Mga Young Adult
Pag-ila sa Kaayo nga Anaa sa Atong Kaugalingon
Ang tagsulat nagpuyo sa Utah, USA.
Unsaon ninyo sa pagpasabot ang gasa sa pag-ila? Hangtod karong bag-ohay lang, wala gayod ako makasabot sa usa sa mahinungdanon nga mga katuyoan niini nga gasa.
Paghulagway sa litrato gikan sa Getty Images
Kasagaran sa akong kinabuhi, akong gisabot ang gasa sa pag-ila isip ang pagkaila sa husto gikan sa sayop, kamatuoran gikan sa kasaypanan. Samtang kana usa ka mahinungdanon nga bahin sa gasa, bag-ohay lang nakong nakat-onan nga adunay mas labaw pa niini.
Nakakaplag ako og usa ka bililhon nga panabot diha sa mga footnote sa usa ka pakigpulong nga gihatag sa Abril 2020 nga kinatibuk-ang komperensiya. Usa ka mamumulong ang mikutlo ni Presidente Stephen L Richards (1879–1959), kanhi Unang Magtatambag sa Unang Kapangulohan, kinsa miingon, “Ang pinakataas nga matang sa pag-ila mao kanang pagmatik[o]d unsay anaa sa uban ug ang pagkaplag alang kanila sa ilang mas maayong mga kinaiya, ang kaayo nga diha nang daan nila.”1
Dili ba kana ingon og balaknon?
Ang Espiritu Santo makatabang kanato sa pagkaplag sa maayo nga diha nang daan sa uban. Ang kamatuoran niana nga pamahayag hilabihan ka espesyal kanako nga gusto nakong makakat-on og dugang pa. Nahibaloan nako nga si Elder David A. Bednar sa Korum sa Napulog Duha ka Apostoles mitudlo usab nga ang gasa sa pag-ila makatabang kanato nga “makakita ug makapagawas sa maayo nga mahimong natago kanato.”2
Sukad niini nga pagdiskobre, nakaamgo ako kon unsa ka importante kini nga bahin sa gasa sa pag-ila. Kinahanglan natong pangitaon ang maayo nga mga hiyas sa atong kaugalingon aron ato kining mapalambo. Samtang ato kining buhaton, kita mobati ug molihok nga mas sama sa mga anak sa Dios nga mao gayod kita (tan-awa sa Salmo 82:6; Mosiah 5:7; Moroni 7:19).
Mao nga sa unsang paagi kita makasugod sa pagkakita sa kaayo nga anaa sa atong kaugalingon? Aniay pipila ka paagi aron makasugod.
Tutoki ang Paggamit sa Inyong mga Kalig-on aron sa Pagpanalangin sa Uban
Kini usa ka doktrinal nga kamatuoran nga ang tanan adunay piho nga mga gasa gikan sa Dios (tan-awa sa Doktrina ug mga Pakigsaad 46:11)—ug dili kawang ang paghunahuna mahitungod niini. Sa pagkatinuod, ang Ginoo nagsugo kanato sa pagbuhat sa ingon! Ang mga kasulatan nagtudlo kanato nga pangitaon “sa matinguhaon nga paagi ang labing maayo nga mga gasa, ug kanunay maghinumdom alang sa unsa sila gihatag” (Doktrina ug mga Pakigsaad 46:8).
Samtang mas makahibalo kita sa atong mga gasa o mga talento, kinahanglan kitang mangita og mga paagi sa paggamit niini aron sa pagserbisyo sa uban.
Usa ka paagi sa pag-ila sa inyong mga gasa mao ang pagpangutana sa usa ka tawo nga inyong gisaligan! Pangutan-a sila kon unsa ang imong mga kalig-on. Kon kamo sama kanako, kamo tingali maghunahuna nga kana daw kiwaw. Apan hinumdomi, dili kini mahitungod sa pagpanghambog; kini mahitungod sa pagpangita kon unsa nga indibidwal nga mga kinaiya o mga hiyas nga anaa kamo aron ikatanyag sa inyong mga igsoong lalaki ug babaye sa kalibotan (tan-awa sa Mosiah 8:18).
