kinsa nagpuyo subay sa balaod sa Ebanghelyo, ug matinuoron ug matinud-anon sa iyang calling, kana nga tawo sama lamang ka angayan sa pagdawat niini ug sa tanang mga panalangin sa Bag-o ug Walay Katapusan nga Pakigsaad sama ni bisan kinsa nga tawo; pinaagi sa iyang pagkamatinud-anon siya makabaton og mga trono, mga gingharian ug mga gahum, ang iyang mga anak ingon ka daghan sama sa mga bitoon diha sa kalangitan o sa mga balas diha sa baybayon. Kinsa, ako mangutana, aduna pa bay mas dako nga mapaabut kay niini?¹² [Tan-awa sa mga sugyot 3 ug 4 sa pahina 301.]

Mga Sugyot alang sa Pagtuon ug Pagtudlo

Hunahunaa kini nga mga ideya samtang ikaw nagtuon sa kapitulo o samtang ikaw nangandam sa pagtudlo. Alang sa dugang nga tabang, tan-awa sa mga pahina v–viii.

Hunahunaa ang asoy diha sa mga pahina 293–94. Unsa ang mahitungod sa pagkakalibutanon nga naggiya sa mga tawo sa pagkalimot sa ilang relihiyon? Sa unsa nga paagi kita makaamuma sa atong temporal nga mga panginahanglan nga dili mabuntog sa pagkakalibutanon?
Palandunga ang seksyon sugod sa pahina 294. Sa unsa nga paagi ang atong gugma alang sa Dios nagtabang kanato sa paglikay nga mabuntog sa pagkakalibutanon?
Mitudlo si Presidente Snow nga kita nakigsaad sa “paggamit sa atong panahon, talento ug abilidad alang sa pagtukod sa gingharian sa Dios dinhi sa yuta” (pahina 297). Paghunahuna mahitungod sa unsay inyong mahimo sa paghupot niini nga pakigsaad.
Ribyuha ang katapusang seksyon diha sa kapitulo. Sa unsa nga mga paagi nga ang mosunod nga mga kamatuoran makatabang kanato sa pagtuman sa atong mga pakigsaad? “Ang panahon dinhi sa kalibutan mubo kon itandi sa kahangturan.” Walay usa “gayud ug sa tinuod ang makatawag bisan hain niining mga butanga sa kalibutan nga iyang kaugalingon.”

May Kalabutan nga mga Kasulatan: Mateo 6:19–24; Juan 17:15; 1 Juan 2:15–17; Jacob 2:13–19; Mormon 8:35–39; D&P 38:39; 63:47–48; 104:13–18

Tabang sa Pagtudlo: Ang panaghisgut diha sa ginagmay nga mga grupo “naghatag sa daghang tawo sa oportunidad nga makaapil sa leksyon. Ang mga indibidwal nga sa kasagaran nagdumili sa pag-apil mahimong makigbahin og mga ideya diha sa ginagmay nga mga grupo nga dili nila masulti atubangan sa kinatibuk-ang grupo” (Pagtudlo, Walay Labaw ka Mahinungdanon nga Tawag, 161).

Bisan pa sa mahinungdanon nga mga pagpakita didto sa Templo sa Kirtland, daghan nga mga Santos nahulog ngadto sa apostasiya.

Sama sa adunahan nga batan-ong lalaki kinsa nakigsulti sa Manluluwas (tan-awa sa Mateo 19:16–22), pipila ka mga tawo karon natintal sa pagtalikod niadtong nanginahanglan.