Kapitulo 2

Bunyag ug ang Gasa sa Espiritu Santo

“Kini … mao ang han-ay sa Ebanghelyo sa mga panahon sa mga apostoles, pagtuo kang Jesukristo, paghinulsol, bunyag pinaagi sa pagpaunlod alang sa kapasayloan sa mga sala, ug pagpandong sa mga kamot alang sa pagdawat sa Espiritu Santo. Kon kini nga han-ay nasabtan ug gisunod sa tukmang paagi, ang gahum, mga gasa, mga panalangin, ug mahimayaon nga mga pribilehiyo mosunod diha-diha dayon.”

Gikan sa Kinabuhi ni Lorenzo Snow

Bisan human nakadawat sa pagsaksi nga si Joseph Smith usa ka propeta, si Lorenzo Snow nanlimbasug sa pagdesisyon nga mopasakop sa Ang Simbahan ni Jesukristo sa mga Santos sa Ulahing mga Adlaw. Nasayud siya nga kon mahimo siya nga usa ka miyembro sa Simbahan, kinahanglan niyang isalikway ang pipila sa iyang kalibutanong mga pangandoy. Apan human sa usa ka kasinatian nga iyang gitawag nga iyang “kinakusgan nga panlimbasug sa kasingkasing ug kalag,” miuyon siya nga magpabunyag. Siya misaysay: “Pinaagi sa tabang sa Ginoo—kay gibati gayud nako nga Siya mitabang kanako—akong gisakripisyo ang akong garbo, kalibutanon nga ambisyon ug mga pangandoy, ug, sa pagkamapaubsanon sama sa usa ka bata, nagpabunyag, ug midawat sa mga ordinansa sa ebanghelyo. … Akong nadawat ang bunyag ug ang ordinansa sa pagpandong sa mga kamot pinaagi sa usa ka tawo nga naghupot sa balaanong katungod.”¹

Human madawat kini nga panalangin sa iyang kaugalingon, matinguhaon siya sa pagpakigbahin niini ngadto sa uban. Sa usa ka sulat nga iyang gisulat isip usa ka misyonaryo didto sa Italy, miingon siya: “Sa kadaghanan sa mga nasud ang pag-abli sa gingharian sa Dios moabut uban sa grabe nga kasamok ug problema. Nakasinati kami og daghan kaayo kalabut niini sa among kaugalingon. Busa, sa dakong kalipay, mituslob ko sa tubig uban sa unang kandidato alang sa kinabuhing dayon. Alang kanamo walay ingon ka nindot paminawon ang Italian nga pinulongan kay sa niining nindot nga higayon, sa dihang ako mipahigayon niining sagrado nga ordinansa, ug miabli sa usa ka pultahan diin walay tawo nga makasirado.”² [Tan-awa sa sugyot 1 sa pahina 66.]

Mga Pagtulun-an ni Lorenzo Snow

Makadawat kita og mga panalangin gikan sa Dios kon kita mosunod sa mga baruganan nga Iyang gi-establisar.

Adunay piho nga mga baruganan nga gi-establisar sa Dios, nga kon gisabut ug gisunod, makahatag sa mga tawo og espirituhanon nga kahibalo, mga gasa ug mga panalangin. Sa unang mga panahon sa kalibutan, sa mga panahon usab sa mga apostoles, ang mga tawo nakahupot og espirituhanong mga gahum ug nagkalainlaing mga pribilehiyo pinaagi sa pagbaton og pagsabut ug matinud-anon nga pagsunod sa piho nga mga balaod nga gi-establisar sa Ginoo. Sama pananglit, si Abel, usa sa mga anak nga lalaki ni Adan, nakadawat og kasayuran nga ang paghalad og mga sakripisyo usa ka mando nga gihatag sa Dios, nga pinaagi niini ang mga tawo makadawat sa mga panalangin, iyang gipahimutang ang iyang kaugalingon sa pagtrabaho, pagsunod sa mando, pagpahigayon sa sakripisyo, diin iyang naangkon ang mahimayaong mga pagpakita sa Labing Makagagahum [tan-awa sa Genesis 4:4; Mga Hebreohanon 11:4].

