Masayod sa mga Taktika sa Atong Kaaway
Ang tagsulat nagpuyo sa Arizona, USA.
Ang makabantay sa mga taktika sa mga kaaway makatabang sa mga disipulo ni Jesukristo nga maduol sa Iyang gahom ug kalig-on sa paglupig ni Satanas ug sa iyang mga sumusunod diha sa mga pakigbatok nga umaabot.
Mga litrato gikan sa Getty Images
Dihang nagserbisyo ko sa militar, usa sa unang mga butang nga akong nakat-onan mao ang kaimportante sa pagkahibalo mahitungod sa kaaway aron epektibong makig-away batok kanila. Migahin ko og panahon sa pagtuon sa mga taktika ug mga estratehiya sa kaaway aron ako makapalambo og mga plano nga mausahan ug malupig sila inkaso kon kami magkaabot diha sa gubat.
Tungod kay ang atong espiritwal nga mga kaaway, si Satanas ug ang iyang mga sumusunod, dili nato makita, kita adunay kalagmitan nga malimot nga sila nagtan-aw kanato ug naningkamot sa pagtintal kanato. Si Presidente George Q. Cannon (1827–1901) sa Unang Kapangulohan mipasidaan: “Ako nakahukom nga kon ang atong mga mata mabuksan aron makakita sa kalibotan sa espiritu sa atong palibot, … kita magmabinantayon ug magmaampingon gayod ug magpakabana bisan pa og kon kita nakabaton ba sa espiritu ug gahom sa Dios uban kanato o wala; apan kita magpadayon nga magmatngon ug magmainampuon sa atong Langitnong Amahan alang sa Iyang Espiritu Santo ug ang Iyang balaan nga mga anghel aron nga magpalibot kanato aron sa paglig-on kanato sa pagbuntog sa matag dautan nga impluwens[i]ya.”1
Ang makasabot sa gahom ug mga abilidad sa dautan makatabang kanato sa pag-ila sa potensyal nga kadaot ug kalaglagan nga siya ug ang iyang mga sumusunod nagtinguha sa pagpahamtang ngari kanato. Kita kinahanglang magmakanunayon nga magmatngon ug mangandam sa atong pagdepensa ug pag-atake sa mga taktika aron malikayan ang mabiktima sa mga tintasyon ug mga pangdani.
Ang gubat gisugdan diha sa kinabuhi sa wala pa dinhi sa yuta.
Sa dihang kita nakig-away diha sa Gubat sa Langit, kita wala makig-away gamit ang mga armas ug mga bomba apan gamit sa pagpamatuod ug pagtuo. Si Presidente Russell M. Nelson mitudlo: “Kini nga gubat sa langit dili usa ka gubat sa pagpaagas sa dugo. Gubat kadto sa kasungian sa mga ideya—ang sinugdanan sa panagbingkil.”2
Ang mga sumusunod sa Langitnong Amahan ug ni Jesukristo mianhi sa yuta nga dunay mortal nga lawas. Si Satanas ug ang iyang mga sumusunod ania usab sa yuta, apan isip mga espiritu.3 Ang gubat nga gisugdan didto sa kinabuhi sa wala pa dinhi sa yuta wala matapos. Sukad sa panahon ni Adan, si Satanas ug ang iyang daghang kasundalohan mipadayon sa pagpakiggubat batok niadtong misuporta sa Amahan ug sa Iyang plano sa kaluwasan. Si Elder Ulisses Soares sa Korum sa Napulog Duha Ka Apostoles mipahayag: “Ang gubat sa maayo batok sa dautan mopadayon sa tibuok natong kinabuhi, tungod kay ang tuyo sa kaaway mao ang paghimo sa tanang katawhan nga mahimong miserable sama kaniya. Si Satanas ug ang iyang mga anghel maninguha sa paglib[o]g sa atong mga hunahuna ug mopugong pinaagi sa pagtintal kanato sa pagpakasala. Kon sila makahimo, ilang dauton ang tanan nga maayo. Bisan pa niana, importante nga masabtan nga sila may gah[o]m lamang kanato kon kita motugot niini.”4
Ang pwersa sa dautan dili diyutay. Uban sa “ikatulo nga bahin sa mga panon sa langit” (Doktrina ug mga Pakigsaad 29:36) nga gisalikway sa langit uban ni Satanas, ang daghan nga mga espiritu ubos sa iyang mga sugo. “Kita gialirongan sa mga panulay, oo, kita giliyokan sa mga anghel kaniya kinsa nagtinguha sa paglaglag sa atong mga kalag” (Helaman 13:37).
