Digital Lamang

Sakay sa Bote nga Igluluwas [Lifeboat]: Pagpangita og Kahilwasan diha sa Simbahan

Ni Brother Bradley R. Wilcox

Ikaduhang Magtatambag sa Kinatibuk-ang Kapangulohan sa Young Men

Dili kita magpahisama niadtong diha sa Titanic kinsa midumili sa pagkuha sa usa ka bote nga igluluwas tungod kay sila naghunahuna nga ang Titanic dili malunod.

paghulagway sa tawo nga naggamit sa mga kasulatan isip usa ka sakayan

Sa dihang ang Titanic misugod sa unang paglawig niini kaniadtong 1912, ang mga tawo miingon nga kini dili malunod nga bapor. Dili sama sa bisan unsa nga bapor sa wala pa kini, gitukod ang barko nga gibahin-bahin sa mga kwarto aron nga kon ang usa mabuslot, kana lamang nga kwarto ang mapuno sa tubig ug ang bapor magpabilin nga molutaw. Sa dihang ang Titanic nakaigo og dako kaayong umol sa gahi nga yelo [iceberg] amihanan sa Dakong Dagat sa Atlantika, tungod niana, ang dako kaayong umol sa gahi nga yelo mibuslot sa daghan nga mga kwarto ug ang bapor misugod sa pagkaunlod.

Gisultihan sa kapitan ang tanan sa pagkuha og mga bote nga igluluwas, apan daghang mga pasahero ang kombinsido nga walay tinuod nga kuyaw. Nagtuo sila nga ang kapitan nanobra sa pagka-mabinantayon ug sa dili madugay mopahibalo nga ang problema nasulbad na ug sila makabalik ngadto sa ilang mga kwarto. Wala sila makakita og rason sa pagbiya sa usa ka bapor nga midan-ag sa matahum nga mga suga ug diin ang orkestra nagtugtog. Dayon ang barko nga “dili malunod” makuyaw nga mitakilid sa pikas kilid samtang kini misugod sa pagtidlom, ug ang tanan gusto nga mosakay sa usa ka bote nga igluluwas.

Apan nianang higayona, ulahi na kaayo.¹

Sa 2019 pipila ka mga tawo mipahayag, “Walay makapugong sa ekonomiya sa kalibutan. Ang gidaghanon sa walay trabaho sa tibuok kalibutan mas ubos sukad masukad.” Dayon miabut ang virus nga hilabihan sa ka gamay nga kita dili gani makakita niini, ug miusab kini sa tanan. Dili lamang minilyon ka mga tawo ang nasakit ug daghang nangamatay, apan daghan usab ang nawad-an og mga trabaho. Ang kahadlok anaa bisan asa. Sama sa Titanic, ang kalibutan mitakilid, apan ang mga miyembro sa Ang Simbahan ni Jesukirsto sa mga Santos sa Ulahing mga Adlaw luwas ug sigurado diha sa bote nga igluluwas.

Dayon usa ka makapaikag nga butang nahitabo. Daghang mga tawo ang mitan-aw ngadto sa atong Simbahan nga boteng igluluwas. Ang Abril ug Oktubre nga kinatibuk-ang komperensiya sa 2020 gitan-aw sa mas daghang mga tawo kay sa kaniadto—minilyon nga dugang nga mga tawo. Sa panahon sa pandemya, daghang mga tawo ang misugod sa pagkaamgo nga gikinahanglan nila ang unsay ikatanyag sa bote nga igluluwas: pagtuo diha sa Dios, pasalamat sa organisado nga relihiyon, ug hugot nga pagtuo diha ni Jesukristo.

Tuo diha sa Dios

Usa ka bag-ong internasyonal nga pagtuon nagpakita nga mas daghang batan-ong mga tawo kay sa kaniadto ang nagpadayag sa ilang mga kaugalingon nga mga walay pagtuo sa Dios. Kini nga mga indibidwal naghunahuna nga ang pagtuo diha sa Dios wala maghimo og kalainan kon kini kabahin sa kabuotan, katalahuron, ug katarung sa tawo.² Ania ang hagit: Ang Dios mihatag kanato og kagawasan sa pagtuo Kaniya o dili, apan dili kini husto ang pag-ingon nga dili kini makahimo og kalainan. Ang atong pagtuo sa Dios nag-apekto kon giunsa nato pagtan-aw ang atong mga kaugalingon ug giunsa nato pagtan-aw ug pagtagad ang uban.

