Digital Lamang: Mga Young Adult
Ang Atong mga Kalainan Dili Kinahanglang Mobahin Kanato
Nanlimbasog ako sa pagdala sa akong relasyon sa usa ka higala kinsa wala makigbahin sa akong mga pagtuo. Ang gugma sa Dios mipakita kanako kon unsaon.
Kon moabut sa pagdala og mga relasyon, ang labing dako nga tubag nga sukad gihatag ngari kanato miabut sa porma sa usa ka Manluluwas: “Kay gihigugma gayud sa Dios ang kalibutan, nga tungod niana gihatag niya ang iyang bugtong Anak” (Juan 3:16).
Bisan kanus-a nga makaplagan ko ang akong kaugalingon sa tunga-tunga sa daw dili magkauyon nga mga pangutana o dili sayon nga panagbangi, ako modangop ngadto ni Jesukristo ug mahupay ako pinaagi sa kalinaw ug gugma nga nagdagayday gikan Kaniya. Ang Iyang gugma, alang kanako, nagpuno sa haw-ang.
Ang gugma ni Jesukristo mao ang tubag nga akong nadawat sa dihang usa ka suod nga higala miingon kanako nga siya magpalayo sa Simbahan. Sa wala pa kini nga desisyon, gipakigbahin niya ang iyang sinserong mga pangutana ngari kanako, nangayo sa akong mga opinyon ug misulti kanako mahitungod sa kasakit nga iyang gibati. Ang iyang kasakit tinuod, kinasingkasing ang iyang mga pangutana, ug gibati nako nga pinasidunggan nga nahimong tigpaminaw sa iyang problema. Bisan pa niana, ang mga hunahuna nga akong kanunay nga gipakigbahin ingon og wala moabut kaniya.
Mobiya ako sa among panag-istoryahanay mibati nga dili sigurado kon unsaon sa pagsuporta kaniya. Atol sa usa ka piho nga pag-istoryahanay, nangutana siya kanako og usa ka sinserong pangutana mahitungod sa usa ka butang nga personal ko nga gibati nga dili sigurado ug nahagit sa dihang ako nanlimbasog nga mahibalo kon unsaon sa pagtubag. Nahinumdom ko kaniya nga nag-ingon, “Em, ikaw dili gayud motuo niana. Ako nasayud nga ikaw dili.”
Husto siya.
Human niana nga pagbinayloay, gibati ko ang akong kaugalingon nga napalayo gikan sa panaghigalaay. Ako dili komportable sa paghisgot og espirituhanong mga butang uban kaniya ug mibati og kasagmuyo sa among mga kalainan sa pagtuo ug sa akong kaugalingong kakulang sa hingpit nga mga tubag. Gibati nako ang pagkanawad-an og paglaom. Sa hinay-hinay mihunong ako sa pagpangutana kaniya mahitungod sa iyang mga pangutana sa ebanghelyo gumikan sa kahadlok nga walay ikatubag. Misugod ako sa paghunahuna nga kami lahi kaayo nga mahimong mga higala.
Mikabat og pipila ka bulan sa wala pa ako nakaamgo nga sa pagpangita og mga tubag ngadto sa iyang (ug akong) mga pangutana, wala nako makita ang labing importante nga tubag: Gihigugma gayud sa Dios ang kalibutan—gihigugma gayud sa Dios ang akong higala.
Sa iyang Oktubre 2020 nga pakigpulong sa kinatibuk-ang komperensiya, si Presidente Dallin H. Oaks, Unang Magtatambag sa Unang Kapangulohan, mipahinumdom kanato, “Ang pagtulun-an sa Manluluwas sa paghigugma [sa usag usa] gibase sa katinuod nga ang tanan nga mga mortal mga hinigugmang anak sa Dios.” Gitapos niya ang iyang mensahe uban sa usa ka pahinumdom mahitungod sa panglantaw nga kini nga kahibalo naghatag: “Nahibalo nga kitang tanan mga anak sa Dios naghatag kanato og balaang panan-awon sa bili sa tanan pang uban.”1
Kadto nga mga pulong miigo kanako. Sa tinuod, kini nga pagtulun-an usa ka sukaranang kamatuoran. Hinoon, akong naamgohan nga sa akong tubag ngadto sa pagpalayo sa akong higala gikan sa Simbahan, akong napadaplin kini nga kamatuoran.
Nasayud nga ang akong higala—walay pagsapayan sa among mga kalainan sa pagtuo—usa ka hinigugma nga anak sa Dios nakapausab sa tanan alang kanako.
Mga bulan milabay nga gibati nako ang ka layo kaayo gikan sa akong higala, apan diha-diha dayon akong gitawag siya human sa akong pagkaamgo, ug akong gipakigbahin ang gugma sa Dios ngadto kaniya. Nakahimo ako sa pagpasabut nganong ako mipalayo sa akong kaugalingon gikan kaniya. Akong gisulti kon nganong sakit kini nga bation nga ang usa ka butang nga bililhon kaayo ngari kanako wala tagda nga may pagtahud. Maayo gani, siya masinabtanon, ug kaming duha nagpinasayloay. Nag-istorya kami kon unsa ka importante ang among panaghigalaay ug sa unsang paagi ang among panagsama mas lig-on kay sa among mga kalainan. Akong gisultihan siya nga ako gusto nga mosugat kaniya kon hain siya samtang nagpalambo sa akong mga sumbanan ug hugot nga pagtuo, ug nga ako naglaom nga makapadayon kami sa pagsuporta sa usag usa. Mapasalamaton kaayo ako sa dihang siya miuyon.
Sama nga si Zoram mao ang “usa ka tinuod nga higala” ngadto kang Nephi (2 Nephi 1:30), nagtinguha ako nga mahimong usa ka mahal nga higala ngadto kaniya, bisan unsa pa ang among mga kalainan.
Mapasalamaton ako alang sa gugma sa Dios—mapasalamaton nga kini putli kaayo, gamhanan kaayo, ug ingon ka matuhupon nga kini makauban kanato sa malisud nga mga panag-istoryahanay. Mapasalamaton ako nga ang gugma sa Dios anaa sa matag tawhanong kalag. Mapasalamaton ako nga ang gugma sa Dios nagtugot kanato sa paghigugma sa usag usa sa hingpit nga paagi. Unsa ka balaan, dili mahulagway nga gugma.