Mga Baroganan sa Pagpangalagad

Pagtabang sa Uban nga Mangandam alang sa Wala Damha nga mga Panginahanglan

Isip tigpangalagad nga mga kaigsoonan, makatabang kita sa atong mga kaigsoonan nga mangandam alang sa usa ka kalibotan nga walay kasegurohan.

a mother and her toddler son planting an indoor garden

Mga pandemya, natural nga mga kalamidad, mga pagkunhod sa ekonomiya, politikanhong kagubot, ug mapintas nga mga panagbangi—ang kalibotan nakakita og daghan niini sa miaging tuig. Agig dugang niining dinagko nga mga panghitabo, kita usab nag-atubang og wala damha nga mga hagit sa atong personal nga mga kinabuhi, sama sa sakit, diborsyo, pagkawala sa kinitaan, ug uban pa.

Ang atong mga paningkamot nga mangandam alang sa wala damha nga mga kahimtang makahatag og kahilwasan ug seguridad alang sa atong kaugalingon ug sa uban. Unsa man ang atong mahimo isip tigpangalagad nga mga kaigsoonan aron sa pagtabang niadtong atong gihigugma nga makalahutay sa wala damha nga mga kalisod sa ilang mga kinabuhi?

Si Carlomagno Aguilar gikan sa Angeles, Philippines, naghatag og usa gayod ka ehemplo. Sa dihang iyang nahibaloan nga ang iyang dapit i-quarantine tungod sa COVID-19 nga pandemya, nagdali-dali siya aron mopalit og mga suplay—bisan og ang iyang lista lahi kay sa unsay lista sa mga tawo sa iyang palibot. Siya adunay plano nga makaandam, ang pagpalit og mga liso ug abuno alang sa iyang tanaman sa panimalay.

video still of man teaching about growing food — Si Carlomagno Aguilar nagsugod og online nga channel sa pagtudlo kabahin sa pagpanguma sa siyudad [urban farming].

Aron mahimong mas makabarog sa kinaugalingong paningkamot, si Carlomagno nahimong usa ka mag-uuma sa siyudad [urban farmer] sulod sa katuigan. Siya usab nangalagad ngadto sa iyang mga silingan, pinaagi sa paghatag kanila og abot gikan sa iyang tanaman ug sa pagtudlo kanila sa pagpatubo og ilang kaugalingon nga pagkaon. Siya usab mihimo og online nga channel diin ang iyang mga sugyot ug mga pagtudlo anaa alang sa tanan, nga nagtabang sa iyang mga kaigsoonan nga mahimong mas makabarog sa kinaugalingong paningkamot ug maandam alang sa umaabot.

Si Bishop W. Christopher Waddell, Unang Magtatambag sa Presiding Bishopric, mitudlo: “Kon atong hang[o]pon ang espirituhanon nga mga bar[o]ganan ug magtinguha og inspirasyon gikan sa Ginoo, magiyahan kita nga masay[o]d sa kabubut-on sa Ginoo alang kanato, sa tagsa-tagsa ug isip mga pamilya, ug unsaon paggamit sa labing maayo nga paagi ang importante nga mga bar[o]ganan sa temporal nga pagpangandam. Ang labing importante nga lakang sa tanan mao ang pagsugod” (“Dihay Tinapay,” Liahona, Nob. 2020, 44–45).

Ang pagtabang sa usag usa nga mahimong andam sa usa ka walay kasegurohan nga kalibotan mao ang sukaranan nga paagi sa pagpakita og Kristohanon nga gugma. Tabangan nato ang usag usa sa paghimo niana nga “labing importante nga lakang” sa pagsugod.

Mga Sugyot alang sa Pagtabang sa Uban

Sa kanunay, ang pagpangalagad magsugod uban sa mainampoong konsiderasyon ug pagtinambagay sa usag usa. Ang mosunod nga mga sugyot makatabang kaninyo sa paghunahuna kon sa unsang paagi kamo o kadtong inyong pangalagaran makasugod sa pagpangandam sa pagsagubang sa wala damhang mga hagit.

