Kapitulo 20

Ang Gingharian sa Ginoo Nag-uswag

Kini ang buhat niadtong kinsa nagpahayag nga anaa sa buluhaton sa [Dios] sa pagpadayon, sa pagpadulong sa unahan. … Kutob nga adunay nagpabilin nga buluhaton, kana nga buluhaton pagahimoon.”

Gikan sa Kinabuhi ni Lorenzo Snow

Sa 1844, samtang nagtuman sa buluhaton didto sa silangan sa Estados Unidos, nahibaloan ni Lorenzo Snow nga si Propeta Joseph Smith ug ang iyang igsoong lalaki nga si Hyrum gimartir. Siya miingon: “Ang balita sa masulub-on nga hitabo, sa dayag, miabut nga hingpit wala damha, ug nakapapugwat kanako sa tumang katingala ug kaguol, nga walay pulong nga makahulagway.” Nagsunod sa mga panudlo gikan sa Korum sa Napulog Duha ka mga Apostoles, nangandam siya sa pagpauli ngadto sa iyang panimalay sa Nauvoo, Illinois.¹

Sa kadugayan siya mihinumdom: “Kini gihunahuna sa uban sa mga panahon ni Joseph nga kini nga Simbahan dili makauswag gawas kon si Joseph migiya sa padulngan niini, ug sa dihang miabut ang panahon nga siya kinahanglan nga mobiya gikan niini nga kalibutan isip usa ka martir padulong ngadto sa kalibutan sa espiritu, ang mga Santos sa tibuok gingharian sa Dios hilabihan kaayo nga natay-ug. Kini usa ka butang nga wala damha. Hapit wala silay nahibaloan kon unsaon sa pagpadayon. Ang responsibilidad [sa paggiya sa Simbahan] busa gihatag ngadto sa Korum sa Napulog Duha ka mga Apostoles; ug pinaagi sa mga panalangin sa Dios diha kanila ug ang espiritu sa pagdasig nga anaa sa ilang mga kasingkasing, ug ubos sa paggiya sa Makagagahum, ang gingharian nag-uswag.”²

Ang ikaduhang Presidente sa Simbahan, si Brigham Young, namatay kaniadtong 1877, human nakagiya sa Simbahan sulod sa 33 ka tuig. Si Elder Snow, nianang panahona usa ka sakop sa Korum sa Napulog Duha, sa makausa pa misaksi og kausaban sa yutan-ong pagpangulo sa Simbahan. Sa kadugayan siya miingon nga si Presidente Young namatay nga wala damha. Ang mga Santos hapit dili andam niini. Ug bisan pa niini ang gingharian sa Dios miuswag.³

Sa diha nga si John Taylor, ang ikatulong Presidente sa Simbahan, namatay kaniadtong 1887, si Elder Snow mipasalig pag-usab sa mga Santos, “Ang Ginoo nakakita nga karon angay na sa pagtawag sa atong pinalanggang brother, si Presidente Taylor, palayo gikan niining kalibutan sa pag-antus, kini nga mga panghitabo sa pagkamartir; ug ang Simbahan sa gihapon nag-uswag.”⁴

Kaniadtong 1898, mga 11 ka tuig human gipasaligan og balik ang mga Santos didto sa lubong ni Presidente Taylor, gibati ni Lorenzo Snow nga siya mismo nanginahanglan sa mao nga pagpasalig og balik. Siya nag-alagad isip Presidente sa Korum sa Napulog Duha niana nga panahon. Si Presidente Wilford Woodruff nag-alagad isip Presidente sa Simbahan, ug ang iyang pisikal nga panglawas nagkaluya. Si Presidente Snow nahibalo nga sumala sa natukod nga linya sa pagpuli, siya modumala sa Simbahan kon mamatay si Presidente Woodruff. Usa ka gabii iyang gibati ang talagsaong kahasol niini nga posibilidad. Naghunahuna sa iyang kaugalingon nga kakulangan sa paglingkod sa pagkapangulo sa Simbahan, miadto siya nga nag-inusara sa usa ka lawak sa Templo sa Salt Lake sa pag-ampo. Mihangyo siya sa Dios sa pagpanalipod sa kinabuhi ni Presidente Woodruff, apan misaad usab siya nga iyang buhaton ang bisan unsa nga katungdanan nga gikinahanglan sa Dios kaniya.

