Kapitulo 18

Pagpangulo sa Simbahan ug Walay Paghunahuna sa Kaugalingon nga Serbisyo

“Kami inyong mga sulugoon diha sa Ginoo ug nagtinguha sa inyong kaayohan ug sa kaayohan sa tanang katawhan.”

Gikan sa Kinabuhi ni Lorenzo Snow

Gikan sa Oktubre 1840 ngadto sa Enero 1843, si Lorenzo Snow midumala sa Simbahan sa London, England, ug sa naglibut nga dapit. Gidumala niya ang mga lider sa priesthood didto, usahay nagtudlo kanila sa personal ug usahay nagsulat og sulat sa paghatag og tambag. Sa hapit na ang katapusan sa iyang misyon didto sa England, misulat siya ngadto sa duha ka “Presiding Elders of London Branches,” kinsa miserbisyo sama kaayo sa gibuhat sa presidente sa branch karon. Sa iyang sulat, miasoy siya og usa ka kasinatian niya uban sa laing lider sa branch niana nga lugar.

Gihulagway ni Elder Snow kini nga lider ingon nga nagbaton og “walay sayop nga makita.” Ang tawo “mitrabaho og maayo sa pagtuman sa kawsa” ug may abilidad sa pagsiguro “nga ang tanan [anaa] sa iyang lugar, ug naghimo sa iyang katungdanan.” Siya kugihan, “[nag]trabaho og maayo kay ni bisan kinsa.” Apan bisan pa sa makita nga panagway sa pagkamatinud-anon, ang branch kanunay adunay mga problema nga ingon og siya gyud ang hinungdan. Si Elder Snow misulay sulod sa pipila ka panahon sa pag-ila sa tinubdan sa mga problema, ug sa hinay iyang gibadlong ang mga miyembro sa branch sa wala pagsuporta sa ilang lider. Dayon misugod siya sa pagkalibug kon ang lider “may posibilidad bang magbaton og sekreto, tinagong kinaiya nga wala siya [maka]matikod, nga [wala] kini makita sa dayag” apan kana misangput ngadto sa mga kalisud sa branch. Miasoy si Elder Snow:

“Tungod niini nag-ampo ako nga ang Ginoo mohatag kanako og gasa sa pag-ila sa sitwasyon. Ang akong pag-ampo gitubag; akong nahibaloan nga ang brother may matang sa pagpakaaron-ingnon, gitago nga kinaiya sa kaugalingong pagpasidungog nga naggiya kaniya sa iyang daghan nga mga lihok. Mopadala siya og brother sa pagtuman og pakigsabut apan adunay gitago nga pangandoy sa pagbaton sa dungog niini sa iyang kaugalingon; kon ang pakigsabut wala matuman, iyang pantunon ang may sala, dili tungod kay ang buhat sa Ginoo napakyas o kana nga brother nawad-an og panalangin, apan tungod [siya] sa iyang kaugalingon naglagot og maayo nganong wala sunda. Sa [usa] ka higayon diin daghan nga mga tawo ang gibunyagan sa usa ka brother, nalipay ang iyang kasingkasing dili kaayo tungod kay ang mga tawo nadala ngadto sa pakigsaad apan tungod kini nahimo ubos sa iyang pagdumala, sa hilum nangandoy nga walay tawo ubos sa iyang pagbantay ang mag-angkon og dakong dungog gawas kon ang iyang kaugalingong pangalan iapil tungod sa ilang pagkalambigit.

Napanid-an ni Elder Snow nga kon ang usa ka miyembro sa branch milampos sa usa ka buhat apan wala misunod sa tambag sa lider sa matag bahin, ang lider adunay “kinaiya sa kasina … nagtago luyo sa gipamulong nga pag-uyon.” Siya mipadayon: “Kini nga espiritu gitago; ang mga resulta wala sa dayag ipakita, apan ipakita kon dili mabantayan; kini maoy dala sa pagkatawo nga pagkadautan nga sa kadugayan moguba sa iyang pagkamapuslanon. Kini midala diha kaniya og wala kinahanglana nga kasamok sa pagpalakaw sa mga kalihokan ubos sa iyang katungdanan; kini usab nagmugna og tinubdan sa nagpadayong dili maayo diha sa iyang kaugalingong hunahuna. Matinguhaon nga ipausbaw ang kawsa sa Dios, apan kanunay sa ingon nga paagi nga ang iyang kaugalingong kamot mahimong makita gayud diha sa tanan nga mga butang. Makugihon sa paghatag og maayo nga mga panudlo apan mabinantayon sa pagbutang sa iyang tibuok pangalan sa tumang gidak-on diha sa ubos niini.”

