Mga Pakigsaad, mga Ordinansa, ug mga Panalangin

Ni Elder Randy D. Funk

Sa Seventy

Gikan sa usa ka debosyonal nga pakigpulong, “Covenants—Accepting God’s Offered Blessings,” nga gihatag didto sa Brigham Young University–Idaho niadtong Septyembre 22, 2020.

Kita mopili sa pagdawat sa gitanyag nga mga panalangin sa Dios kon kita mogamit sa atong moral nga kabubut-on sa pagdawat sa mga ordinansa ug motuman sa may kalabotan nga mga pakigsaad.

Atol sa akong unang semestre sa abogasiya, ang akong klase bahin sa mga kontrata gitudlo sa usa ka inila nga propesor kinsa mabination ug maabiabihon kaayo—kon siya wala diha sa lawak klasehanan. Diha sa klase, hanas siya sa pagtudlo gamit ang Socratic nga pamaagi—usa ka pamaagi sa pagtudlo nga naglangkob sa panukit-sukit [probing] nga mga pagpangutana sa paagi nga gituyo aron sa pagpalambo og matukion nga paghunahuna.

Sa kadaghanan nga mga panahon sa klase kami gitahasan sa pagbasa og tulo ka legal nga mga desisyon o mga kaso. Atol sa klase, usa ka estudyante ang tawagon sa pagpamubo [summarize] sa mga kamatuoran sa kaso ug dayon sa paghulagway sa legal nga mga baroganan sa balaod sa kontrata nga giestablisar sa mga kaso. Ang walay swerte nga estudyante ipaubos dayon sa panukit-sukit, makatuis nga mga pangutana sa propesor. Kini hapit sa kanunay usa ka makapaubos nga kasinatian.

Sa unang higayon nga ako gitawag, ang mga kaso naghisgot bahin sa usa ka baroganan sa balaod sa kontrata nga nailhan isip unilateral acceptance [pagdawat pinaagi sa pagbuhat]. Isip resulta, wala gayod ako makalimot niana nga baroganan.

Tanyag ug Pagdawat

Lakip sa ubang mga butang, aron makahimo og balido nga kontrata ubos sa mga balaod sa tawo, kinahanglan nga adunay usa ka tanyag ug usa ka pagdawat. Sa kinatibuk-an, ang usa ka kontrata maporma kon ang usa ka tawo o grupo maghimo og tanyag ug ang lain nga tawo o grupo modawat sa tanyag.

Alang sa ubang mga kasabotan, sama sa usa ka kontrata sa pagpalit og balay o yuta, ang balaod nagkinahanglan nga ang tanyag ug ang pagdawat nahisulat. Sa ubang mga sitwasyon, ang mga tawo o grupo kinahanglan nga magkauyon sumala sa pulong lamang. Apan alang sa ubang mga kasabotan, ang pagdawat sa usa ka tanyag gihimo pinaagi lamang sa pagbuhat. Kini nailhan isip unilateral acceptance.

Sama pananglit, tingali moingon ako kaninyo, “Kon kamo modala kanako og usa ka dosena nga saging, bayaran ko kamo og $100.” Aron sa pagdawat sa akong madagayaon nga tanyag, dili kamo kinahanglan nga mopirma og kasabotan o bisan mosulti nga dad-an ninyo ako og mga saging. Gikinahanglan lang ninyo nga moadto sa tindahan o sa merkado, mopalit og usa ka dosena nga saging, ug dad-on kini ngari kanako. O, sa ubang bahin sa kalibotan, mahimong kamo gayod mismo ang mamupo sa mga saging. Sa bisan hain nga paagi, kon kamo modala kanako og usa ka dosena nga saging, obligado ako sa kontrata sa pagbayad kaninyo og $100. Ngano man? Tungod kay inyong gidawat ang akong tanyag pinaagi sa inyong pagbuhat.