Usab, sa dihang ang mga Antediluvian [ang mga tawo sa wala pa ang dakong lunop] mihugaw-hugaw sa ilang kaugalingon, ug ang panahon miabut diin ang kalaglagan miabut kanila, ang Ginoo mipadayag og usa ka dalan diin ang matarung nga mga tawo mahimong makalingkawas; busa, ang tanan nga nakasabut ug misunod sa dalan sigurado nga nakaangkon sa panalangin nga gisaad [tan-awa sa Genesis 6–8].

Si Josue, sa wala pa maangkon ang Jerico, kinahanglan nga mosunod og piho nga mga lakang nga gitudlo sa Dios. Ang mga lakang gisunod sa tukmang paagi, sumala sa sugo, ang Jerico diha-diha dayon iyang naangkon. [Tan-awa sa Josue 6.]

Laing sanglitanan: ang nahitabo ni Naaman, ang kapitan sa mga sundalo sa Asiria;—makita, nasakit og sanla ug nakadungog kabahin ni Eliseo, ang propeta, mihangyo siya ngadto kaniya sa pagwagtang niana nga sakit. Ang propeta, nga ang Espiritu Santo anaa kaniya, nga [nagpahayag] sa Hunahuna sa Dios, mipahibalo kaniya nga pinaagi sa pagtuslob sa katubigan sa Jordan sa pito ka higayon, siya mamaayo. Sa sinugdanan, si Naaman naghunahuna niini nga sayon ra kaayo ug wala nalipay ug walay tinguha nga mosunod—dili mogamit sa mga pamaagi nga sayon ra kaayo. Hinoon, human sa daghang paghunahuna, mipaubos sa iyang kaugalingon, miadto siya aron sa pagsunod sa mga lagda; sa diha-diha! ang mga panalangin misunod dayon. [Tan-awa sa 2 Mga Hari 5:1–14.] …

Sa dihang ang dispensasyon sa Ebanghelyo napaila, ang mga gasa ug mga panalangin naangkon sa susama nga mga baruganan; nga mao ang, pagsunod sa piho nga mga lagda nga na-establisar. Ang Ginoo mitakda og piho nga mga lihok, nagsaad og piho nga talagsaong mga pribilehiyo sa tanan niadtong kinsa mobuhat niini; ug kon kadtong mga lihok napahigayon—nasunod gayud ang matag bahin niini—nan kadtong mga panalangin nga gisaad sigurado gayud nga maangkon.³

Ang makita nga mga ordinansa sa bunyag ug kumpirmasyon dili mabulag sa dili makita nga mga buhat sa hugot nga pagtuo ug paghinulsol.

Ang uban sa walay kapuslanan naghunahuna nga ubos sa dispensasyon sa Ebanghelyo, ang mga gasa ug mga panalangin dili maangkon pinaagi sa makita nga mga pagsunod, o makita nga mga buhat, apan pinaagi lamang sa hugot nga pagtuo ug paghinulsol, pinaagi sa paggamit sa hunahuna, walay kalabutan sa pisikal. Apan, sa pagsalikway sa mga tradisyon, mga pagtuo-tuo, ug mga pamahayag sa pagtuo sa tawo, atong paminawon ang pulong sa Ginoo, diin atong madiskubrihan nga ang makita nga mga buhat, o makita nga mga ordinansa, ubos sa dispensasyon sa Ebanghelyo, dili mabulag sa dili makita nga mga buhat, sa hugot nga pagtuo ug paghinulsol. Agig pamatuod niini, akong iduso ang mosunod nga obserbasyon:—

Ang Manluluwas miingon, “Nganong motawag man kamo kanako nga, Ginoo, Ginoo, apan dili mobuhat sa ginasugo ko kaninyo?” [Lucas 6:46.] Usab; siya miingon, “Bisan kinsa nga magapatalinghug niining akong mga pulong, ug magatuman niini, mahisama siya sa usa ka tawong but-an nga nagtukod sa iyang balay ibabaw sa bato.” [Tan-awa sa Mateo 7:24.] Ug, “Ang motuo ug magpabautismo, maluwas.” [Marcos 16:16.] Miingon usab siya, “Gawas kon ang tawo igaanak sa tubig ug sa Espiritu, dili siya makasulod sa gingharian sa Dios. [Juan 3:5.] Kining mga gisulti sa atong Manluluwas nagkinahanglan sa tawo sa pagpahigayon sa makita nga mga buhat aron makadawat sa ilang kaluwasan.