Ang mga pagtuon nagpakita nga sa mga panahon sa kasamok ug krisis, ang mga tumutuo mas makasagubang og maayo kay sa mga dili tumutuo.³ Ang mga tumutuo mas malipayon ug mas andam sa paghatag ngadto sa kabos.⁴ Atol sa pandemya, ang mga tawo nanlimbasog sa pagpangita og kalinaw ug kahulugan sa panahon sa usa ka grabeng paglinainay ug kasamok. Ang mga tumutuo mibati og paglaom ug pagkamasaligon ang uban wala.⁵

Si Brett G. Scharffs usa ka propesor sa abogasiya sa Brigham Young University. Sa dihang nahibaloan sa pipila sa iyang mga kauban sa ubang mga unibersidad nga usa siya ka matinud-anon nga tumutuo, usahay mangutana sila, “Apan unsa kaha kon ikaw sayop ug walay Dios?”

Motubag siya: “Ako andam nga masayop niini nga paagi kon kini nangahulugan og pagtuo ug pagtagad sa uban ingon og sila mga anak sa Dios, gilalang diha sa Iyang panagway nga may kalagmitang mahimo nga mga binuhat sama ngadto sa usa ka hingpit ug labing mapinanggaon nga Dios. Mas maayo pang ako nakahimo og sayop sa paghatag og kahulugan ug gugma ngadto sa usa ka kalibutan nga walay kahulugan ug walay pagpakabana kay sa bali nga paagi. Ug gawas pa, wala ako magtuo nga kami sayop.”⁶

Hatagi og Bili ang Organisado nga Relihiyon

grupo sa mga young adult nga nagmiting alang sa usa ka kalihokan

Daghang mga tawo ang nagtuo sa Dios apan dili sa organisado nga relihiyon. Sila nag-ingon, “Ako espirituhanon, dili relihiyoso.” Sa kasagaran kana nagpasabut nga sila nag-ila sa pagka-adunay Dios apan dili gusto Kaniya nga mangayo og bisan unsa diha kanila, hatagan sila og bisan unsa nga mga sugo, o paabuton sila nga mohimo og bisan unsa nga mga kausaban.

Si Elder Jeffrey R. Holland sa Korum sa Napulog Duha ka Apostoles nagtudlo nga ang pagka-espirituhanon—ang indibidwal nga kasinatian—mahimo nga mao ang tanan nga atong gikinahanglan kon kita nagpuyo nga nag-inusara sa tumoy sa mga kabukiran, apan nagpuyo kita uban ang mga pamilya, mga komunidad, ug mga katilingban. Mao kana nganong nagkinahanglan kita og relihiyon—ang grupo nga pagpraktis sa pagka-espirituhanon.⁷

Kini sayon ang paglingkod nga mag-inusara sa tumoy sa bukid ug moingon, “Ako nahigugma sa tanan.” Sulayi ang pagbati sa samang paagi kon ikaw ulahing moabut sa trabaho tungod kay ang nagmaneho sa sakyanan diha sa imong atubangan hinay kaayo. Gusto nimong bosenahan ug singgitan ang drayber. Niana nga higayon, gikinahanglan nimo ang mga lagda ug mga sumbanan sa relihiyon aron sa pagtabang kanimo sa pagdala sa mithi sa tumoy sa bukid sama sa gugma ngadto gyud sa katinuod sa higayon nga ang usa ka tawo dili angay higugmaon. Mao kana ang unsay ikatabang sa relihiyon kanato nga buhaton.

Ang ubang mga tawo wala makakita sa panginahanglan alang sa organisado nga relihiyon, ug apan sila nagdemanda og organisado nga mga eskwelahan, mga siyudad, mga tindahan, mga tugpahanan sa eroplano ug mga ospital. Nakita nila ang mga benepisyo sa pag-adto sa usa ka organisado nga ospital, diin adunay mga balaod o mga gipaabut. Atong makita ang samang benepisyo sa atong organisado nga Simbahan.