Kinahanglan Gayod Kitang Molihok

Ang mga pakigsaad sa atong Langitnong Amahan molihok sa sama kaayo nga paagi. Aron makadawat sa madagayaon nga mga panalangin nga Iyang gitanyag, kinahanglan gayod kitang molihok aron sa pagdawat niini. Walay negosasyon nga gisundan sa usa ka gipirmahan nga pagdawat. Hinuon, pinaagi sa atong mauyonon nga mga pagpahayag ug pinaagi sa paglihok sumala sa Iyang kabubut-on, lakip sa pagdawat og gikinahanglan nga mga ordinansa, atong gipakita ang atong tinguha ug kaandam sa paghimo og mga pakigsaad uban Kaniya. Dayon samtang kita motuman sa atong mga pakigsaad pinaagi sa unsay atong gibuhat, mosarang kita alang sa buhong nga mga panalangin nga Iyang gisaad.

Sa Doktrina ug mga Pakigsaad atong makat-onan:

“Adunay usa ka balaod, nga dili mausab nga sugo didto sa langit sa wala pa ang mga katuk[o]ran niini nga kalib[o]tan, nga diha ang tanan nga mga panalangin gipasikad—

“Ug kon kita makadawat og bisan unsa nga panalangin gikan sa Dios, kini tungod sa pagsunod niana nga balaod diin diha kini gipasikad” (Doktrina ug mga Pakigsaad 130:20–21).

Ang Manluluwas mitudlo, “Dili ang tanan nga magtawag kanakog ‘Ginoo, Ginoo,’ makasulod sa Gingharian sa langit kondili kadto lamang nagtuman sa kabubut-on sa akong Amahan nga atua sa langit” (Mateo 7:21).

Sa laing pagkasulti, dawaton nato ang gitan-yag nga panalangin sa atong Langitnong Amahan nga kinabuhing dayon diha sa gingharian sa langit dili lamang sa unsay atong isulti apan usab sa unsay atong buhaton. Ug kon kita makigsaad Kaniya, Siya miseguro kanato nga, “Ako, ang Ginoo, mapugos sa pag-tuman kon kamo mobuhat sa unsa nga Ako misulti.” Giklaro usab Niya nga kon kita dili mobuhat sa Iyang kabubut-on—kon kita dili modawat sa Iyang tanyag—nan kita walay kasabotan: “Kon kamo dili mobuhat sa unsa nga Ako misulti, kamo dili makaangkon og saad” (Doktrina ug mga Pakigsaad 82:10).

Mga Ordinansa sa Kaluwasan ug Kahimayaan

Kita mosulod niadto nga mga pakigsaad nga gikinahanglan alang sa kaluwasan ug kahimayaan pinaagi sa pagdawat og sagradong mga ordinansa. Sama sa gipahayag sa Kinatibuk-ang Tamdanan nga Basahon: “Ang mga miyembro mohimo og mga pakigsaad uban sa Dios samtang sila modawat sa mga ordinansa sa kaluwasan ug kahimayaan. … Ang tanan nga molahutay hangt[o]d sa katap[o]san sa pagtuman sa ilang mga pakigsaad makadawat og kinabuhing dayon.”¹

Ang mga ordinansa sa kaluwasan ug kahimayaan mao ang bunyag, pagkumpirma ug ang gasa sa Espiritu Santo, ordinasyon sa Melchizedek nga Pagkapari alang sa mga lalaki, ug ang pagtuga ug pagsilyo nga mga ordinansa sa templo.² Matag usa niining lima ka ordinansa gipahigayon sa paagi nga adunay mopuli [vicariously] diha sa templo alang sa namatay nga mga katigulangan tungod kay kini nga mga ordinansa mahinungdanon alang sa tanang anak sa Dios.

Ang rekord ni Alma nga nagtudlo diha sa Katubigan sa Mormon naghulagway sa relasyon tali sa mga pakigsaad, mga ordinansa, ug mga panalangin. Bantayi kon sa unsang paagi ang Dios, pinaagi sa Iyang propeta, nagtakda sa mga kondisyon, naghulagway sa gisaad nga mga panalangin, ug nagpahayag kon sa unsang paagi kita makadawat niadto nga mga panalangin.