Sa adlaw sa Pentecostes, si Pedro miingon, ngadto sa naglibut nga mga tawo “Paghinulsol kamo ug pabautismo tungod sa kapasayloan sa inyong mga sala, ug madawat ninyo ang gasa nga Espiritu Santo.” [Tan-awa sa Mga Buhat 2:38.] Niining mapanagnaon nga pamahayag, atong nasayran nga ang mga tawo kinahanglan nga mopahigayon og makita nga buhat, bunyag diha sa tubig, aron ilang madawat ang kapasayloan sa mga sala, ug human niana ang gasa sa Espiritu Santo. Apan, sa dili pa ipahigayon ang makita nga buhat, ang dili makita nga buhat kinahanglang mapahigayon—hugot nga pagtuo ug paghinulsol. Ang hugot nga pagtuo ug paghinulsol ang mag-una sa bunyag; ug ang bunyag sa dili pa ang kapasayloan sa mga sala ug pagdawat sa Espiritu Santo. …

Ang uban naghunahuna nga sayop nga i-apil ang bunyag diha sa mahinungdanon nga mga baruganan nga gihimo sa Dios, nga angayang pagahimoon aron madawat ang kapasayloan sa mga sala. Agig tubag, kita moingon nga ang Manluluwas ug ang mga apostoles naghimo sa ingon sa wala pa kita; busa, kita mibati nga kinahanglang mosunod sa ilang ehemplo. … Ang bunyag … mokuha sa atong mga kalag gikan sa mga sala ug kahugaw, pinaagi sa hugot nga pagtuo sa mahinungdanong pag-ula. …

Klaro kining gipakita nga ang makita nga mga buhat kinahanglang pagahimoon, ingon man usab ang hugot nga pagtuo ug paghinulsol, aron madawat ang mga pribilehiyo sa Ebanghelyo.⁴ [Tan-awa sa sugyot 2 sa pahina 66.]

Ang bunyag gipahigayon pinaagi sa pagpaunlod, ug ang gasa sa Espiritu Santo gihatag pinaagi sa pagpandong sa mga kamot.

Ang bunyag diha sa tubig, isip kabahin sa Ebanghelyo ni Kristo, mao nga atong mamatikdan nga ang mga sulugoon sa Dios sa unang mga panahon partikular kaayo sa pagpahigayon niini. …

Karon mogahin kita og panahon sa paningkamot nga makabaton og saktong panglantaw kalabut sa pamaagi nga ang bunyag gipahigayon. Makita gayud nga adunay usa lamang ka paagi o pamaagi nga kining ordinansa ipahigayon, ug kana nga pamaagi gipasabut sa mga apostoles ug higpit nga gisunod diha sa tanan nilang mga pagpahigayon. Aron kita makabaton og tukma nga panglantaw kalabut niini nga hilisgutan, kinahanglang motan-aw ngadto sa mga panghitabo diin ang bunyag gipahigayon.