Paghunahuna sa kinatibuk-an. Makaandam kita sa lain-laing paagi alang sa lain-laing bahin sa atong kinabuhi. Importante nga magtipig ug magproseso og pagkaon kon makaya ninyo, mangandam sa pinansyal nga paagi, magpalambo og lig-on nga emosyonal nga pagsagubang, ug maghimo og mga plano alang sa emerhensiya nga mga sitwasyon.
Hisgoti ang mga hagit nga lagmit kaayong mahitabo sa dapit diin kamo nagpuyo ug unsaon sa pagsagubang niini. Lain-lain nga mga dapit sa kalibotan adunay talagsaon nga mga hagit. Kon nagpuyo kamo sa usa ka dapit diin komon ang mga linog, hisgoti kon sa unsang paagi ninyo maandam ang inyong panimalay aron sa pagtabang kaninyo nga magpabiling luwas, sama sa pagpatapot sa bug-at nga mga kabtangan ngadto sa bungbong. O kon nagpuyo kamo sa usa ka dapit diin komon ang mga bagyo, hisgoti kon unsaon sa pagresponde niana nga sitwasyon, sama sa pagpaminaw sa radyo alang sa mga balita o sa pagbakwit ngadto sa taas nga lugar.
Hisgoti kon unsaon sa paghimo og pundo alang sa emerhensiya. Ang pagtigom og kwarta makatabang kaninyo kon kamo mawad-an sa inyong trabaho o adunay dugang nga wala damha nga mga gastohanan. Hisgoti kon unsaon sa pagtigom og kwarta, sama sa pagsugod og gamay ug pagtigom og ginagmay sa matag higayon nga kamo gibayaran hangtod makab-ot ninyo ang inyong tumong.
Pagtinabangay sa pagpundok og mga suplay alang sa usa ka kit sa emerhensiya. Ang pagbaton og usa ka kit sa emerhensiya makatabang kaninyo nga mahimong andam kon kinahanglan ninyong mobiya sa inyong panimalay sa mubo nga panahon. Pagtinabangay sa paghunahuna ug pagpundok sa gikinahanglan nga mga butang. Kini mahimong buhaton sulod sa usa ka panahon. Ikonsiderar ang kapasilongan, suga, kwarta, pagkaon ug tubig, medikal nga mga suplay, komunikasyon, importante kaayo nga mga dokumento, sinina nga kailisan, kalingawan ug mga butang nga makahupay (mga dula, mga libro, mga dulaan alang sa mga bata), ug bisan unsa nga uban pang mga panginahanglan.
Pag-ugmad og panaghigalaay sa tawo nga inyong giserbisyohan. Importante nga makabaton og lig-on nga mga kahanas sa pagsagubang sa mga pagbati nga moabot tungod sa kalisod. Usa niini nga mga kahanas mao ang pagbaton og maayo nga mga relasyon. Samtang inyong gipalig-on ang inyong pakighigala sa tawo, kamo makatabang kanila sa pagmugna og usa ka sistema sa pagsuporta.
Hisgoti ang mahitungod sa pagtipig og pagkaon. Mahimong makatabang ang pagbaton og sobra nga pagkaon nga anaa nang daan alang sa mga emerhensiya. Awhaga ang usag usa nga magsugod pinaagi sa pag-ugmad og suplay alang sa mubo nga panahon nga inyong gamiton ug hulipan sa inyong regular nga pagluto. Dayon pagsugod sa pagpundok og mga butang nga kanunayng kinahanglanon sa dugay nga panahon. Kon kamo walay dakong luna alang sa pagtipig og pagkaon o kon kamo gibawalan sa balaod sa pagtipig og dinaghan nga pagkaon, pagtipig lang og kutob sa angay sa inyong mga kahimtang.