Namatay si Presidente Woodruff sa Septyembre 2, 1898, dili dugay human sa kinasingkasing nga pag-ampo ni Presidente Snow didto sa templo. Si Presidente Snow didto sa Siyudad sa Brigham, mga 60 ka milya (100 ka kilometro) amihanan sa Siyudad sa Salt Lake, sa diha nga nadawat niya ang balita. Mihimo siya og pakigsabut sa pagbiyahe ngadto sa Siyudad sa Salt Lake pinaagi sa train nianang gabhiona. Sa iyang pag-abut, miadto na usab siya sa usa ka pribado nga lawak sa templo sa pag-ampo. Iyang giangkon ang iyang mga pagbati sa kakulangan apan mipahayag sa iyang pagkaandam sa pagbuhat sa kabubut-on sa Ginoo. Nag-ampo siya alang sa paggiya ug mihulat sa tubag, apan walay miabut. Busa mibiya siya sa lawak.

Misulod sa usa ka dako nga pasilyo, nadawat niya ang tubag—ug ang pasalig og balik— nga iyang gipangayo. Sa iyang atubangan nagtindog ang nabanhaw nga Manluluwas, kinsa misulti kaniya unsa ang kinahanglan niya nga buhaton. Sa wala madugay si Presidente Snow misulti sa iyang apo nga babaye nga si Alice Pond mahitungod niini nga kasinatian. Girekord ni Alice ang panagsinultihanay nila sa iyang apohang lalaki didto sa Templo sa Salt Lake.

“Diha sa dako nga koridor padulong ngadto sa lawak sa celestial, naglakaw ako nga una og pipila ka mga lakang ni lolo sa diha nga gipahunong niya ako ug miingon: ‘Kadiyot lang, Allie, gusto kong mosulti kanimo og usa ka butang. Dinhi gayud nga dapit nga ang Ginoong Jesukristo mipakita kanako sa diha nga si Presidente Woodruff namatay. Siya misugo kanako sa pagpadayon ug sa paghan-ay og usab sa Unang Kapangulohan sa Simbahan diha-diha dayon ug sa dili paghulat sama sa gihimo human sa kamatayon sa naunang mga presidente, ug nga ako ang mopuli ni Presidente Woodruff.

“Dayon si lolo mipaduol og usa ka lakang og mipakita sa iyang wala nga kamot ug miingon: ‘Siya dinhi gayud nagtindog, mga tulo ka pye gikan sa sawog. Ingon og nagtindog Siya diha sa usa ka palid sa solido nga bulawan.’

“Misulti kanako si lolo unsa ka mahimayaon nga personahe ang Manluluwas ug gihulagway ang Iyang mga kamot, mga tiil, panagway ug ang matahum nga puting saput, ang tanan usa ka himaya sa pagkaputi ug pagkahayag nga hapit dili siya makatan-aw Kaniya.

“Dayon si [lolo] mihimo og laing lakang paduol ug mibutang sa iyang tuo nga kamot diha sa akong ulo ug miingon: ‘Karon, apong babaye, gusto ko nga hinumduman nimo nga kini mao ang pagpamatuod sa imong lolo, nga siya misulti kanimo sa iyang kaugalingong ba-ba nga siya nakakita gayud sa Manluluwas, dinhi sa Templo, ug nakigsulti Kaniya nga nag-inatubangay.’”⁵

Ang pakig-istorya ni Presidente Snow og kadiyot sa Manluluwas maoy usa ka sagrado nga panghimatuod sa kamatuoran nga iyang nahibaloan sulod sa daghang mga katuigan—nga si Jesukristo mao ang pangulo sa Simbahan. Nadasig niini nga kamatuoran, si Presidente Snow kanunay mipamatuod nga ang Simbahan mopadayon sa pag-uswag bisan pa sa mga pagbatok. Mipahayag siya sa iyang pasalamat alang sa pribilehiyo nga nakaapil sa nagpadayon nga buhat sa Ginoo sa ulahing adlaw. Sa Oktubre 1898 nga kinatibuk-ang komperensya, diin siya gipaluyohan isip Presidente sa Simbahan, siya miingon: “Atong ikulit diha sa atong mga kasingkasing, atong ipamatuod sa hilum ngadto sa Ginoo, nga kita mahimong mas maayo nga mga tawo, mas naghiusa nga mga tawo diha sa atong sunod nga komperensya kay sa karon. Kinahanglan mao kini ang pagbati ug determinasyon sa matag lalaki ug babaye nga ania niining sagradong miting. Gibati ko sa akong kasingkasing nga ako maninguha nga mas matinud-anon kay sa ako kaniadto alang sa kaayohan sa gingharian sa Dios ug sa pagpadayon sa Iyang mga katuyoan.”⁶ [Tan-awa ang sugyot 1 diha sa pahina 289.]