Sa mga nagpundok didto sa Katubigan sa Mormon kinsa mipahayag og tinguha sa pag-ipon ngadto sa panon sa Dios—ang tinguha mao ang importante nga unang lakang (tan-awa sa Alma 32:27)—si Alma mitudlo kon unsay gilaoman gikan kanila. Sila kinahanglan nga “andam sa pagtambayayong sa usag usa nga mga alant[o]son, … sa pagbang[o]tan uban niadto nga nagbang[o]-tan; … sa paghupay niadto nga nagkinahanglan sa kahupayan,” ug “mobar[o]g ingon nga mga saksi sa Dios sa tanan nga mga panahon ug diha sa tanan nga mga butang, ug diha sa tanan nga mga dapit … bisan hangt[o]d sa kamatayon” (Mosiah 18:8, 9).

Dayon si Alma mihulagway sa gisaad nga mga panalangin kanila: “Kamo mahimo nga matubos sa Dios, ug malakip uban niadto nga diha sa unang pagkabanhaw, nga kamo makabaton og kinabuhi nga dayon” ug nga “[ang] Ginoo … unta mobu[bo] sa kabuhong sa iyang Espiritu diha kaninyo” (Mosiah 18:9, 10).

Unsa ang gikinahanglan nga buhaton sa mga tawo aron sa pagdawat niadto nga talagsaon nga mga panalangin? Sa mga pulong ni Alma: “[Kamo kinahanglang mabunyagan] diha sa ngalan sa Ginoo, ingon og usa ka saksi sa iyang atubangan nga kamo nakasulod ngadto sa usa ka pakigsaad uban kaniya, nga kamo mag-alagad kaniya ug maghupot sa iyang mga sugo” (Mosiah 18:10). Bantayi nga ang ordinansa sa bunyag, usa ka sagrado nga buhat nga kadaghanan kanato klaro nga nakahinumdom, nagsilbi isip usa ka saksi o ebidensya nga kita misulod sa usa ka pakigsaad sa Dios.

Ang katawhan mahinamon kaayo sa pagbuhat niini nga “sila namakpak sa ilang mga kamot tungod sa hingpit nga kalipay, ug misinggit: Kini mao ang tinguha sa among mga kasingkasing” (Mosiah 18:11). Gawasnon sila nga mitinguha nga mosulod ngadto sa usa ka pakigsaad sa dihang misulod sila ngadto sa mga tubig sa bunyag.

Sa samang paagi, samtang dawaton nato ang matag usa sa uban pang mga ordinansa sa kaluwasan ug kahimayaan, makadawat kita og dugang pa nga mga saad sa dagkong mga panalangin. Ang mga pakigsaad nga atong gihimo mga sagrado ug nagbugkos kanato ug sa Dios. Gipili nato ang pagdawat sa Iyang gitanyag nga mga panalangin kon kita mogamit sa atong matarong [moral] nga kabubut-on sa pagdawat sa mga ordinansa ug pagtuman sa may kalabotan nga mga pakigsaad.

Ang Sakramento

young man passing the sacrament to members in church

Ang ordinansa sa sakramento nagdapit kanato sa paghinumdom sa Manluluwas ug sa atong mga pakigsaad. Sa dihang gipasiugdahan ni Jesukristo ang sakramento taliwala sa mga Nephite, Siya mihatag sa gahom sa pagkapari ngadto sa Iyang mga disipulo ug mitudlo kanila nga “mopikas-pikas sa pan ug mopanalangin niini ug mohatag niini ngadto sa mga katawhan sa akong simbahan, ngadto sa tanan niadto kinsa motuo ug mopabunyag diha sa akong ngalan” (3 Nephi 18:5).

