Alang sa mga Ginikanan
Pagtudlo mahitungod sa Pagtuman sa mga Pakigsaad ug sa Pagtukod sa Zion
litrato pinaagi ni Alexandre Borges
Minahal nga mga Ginikanan,
Niini nga isyu, kami naglaom nga kamo malingaw sa mga artikulo kabahin sa pagtuman sa mga pakigsaad, pagtukod sa Zion, pag-ila sa mga taktika ni Satanas, ug dugang pa. Kini nga pahina adunay mga ideya alang sa paggamit niini nga isyu aron sa pagtabang kaninyo og tudlo niini nga mga hilisgotan ngadto sa inyong pamilya.
Mga Panaghisgotan sa Ebanghelyo
Mga Pakigsaad ug mga Panalangin
Unsa ang mga pakigsaad, ug unsa ang gipasabot sa paghimo og pakigsaad? Sa iyang artikulo sa pahina 30, si Elder Randy D. Funk sa Seventy motubag niini nga mga pangutana. Gamita kini nga artikulo sa pagtabang kaninyo og hisgot sa mosunod nga mga pangutana uban sa inyong pamilya: Unsa nga mga pakigsaad ang inyo nang nahimo, ug hain ang inyong gipangandaman sa paghimo? Sa unsang paagi kita mas maayong makatuman sa atong mga pakigsaad? Unsa nga mga panalangin ang inyong nadawat gumikan sa paghimo og mga pakigsaad?
Pagtukod sa Zion
Pangutan-a ang inyong mga anak kon unsa sa ilang hunahuna ang gipasabot sa Zion. Dayon gamita ang artikulo ni Elder Gerrit W. Gong nga “Pagpadayag sa Zion” sa pahina 6 aron sa pagtabang kanila nga makakat-on og dugang mahitungod kon unsay gipasabot sa Zion kaniadto ug karon. Hunahunaa ang paghisgot og mga paagi nga ang inyong pamilya makatabang sa pagtukod sa Zion sulod sa inyong panimalay ug sa inyong komunidad.
Pagpanalipod batok ni Satanas
Tinoa ang pipila ka mahinungdanong mga punto ug mga kinutlo gikan sa “Masayod sa mga Taktika sa Atong Kaaway” sa pahina 20 ug hisgoti sa inyong pamilya ang pipila ka paagi nga si Satanas mahimong motintal kanila. Hisgoti ang pipila ka paagi nga kamo magtinabangay sa paglig-on sa usag usa batok niini nga mga tintasyon.
Mga Tabang sa Pagtuon sa Dali, Sunod Kanako
Tan-awa sa pahina 26 alang sa mga artikulo sa nagkalain-laing mga hilisgotan diha sa Dali, Sunod Kanako aron sa pagsuporta sa inyong pagtuon sa Doktrina ug mga Pakigsaad niini nga bulan.
Kalingawan sa Pamilya sa Dali, Sunod Kanako
Mga Panalangin gikan sa Templo
Ang Kirtland Temple gipahinungod niadtong Marso 27, 1836. Daghang espirituhanon nga mga kasinatian ang narekord gikan niini nga panghitabo.
-
Basaha ang pipila sa mga istorya gikan sa seksiyon nga “Mga Tingog sa Pagpahiuli” sa kataposan sa Septyembre 27–Oktubre 3 nga leksiyon sa manwal sa Dali, Sunod Kanako.
-
Ang gagmayng mga bata mahimong magdrowing og hulagway sa Kirtland Temple.
-
Hisgoti kon unsa kaha ang bation nga moapil sa pagpahinungod sa Kirtland Temple. Unsa nga mga detalye gikan sa mga istorya ang labing mahinungdanon kaninyo?
-
Kantaha ang “Ang Espiritu sa Dios” (Mga Himno, nu. 2), nga gisulat alang niini nga pagpahinungod sa templo.
Panaghisgotan: Nganong importante man ang mga templo kaninyo? Pagpaambit og espirituhanong mga kasinatian nga imong nasinati tungod sa mga templo.
Sirkulo sa Pagpasalamat
Doktrina ug mga Pakigsaad 98:1
“Sa pagkatinuod Ako moingon nganha kaninyo akong mga higala, ayaw kahadlok, himoa nga mahupay ang inyong mga kasingkasing; oo, maglipay hangt[o]d sa hangt[o]d, ug sa matag butang maghatag og mga pagpasalamat” (Doktrina ug mga Pakigsaad 98:1).
-
Barog nga magliyok ug guniti ang mga kamot sa mga sakop sa pamilya sa inyong tupad.
-
Magsugod ang usa ka tawo pinaagi sa pagsulti og usa ka butang nga siya mapasalamaton, dayon kumoton ang kamot sa tawo sa tuo o wala.
-
Dayon kana nga tawo mopaambit og butang nga pasalamatan ug mokumot og usa ka kamot, nga modapit niana nga tawo sa pagpaambit og butang nga pasalamatan.
-
Tan-awa kon unsa ka dugay magpadayon ang sirkulo sa pagpasalamat.
Panaghisgotan: Sa unsang paagi nga ang pagpahayag og pasalamat ingon og makadugang niini? Sa unsang paagi nga ang pagpasalamat makapahupay? Sa unsang paagi kini “[mo]himo nga mahupay ang inyong mga kasingkasing”?