Si Elder Snow wala mosulat niini nga sulat aron sa paghukom sa lokal nga lider. Ang iyang tuyo sa pagsulat mao ang pagtabang sa ubang mga lider—nga ang mapasigarbuhon nga espiritu nga iyang gihulagway “mahimong makita, mailhan, ug malikayan” taliwala kanila. Mipasidaan siya nga daghang mga tawo “kinsa sinserong nagtuo sa ilang mga kaugalingon nga wala niini nga kinaiya nga magpabayaw, mahimo sa higpit nga pagsusi sa ilang mga motibo nga nagdasig kanila sa ilang batasan, makadiskubre sa ilang katingala nga kini nga kinaiya nag-aghat kanila ngadto sa pagbuhat og daghan sa ilang mga lihok.”

Nagpaambit niini nga pahimatngon mitambag siya: “Nga mahimo unsay gusto sa Dios kanato, kinahanglan gayud nga anaron nato ang atong mga hunahuna sa paglipay sa pagtan-aw sa uban nga napanalanginan sama kanato; naglipay sa pagtan-aw sa kawsa sa Zion nga gibayaw pinaagi sa bisan unsay gusto nga buhaton sa Dios niini, ug dili motugot sa kasilag nga mosulod sa atong mga kasingkasing kon ang usa ka huyang nga tawo kay sa atong mga kaugalingon gihatagan og mas dako nga calling; pagmalipayon sa pagpalambo og mas ubos nga katungdanan hangtud tawgon ngadto sa usa ka mas dako; pagtagbaw sa pagbuhat og gagmay nga mga butang ug dili angkunon ang dungog sa pagbuhat og dagkong mga butang.” Gitandi niya ang Simbahan ngadto sa usa ka dako kaayo nga building, uban sa tagsa-tagsa ka mga Santos ingon nga kabahin niana nga building, nag-ingon nga kinahanglan kita nga “dili gayud magmapasigarbuhon nga usahay ipaubos, ipahiangay, tarungon, ug usbon aron mapahimutang didto sa dapit nga atong pagapuy-an diha sa espirituhanong building.

Gitapos ni Elder Snow ang iyang sulat niini nga mga pulong: “Kon ang tigdumala nga elder motinguha lamang sa paghimo kutob sa iyang mahimo ug kinahanglan nga mahimo, isalikway sa kaugalingon ang hinakog nga mga baruganan, ug kanunay nga molihok alang sa kaayohan sa iyang mga tawo, ug magpaubos, ug dili maninguha sa paghimo og daghan kaayo sulod sa gamay nga panahon, o magkugi og maayo hangtud maanad, dili gayud siya mapakyas kon unsaon sa pagpalambo ang iyang katungdanan sa husto nga paagi, ni magkulang sa gahum sa Dios sa pagpahinabo sa Iyang maalamong mga katuyoan.¹ [Tan-awa sa sugyot 1 sa pahina 262.]

Mga Pagtulun-an ni Lorenzo Snow

Ang Ginoo naghatag sa mga lider diha sa Iyang Simbahan og balaanong sugo: “Pakan-a ang akong mga karnero.”

Tuguti nga ang matag lalaki kinsa naghupot og opisyal nga katungdanan, kinsa gihatagan sa Dios sa iyang balaanon ug sagradong priesthood sa paghunahuna kon unsay gipamulong sa Manluluwas ngadto sa Napulog Duha ka mga Apostoles sa hapit na siya moadto sa presensya sa iyang Amahan—“Pakan-a ang akong mga karnero” [Juan 21:16–17.] Ug mipadayon siya sa pagsulti niini hangtud ang iyang mga apostoles mibati og kaguol nga siya kinahanglan magpadayon sa pagtawag kanila niini nga paagi. Apan miingon siya— “Pakan-a ang akong mga karnero.” Sa ato pa, “Lakaw uban sa inyong tibuok kasingkasing, pagmatinud-anon sa hingpit diha sa akong kawsa. Kini nga mga katawhan sa kalibutan akong mga kaigsoonan. Dako ang akong mga pagbati kanila. Amumaha ang akong mga katawhan. Pakan-a ang akong mga panon. Lakaw ug isangyaw ang ebanghelyo. Ako moganti kaninyo alang sa tanan ninyong mga sakripisyo. Ayaw paghunahuna nga kamo makahimo og dako kaayo nga sakripisyo sa pagtuman niini nga buhat.” Mitawag Siya kanila sa kinasingkasing sa pagbuhat niini. Ug karon ako motawag kaninyo kinsa naghupot niini nga priesthood, ang tigdumala nga mga opisyal diha [sa] stake, ug ang mga Bishop, ug ang High Council, sa paglakaw ug sa pagpakaon sa panon. Atimana ang ilang kaayohan. … Trabaho alang kanila, ug ayaw tuguti ang inyong mga hunahuna ug mga pagbati diha sa pagtuboy sa inyong kaugalingon. Dayon ang Dios mohatag kaninyo og pagpadayag human sa laing pagpadayag, inspirasyon human sa laing inspirasyon, ug motudlo kaninyo kon unsaon pag-angkon og mga panalangin sa mga Santos sa temporal ug espirituhanon nga kaayohan.² [Tan-awa sa sugyot 2 sa pahina 262.]