Kasagaran naghunahuna kita bahin sa pag-ambit sa sakramento aron sa pagbag-o sa atong mga pakigsaad sa bunyag. Bisan tuod og husto kana, bantayi ang pinulongan nga gigamit sa Manluluwas. Sa dihang Iyang gisugo ang Iyang mga sumusunod sa pag-ambit sa pan, Siya miingon, “Kini kamo mobuhat agi og hand[o]manan sa akong lawas, nga Ako mipakita kaninyo. Ug kini mao ang usa ka pagpamatuod ngadto sa Amahan nga kamo sa kanunay mahinumdom kanako” (3 Nephi 18:7).

Sa dihang sila miinom sa bino, Siya miingon, “Kini mao ang pagtuman sa akong mga sugo, ug kini mosaksi ngadto sa akong Amahan nga kamo andam sa paghimo niana diin Ako misugo kaninyo” (3 Nephi 18:10).

Sa laing pagkasulti, kon kita moambit sa sakramento matag semana, kita nagpamatuod ug nagsaksi pag-usab nga kita kanunay nga mohinumdom ni Jesukristo ug nga kita andam sa pagtuman sa Iyang mga sugo. Kon kita kanunay nga mohinumdom Kaniya ug maghupot sa Iyang mga sugo, Iyang Espiritu magauban kanato (tan-awa sa 3 Nephi 18:7, 11).

Mga Panalangin nga Atong Dawaton

Namalandong sa mga panalangin nga moabot kanato samtang kita moambit sa sakramento, si Presidente Dallin H. Oaks, Unang Magtatambag sa Unang Kapangulohan, nakaobserbar: “Tungod kay kini gipikas-pikas, ang matag piraso sa pan talagsaon, sama lang nga talagsaon ang mga indibidwal nga moambit niini. Kitang tanan adunay lain-laing mga sala nga hinulsolan. Kitang tanan adunay lain-laing mga panginahanglan nga lig-onon pinaagi sa Pag-ula ni Ginoong Jesukristo, kinsa atong gihinumdom niini nga ordinansa.”³

Akong nakat-onan nga makatabang ang pagpamalandong sa mga bersikulo 10, 12, ug 14 sa 3 Nephi 18. Sa matag usa niining mga bersikulo ang Manluluwas nag-ingon ngadto niadto kinsa moambit sa sakramento, “Bulahan kamo,” apan wala Niya gitino kon unsa ang panalangin. Tingali tungod kay ang matag tawo kinsa moapil niini nga sagrado nga ordinansa sama ka lahi sama sa porma sa matag piraso sa pan, ang matag usa kanato nagkinahanglan og managlahi nga mga panalangin. Bisan og magkalahi ang atong mga hagit, mga kahimtang, ug mga panginahanglan, ang Manluluwas misaad sa matag usa kanato nga nagtuman sa pakigsaad sa sakramento, “Bulahan kamo.”

Gugma ug Kaluoy

Karon akong hatagan og gibug-aton ang usa ka importante nga kalainan tali sa mga balaod sa Dios ug sa mga balaod sa tawo: ang tahas sa gugma ug kaluoy diha sa plano sa Dios sa pagtubos sa Iyang mga anak. Sama sa nahibaloan, sa daghang higayon atong gidapit ang Iyang gitanyag nga mga panalangin pinaagi sa atong mga lihok. Sama sa buhaton sa mahigugmaong mga ginikanan, ang Langitnong Amahan maloloy-on nga nagkonsiderar sa tinguha sa atong mga kasingkasing ingon man usab sa atong mga binuhatan (tan-awa sa Doktrina ug mga Pakigsaad 137:9). Nasayod Siya nga usahay ang oportunidad sa paglihok malimitahan sa mga kahimtang nga dili nato makontrolar. Ang sayo nga kamatayon, grabe nga kakulangan [disability], ang yano nga kakulang sa kahibalo o oportunidad, o ang bisan unsa nga pagkadili makiangayon nga mahitabo sa usa ka napukan nga kalibotan daw mobabag sa atong pag-uswag ug sa pagdawat sa gisaad nga mga panalangin nga atong gitinguha.

