Nagkatigulang nga Matinud-anon
Ang Akong Matinud-anong Magtatambag
Kon kabahin na gani sa pagserbisyo, si Larry wala gayod mitan-aw sa edad isip usa ka babag.
Mga paghulagway pinaagi ni Carolyn Vibbert; litrato sa maayong kabubut-on sa pamilyang Morgan
Sa dihang ang akong pamilya mibalik og balhin ngadto sa lungsod diin ako nagdako, among nakita ang komunidad nga anaa sa kausaban. Kanhi naila isip usa ka dapit alang sa bag-ong mga pamilya, ang kasilinganan karon pinuy-anan na sa daghang biyuda ug biyudo, mga ginikanan kansang mga anak nanagko na ug mibalhin na sa layo, ug usa ka gamay apan nagdako nga gidaghanon sa bag-ong mga pamilya kinsa mga dayo sa dihang nabakante ang mga panimalay.
Tungod sa nagkausab nga populasyon, ang mga utlanan sa ward gi-organisar pag-usab. Mga bahin sa tulo ka ward ang gihiusa ngadto sa usa ka ward, ug ako ang gitawag nga bishop. Ako adunay pipila ka adlaw sa paghunahuna mahitungod sa akong mga magtatambag. Ang unang ngalan misantop dayon ug ang Espiritu mikompirmar niini. Apan wala ko makasiguro kon si kinsa ang laing magtatambag.
Gikonsiderar nako ang pipila ka mas bata pa nga kalalakin-an diha sa bag-o nga ward, apan wala ko makaila kaayo kanila. Para nako mas gikinahanglan namo sila diha sa organisasyon sa Young Men.
Nakaila ko og usa ka mas tigulang na nga lalaki, si Larry Morgan, kinsa nagpuyo diha sa kasilinganan sulod sa dugayng panahon. Sa pagkatinuod, nahimo siyang usa ka lider sa kabatan-onan sa dihang tin-edyer pa ako. Karon 76 na siya. Naaghat ko nga makig-istorya kaniya. “Tingali motabang siya nako nga mas makaila pa sa pipila sa mga tawo nga wala nako mailhi,” naghunahuna ko.
Nagbarog siya diha sa agianan sa sakyanan sa dihang miabot ko sa iyang panimalay, ug bisan wala pay usa nga pulong nga nasulti, ako nasayod nga si Larry mao ang mamahimo nga laing magtatambag. Nakig-istorya ko niya sulod sa pipila ka minutos; dayon mipauli ko ug mitawag sa presidente sa stake. Nianang pagka Dominggo ang bishopric gipaluyohan, uban ni Larry isip ikaduhang magtatambag.
Si Larry kalmado nga manulti ug mainampingon sa iyang kinaiya, apan kon siya mosulti, ang mga tawo maminaw. Aduna usab siyay lig-on nga pagtuo sa Ginoo. Sa wala madugay nakakat-on ko sa pagsalig sa iyang tambag.
“Atoa Silang Bisitahon”
Ang mga home teacher (nailhan karon isip tigpangalagad nga mga brother) mihimo og talagsaong buhat sa pagbisita sa mga biyuda ug mga biyudo ug sa pagpahibalo sa bishopric kon komosta na ang ilang mga kahimtang. Karon, kadaghanan sa responsibilidad alang sa ilang kaayohan anaa sa elders quorum ug Relief Society. Apan nianang higayona, mibati ko og usa ka katungdanan sa pagbisita usab kanila. Busa ako naningkamot sa pagbisita og usa o duha kanila sa matag semana. Sa niana nga gidaghanon mokabat og hapit usa ka tuig aron makabisita ko nilang tanan. Sa akong bag-ong nagtubo pa nga pamilya nga nagkinahanglan usab sa akong panahon, mibati ko og kaapiki sa panahon.
Ako mihisgot mahitungod niini diha sa miting sa bishopric, ug si Larry adunay ideya.
Si Larry ug Elizabeth Morgan
Mga paghulagway pinaagi ni Carolyn Vibbert; litrato sa maayong kabubut-on sa pamilyang Morgan
“Unsa kaha kon motabang akong asawa ug ako?” miingon siya. “Aduna mi tibuok adlaw sa pagbisita. Salig sa mga home teacher, apan tugoti nga si Elizabeth ug ako moadto aron makigkita niadtong nagkinahanglan og dugang pagtagad. Kami mo pahibalo kanila nga ikaw naghunahuna kanila.”
Human niana, ang akong matinud-anong magtatambag ug ang iyang asawa mihimo og daghang pagbisita ug miabiba sa daghang mga kalag. Kini mipagaan gayod sa akong palas-anon.
“Pila ang Edad sa Propeta?”
Sa usa ka higayon, ang among ward nagkinahanglan og usa ka magtutudlo sa Doktrina sa Ebanghelyo [Gospel Doctrine] sa Sunday School. Isip bishopric nag-ampo kami ug miribyo og pipila ka mga ngalan uban sa presidente sa Sunday School. Apan wala kami mobati og usa ka kompirmasyon mahitungod sa unsa ang buhaton. Sa makausa pa, si Larry adunay usa ka ideya. “Unsa kaha kon si Ila Gibb?” Si Ila nagpangedaron na og mga 70, apan mibati kaming tanan nga siya mahimong maayo nga magtutudlo. Miuyon ang presidente sa Sunday School.
Si Sister Gibb mikatawa sa dihang si Larry ug ako mihatag sa calling. “Tigulang nako,” miingon siya. “Pasagdi na lang ko.”
Sa dihang si Larry mitubag, “Sister Gibb, pila ang edad … ,” nagtuo ko nga iyang gamiton ang iyang kaugalingon isip ehemplo. Apan wala diay. Siya miingon uban sa pagkamabination, “Pila ang edad sa propeta?” Niining higayona, si Presidente Gordon B. Hinckley (1910–2008) bag-o lang nga nahimong Presidente sa Simbahan sa edad nga 84.
“Kahibalo nako asa ka padulong,” mitubag si Ila. “Siguro dili gayod kita ingon nga tigulang ra kaayo para moserbisyo.” Ug sulod sa tulo ka tuig, miserbisyo siya isip usa ka dalaygon kaayo nga magtutudlo sa Doktrina sa Ebanghelyo.
Ako 69 anyos na karon ang panuigon, ug kanunay akong maghunahuna kabahin ni Larry ug sa hugot nga pagtuo nga iyang gipakita sa pagdawat sa calling sa pagserbisyo isip usa ka magtatambag diha sa bishopric sa edad nga 76. Samtang maghunahuna ko mahitungod sa iyang pagserbisyo, ako madasig sa paghunahuna nga daghan pa gihapon kog mahimo—ug nga daghan kanato sa atong pangedaron nga 60, 70, ug 80 anyos makahimo pa—sa pagpadayon sa pagtukod sa gingharian sa Dios.