Ang mga lider ug mga magtutudlo gitawag sa pagsunod sa ehemplo sa Manluluwas ug pagserbisyo uban sa gugma, dili sa pagtuboy sa ilang mga kaugalingon.

Ngano nga ang [usa] ka tawo gitawag sa pagbarug isip presidente sa usa ka grupo sa katawhan? Aron ba sa pagbaton og impluwensya ug unya gamiton kana nga impluwensya sa alang sa pagtuboy sa iyang kaugalingon? Dili, apan sa sukwahi, gitawag siya sa paglihok sa mao nga katungdanan diha sa samang baruganan nga ang priesthood gihatag ngadto sa Anak sa Dios, nga siya kinahanglan nga maghimo og mga sakripisyo. Alang sa iyang kaugalingon? Dili, apan sa mga kaayohan sa katawhan kinsa iyang gidumala. Gikinahanglan ba nga ihalad ang iyang kaugalingon diha sa krus sama sa gibuhat sa Manluluwas? Dili, apan nga mahimong sulugoon sa iyang mga kaigsoonan, dili ilang agalon, ug sa pagtrabaho diha sa ilang kaayohan ug kapuslanan. Ang dili paggamit sa impluwensya nga naangkon sa kaayohan sa iyang kaugalingon, iyang pamilya ug mga paryente ug personal nga mga higala, apan sa pagtagad sa tanan ingon nga iyang mga kaigsoonan, may mga katungod sama sa iyang kaugalingon ug, busa, naningkamot sa pagpanalangin ug paghatag og samang kaayohan sa tanan sumala sa mga talento ug katakos nga anaa kanila, ug busa pinaagi sa pagbuhat sa mao nagpalambo diha sa iyang kaugalingon niana nga inamahan nga pagbati nga kanunay anaa sa kasingkasing sa Amahan. …

… Himoa nga kadtong nagsangyaw taliwala [sa] mga Santos, makasabut kon unsa ang Priesthood nga gihatag nganha kanila; pahibaloa sila ug sa hingpit pasabta nganong sila gitudlo sa paglingkod sa mao nga katungdanan, sa ato pa, nga sila kinahanglan nga molihok diha sa espiritu sa atong Agalon, usa ka sulugoon sa tanan, nga sila magkat-on sa paghunahuna ug pagtagad sa sama nga mahigugmaong tinguha, sa kaayohan sa tanan, sama sa ilang pag-amuma sa ilang mga kaugalingon. … Niana sila makasabut sa kahulugan sa duha ka labing dako nga mga sugo diin, ang Manluluwas, miingon, “nagasukad ang tibuok kasugoan ug ang mga propeta,” nga mao ang, paghigugma sa Ginoo sa tibuok natong kasingkasing, hunahuna, ug kalag, ug ang atong silingan sama sa atong mga kaugalingon. [tan-awa sa Mateo 22:37–40]. ³

Pag-ampo sa dili pa [magtudlo], ug kini: Hangyoa ang Ginoo nga kamo mahimong mosulti og usa ka butang sa panahon sa inyong mga pagpasabut nga mapuslanon ngadto sa mga tigpaminaw. Ayaw panumbalinga kon kini usa na ka butang nga modugang sa inyong kaugalingong dungog o dili, apan sa yano hunahunaa nga kamo gitawag sa pagpakigpulong sa mga tigpaminaw ug nga sila nagtinguha sa pagdawat og usa ka butang nga makahatag kanila og kaayohan. Kini mahimong gikan lamang sa Ginoo. Ayaw kaguol kon … kadto bang naminaw kaninyo mosulti nga kamo maayong misulti. Ayaw gayud panumbalinga kana, apan isalikway ang tanang kahakog nga mahimong anaa sa inyong hunahuna aron ang Ginoo mahimong modiktar diha kaninyo og usa ka butang nga mahimong mohatag og kaayohan ngadto sa mga tawo.⁴ [Tan-awa sa sugyot 3 sa pahina 263.]