Gisulti kabahin ni Juan [Bautista] nga siya namunyag sa Enon, kay didto daghan man og mga tubig [tan-awa sa Juan 3:23]; nan kon ang pagwisik-wisik mao pa ang pamaagi, maglisud kita sa paghunahuna nga miadto pa siya sa Enon, tungod kay daghang tubig nianang dapita, kay ang gamayng tubig, makawisik-wisik gayud sa tibuok Judea, nga mahimo ra niyang makuha nga dili na mobiyahe pa sa Enon. Kita gisultihan usab, nga namunyag siya sa Jordan, ug human ang ordinansa napahigayon ngadto sa atong Manluluwas, mihaw-as siya sa tubig, klarong nagpasabut nga siya mituslob sa tubig, aron ang ordinansa mapahigayon sa tukma nga pamaagi [tan-awa sa Mateo 3:16]. Usab; naghisgut kini kabahin sa Eunoco, nga siya mituslob sa tubig uban ni Felipe, ug mikawas sa tubig [tan-awa sa Mga Buhat 8:26–38]; karon kinahanglan gayud nga angkonon sa matag usa nga naghimo og mga pagpangangkon sa pagpangatarungan ug nahiuyon sa ideya nga kon ang pagwisik-wisik og gamayng tubig sa agtang ang tubag sa katuyoan, nan kadto nga mga tawo wala unta motuslob sa tubig aron sa pagdawat sa ordinansa. Si Pablo, sa pagsulat ngadto sa mga santos, naghatag kanato og yanong pagpamatuod mahitungod sa pagpaunlod. … Kana nga apostol namahayag diha nga ang mga santos gilubong uban kang Kristo pinaagi sa bunyag [tan-awa sa Mga Taga-Roma 6:4; Mga Taga-Colosas 2:12].

Klaro kaayo nga dili sila mahimong ilubong pinaagi sa bunyag nga dili ipaunlod o tabunan sa tubig. Ang usa ka butang dili masulti nga gilubong kon adunay bahin nga wala matabuni; busa, usab, ang usa ka tawo dili malubong diha sa tubig pinaagi sa bunyag gawas kon ang tibuok lawas sa tawo matuslob sa tubig. Kini nga pagpasabut sa apostol sa pamaagi sa bunyag maayo kaayong pagkatukma nianang gihatag sa atong Manluluwas, Gawas kon ang tawo igaanak sa tubig, ubp. Ang igaanak diha sa usa ka butang nagpasabut nga ipahimutang niana nga butang; ug paghaw-as, o paggawas gikan niini, ang igaanak sa tubig, nagpasabut usab nga ibutang sa ilawom sa tubig ug ihaw-as og balik.

Ako nagtuo nga igo na ang nasulti aron sa pagdani sa matag masabtunon ug patas og hunahuna nga ang pagpaunlod mao ang pamaagi nga ang ordinansa sa bunyag gipahigayon sa unang mga panahon sa Kristiyanismo, sa dihang ang Ebanghelyo gisangyaw diha sa kalunsay ug kahingpitan niini, busa, akong tapuson ang akong mga obserbasyon niining puntoha.

Atong nasayran gikan sa ika-6 nga [kapitulo] sa Mga Hebreohanon nga ang pagpandong sa mga kamot giapil diha sa mga baruganan sa Ebanghelyo. Nahibaloan sa tanan nga kini nga ordinansa, ingon man usab ang bunyag alang sa kapasayloan sa mga sala, pinaagi sa pagpaunlod, daw nabaliwala karong panahona diha sa Kristiyano nga mga simbahan; busa, ang pipila ka komentaryo kalabut niini nga hilisgutan, ako nanghinaut, makatabang. Adunay pipila ka mga higayon diin si Kristo mipandong sa iyang mga kamot sa mga masakiton ug miayo kanila; ug sa iyang pagmando sa mga apostoles, sa katapusang kapitulo sa Marcos, siya miingon, Kanila nga motuo maganunot kining maong mga ilhanan; ang mga masakiton pagapandongan nila sa ilang mga kamot, ug mangaayo sila, ubp. Si Ananias mipandong sa iyang mga kamot ni Saulo, kinsa diha-diha naulian sa iyang panan-aw human mapahigayon kini nga ordinansa [tan-awa sa Mga Buhat 9:17–18]. Si Pablo, sa dihang nasangad ang sakayan sa pulo sa Malta, mipandong sa iyang mga kamot sa amahan ni Publio, ang gobernador sa pulo, ug miayo kaniya sa hilanat [tan-awa sa Mga Buhat 28:8]. Kining pipila ka mga pamahayag klarong nagpakita nga ang pagpandong sa mga kamot gituyo sa Dios nga mahimong [pamaagi] diin ang mga panalangin sa langit maangkon.