Mao nga, sentro sa mahinungdanon nga laraw sa kalipay mao ang usa ka Manluluwas, si Jesukristo, kinsa mopuno sa kakulang, mobuntog sa pagkadili makiangayon, ug motugot sa tanan—tanan kinsa nga tinud-anay nga magtinguha ug mobuhat sa tanan nga ilang mahimo—nga sa kataposan modawat sa gisaad nga mga panalangin sa usa ka mahigugmaon nga Langitnong Amahan.

Gusto sa Langitnong Amahan nga mobalik kita ngadto sa Iyang presensya, apan gusto Niya nga mobalik kita tungod kay gitinguha nato ang pagbuhat sa ingon. Sama sa gitudlo ni Elder Dale G. Renlund sa Korum sa Napulog Duha ka Apostoles: “Ang tumong sa atong Langitnong Amahan sa pagkaginikanan dili ang pag[pa]buhat sa Iyang mga anak sa unsay matar[o]ng; kini ang pag[pa]pili sa Iyang mga anak sa pagbuhat sa matar[o]ng ug sa katap[o]san mahimong sama Kaniya. Kon gusto lang Niya nga magmasulundon kita, mogamit Siya og diha-diha dayon nga mga ganti ug mga silot aron sa pag-impluwens[i]ya sa atong mga kinaiya.”⁴

Ang Langitnong Amahan nagkinahanglan og usa ka andam nga kasingkasing ingon man usab sa paningkamot sa atong bahin. Daghan sa mga ganti sa pagpili sa matarong moabot sa umaabot, ug kini mas labaw pa kay sa unsay angay kanato—nga mao ang rason kon nganong ang pipila ka ganti gitawag isip usa ka gasa (tan-awa sa 1 Nephi 10:17; Doktrina ug mga Pakigsaad 14:7). Sama sa manggihatagon, maloloy-on nga ginikanan nga Langitnong Amahan, Siya mohatag kanato og daghan—lapas pa gayod sa bisan unsa nga kita angayan. Mao nga, ang kahimayaan dili maangkon, apan kini kinahanglan gayod nga pilion, dawaton, ug mapasalamatong dawaton.

Sa tanang panahon ug sa tanang kahimtang, hinaot nga ang matag usa kanato mo-lihok inubanan sa hugot nga pagtuo, pagkamasulundon, kakugi, ug pagpasalamat aron mangandam sa pagdawat sa “tanan nga iya sa [atong] Amahan” (Doktrina ug mga Pakigsaad 84:38; tan-awa usab sa Alma 34:32).

Usa ka Matarong, Katawhan sa Pakigsaad

Kita nagpuyo sa usa ka talagsaon nga pa-nahon nga ang mga panalangin sa ebanghelyo anaa nang daan ngadto niadtong kinsa modawat niini. Si Presidente Russell M. Nelson nagtudlo:

“Kita nakasaksi gay[o]d unsay nakita ni propeta Nephi sa panan-awon lamang, nga ang ‘gah[o]m sa Kordero sa Dios’ mokunsad ‘diha sa mga katawhan sa pakigsaad sa Ginoo, kinsa nagkatibulaag sa ibabaw sa yuta; ug sila gisangkapan sa katar[o]ng ug uban sa gah[o]m sa Dios sa dako nga himaya’ [1 Nephi 14:14].

“Kamo, akong kaigsoonan, apil niadtong mga lalaki, mga babaye, ug mga bata nga nakita ni Nephi. Hunahunaa kana!”⁵

Ang atong Langitnong Amahan nahigugma kanato ug tinud-anay nga nagtinguha sa pagpanalangin kanato. Pinaagi sa walay kinutoban nga Pag-ula sa Iyang Anak, si Jesukristo, ang tanan mamahimo nga mamaayo. Samtang kita mosalig sa Dios ug molihok inubanan sa hugot nga pagtuo aron mohimo ug motuman og sagrado nga mga pakigsaad ngadto Kaniya, pagkadako sa atong hingpit nga kalipay karon ug hangtod sa kahangtoran.