Sama sa gubat dinhi sa yuta, pinaagi sa pagkat-on sa unsay atong mahimo mahitungod sa pagsupak sa espirituhanong pwersa—ilang mga kapabilidad, kalig-on ug kahuyang, ug pagdasig—kita makaandam sa epektibo nga pakig-away batok kanila. Atong mahibaloan ang pipila ka importanting mga taktika nga gamiton ni Satanas pinaagi sa pagtuon sa mga kasulatan ug mga pulong sa mga propeta sa modernong panahon.
1. Ang kaaway naghatag og importansiya sa pag-ataki sa labing lig-on nga kaaway.
Si Presidente George A. Smith (1817–75) sa Unang Kapangulohan mihulagway niini sa dihang siya misulti niining Chinese nga sugilanon:
“Usa ka tawo, nagbiyahe agi sa bukid, miabot sa usa ka dako nga dakbayan, adunahan kaayo ug talagsaon ang kanindot; mitan-aw siya niini ug miingon ngadto sa iyang giya, ‘Tingali kining mga tawo matarong kaayo, tungod kay makakita lang ko og usa ka gamayng yawa dinhi niining dako nga dakbayan.’
“Ang giya mitubag, ‘Wala nimo masabti, sir; kini nga siyudad hingpit na kaayong mitahan ngadto sa pagkadautan … nga usa lang ka yawa ang gikinahanglan aron maubos silang tanan niini.’
“Nagpadayon sa pagbiyahe og diyutayng gilay-on siya miabot sa usa ka lisod nga agianan ug nakakita og usa ka tigulang nga naningkamot sa pagbarog sa kilid sa bungtod, gialirongan sa pito ka talagsaon, dako, laksot nga tan-awon nga mga yawa.
“‘Ngano kaha,’ miingon ang biyahidor, ‘kining tawhana tingali grabe ka dautan, tan-awa lang kon unsa kadaghan sa mga yawa ang nag-alirong kaniya.’
“‘Kini,’ mitubag ang giya, ‘mao lang ang matarong nga tawo diha sa nasod ug anaa ang pito ka kinadak-ang mga yawa nga naningkamot sa paghisalag kaniya sa iyang dalan ug sila wala makahimo niini.’”5
Kon si Satanas nga mopahisalaag sa usa ka miyembro sa Simbahan, siya makabaton og usa ka mas dakong kadaugan batok sa usa kinsa wala gayod nakahimo og bisan unsa nga mga pakigsaad sa Dios. Si Elder Larry R. Lawrence, emeritus nga sakop sa Seventy, mitudlo: “Ang yawa nagpunting sa tanang mga tawo, ilabi na niadtong adunay labing dakong potens[i]yal alang sa mahangt[o]rong kalipay. Klaro kaayo nga siya masina ni bisan kinsa nga anaa sa dalan padulong sa kahimayaan.”6
Gani ang usa ka mas importanting gubat madaog sa kaaway kon ang usa ka lider sa Simbahan mabuntog sa kaaway. Si Presidente Spencer W. Kimball (1895–1985) misulat: “Gusto ni Satanas ang tanan nga mga tawo, apan labaw pa gyod siyang nagtinguha sa mga nanguna nga mga tawo kinsa adunay impluwens[i]ya. Tingali maningkamot pa gayod siya og maayo sa pag-angkon og mga tawo kinsa adunay kalagmitan nga mamahimo niyang talagsaong oposisyon, mga tawo nga anaa sa taas nga kahimtang kinsa makahimo sa pag-agni og daghan pa aron dili mamahimong sulugoon ni Satanas.”7
Ang pagkasayod nga si Satanas mobutang sa iyang pwersa diha sa iyang labing lig-on nga kaaway makatabang kanato sa pag-atubang sa mga gubat sa kinabuhi. Mahimong madasig kita aron magmakanunayon sa pagbutang og mga depensa batok sa atong espirituhanong kaaway.