Mga Pagtulun-an ni Lorenzo Snow

Agi og katumanan sa panagna, gipahiuli sa Ginoo ang Iyang Simbahan dinhi sa yuta.

Isip sulugoon sa Ginoo mopamatuod ako ngadto sa pagpadayag sa Iyang kabubut-on dinhi sa ika-disinwebe nga siglo. Kini miabut pinaagi sa Iyang kaugalingon nga tingog gikan sa kalangitan, pinaagi sa personal nga pagpakita sa Iyang Anak ug pinaagi sa pagpangalagad sa balaan nga mga anghel. Nagmando Siya sa tanang mga katawhan bisan asa sa paghinulsol, sa pagbiya sa ilang dautan nga mga paagi ug dili matarung nga mga tinguha, sa pagpabunyag alang sa kapasayloan sa ilang mga sala, nga sila mahimong makadawat sa Espiritu Santo ug modangat sa pakig-uban Kaniya. Iyang gisugdan ang buhat sa katubsanan nga gipamulong pinaagi sa balaan nga mga propeta, sa mga makinaadmanong tawo ug mga manalagna sa tanang panahon ug sa tanang kaliwatan sa mga katawhan.⁷

Ang Mormonismo, usa ka angga alang sa tinuod nga relihiyon sa Santos sa Ulahing mga Adlaw, wala mag-angkon nga usa ka bag-ong butang gawas niini nga henerasyon. Nag-angkon kini mismo isip ang orihinal nga plano sa kaluwasan, gihan-ay sa kalangitan sa wala pa ang kalibutan mamugna, ug gipadayag gikan sa Dios ngadto sa tawo sa lainlaing mga panahon. Nga sila si Adan, Enoch, Noe, Abraham, Moises, ug ubang takus nga mga tawo sa una aduna niini nga relihiyon nga nagsunod-sunod, sa nagsumpay-sumpay nga mga dispensasyon, kita, isip mga tawo, sa pagkatinuod nagtuo.… ang Mormonismo, sa laktud, mao ang karaan nga relihiyon sa Kristiyano nga gipahiuli, ang karaan nga Ebanghelyo nga gibalik pag-usab—niini nga panahon sa pagpasiuna sa katapusan nga dispensasyon, sa pagtukod sa sinugdanan sa Milenyum, ug sa pagtapos sa buhat sa pagtubos kalabut niini nga planeta.⁸

Atong makita ang kamot sa Makagagahum nga nagtukod og gingharian nga gipamulong sa dugay na kaayo nga mga panahon pinaagi ni Daniel ang Propeta,— usa ka gingharian nga motubo ug mokaylap hangtud kini mopuno sa tibuok kalibutan [tan-awa sa Daniel 2:44], kon ang kahayag ug ang salabutan mokaylap sa hilabihan nga kini dili na kinahanglan ni bisan kinsa nga tawo sa pag-ingon ngadto sa iyang mga isigkatawo, “Ilhon mo ang Ginoo, kay silang tanan managpakaila kaniya, gikan sa labing diyutay ngadto sa labing dako;” [tan-awa sa Jeremias 31:34] ug kon ang Espiritu sa Ginoo ibu-bu diha sa tanang katawhan sa hilabihan nga ang ilang anak nga mga lalaki ug ang ilang anak nga mga babaye managpanagna, ang ilang mga tawo nga tigulang managdamgo, ang ilang mga batan-ong lalaki makakita og mga panan-awon [tan-awa sa Joel 2:28], ug wala nay modaut o moguba sa tibuok bukid nga balaan sa Ginoo [tan-awa sa Isaias 11:9].⁹ [Tan-awa sa sugyot 2 sa pahina 289.]