Maalamong mga lider mapasalamaton sa mga talento sa uban ug naghatag og mga oportunidad sa pagserbisyo.

Gikan sa kamatuoran sa [usa ka lider] nga napamahal na sa mga tawo, ug nailhan na nila ang iyang integridad ug pagkamatinuoron, ug ang iyang pagkaandam nga motrabaho alang sa mga katuyoan sa Dios ug sa mga tawo, andam sa paghimo og bisan unsa nga sakripisyo nga mahimong gikinahanglan gikan kaniya, siya nag-angkon sa ilang pagsalig, ug sa diha nga naangkon na ang ingon ka sagrado nga pagsalig, unsa pa ang iyang mahimong buhaton aron sa pagtagbaw sa mga hunahuna sa mga tawo, nga mao, kapin o kulang, nahilig sa pagkamauswagon? Patawga kana nga tawo og iyang tabang diha sa iyang mga kaigsoonan kinsa mao ang labing makahimo, makigbahin kanila sa iyang mga responsibilidad. Tungod kay inyong mahibaloan, sa kinatibuk-an, nga ang talento gibahin ngadto sa daghan ug panagsa ra nga itingub diha sa usa ka tawo; ug kini nagkinahanglan lamang og oportunidad aron mapalambo. Mahimo nga moingon siya ngadto sa usa, “Ania, Brother Polano, ikaw mas angay nga molingkod niini o niana nga katungdanan kay kanako; o, ngadto sa lain, Ikaw ang tawo nga labing angay alang niini nga departamento;” ug magpadayon hangtud makuha niya ang mga talento sa tanan, ug kay sa magkawala ang pagsalig sa mga tawo diha sa iyang kaugalingon, ang mao nga paagi modugang ngadto niini.⁵ [Tan-awa ang sugyot 4 sa pahina 263.]

Ang husto nga paagi sa paggiya mao ang pinaagi sa pagkamapainubsanon, maayo nga ehemplo, ug pagkamatinud-anon ngadto sa kaayohan sa uban.

Ang hari-hari[anon] nga pagmando dili mao ang husto nga pagmando sa pagdumala sa mga Santos, apan hinoon ang pagpaningkamot sa pagpangalagad diha sa espiritu sa pagkamapainubsanon, kaalam, ug kaayo, nagtudlo pinaagi sa ehemplo kay sa sulti. Bisan tuod ang usa ka tawo nagtudlo uban sa kalarino sa anghel, apan ang maayong mga buhat sa tawo, maayong mga ehemplo, mga lihok, sa kanunay nagpakita sa kinasingkasing alang sa kaayohan sa mga tawo, nagtudlo nga mas larino, mas labaw ka epektibo.⁶

Kon kamo magmatinud-anon ug managhiusa sama nga ang Unang Kapangulohan ug ang Napulog Duha mga matinud-anon ug naghiusa, ug mosunod kanamo sama sa atong pagsunod ni Kristo, ang tanan mamaayo diha kaninyo. Kita determinado sa paghimo sa atong katungdanan ug sa pagserbisyo sa Ginoo ug maghago alang sa kaayohan sa Iyang katawhan ug sa katumanan sa Iyang buhat. “Kami inyong mga sulugoon diha sa Ginoo ug nagtinguha sa inyong kaayohan ug sa kaayohan sa tanang katawhan.”

Wala pilia sa Ginoo ang bantugan ug makinaadmanon sa kalibutan sa paghimo sa Iyang buhat dinhi sa yuta. Dili kadto kinsa gibansay ug na-edukar sa mga kolehiyo ug relihiyoso nga mga kolehiyo, apan ang mapainubsanon nga mga tawo nga matinud-anon ngadto sa Iyang kawsa kinsa mao ang Iyang gipili sa pagdumala sa mga kalihokan sa Iyang Simbahan, mga tawo kinsa andam nga pagapangulohan ug pagagiyahan pinaagi sa Balaang Espiritu, ug kinsa tungod sa panginahanglan mohatag sa himaya ngadto Kaniya, nasayud nga sa ilang mga kaugalingon walay silay mahimo. Ako makapaniguro kaninyo, mga kaigsoonan, nga ako walay tinguha sa pag-angkon sa katungdanan nga karon ania kanako. Kon nahimo ko pa ang paglikay niini sa maayo nga paagi wala unta ako dinhi niini nga katungdanan karon. Wala gayud ako mangayo niini, ni mangayo sukad og panabang ni bisan kinsa sa akong mga kaigsoonan nga unta akong maangkon kini nga katungdanan, apan ang Ginoo mipadayag ngari kanako ug ngadto sa akong mga kaigsoonan nga kini Iyang kabubut-on, ug wala akoy katungod sa pagtalikod sa bisan unsa nga responsibilidad ni pagbalibad sa paglingkod og bisan unsa nga katungdanan nga gikinahanglan sa Ginoo kanako nga lingkuran.⁷