Sama pananglit, usa ka buotan nga silingan sa makausa misulti kanako nga ako adunay gasa sa pagtabang sa mga tawo nga mobati nga komportable. Imbes ibaliwala ang komentaryo isip usa lamang ka matinahoron nga pagdayeg, misugod ako sa pagbantay niana nga gasa sa akong kinabuhi. Samtang gibuhat nako, akong naamgohan nga ang Langitnong Amahan makatabang kanako sa paggamit sa akong sosyal nga mga kahanas sa pagpakighigala sa uban ug sa pagpanalangin og dugang pa nga mga kinabuhi kay sa ako lang kaugalingon.
Pinaagi sa pag-ila sa inyong mga gasa, tuyo kamong makapili sa paggamit niini aron sa pagpanalangin sa uban (tan-awa sa Doktrina ug mga Pakigsaad 82:18).
Tun-i ang Inyong Patriyarkal nga Panalangin
Litrato pinaagi ni Judith Ann Beck
Ang patriyarkal nga mga panalangin usa usab ka maayong tinubdan aron makakita sa atong talagsaon, hinatag sa Dios nga mga gasa. Si Elder Larry R. Lawrence, usa ka emeritus nga sakop sa Seventy, miingon: “Ang Espiritu makapakita nato sa atong mga kahuyang, apan makapakita usab Siya nato sa atong mga kalig-on. … Kon basahon nato ang atong patriyarkal nga mga panalangin, mapahinumd[o]man kita nga ang atong Langitnong Amahan nahibalo sa atong balaang potens[i]yal.”3
Ang pagtuon sa inyong patriyarkal nga panalangin makatabang kaninyo nga motutok sa pagpalambo og mga kinaiya nga makatabang kaninyo sa pagkab-ot sa inyong potensiyal.
Sa akoang bahin, kanunay nakong gihunahuna ang matang sa inahan nga akong gilaoman nga mamahimo sa umaabot nga adlaw. Wala nako maamgohi, naghinobra akong paghunahuna nga ang usa ka maayo nga inahan himsog, organisado, ug maanyag—ug nga siya adunay maayo kaayo nga mga kahanas sa pag-bake nga kasinahan sa Relief Society sa iyang ward. Samtang kadto nga mga butang dili ngil-ad, ang pagtuon sa akong patriyarkal nga panalangin mipakita kanako nga ang Ginoo mas nagpakabana nga ako usa ka mabination ug mahigugmaon nga inahan. Alang kanako, kadto nga Kristohanon nga mga kinaiya mao ang mga butang nga gikinahanglan nako nga magmatinud-anon nga magtinguha sa pagpalambo.
Hinumdomi ug Pamalandong atol sa Sakramento
Litrato pinaagi ni Jerry Garns
Ang sakramento mao ang panahon sa paghunahuna mahitungod sa Manluluwas. Kini usab usa ka panahon sa pagpamalandong sa inyong pag-uswag padulong sa pagkahimong sama Kaniya. Samtang maningkamot kamo sa pagdiskobre sa inyong tiunay nga maayo nga mga kinaiya, ang paghandom matag semana sa inyong mga kalamposan, mga kasinatian, ug sosyal nga mga kasinatian makatabang kaninyo nga makakita sa piho nga mga higayon diin ang inyong mga gasa napakita.
Si Presidente Henry B. Eyring, Ikaduhang Magtatambag sa Unang Kapangulohan, miingon: “Sa pagsusi ninyo sa inyong kinabuhi atol sa ordinansa sa sakrament[o], unta ang inyong mga hunahuna makasentro dili lamang sa mga butang nga nasayop ninyo pagbuhat apan sa mga butang usab nga nabuhat ninyo sa sakto—mga gutlo sa dihang gibati ninyo nga ang Langitnong Amahan ug ang Manluluwas nahimuot kaninyo. Mahimo man gani nga mogahin kamo og panahon atol sa sakrament[o] nga mohangyo sa Dios sa pagtabang kaninyo nga makakita niining mga butanga.”4
Ania ang pipila ka pangutana nga mahimo ninyong ipangutana sa inyong kaugalingon o sa Dios atol sa sakramento:
-
Sa unsang paagi ako misunod sa ehemplo ni Jesukristo niini nga semana?
-
Kinsa ang akong giserbisyohan?
-
Kanus-a man nako nabati ang Espiritu karong semanaha? Ngano man?
-
Unsa ang usa ka Kristohanon nga kinaiya nga gipaningkamotan nako og palambo? Unsa ako ka malamposon niini?