Ang Simbahan ni Jesukristo sa mga Santos sa Ulahing mga Adlaw gitukod diha sa lig-on nga pundasyon, ug kini magpadayon bisan pa sa pagbatok.

Mga kaigsoonan, ang Dios nagtukod sa Iyang Simbahan ug Gingharian dinhi sa yuta alang sa kaayohan ug panalangin sa tawhanong pamilya, sa paggiya kanila sa paagi sa kamatuoran, sa pag-andam kanila alang sa kahimayaan diha sa Iyang presensya ug alang sa Iyang mahimayaon nga pag-anhi ug gingharian dinhi sa yuta. Ang Iyang mga katuyoan matuman bisan pa sa tanang pagbatok nga mahimong ipasangil kanila sa dautang mga tawo ug sa mga gahum sa kangitngit. Ang tanan nga nagbabag niini nga buhat pagakuhaon. Walay usa nga makasugakod sa Iyang gahum, apan ang tanan nga iyang gitakda sa bug-os ug sa hingpit matuman. Ang gugma sa Dios alang sa Iyang mga katawhan magpadayon ug magpabilin ug kini modaog diha sa Iyang gahum.¹⁰

Karon kinahanglan ba nga hisgutan kining gingharian nga giguba! … Ngano, mahimo usab kamong mosulay sa pagpu-pu sa mga bitoon gikan sa kalangitan o sa bulan o sa adlaw gikan sa gilibutan niini! Kini dili gayud matuman, tungod kay kini buhat sa Makagagahum.¹¹

Ang gingharian sa Dios nag-uswag uban ang kusog ug gahum, ug uban sa dako ug mahimayaong kalampusan.¹²

Kini nga buhat gitukod diha sa lig-on nga pundasyon, ingon nga gitukod diha sa iyang bato. … Dili igsapayan kinsa ang nawala sa dalan ug nagguba sa ilang hugot nga pagtuo, ang Simbahan magpadayon.¹³

Kini nga Simbahan mobarug, tungod kay kini anaa sa lig-on nga sukaranan. Kini dili hinimo sa tawo; kini dili hinimo sa Bag-ong Tugon o sa Daang Tugon; kini dili ang resulta sa nakat-unan nga atong nadawat sa mga kolehiyo ni mga kolehiyo sa relihiyon, apan kini niabut gikan gayud sa Ginoo. Ang Ginoo nagpakita niini kanato pinaagi sa gipadayag nga baruganan sa Balaang Espiritu sa kamatuoran ug ang matag tawo makadawat sa samang kamatuoran.

… Naghatag Siya kanato og kahibalo kon unsa ang atong pagabuhaton, kutob nga kita andam sa pagsakripisyo sa atong mga kinabuhi kay sa pagsupak niana nga kahibalo. Nag-abli Siya kanato sa mga sekreto sa celestial nga gingharian, ug siya kanunay nga nagtudlo kanato sa mga butang nga wala gayud nato mahibaloi kaniadto. Kini nga kahibalo ug salabutan nagtubo diha kanato sa kanunay.

… Kita nakadawat og sobra kaayo nga kahibalo nga ipugong sa atong mga katuyoan. Kadtong kinsa nagtinguha sa paglutos ug pagpukan sa Mormonismo, pasagdi sila ug ipabuhat ang ilang trabaho. … Ang atong buhat mao ang pagtubo diha sa kahibalo sa Dios, sa pagsunod sa mga sugo sa Dios, sa pagmatinud-anon ug sa pagpadayon sa pagtubo ug sa pagkaanam nga mahimong hingpit samtang nagtubo ang atong edad.¹⁴ [Tan-awa sa sugyot 3 sa pahina 290.]

Kita mao ang mga katawhan sa Dios, ug Siya mopanalipod kanato samtang kita nagpadayon ug nagbuhat sa tanan nga Iyang gikinahanglan.

