Kapitulo 13

Relief Society: Tinuod nga Gugmang Putli ug Relihiyon nga Putli

“Walay institusyon nga natukod sukad nga adunay mas halangdon nga tumong. Ang basihanan niini mao ang tinuod nga gugmang putli, nga mao ang tiunay nga gugma ni Kristo.”

Gikan sa Kinabuhi ni Lorenzo Snow

Sa ting-init niadtong 1901, ang kinatibuk-ang kapangulohan sa Relief Society mi-organisar og tibuok adlaw nga kalihokan alang sa mga sister sa Relief Society sa Salt Lake Valley. Si Presidente Lorenzo Snow midawat sa pagdapit nga motambong ug mamulong sa grupo. Iyang gisugdan ang iyang pakigpulong pinaagi sa pag-ingon: “Nagpasalamat ko sa pribilehiyo nga makagahin og usa ka oras o duha kauban ninyo karong hapona, ug ako naglaum nga kamong tanan nalingaw karong adlawa. Ang husto nga kalingawan ug paglingaw-lingaw maayo nga mga butang, ug ako malipayon nga makita kamong mga sister nga nagpahigayon og gamayng pagpahulay ug paglingaw-lingaw, kay kamo nga nagtrabaho og grabe kaayo matag adlaw diha sa inyong mga panimalay ug diha sa Relief Society sigurado gayud nga angayan sa tanang kalipay kutob sa inyong mahimo.”

Si Presidente Snow, kansang igsoong babaye nga si Eliza R. Snow nakaserbisyo isip ikaduhang kinatibuk-ang presidente sa Relief Society, mipadayag og pasalamat alang sa buhat sa Relief Society. Namulong kabahin sa kababayen-an sa Simbahan, siya miingon, “Lisud hunahunaon kon unsa unta ang atong nabuhat, o unsa nga pag-uswag ang nahimo sa buhat sa Ginoo, kon wala sila.” Sa paghisgut og usa ka sanglitanan, iyang gipasabut ang programa sa misyonaryo sa Simbahan nianang higayuna, diin ang minyo nga kalalakin-an kasagaran gitawag aron moserbisyo og full-time nga mga misyon: “Sa dihang nahilayo kami alang sa mga misyon sa gawas sa nasud, ang ilang mga misyon sa panimalay dili minus sa kabug-aton kay sa atoa nga didto sa laing nasud; ug taliwala sa pagsulay ug kalisdanan ilang gipakita ang pagpailub, kalig-on ug pagtabang sa kaugalingon nga tinuoray gayud nga makapadasig. Salamat sa Dios alang sa kababayen-an niini nga Simbahan! Mao kana ang akong gibati karon samtang miapil ako niini nga panagtigum.”¹ [Tan-awa sa sugyot 1 sa pahina .]

Mga Pagtulun-an ni Lorenzo Snow

Ang mga sakop sa Relief Society nagpakita sa tinuod nga gugmang putli ug relihiyon nga putli.

Ang Relief Society na-organisar … pinaagi kang Propeta Joseph Smith, ubos sa inspirasyon sa Ginoo. … Karon giila kini isip usa sa labing gamhanang mga pwersa alang sa kaayohan diha sa Simbahan. …

Ang misyon sa Relief Society mao ang pagtabang sa mga nangasubo, pagpangalagad sa mga masakiton ug maluyahon, pagpakaon sa mga kabus, pagsinina sa mga hubo, ug pagpanalangin sa tanang anak nga mga lalaki ug anak nga mga babaye sa Dios. Walay institusyon nga natukod sukad nga adunay mas halangdon nga tumong. Ang basihanan niini mao ang tinuod nga gugmang putli, nga mao ang tiunay nga gugma ni Kristo [tan-awa sa Moroni 7:47], ug kana nga diwa napakita sa tanang mga pagpangalagad sa Kapunongan diha sa katawhan. Si Apostol Santiago miingon nga ‘ang relihiyon nga putli ug dili bulingon sa atubangan sa Dios ug sa Amahan mao kini: Ang pagduaw sa mga ilo ug mga babayeng balo sa ilang mga pagkaguol, ug ang pag-amping sa kaugalingon nga dili mahugawan sa kalibutan.” [Santiago 1:27.] Midawat niana nga tinuod, ang mga sakop sa Relief Society siguradong mihimo nga ehemplo sa putli ug dili bulingon nga relihiyon diha sa ilang kinabuhi; kay sila nangalagad niadtong mga naguol, ilang gilikos ang ilang mga kamot sa gugma libot sa mga ilo ug sa mga babayeng balo, ug ilang giampingan ang kaugalingon nga dili mahugawan sa kalibutan. Makapamatuod ako nga walay mas putli ug mas mahadlukon sa Dios nga mga babaye sa kalibutan kay sa anaa sa pundok sa Relief Society.² [Tan-awa sa sugyot 2 sa pahina 202.]

