“Kinatibuk-ang Komperensiya; Usa ka Tibuok Kalibotan nga Miting sa Simbahan” Liahona, Septyembre 2021
Mga Sukaranan sa Ebanghelyo
Kinatibuk-ang Komperensiya: Tibuok Kalibotan nga Miting sa Simbahan
Maminaw kita sa mga propeta ug ubang mga lider sa Simbahan atol sa kinatibuk-ang komperensiya. Magtudlo sila kanato unsay gusto sa Dios nga atong madungog.
Matag Abril ug Oktubre, ang Simbahan mopahigayon og sunod-sunod nga mga miting nga gitawag og kinatibuk-ang komperensiya. Ang mga lider motudlo ug mopamatuod mahitungod ni Jesukristo ug sa Iyang ebanghelyo. Ang kinatibuk-ang komperensiya gipahigayon didto sa Siyudad sa Salt Lake, Utah, USA, ug gisibya sa tibuok kalibotan sa sobra sa 80 ka mga pinulongan. Tanang miyembro ug ang uban pang mga interesado nga mga tawo gidapit sa pagpaminaw sa mga pakigpulong.
Ang Unang mga Komperensiya sa Simbahan
Ang Simbahan opisyal nga naorganisar atol sa miting niadtong Abril 6, 1830 (tan-awa sa Doktrina ug mga Pakigsaad 20). Ang unang kinatibuk-ang komperensiya gipahigayon niadtong Hunyo 9, 1830. Sukad niadto, ang kinatibuk-ang mga komperensiya gipahigayon ubos sa direksiyon sa Presidente sa Simbahan bisan asa nga magkapundok ang mga miyembro. Niadtong mga 1840, nagsugod ang mga lider sa pagpahigayon og komperensiya kaduha sa usa ka tuig.
Giunsa Pag-organisar ang mga Komperensiya Karon
Ang Unang Kapangulohan, Korum sa Napulog duha ka Apostoles, ug ubang mga lider sa Simbahan mamulong atol sa kinatibuk-ang komperensiya. Ang Tabernacle Choir sa Temple Square ug ang ubang mga choir sa Simbahan modalit og musika. Matag komperensiya adunay lima ka mga sesyon: tulo sa Sabado ug duha sa Dominggo.
Mga Pagtulun-an sa mga Lider
Sa mga bulan sa wala pa ang komperensiya, ang mga lider sa Simbahan mag-ampo mahitungod kon unsay itudlo. Ang Ginoo modasig kanila nga masayod kon unsay ilang isulti. Sila magtudlo sa mga kamatuoran sa ebanghelyo ug nagdapit kanato sa pagsunod sa mga sugo sa Dios. Sila usab magpamatuod ni Jesukristo ug mag-awhag kanato sa pagsunod Kaniya.
Magkat-on gikan sa Komperensiya
Sa dili pa ang kinatibuk-ang komperensiya, makaampo kita aron maminaw sa unsay gusto sa Ginoo nga atong makat-onan. Samtang kita maminaw sa mga pakigpulong, ang Espiritu motudlo kanato unsa ang kinahanglan natong mahibaloan. Human sa komperensiya, ang mga pakigpulong makita sa ChurchofJesusChrist.org, diha sa Gospel Library app, ug diha sa Liahona. Kita mahimong magmainampoon sa pagtuon sa mga pakigpulong aron makat-on og dugang mahitungod ni Jesukristo ug sa Iyang ebanghelyo.
Gikan sa mga Kasulatan
Si Jesukristo mitudlo nga kita kinahanglan nga magtig[o]m kanunay (tan-awa sa 3 Nephi 18:22).
Kon ang mga miyembro sa Simbahan mag-uban sa pagsimba, ang Ginoo magauban kanila (tan-awa sa Mateo 18:20).
Ang Ginoo misugo sa mga miyembro sa Simbahan nga “magtudlo ug maghatag og kaayohan sa usag usa” (Doktrina ug mga Pakigsaad 43:8).
Samtang ang mga miyembro sa Simbahan magpakita og hugot nga pagtuo kang Kristo, ang Iyang Espiritu magauban kanila samtang magpundok sila (tan-awa sa Doktrina ug mga Pakigsaad 44:2).