Sa daghan nga mga higayon … diin ang kalaglagan sa mga katawhan sa Dios ingon og hapit na mahitabo, ug walay nakita nga agianan sa paglingkawas, … sa kalit usa ka butang o lain miabut nga giandam alang sa ilang kaluwasan sa paglikay sa umaabut nga kalaglagan. Atong makita kini sa hitabo sa mga Israelita sa diha nga gigiyahan ni Moises. Sa diha nga miabut na sila sa Pulang Dagat, ug ang kasundaluhang Ehiptohanon nga diha sa ilang luyo mibahad sa ilang kalaglagan, ingon og walay paagi sa paglingkawas, apan niana gayud nga higayon sa diha nga ang pagkaluwas gikinahanglan, tan-awa, kini miabut ug sila naluwas [tan-awa sa Exodo 14:10–25].

Busa kini ang nahitabo ug busa kini mahitabo gihapon kanato. Bisan pa og ang atong mga kalisud maingon og dagko kaayo, apan adunay paagi nga ihatag alang kanato sa paglingkawas kon kita sa atong mga kaugalingon mohimo sa mga katungdanan nga gikinahanglan diha kanato isip mga anak sa Dios. Apan kini mahimong kinahanglan sa umaabut—ug kini mao ang akong punto nga ako buot mohimo—alang sa pipila ka mga Santos sa pagbuhat sa bahin ni Ester, ang reyna, ug maandam sa pagsakripisyo sa bisan unsa nga butang ug sa tanan nga butang nga gikinahanglan diha sa ilang mga kamot alang sa katuyoan sa paglampos sa kaluwasan sa mga Santos sa Ulahing mga Adlaw.

Una kinahanglan gayud kita mahibalo nga kita mga katawhan sa Dios. … Kini atong obligasyon sa pagpaila sama sa gibuhat ni Ester, ug mag-andam sa pagrisgo sa tanan alang sa kaluwasan sa mga katawhan. Sa pagbuhat sa iyang buluhaton, si Ester miingon, “Kon ako mamatay, mamatay ako.” [Tan-awa sa Ester 4:3–16.] … Apan ang mga katawhan sa Dios dili mamatay. Kanunay adunay laki nga karnero nga nagapus sa kasampinitan alang sa ilang kaluwasan [tan-awa sa Genesis 22:13]. …

… Ang Ginoo nag-ingon, “Ako mitakda sa akong kasingkasing, nga Ako mosulay kaninyo sa tanan nga mga butang, kon kamo motuman ba sa akong pakigsaad, bisan ngadto sa kamatayon, aron kamo makita nga takus; kay kon kamo dili motuman diha sa akong pakigsaad, kamo dili takus kanako.” [Tan-awa sa D&P 14–15]. Kita adunay usa ka butang aron magpakabuhi; kita adunay tanan nga butang nga angayang pakamatyan. Apan walay kamatayon niini nga mga butanga. Adunay kaluwasan ug adunay kinabuhi kon ang mga katawhan sa Dios—kadtong kinsa nagtawag sa ilang mga kaugalingon subay sa pangalan sa Ginoong Jesukristo—mosunod sa iyang mga sugo ug mobuhat niana nga madawat sa Iyang panan-aw. Wala kini sa plano sa Makagagahum sa pagtugot sa Iyang mga katawhan nga pagalaglagon. Kon kita magmatarung ug mosunod sa Iyang mga sugo siya sa pagkatinuod moluwas kanato gikan sa tanan nga kalisud.¹⁵ [Tan-awa sa sugyot 4 sa pahina 290.]

Kini panahon na alang kanato sa pagpaubos sa atong mga kaugalingon diha sa atubangan sa Dios ug sa pagtuman sa buhat nga Iyang gisalig kanato.

Kini obligasyon niadtong kinsa nag-angkon nga naghimo sa Iyang buhat sa pagpadayon ngadto sa unahan, … nga walay pagbagulbol o pagapugson; kutob nga adunay nagpabilin nga lakang nga pagahimoon, kana nga lakang kinahanglan nga pagahimoon.¹⁶

Kini karon ang panahon alang sa mga Santos sa Ulahing mga Adlaw sa pagpaubos sa ilang mga kaugalingon diha sa atubangan sa Makagagahum. … Kini karon ang panahon alang sa mga Santos sa Ulahing mga Adlaw sa pagsusi diin sila mipasalig sa ilang mga kaugalingon; kini ang panahon alang sa mga Santos sa Ulahing mga Adlaw sa paghinulsol sa ilang mga sala ug mga kabuang ug sa pagtawag sa Makagagahum, nga ang Iyang panabang unta ihatag;… nga kita mahimong mopadayon sa unahan ug tumanon ang mahinungdanong buhat nga gisalig sa atong pag-atiman.¹⁷