Bisan og ang pag-ayo sa masakiton may kalambigitan sa pagpahigayon niini nga ordinansa, apan, kon kita magtuon pa sa hilisgutan, atong masayran nga aduna pay mas mahinungdanon nga panalangin nga nakalambigit niini nga ordinansa. Gisultihan kita, nga didto sa siyudad sa Samaria, ang mga lalaki ug mga babaye gibunyagan ni Felipe, nga naghatag og dakong kalipay niadtong gibunyagan. Tingali nalipay sila tungod sa pagkadawat sa kapasayloan sa ilang mga sala, pinaagi sa hugot nga pagtuo, paghinulsol, ug bunyag, ug sa pagdawat sa pipila ka tipik sa Balaang Espiritu sa Dios, nga kasagarang mosunod niini, human makaangkon sa tubag sa maayong tanlag pinaagi sa kapasayloan sa ilang mga sala. Pinaagi niini nga tipik sa Balaang Espiritu, nga ilang naangkon, nagsugod sila og kakita sa gingharian sa Dios. Kay kini mahinumduman nga ang Manluluwas namahayag, Gawas kon ang tawo igaanak pag-usab, dili siya makakita sa gingharian sa Dios; ug diha [sa] sunod nga bersikulo, miingon siya, Gawas kon ang tawo igaanak sa tubig ug sa Espiritu dili siya makasulod sa gingharian sa Dios [tan-awa sa Juan 3:3–5].

Karon, kadtong mga tawo sa Samaria gipakatawo pinaagi sa tubig—ilang nadawat ang unang pagkatawo, busa, anaa sila sa kahimtang nga makakita sa gingharian sa Dios, sa pagpamalandong uban ang mata sa hugot nga pagtuo sa nagkalainlaing mga panalangin, pribilehiyo, ug mga himaya niini; apan kay sila wala pa matawo sa ikaduhang higayon, nga mao, ang pinaagi sa Espiritu, wala sila makasulod ngadto sa gingharian sa Dios—wala nila maangkon ang mga pribilehiyo sa Ebanghelyo sa kahingpitan niini. Sa dihang ang mga apostoles didto sa Jerusalem nakadungog sa kalampusan ni Felipe, ilang gipadala sila si Pedro ug Juan sa Samaria, alang sa katuyoan nga mapahigayon ang pagpandong sa mga kamot. Busa, sa dihang miabut sila sa Samaria, sila mipandong sa ilang mga kamot niadtong mga nabunyagan, ug nadawat nila ang Espiritu Santo. [Tan-awa sa Mga Buhat 8:5–8, 12, 14–17.]⁵ [Tan-awa sa sugyot 3 sa pahina 67.]

Ang mga panalangin sa bunyag ug pagkumpirmar moabut lamang kon kadto nga mga ordinansa gipahigayon pinaagi sa tukma nga awtoridad.

Gawas kon ang [mga ordinansa] gipahigayon sa usa kinsa pinadala gayud sa Dios, ang sama nga mga panalangin dili mosunod. Ang mga apostoles ug mga seventy gi-orden ni Jesukristo sa pagpahigayon sa mga ordinansa sa Ebanghelyo, diin ang mga gasa ug mga panalangin sa mahangturong mga kalibutan matagamtaman. Busa, si Kristo miingon ngadto sa mga apostoles, Kinsa ganing mga sala ang inyong pasayloon, kini pagapasayloon; kinsa ganing sala ang inyong pahawiran, kini pagahawiran [tan-awa sa Juan 20:23]: nagpasabut kini, nga matag tawo nga mapainubsanong moduol, tinud-anay nga naghinulsol sa iyang mga sala, ug modawat sa bunyag gikan sa mga apostoles mapasaylo ang iyang mga sala pinaagi sa maulaong dugo ni Jesukristo, ug pinaagi sa pagpandong sa mga kamot makadawat sa Espiritu Santo; apan kadtong dili modawat niini nga mga pamaagi gikan sa mga apostoles ang ilang mga sala magpabilin kanila. … Kini nga gahum ug awtoridad sa pagpangalagad sa Ebanghelyo gihatag ngadto sa uban pinaagi sa mga apostoles; aron ang mga apostoles dili lamang mao ang naghupot niining mahinungdanong katungdanan. … Karon, hangtud nga adunay tawo nga naghupot niining sama nga katungod, usa ka tawo nga adunay awtoridad sa pagbunyag ug pagpandong sa mga kamot, walay usa nga gikinahanglan nga makadawat niadto nga mga ordinansa, ni kinahanglang magpaabut og mga panalangin, gawas kon sila gipangalagaran sa legal nga paagi.