Ako maningkamot sa pagmatinud-anon nganha sa inyong mga katuyoan ug sa mga katuyoan sa gingharian sa Dios. Moalagad ako kaninyo sa labing maayo sa akong kahibalo ug pagsabut, kalabut niana nga makapalambo sa katuyoan sa Makagagahum. Ako mobuhat niini, nga ang Ginoo maoy akong katabang.⁸ [Tan-awa sa sugyot 5 sa pahina 263.]

Mga Sugyot alang sa Pagtuon ug Pagtudlo

Hunahunaa kini nga mga ideya samtang ikaw nagtuon sa kapitulo o samtang ikaw nangandam sa pagtudlo. Alang sa dugang nga tabang, tan-awa sa mga pahina v–viii.

Sa unsa kaha nga paagi nga ang sulat ni Lorenzo Snow ngadto sa mga lider sa England (mga pahina 255–57) magamit nato? Sama pananglit, unsa ang moresulta kon kita adunay “espiritu sa pagtuboy sa kaugalingon” diha sa atong mga calling sa Simbahan? Sa unsa nga paagi atong mapalambo ang atong mga calling sa walay pagpalambo sa atong mga kaugalingon?
Tun-i ang seksyon nga nagsugod sa pahina 258. Sa unsa nga mga paagi ang mga lider makahimo sa “pagpakaon sa panon” ni Kristo? Unsa ang nahimo sa mga lider sa Simbahan sa “pagpakaon” kaninyo? Unsa nga mga kinaiya ang inyong gidayeg niini nga mga lider?
Basaha ang mga pasidaan ni Presidente Snow mahitungod sa kaugalingon nga pagtuboy (mga pahina 258–60). Dayon ribyuha ang tibuok ikatulong paragraph diha sa pahina 256. Nganong kinahanglan nga hunahunaon nato ang motibo sa atong paghatag og serbisyo? Sa mainampuon nga paagi hunahunaa ang inyong mga motibo sa pagserbisyo diha sa Simbahan.
Palandunga ang paragraph nga nagsugod diha sa ubos sa pahina 260. Sa unsa nga paagi ang ward o branch maimpluwensya kon ang mga lider nakigbahin sa uban nga mga responsibilidad ngadto sa ubang mga miyembro? Unsa ang mga resulta nga inyong makita kon ang mga miyembro sa Simbahan nga adunay nagkalainlaing mga talento ug mga kasinatian nagkahiusa og trabaho ngadto sa usa ka sama nga tumong?
Mitambag si Presidente Snow, “Ang hari-hari[anon] nga pagmando dili mao ang husto nga pagmando sa pagdumala sa mga Santos”(pahina 261). Unsa ang pipila ka posible nga mga resulta sa hari-harianon nga pagmando sa mga lider sa Simbahan? Sa mga ginikanan? Unsa ang pipila ka posible nga mga resulta sa mapainubsanon nga pagpangulo?

May Kalabutan nga mga Kasulatan: Mateo 6:24; 20:25–28; 23:5; Marcos 10:42–45; Juan 13:13–17; 2 Nephi 26:29; 28:30–31; Mosiah 2:11–19; 3 Nephi 27:27; D&P 46:7–11; 50:26; 121:34–46

Tabang sa Pagtudlo: “Ang mga pangutana nga isulat sa pisara sa dili pa magsugod ang klase makatabang sa mga estudyante nga maghunahuna kabahin sa hilisgutan bisan sa dili pa sugdan ang leksyon” (Pagtudlo, Walay Labaw ka Mahinungdanon nga Tawag, 93).

Ang matinud-anong mga lider sa Simbahan nagsunod sa pahimangno sa Ginoo ngadto ni Pedro: “Pakan-a ang akong kanero” (Juan 21:16–17).

“Inyong mahibaloan, sa kinatibuk-an, nga ang talento gibahin ngadto sa daghan ug panagsa ra nga gitingub diha sa usa ka tawo.”