Ang mga sister sa Relief Society nagtrabaho uban sa mga naghupot sa priesthood aron sa pagpalambo sa mga gitinguha sa gingharian sa Dios.

Kanunay kining nahimong tinubdan sa kalipay ngari kanako nga makabantay kon unsa kamo ka matinud-anong misuporta mga sister sa Relief Society sa mga sulugoon sa Ginoo ubos sa tanang mga kahimtang. Kanunay kamong nakit-an diha sa kiliran sa Priesthood, andam nga mopalig-on sa ilang mga kamot ug sa pagbuhat sa inyong bahin sa pagtabang sa pagpalambo sa mga gitinguha sa gingharian sa Dios; ug samtang nakigbahin kamo niini nga mga buhat, sigurado usab kamo nga mopakigbahin sa kalampusan sa buhat ug sa kahimayaan ug himaya nga ihatag sa Ginoo ngadto sa Iyang matinud-anong mga anak.

… Walay maalamong Bishop ang mapakyas sa pagpasalamat sa mga trabaho sa Relief Society diha sa iyang ward. Unsa man ang mabuhat sa usa ka Bishop kon wala ang Relief Society? Moingon ko sa tanang mga Bishop sa Simbahan, awhaga ang mga sister sa Relief Society, ug suportahi sila sa ilang buhat sa gugmang putli ug kalooy, ug sila makahatag og panalangin nganha kaninyo ug sa mga tawo.³ [Tan-awa sa sugyot 3 sa pahina 202.]

Maayo nga mabatunan ang impluwensya sa Relief Society sa matag panimalay.

Akong tambagan ang mga kaigsoonan sa pag-awhag sa ilang mga asawa sa [pagsalmot diha] sa kapunongan … ; kay kini maayo nga butang nga mabatunan ang impluwensya niini nga organisasyon sa matag panimalay. Ako mohangyo kaninyo, akong mga sister, diha sa inyong mga pagbisita sa mga panimalay sa mga Santos sa Ulahing mga Adlaw, sa pagdala niini nga impluwensya bisan asa kamo moadto. Ang Ginoo klaro nga mipakita kaninyo sa matang sa inyong relasyon ngadto Kaniya ug unsay gilauman gikan kaninyo isip mga asawa ug mga inahan. Itudlo kini nga mga butang ngadto niadtong inyong bisitahan, ilabi na sa batan-ong mga babaye. …

Kamo, akong mga sister, isip mga sakop sa Relief Society ug isip mga inahan sa Israel, kinahanglang mogamit sa inyong impluwensya … agig pabor sa tiunay nga pagka-inahan ug pagkamatinud-anon sa pakigsaad sa kaminyoon.⁴ [Tan-awa sa sugyot 4 sa pahina 203.]

Samtang naglambo ang Simbahan, ang mga sister sa Relief Society makabaton og mas dagkong mga oportunidad sa pagserbisyo.