Kita naapil diha sa buhat sa Dios. Ang atong umaabut mahimayaon, apan atong hinumduman, sa matag buhat sa atong mga kamot, nga kita mao ang mga sulugoon sa Dios ug nagbuhat sa Iyang kabubut-on. Ayaw itugot nga ang atong integridad dili masaligan, apan ang atong hugot nga pagtuo sa kanunay palambuon samtang kita nagpadayon sa kinabuhi. Igo kanako ang paglihok diin ako gibutang sa Kalooy sa Dios ug mangutana sa Dios kon unsay akong mabuhat sa pagtabang sa pagtukod sa gingharian sa Dios niana nga dapit, ug sa pagtabang kanako sa pagkab-ut sa mga panginahanglan alang sa akong pamilya.¹⁸

Kita mahimong motubo sa kahibalo ug gahum, ug diha sa atong abilidad sa pagtukod sa gingharian sa Dios dinhi sa yuta, ug nga, usab, pinaagi sa atong kakugi, atong pagkamapainubsanon ug pagkamatinud-anon ngadto sa mga pakigsaad nga atong nahimo.¹⁹

Kini mahimong makita pinaagi sa atong pagkawalay kahibalo sa pagsabut og hingpit sa mga paagi sa Ginoo ug sa Iyang mga katuyoan, nga sa atong pagpadayon og buhat aron sa pagtuman sa buluhaton nga atong giatubang, kita usahay moabut og usa ka hununganan nga dapit sa makadiyut, apan ang kamatuoran, wala ang mao nga butang diha sa buluhaton, ug wala gayud, kutob nga ang mga tawo mopadayon sa pagtrabaho nagbutang sa ilang pagsalig diha sa mga saad sa Dios. …

… Himoa nga ang matag tawo magmatinud-anon ug magmakugihon kaayo sa pagsunod sa mga sugo sa Dios, ug magpalambo sa tinguha sa pagbuhat og maayo ngadto sa naglibut kaniya; ug kon, sa pagpamalandong sa nangagi, atong nahibaloan nga wala nato mabuhat sa higpit pinasubay sa mga diktar sa atong mga tanlag ug katungdanan, atong himoon ang atong mga kaugalingon nga tarung sa atubangan sa Dios ug sa tawo, nga kita mahimong andam sa matag hitabo nga moabut. Himoa nga ang trabaho sa pagtukod og mga templo ug mga balay sa pag-ampo magpadayon; himoon [nato] ang pagpadayon sa pag-edukar sa [atong] mga anak ug patubuon sila sa pagtahud sa Ginoo, ug ipasangyaw gihapon ang Ebanghelyo ngadto sa langyaw nga mga kanasuran …

Kini mao ang buhat sa Dios, ug Siya naggiya sa direksyon ug kalamboan niini dinhi sa yuta, ug kini nga buhat kinahanglan nga labing importante sa atong hunahuna; ug kutob nga kita nagpadayon sa agianan sa katungdanan kita sa pagkatinuod magpabilin nga dili matarug ug determinado sa atong katuyoan, ug sa ingon nagpakita ngadto sa kalibutan sa atong hugot nga pagtuo ug pagkamatinud-anon sa mga baruganan sa kamatuoran nga gipadayag sa Dios. …