Ingon nga kabahin niining organisado nga relihiyon nagpanalangin kanato ug niadtong atong gihigugma sa matag aspeto sa atong mga kinabuhi. Tungod kay ang Simbahan organisado, kita makahimo sa pag-amuma sa uban sa mas epektibo nga paagi nga magtinabangay kay sa atong mahimo sa indibidwal nga paagi. Si Elder Gerrit W. Gong sa Korum sa Napulog Duha ka Apostoles nag-ingon nga sa katungang bahin sa pandemya sa kalibutan sa 2020, ang Simbahan nakaapil na og sobra sa 1,000 ka mga proyekto sa tawhanong tabang sa tibuok 150 ka mga nasud. Kita mihatag og pagkaon ug ubang mga kinahanglanon sa pag-amuma alang sa minilyon nga nanginahanglan. Walay usa kanato ang makahimo niana sa atong kaugalingon, apan gihimo nato kini nga nagtinabangay tungod kay kita adunay usa ka organisado nga relihiyon.⁸

Pagbaton og Hugot nga Pagtuo diha ni Jesukristo

Ang ubang mga tawo nagtuo sa Dios ug sakop sa organisado nga mga relihiyon, apan sila walay hugot nga pagtuo diha ni Jesukristo. Si Elder Neil L. Andersen sa Korum sa Napulog Duha ka Apostoles mireport sa Oktubre 2020 nga kinatibuk-ang komperensiya sa Simbahan nga sa umaabot nga mga dekada, mas daghang gipanagna nga mobiya sa Kristiyanismo kay sa mosulod niini.⁹

Kini kasagarang makita nga gi-post sa social media nga nagpakaulaw ni Kristo ug sa mga Kristiyanos. Kita ba motalikod sa Manluluwas tungod kay ang pagsunod Kaniya dili na bantog? Kita modumili ba sa pagpataas sa bandilang Kristiyano tungod kay kini naghimo kanato nga mga target? Wala ako magtuo sa mao.

Usa ka pagsiksik nga pagtuon mipakita nga samtang ang COVID-19 nga pandemya daling mikatap sa ting-init sa 2020, 12 ka porsyento sa mga pamilya nga dili Santos sa Ulahing mga Adlaw ang mipalambo sa ilang pamilya nga relihiyosong mga praktis itandi sa 62 ka porsyento sa mga pamilya nga Santos sa Ulahing mga Adlaw kinsa mipalambo sa ila.¹⁰ Kini nga mga pamilya nahibalo nga ang mga opinyon sa mga tawo dili makausab sa kamatuoran. Si Jesukristo mao ang Manluluwas sa kalibutan. Siya mao ang Kapitan sa bote nga igluluwas. Miingon Siya, “Bulahan kamo sa diha nga panamastamasan kamo sa mga tawo, ug pagalutuson kamo, ug pagabutang-butangan kamo sa tanang matang sa kadautan batok kaninyo tungod kanako” (Mateo 5:11).

Tabangi ang Uban sa Pagkaplag sa Bote nga Igluluwas

Sa dihang pipila ka mga pasahero misugod sa pagsakay sa mga bote nga igluluwas diha sa Titanic, gihunahuna sa uban nga sila mga buang. Sa pagkatinuod, ang unang mga bote nga igluluwas milarga nga puno sa katunga. Sa dihang ang Titanic mitakilid, hinoon, nakita sa katawhan ang kaimportante sa bote nga igluluwas. Sa dihang ang kalibutan mitakilid, pipila sa mga katawhan nagsugod sa paghunahuna og makadaghan mahitungod sa Dios, nakaamgo sa bili sa organisado nga relihiyon, ug nagpalambo sa ilang hugot nga pagtuo diha ni Jesukristo.

Karon dili mao ang panahon nga mobalik ngadto sa Titanic. Karon ang panahon nga magpabilin diha sa bote nga igluluwas—ang Simbahan ni Jesukristo—ug mokab-ot sa pagtabang sa uban sa pagpangita kon unsay nawala kanila.