Dili na kinahanglan alang kanako sa pagdetalye kon unsay nahimo sa Relief Society sa nangagi; ang talagsaon niining buhat nahibaloan sa tibuok Zion, ug sa daghang mga dapit sa kalibutan. Igo na ang pag-ingon, nahimo kining matinuoron sa misyon niini, ug ang rekord niini wala malabwi, kon natupngan, sa bisan unsa nga matinabangon nga organisasyon. Ang mga Santos sa Ulahing mga Adlaw mapasigarbuhon niini ug sa mga nahimo niini, ug mapasalamaton sa atong Amahan sa Langit nga Siya midasig sa Iyang sulugoon ang Propeta sa pag-establisar sa ingon nga institusyon. Ang kaugmaon sa Kapunongan puno sa saad. Samtang naglambo ang Simbahan, ang ikatabang niini magkadako usab, ug gani mas maayo pa ang mahimo nga kaayohan niini kay sa kaniadto. Kon ang tanang mga sister maghiusa sa pagsuporta sa kapunongan, makahimo kini og talagsaon nga buhat ug magpadayon nga panalangin ngadto sa Simbahan. Makatagbaw nga tan-awon ang mga hamtong nga ingon ka interesado niini nga institusyon sama sa mga tigulang, ug sa ingon sila makabantay nga kini makapalig-on sa ilang pagtuo, makahatag kanila og mas halapad nga mga ideya sa kinabuhi ug sa mga responsibilidad niini, ug makapalambo kanila sa materyal nga paagi diha sa dalan sa pag-uswag ug kahingpitan.⁵

Gikan sa sinugdanan sa ilang buhat ang panalangin sa Dios gihatag ngadto [sa kababayen-an sa Simbahan], ug nakakita ko og dakong kamaya ug kalipay ug lawom nga tinguha sa ilang pag-uswag. … Nagmalampuson sila sa hilabihan, ug talagsaon kini kon giunsa sa Dios sa pagpanalangin kanila ug pagbu-bu kanila sa Iyang Espiritu. Sila nahimo, tingali akong isulti sa matinahurong paagi, isip mga anghel nga nagbarug sa atubangan sa mga tawo sa kalibutan.⁶ [Tan-awa sa sugyot 5 sa pahina 203.]

Ang mga sister sa Relief Society kinsa nagasalig sa Dios ug nagserbisyo Kaniya panalanginan dinhi niini nga kinabuhi ug sa kahangturan.

Kini ang among tinguha nga masilsil diha sa mga kasingkasing sa mga sister—nga magmapuslanon diha sa ilang mga luna ug dili mawad-an sa paglaum tungod sa mga kalisdanan nga nag-atang, apan mosalig sa Dios ug mohangad Kaniya, ug ang talagsaon Niya nga mga panalangin, ako mosaad kaninyo, kini igabu-bu diha kaninyo.”Mao kini ang inyong mahimong kasinatian. … Ako kining balikon, ayaw kawala og paglaum, apan padayon ug paghimo og kaayohan, pakita og pagtuo, ug matag oportunidad nga gipresentar nagtinguha sa pagpalambo niini. Gusto kami nga inyong gamiton ang tanang mga talento nga gihatag sa Dios diha kaninyo. Ug anaa kini kalabut sa pagpasabut sa inyong kahigayunan sa kalampusan. Kon ang tawo mosugod sa pagbiyahe nianang dalan nga gitakda sa Ginoo, ug pinaagi niini makahimo og kaayohan diha sa Iyang katuyoan, sigurado siya nga molampus. Siya anaa gayud kon asa gusto sa Dios nga siya maanaa, ug mao kana ang dapit nga kamo mahimo, uban sa hilabihan ka tukma, mangayo sa Dios alang sa Iyang panalangin.⁷

Gibati nako nga moingon, ang Dios mopanalangin sa mga opisyales ug mga sakop sa Relief Society. Nagpahigayon kamo og talagsaon nga misyon, ug ako moawhag kaninyo nga ayaw kaluya diha sa maayo nga buhat [tan-awa sa D&P 64:33]. Kitang tanan nagtinguha alang sa celestial nga himaya, ug ang katalagsaon sa mga posibleng mahitabo nga atong giatubang dili matukib sa tawhanong pinulongan. Kon kamo magpadayon nga matinud-anon sa buhat diin kamo nalambigit, kamo makaangkon niini nga himaya, ug magmaya pa gayud diha sa atubangan sa Dios ug sa Kordero. Kini angay lamang nga paningkamutan; kini angay lamang nga sakripisyohan, ug bulahan ang lalaki o babaye kinsa matinud-anon ngadto sa pag-angkon niini. Ang Dios mopanalangin kaninyong tanan.⁸ [Tan-awa sa sugyot 6 sa pahina 203.]