-
Aduna bay bisan unsa nga butang sa akong kinabuhi nga kinahanglan kong mag-ampo alang sa tabang?
-
Aduna ba akoy gikinahanglan nga pasayloon?
-
Unsa ang usa ka problema, dako o gamay, nga gitabangan ko sa Langitnong Amahan ug ni Jesukristo niining semanaha?
Ang pagpamalandong sa kaayo sa Dios ug sa pagtimbang-timbang sa akong kinabuhi atol sa sakramento imbes nga magtutok lamang sa mga kapakyasan ug mga kasaypanan makatabang kanako nga mosalig Kaniya.
Palamboa ang Inyong Calling
Gihatagan kita sa atong mga calling alang sa usa ka rason, bisan kon kita sa kinaunahan wala pa masayod sa rason.
Kaniadto gitawag ako sa kapangulohan sa Relief Society sa akong young single adult ward. Mahinamon ako nga magsugod sa pagbuhat sa akong calling. Apan human sa pipila ka bulan, mibati ako nga nawad-an og kadasig. Wala ko makakita og bisan unsang espirituhanon nga paglambo niadtong akong gipaningkamotan sa pagpangalagad. Ang akong mga paningkamot sa pagbisita ug pakighigala ingon og napakyas.
Usa ka Dominggo, gibati nako nga daw nawad-an ko sa espirituhanong mga gasa nga makatabang sa usa ka tawo nga mahimong maayo sa pagpangalagad. Ang akong pag-ampo atol sa sakramento nianang adlawa mao ang mobati sa kasegurohan nga ako makahimo sa akong calling. Mibati ko nga naaghat nga mangayo og panalangin sa pagkapari.
Nakigkita ko sa akong bishop, ug samtang siya mipandong sa iyang mga kamot sa akong ulo, usa sa unang mga butang nga siya miingon ngari kanako mao, “Ang Langitnong Amahan nakadayeg sa kamabination nga gipakita nimo ngadto sa uban.”
Kalit nakong nabati ang Espiritu nga kusog kaayo, ug gibati nako ang kasegurohan nga ang Ginoo nahimuot sa akong mga paningkamot. Gibati nako nga ako gayod adunay usa ka bahin sa mga gasa nga gikinahanglan aron mangalagad sa mahigugmaon nga paagi. Ako nagasukod lamang sa akong mga kapakyasan kay sa akong mga kalamposan.
Ang inyong mga calling talagsaon nga mga oportunidad sa pagpangita ug paggamit sa inyong espirituhanong mga gasa.
Makasugod Kamo Karon
Dili kita kinahanglan nga maghulat aron magsugod sa pagkaplag sa kaayo nga anaa sa atong kaugalingon.
Si Presidente Dieter F. Uchtdorf, kaniadto Ikaduhang Magtatambag sa Unang Kapangulohan, miingon:
“Usahay kita mawad-an og kadasig tungod kay kita dili ‘mas maayo’ sa usa ka butang—mas espirituhanon, tinah[o]d, maalamon, himsog, adunahan, mahigalaon, o makahimo. …
“Akong nakat-[o]nan sa akong kinabuhi nga kita dili kinahanglan nga ‘mas maayo’ sa bisan unsang butang aron makasugod nga mahimong tawo nga tuyo sa Dios nga kita mamahimo.”5
Makasugod kita sa usa ka pag-ampo. Sultihi ang Langitnong Amahan kon unsay inyong gibati karon, ug unsay gusto ninyo nga bation sa inyong kaugalingon. Sa piho nga paagi pangayo alang sa gasa sa pag-ila aron sa pagtabang kaninyo nga makakita sa inyong tiunay nga pagkamaayo. Pipila sa labing tam-is nga mga gutlo sa akong kinabuhi miabot gikan niini nga mga pag-ampo. Nagtuo ako nga ang Langitnong Amahan matinguhaon sa pagtabang kanato nga makasabot sa mga butang sa paagi nga Siya nakasabot niini.
Tungod sa atong pagkatawo isip mga anak sa Dios, kita gitagana alang sa kahalangdon (tan-awa sa Doktrina ug mga Pakigsaad 78:17). Pinaagi sa gasa sa pag-ila, kita mahimong masayod niana sa atong kaugalingon.