… Ang awtoridad sa pagpahigayon sa mga ordinansa sa Ebanghelyo nawala sulod sa daghang mga siglo. … Ang simbahan nga natukod pinaagi sa mga apostoles hinay-hinay nga nahanaw, nahisalaag sa kamingawan, ug nawala ang awtoridad niini, ang priesthood niini, ug nahilayo sa pagmando sa Dios, nawala usab ang mga gasa ug mga grasya niini; gilapas niini ang mga balaod ug giusab ang mga ordinansa sa Ebanghelyo; giusab ang pagpaunlod ngadto sa pagwisik-wisik, ug daw nabaliwala ang pagpandong sa mga kamot; gitamay ang pagpanagna ug wala motuo sa mga timailhan. …

Si Juan, sa iyang mga Pinadayag, nakakita ug nakahisgut kalabut sa pagkahisalaag sa simbahan ngadto sa kangitngit, … naghisgut, sa [kapitulo 14, bersikulo 6], kabahin sa pagpahiuli sa Ebanghelyo. “Nakita ko ang laing manolunda nga naglupad sa taliwala sa kalangitan, ug kini siya may gidalang walay katapusang Maayong Balita aron imantala ngadto sa mga nanagpuyo sa yuta;” busa klaro kini nga ang panagna matuman sa umaabut nga panahon sa dili pa ang ikaduhang pag-anhi sa Manluluwas.

… Ako karon mopamatuod, nga nakabaton og hilabihan nga kasigurado pinaagi sa pinadayag gikan sa Dios, nga kini nga panagna natuman na, nga ang Anghel gikan sa Dios mipakita sa tawo niining ulahi nga mga adlaw ug mipahiuli nianang dugay na nga nawala, gani ang priesthood,—ang mga yawe sa gingharian,—ang kahingpitan sa Ebanghelyo.⁶ [Tan-awa sa sugyot 4 sa pahina 67.]

Kon kita nagsunod sa pakigsaad sa bunyag ug nangayo og giya sa Espiritu Santo, ang gisaad nga mga panalangin siguradong mosunod.

Mao kini ang pamaagi sa Ebanghelyo sa mga panahon sa mga apostoles, pagtuo kang Jesukristo, paghinulsol, bunyag pinaagi sa pagpaunlod alang sa kapasayloan sa mga sala, ug pagpandong sa mga kamot sa pagdawat sa Espiritu Santo. Kon kini nga pamaagi nasabtan ug gisunod sa tukmang paagi, ang gahum, mga gasa, mga panalangin, ug mahimayaong mga pribilehiyo mosunod diha-diha dayon; ug sa matag yugto ug panahon, kon kini nga mga lakang tukmang gisunod ug gituman diha sa tukmang dapit ug pamaagi niini, ang sama nga mga panalangin sigurado nga mosunod; apan kon gibaliwala, kinatibuk-an man o ang kabahin lang niini, mawala usab ang tanan niadto nga mga panalangin, o adunay dakong pagkunhod niini.