Ang pagkahibalo niini makatabang usab kanato samtang kita mopaambit sa ebanghelyo sa atong mga higala ug pamilya. Si Elder Ronald A. Rasband sa Korum sa Napulog Duha ka Apostoles miingon: “Nakiggubat kita kang Satanas alang sa mga kalag sa katawhan. Ang panagsumpaki diha na sa atong kinabuhi sa wala pa dinhi sa yuta. Si Satanas ug ang ikatulo nga bahin sa mga anak sa atong Amahan sa Langit misalikway sa Iyang mga saad sa kahimayaan. Sukad niadtong panahona, ang mga katabang sa yawa nakigbatok na gy[o]d sa mga matinud-anon kinsa mipili sa plano sa Amahan.”8
Samtang kita mopaambit sa ebanghelyo nasayod nga ang tanan malagmit nga nakasinati og ilang kaugalingong mga gubat batok ni Satanas, kita mas makaandam sa pag-ila sa mga gubat ug sa pag-apil sa uban batok sa pakig-away kaniya bisan unsa pa ang ilang mga gituohan.
2. Si Satanas ug ang iyang dautang mga pwersa maningkamot sa pagpakgang sa mga panghitabo nga adunay espirituhanong kahulugan.
Ikonsiderar kini nga mga ehemplo gikan sa mga kasulatan:
-
Si Satanas mihimo og dakong pagpamugos diha ni Adan ug Eva nga mokaon sa gidili nga bunga didto sa Tanaman sa Eden, nagtuo nga sa pagbuhat niini, siya makalaglag sa plano sa kaluwasan sa wala pa kini mouswag sa unahan (tan-awa sa Moises 4:6–12).
Imahechess pieces and an apple -
Human si Moises nakakita sa Dios nawong sa nawong, “si Satanas misinggit sa makusog nga tingog, ug nagyaw-yaw diha sa yuta, ug nagmando” kang Moises sa pagsimba kaniya (Moises 1:19).
-
Human si Kristo nagpuasa sulod sa 40 ka adlaw ug nakigsulti sa Langitnong Amahan, si Satanas misulay sa pagtintal kang Kristo sa sayop nga paggamit sa Iyang gahom (tan-awa sa Mateo 4:2–11; Lucas 4:1–13).
-
Si Joseph Smith gibuntog sa kangitngit sa wala pa mipakita ang Langitnong Amahan ug si Jesukristo ngadto kaniya aron masugdan ang Pagpahiuli sa ebanghelyo sa yuta (tan-awa sa Joseph Smith—Kasaysayan 1:15–17).
Daghan pang uban sa tibuok kasulatan ug sa tibuok panahon nga adunay dautan nga pagpamugos nga gibutang ngadto kanila aron mapakgang ang ilang bahin diha sa plano sa Langitnong Amahan.
Sa atong kinabuhi, kita kinahanglan makabantay nga si Satanas o ang iyang mga sumusunod mobutang og dakong paningkamot kabahin sa pagbaton og pagkontrolar aron mapakgang ang usa ka sagradong panghitabo o ang mga resulta niana nga panghitabo. Pila kanato ang nahulog niadtong mga tintasyon, misinati og personal nga mga pagsulay, o nag-atubang og usa ka espirituhanong babag sa wala pa ang espirituhanong panghitabo sa atong mga kinabuhi? Ang pagdawat og usa ka bag-ong calling, pagpangandam sa pag-adto sa templo, o pag-apil sa bisan unsang espirituhanong kalihokan panagsa rang hapsay nga mahitabo.