Posible kaayo nga ang Ginoo mohatag og bug-at kaayo nga buluhaton ngari kanato, nga magkinahanglan og dako kaayo nga sakripisyo diha sa iyang mga tawo. Ang nakaapan kanato mao, mohimo ba kita niana nga sakripisyo? Kini nga buhat mao ang buhat sa Makagagahum ug ang mga panalangin nga atong gipangita nga kita gisaaran, moabut human nato napamatud-an sa atong mga kaugalingon ug nakalampos sa kalisud. Wala akoy ikasulti ngadto niini nga mga tawo nga aduna, o nga wala, sa ilang atubangan ang usa ka malisud nga pagsulay nga sila pagahatagan aron sa pagsinati; ang pangutana kanako mao, andam ba ako sa pagdawat ug paggamit sa tarung ug sa maayo sa bisan unsa nga panalangin nga ang Ginoo aduna alang kanako nga angay sa Iyang mga katawhan; o, sa laing bahin, andam ba ako sa paghimo og bisan unsa nga sakripisyo nga Siya manginahanglan kanako? Dili ako mohatag og butang nga walay bili sama sa abug sa dagami alang sa bisan unsa nga relihiyon nga dili takus sa pagpakabuhi ug kana nga dili takus pakamatyan; ug dili ako mohatag og daghan alang sa usa ka tawo nga dili andam sa pagsakripisyo sa iyang tanan alang sa iyang relihiyon.

Tan-awa, ako [mosulti] ngadto sa usa ug sa tanan, Lihok! lihok, ug angkona ang kaluwasan sa Ginoo, ug ayaw paghunong.²⁰ [Tan-awa sa sugyot 5 sa pahina 290.]

Mga Sugyot alang sa Pagtuon ug Pagtudlo

Hunahunaa kini nga mga ideya samtang ikaw nagtuon sa kapitulo o samtang ikaw nangandam sa pagtudlo. Alang sa dugang nga tabang, tan-awa sa mga pahina v–viii.

Ribyuha ang mga asoy diha sa mga pahina 279–82. Unsa sa inyong hunahuna ang gipasabut sa pagsulti nga ang gingharian sa Dios nagpadayon? Unsa nga mga kasinatian ang nagtabang kaninyo sa pagtan-aw sa gingharian sa Dios nga nagpadayon?
Sa ikaduha nga paragraph diha sa pahina 284, nagpasabut si Presidente Snow sa upat ka mga panagna diha sa Daang Tugon. Sa unsa nga mga paagi kini nga mga panagna natuman karon?
Tun-i ang mga pagtulun-an ni Presidente Snow mahitungod sa pagpadayon sa Simbahan bisan pa sa pagbatok (mga pahina 284–86). Sa unsa kaha nga paagi kini nga mga pagtulun-an nagtabang kanato kon ang mga tawo naggukod kanato tungod sa atong tinuohan? Sa unsa nga paagi inyong gitagad ang pagbatok ngadto sa inyong pagpamatuod?
Eksamina ang ikatulo ug ikaupat nga mga paragraph diha sa pahina 286. Kon gikinahanglan kita sa paghimo og mga sakripisyo, unsa ang atong makat-unan gikan sa ehemplo ni Ester? Sa ingon nga mga sitwasyon, sa inyong hunahuna sa unsang paagi kini motabang kanato sa “pagkahibalo nga kita ang mga katawhan sa Dios”?
Diha sa katapusan nga seksyon sa kapitulo, nagtambag si Presidente Snow sa mga miyembro sa paglig-on sa gingharian sa Dios bisan asa nga dapit nga ang Ginoo nagbutang niini. Sa unsang mga paagi ang mga paningkamot sa mga ginikanan sa panimalay nagtabang sa paglig-on sa gingharian sa Dios sa tibuok yuta? Sa unsang paagi nga ang mga home teacher ug mga visiting teacher naglig-on sa gingharian sa Dios?

May Kalabutan nga mga Kasalutan: Mateo 24:14; Ether 12:27; Moroni 7:33; D&P 12:7–9; 65:1–6; 128:19–23

Tabang sa Pagtudlo: “Kini kasagaran makatabang ang pagsugod og hunahuna mahitungod sa umaabut nga leksyon human dayon ikaw nagtudlo sa nag-unang leksyon. Tingali ikaw labing mahibalo niadtong inyong gitudloan ug ang ilang mga panginahanglan ug mga interes human dayon ikaw uban kanila” (Pagtudlo, Walay Labaw ka Mahinungdanon nga Tawag, 97).

Si Presidente Lorenzo Snow mipamatuod sa Pagpahiuli sa ebanghelyo pinaagi ni Propeta Joseph Smith.

“Mga kaigsoonan, ang Dios mitukod sa Iyang Simbahan ug Gingharian dinhi sa yuta alang sa kaayohan ug panalangin sa tawhanong pamilya.”