Si Kristo, sa iyang pagtawag sa mga apostoles, naghisgut kabahin sa talagsaon kaayo nga mga gasa nga nadawat niadtong misunod niini nga pamaagi sa mga butang [tan-awa sa Marcos 16:15–18]. Si Pablo … naghatag og mas hingpit nga asoy sa nagkalainlaing mga gasa nga anaa sa kahingpitan sa Ebanghelyo; naghisgut siya og siyam niini ug nagpahibalo kanato nga kini mga epekto o mga bunga sa Espiritu Santo [tan-awa sa 1 Mga Taga-Corinto 12:8–10]. Karon ang Espiritu Santo gisaad ngadto sa tanan, kutob sa tawagon sa Ginoo [tan-awa sa Mga Buhat 2:37–39]. Kini nga gasa, ingon nga dili mausab sa kinaiyahan ug paggamit niini, ug ingon nga dili mabulag nga kalambigitan pinaagi sa saad niini nga sumbanan o pamaagi sa mga butang, kini makatarunganon, makanunayon, ug nahisulat sa Kasulatan nga molaum sa sama nga mga gasa ug mga panalangin; ug kon si Noe, human sa pagtukod sa Arka, nakakuha ug nakaangkon sa iyang temporal nga kaluwasan sumala sa saad [tan-awa sa Moises 7:42–43]; o si Josue, human napalibutan ang Jerico sa nahisgutan nga mga higayon, nga makasulod sa nangagun-ob nga mga paril ug masakop ang mga lumulupyo niini [tan-awa sa Josue 6:12–20]; o ang mga Israelite, nga human sa paghalad sa mga sakripisyo nga gimando, sama sa gisaad, naangkon dayon ang kapasayloan sa ilang mga sala [tan-awa sa Levitico 4:22–35]; o si Naaman, human makatuman sa sugo ni Eliseo, sa pagtuslob og pito ka higayon didto sa katubigan sa Jordan, nakuha ug naangkon ang iyang kaayohan [tan-awa sa 2 Mga Hari 5:1–14]; o sa katapusan, ang buta nga tawo, human manghilam-os didto sa tubod sa Siloe, kon siya nakaangkon ug nakakuha dayon sa gisaad nga ganti [tan-awa sa Juan 9:1–7], nan, ako moingon, uban sa pagtahud ug kamakanunayon, nga sa higayon nga ang tawo mosalikway sa iyang kataphaw sa panghunahuna, ug mga karaan nga hunahuna, ug sayop nga mga tradisyon, ug motugyan ngadto sa tanang pamaagi sa ebanghelyo ni Jesukristo, nan walay butang nga anaa ubos sa celestial nga mga kalibutan nga molihok batok sa pag-angkon ug pagdawat sa gasa sa Espiritu Santo ug sa tanang mga panalangin nga may kalabutan sa Ebanghelyo sa panahon sa mga apostoles.

Aron makabaton og relihiyon nga moluwas kanato sa presensya sa Dios, kinahanglan nga kita makabaton sa Espiritu Santo, ug aron mabatunan ang Espiritu Santo, kinahanglan nga kita motuo ni Ginoong Jesus, dayon maghinulsol sa atong mga sala, nagpasabut nga, isalikway kini, dayon mopadayon sa unahan ug magpabunyag alang sa kapasayloan sa mga sala, dayon madawat ang pagpandong sa mga kamot.⁷

Sa dihang atong gidawat kining Ebanghelyo, nakigsaad kita atubangan sa Dios nga kita pagagiyahan, nga kita pagadumalaon, ug mosunod sa mga pag-aghat sa Balaang Espiritu, nga kita mosunod sa mga sugyot sa baruganan nga naghatag og kinabuhi, nga naghatag og kahibalo, nga naghatag og panabut kabahin sa mga butang sa Dios, nga nagpahayag sa hunahuna sa Dios; ug nga kita molihok alang sa katumanan sa mga katuyoan sa Dios sa kaluwasan sa tawhanong pamilya, pilion isip motto sa kinabuhi, “Ang Gingharian sa Dios, o wala.” Kon unsa na kalayo ang atong pagsunod niini nga mga sugo … ug pagsunod sa mga pag-aghat sa Balaang Espiritu, kita sa atong kaugalingon mao ang mga maghuhukom. Kon kita naghimo niini, nan atong madawat ang mga panalangin sa Labawng Makagagahum, ug ang atong mga hunahuna malamdagan, ang atong mga panabut molambo, ug kita makapadayon sa unahan diha sa dalan sa kabalaan, diha sa dalan sa kahingpitan. … Kon kita pakyas sa atong pagkamatinud-anon, … nan pakyas kita niining buluhaton nga atong giapilan sa pagbaton og kinabuhing dayon, pagbaton og kaalam ug kahibalo ug balaanong salabutan nga igo sa pagbuntog sa dautan ug mga pagtintal nga naglibut kanato. Ug kon kita nagsunod sa mga sugyot niining balaan nga Espiritu, kita makatagamtam sa kalinaw ug kalipay sa atong mga kalag, kita makapildi sa kaaway, kita nagtigum sa atong kaugalingon og mga bahandi nga dili madunot sa anunogba ug taya, kon kita nagpadayon diha sa dalan sa celestial nga gingharian.⁸ [Tan-awa sa sugyot 5 sa pahina 67.]