Si Presidente Brigham Young (1801–77) kausa miingon, “Kon ang mga indibidwal mapanalanginan og mga panan-awon, mga pagpadayag ug talagsaong mga pagpakita, pagbantay, unya ang yawa anaa sa duol kaninyo, ug kamo matintal sumala sa panan-awon, pagpadayag, o pagpakita nga nadawat ninyo.”9
3. Ang makapadasig sa yawa mao ang garbo.
Sa kinabuhi sa wala pa sa yuta, si Satanas miingon ngadto sa Langitnong Amahan, “ako motubos sa tanan nga mga katawhan … ; busa ihatag kanako ang imong dungog” (Moises 4:1). Kana nga garbo misangpot ngadto sa iyang pagkapukan ug nakapahimo kaniya nga gisalikway. Si Isaias misulat:
“Ngano nga ikaw nahulog gikan sa langit, O Lucifer, anak sa kabuntagon! …
“Kay ikaw nag-ingon sa imong kasingkasing, mosaka ako sa langit, ibabaw pa sa kabituonan ug adto ko didto ipahimutang ang akong trono: …
“… Makigsama ako sa labing gamhanang Dios” (Isaias 14:12–14).
Kinahanglan gayod kitang mag-amping sa atong kaugalingong garbo ug likayan nga tugotan si Satanas sa paggamit niini aron pagtintal kanato. Sama pananglit, si Satanas makagamit sa atong garbo sa pagtintal kanato nga masilo pag-ayo pinaagi sa usa ka butang nga gisulti sa usa ka tawo nga dili na kita mobalik sa simbahan. O tingali siya mogamit sa atong garbo aron sa pag-awhag kanato nga mas tutokan ang pagkainsakto kay sa pagpaminaw ug paghigugma sa laing tawo.
Ang mahibalo sa mga taktika ni Satanas makatabang kanato sa paglupig kaniya.
Si Satanas ug ang iyang mga sumusunod naninguha sa paglupig kanato. Kita napalibotan niining mga kaaway ug nabantang ngadto sa ilang mga paningkamot sa matag adlaw sa atong kinabuhi. Dili gayod nato ipakaubos ang ilang gahom o hunahunaon nga ang ilang mga tinguha taphaw lamang.
Apan kita nangandam na alang gayod niini nga gubat sukad sa wala pa kita matawo. Si Presidente Joseph F. Smith (1838–1918) sa makausa nakabaton og panan-awon diin iyang nakat-onan nga daghang mga pinili nga mga espiritu “midawat sa ilang unang mga leks[i]yon didto sa kalib[o]tan sa mga espiritu ug naandam sa pag-anhi sa tukma nga panahon sa Ginoo aron sa paghago diha sa iyang ubasan alang sa kaluwasan sa mga kalag sa mga tawo” (Doktrina ug mga Pakigsaad 138:56). Ang matag tawo dinhi sa yuta mipili sa pagsunod sa plano sa Langitnong Amahan didto sa kinabuhi sa wala pa dinhi sa yuta ug makabuhat pag-usab sa ingon.
Ang atong Langitnong Amahan nasayod nga kining katap[o]sang mga adlaw puno sa kakuyaw, pagkadaotan, ug pagpangilad. Aron mabuntog si Satanas ug ang iyang anad, gamhanan nga mga pwersa diha sa kataposang panagbangi sa dili pa ang Ikaduhang Pag-anhi sa Manluluwas, kita kinahanglan nga maningkamot nga mahimong pipila sa labing lig-on ug labing matinud-anong anak nga mga babaye ug anak nga mga lalaki sa Dios.