Mga Sugyot alang sa Pagtuon ug Pagtudlo

Hunahunaa kini nga mga ideya samtang ikaw nagtuon sa kapitulo o samtang ikaw nangandam sa pagtudlo. Alang sa dugang nga tabang, tan-awa sa mga pahina v–viii.

Si Presidente Snow namahayag nga lisud mahunahuna ang pag-uswag sa buhat sa Ginoo kon wala ang kababayen-an sa Simbahan (pahina 197). Sa unsang mga paagi nga ang kababayen-an nakatampo sa buhat sa Ginoo karon?
Pamalandonga ang mga pulong ni Presidente Snow mahitungod sa misyon sa Relief Society (pahina 198). Paghunahuna og higayon sa dihang ang mga sister sa Relief Society nakatuman niini nga misyon pinaagi sa pagtabang kanimo ug sa imong pamilya. Sa unsang paagiha nga ang ingon nga mga lihok nakaimpluwensya sa imong kinabuhi?
Ribyuha ang unang seksyon sa pahina 199. Sa unsang mga paagi nga ang mga sister sa Relief Society “makapalambo sa mga gitinguha sa gingharian sa Dios”? Unsa nga mga ehemplo nga inyong nasaksihan nga ang mga sister sa Relief Society ug mga naghupot sa priesthood kaubang nagtrabaho?
Pamalandonga ang pangamuyo ni Presidente Snow alang sa mga sister sa Relief Society nga mogamit sa ilang impluwensya “agig pabor sa tiunay nga pagka-inahan ug pagkamatinud-anon sa pakigsaad sa kaminyoon” (pahina 200). Nganong kini nga impluwensya gikinahanglan man sa kalibutan karon? Sa unsa nga mga paagi nga ang mga sister sa Relief Society makatabang sa batan-ong mga babaye nga maandam alang sa kaminyoon sa templo ug sa pagka-inahan?
Si Presidente Snow miingon, “Samtang naglambo ang Simbahan, ang ikatabang niini [ang Relief Society] magkadako usab, ug gani mas maayo pa ang mahimo nga kaayohan niini kay sa kaniadto” (pahina 200). Sa kalibutan karon, unsa man ang mahimo sa mga sister sa Relief Society sa pagpalambo sa ilang impluwensya alang sa kaayohan?
Tun-i ang seksyon nga nagsugod sa pahina 201. Pamalandonga ang mga paagi nga ikaw nagiyahan nga maanaa sa dapit “kon asa gusto sa Dios nga [ikaw] maanaa.” Giunsa man pagtabang sa Dios kanimo niini nga mga paningkamot?

May Kalabutan nga mga Kasulatan: Isaias 1:17; Mateo 25:34–40; Mosiah 4:26–27; Alma 1:29–30; Moroni 7:44–48

Tabang sa Pagtudlo: “Samtang mangandam ikaw sa pagtudlo, siguroha nga ikaw mogamit og lainlaing mga pamaagi sa kada leksyon. Kini nagpasabut sa paggamit og butang nga yano sama sa poster nga kinoloran o tsart sa bong-bong sa usa ka leksyon ug lista sa mga pangutana diha sa pisara sa laing leksyon” (Pagtudlo, Walay Labaw ka Mahinungdanon nga Tawag, 89).

Gikan sa unang mga adlaw sa Simbahan, ang mga sister sa Relief Society kauban nga nagtrabaho ug naglig-on sa usag usa sa temporal ug sa espirituhanong paagi.

“Ang mga sakop sa Relief Society siguradong mihimo nga ehemplo sa putli ug dili bulingon nga relihiyon diha sa ilang kinabuhi.”