Mga Sugyot alang sa Pagtuon ug Pagtudlo

Hunahunaa kini nga mga ideya samtang ikaw nagtuon sa kapitulo o samtang ikaw nangandam sa pagtudlo. Alang sa dugang nga tabang, tan-awa sa mga pahina v–viii.

Sa imong pagbasa sa mga asoy sa mga pahina 55–56, pamalandonga ang imong kaugalingong bunyag ug kumpirmasyon o ang panahon nga ikaw nakakita sa laing tawo nga midawat niini nga mga ordinansa. Unsa nga mga pakigsaad ang imong gihimo sa imong pagdawat niini nga mga ordinansa? Sa unsang paagi nga kini nga mga pakigsaad nakaimpluwensya sa imong kinabuhi?
Ngano nga ang hugot nga pagtuo ug ang paghinulsol dili man igo kon wala ang mga ordinansa? Ngano nga ang mga ordinansa dili man igo kon wala ang hugot nga pagtuo ug paghinulsol? Sa imong pagpamalandong o paghisgut niini nga mga pangutana, ribyuha ang mga pagtulun-an ni Presidente Snow kabahin sa dili makita nga mga buhat ug makita nga mga ordinansa (mga pahina 57–59).
Tun-i ang mga pagtulun-an ni Presidente Snow sa mga pahina 59–62, timan-an ang mga kasulatan nga iyang gihatag. Sa unsang mga paagi nga kining mga kasulatan nakapadugang sa inyong pagsabut nga kinahanglanon ang pagpaunlod sa tubig? Ngano sa inyong hunahuna nga ang pagpandong sa mga kamot alang sa gasa sa Espiritu Santo usa ka “mas mahinungdanon nga panalangin” kay sa pagpandong sa mga kamot sa pagpanalangin sa masakiton?
Basaha ang seksyon nga nagsugod sa pahina 63. Unsa nga mga “gasa ug mga grasya” ang imong naangkon sa imong kinabuhi tungod kay ang priesthood napahiuli?
Tun-i ang katapusang duha ka mga paragraph sa kapitulo. Unsa man ang ipasabut niini kanimo nga pagagiyahan ug pagadumalaon “sa mga pag-aghat sa Balaang Espiritu”?
Sa unsang paagi nga ang Doktrina ug mga Pakigsaad 68:25–28 may kalabutan sa mga pagtulun-an niini nga kapitulo? Unsa ang mahimo sa mga ginikanan aron matabangan ang ilang mga anak nga makasabut sa hugot nga pagtuo, paghinulsol, bunyag, ug gasa sa Espiritu Santo?

May Kalabutan nga mga Kasulatan: 2 Nephi 31:12, 17–20; Mosiah 18:8–10; Alma 5:14; D&P 20:37; 36:2; 39:6; 130:20–21

Tabang sa Pagtudlo: “[Likayi] ang tintasyon sa pagtudlo og sobra ka daghan nga materyal.… Nagtudlo kita sa mga tawo, dili ang hilisgutan; ug … matag leksyon nga gilatid nga sukad akong nakita adunay daghang ikatudlo kay sa atong mapaambit sa gihatag nga oras” (Jeffrey R. Holland, “Pagtudlo ug Pagkat-on sa Simbahan,” Liahona, Hunyo 2007, 91).

Si Jesukristo mipakita og ehemplo kanato sa dihang Siya gibunyagan pinaagi sa pagpaunlod.

Sa adlaw sa Pentecostes, mga 3,000 ka mga tawo ang gibunyagan.

Atong madawat ang gasa sa Espiritu Santo pinaagi sa pagpandong sa mga kamot.