Tabang gikan sa Pikas Habig sa Tabil
Samtang naghigda ko sa kasakit diha sa ospital, mibati ko nga nag-inusara hangtod nakahinumdom ko sa akong minahal nga katigulangan.
Litrato gikan sa Getty Images
Niadtong 2017, namabdos ko sa among unang anak. Ang akong bana, si Lucas, ug ako naghinam-hinam na apan nahadlok alang sa pag-abot sa bata nga si Juan Lionel.
Usa ka lawom na nga gabii diha sa sinugdanan sa Pebrero 2018, misugod na og busog akong tiyan. Walo pa lang ka bulan ko nga nagmabdos, apan ingon og ang bata mogawas og sayo kay sa gilaoman. Nagdala kami og pipila lang ka mga butang ug nagdali sa pagbiya sa pag-adto sa klinika. Sa akong pamati dili pa ako andam nga manganak, apan nag-ampo ko, naghangyo sa Dios nga ang Iyang kabubut-on ang matuman bisan pa sa among kahadlok.
Sa dihang miabot na kami sa klinika, gipahibalo ang akong gynecologist apan miingon nga maulahi siya sa pag-abot. Ang akong bana mitawag og mitext og mga mensahe ngadto sa among mga ginikanan ug mga igsoon, apan walay usa kanila nga nagmata. Mipadayon siya sa pagtawag ug pag-text sa tibuok gabii, apan walay mitubag. Kana nakapabati nako nga nag-inusara kaayo.
Samtang ang kasakit sa akong pag-bati migrabe, mas mibati pa gyod ko nga nag-inusara. Sa kalit lang, hinoon, usa ka maanindot nga butang ang nahitabo. Misugod ko sa paghunahuna sa akong mga katigulangan—ilabi na sa akong lola, si Rosa Mercado, ug sa iyang inahan, si Javiera Balmaceda.
Samtang mihinumdom ko kanila, nabati nako sa akong kasingkasing ug hunahuna nga sila nag-uban kanako nianang higayona. Nabati nako ang ilang presensya sa ingon ka kusog ug matam-is nga paagi nga dili nako hingpit nga mapahayag sa mga pulong unsa ang akong nasinati. Wala nako sila nakita, apan nabati nako nga sila anaa ra sa duol, naghatag kanako og kaisog, suporta, ug gugma isip akong mga inahan ug isip kabahin sa akong pamilya. Akong gibati nga sila mga anghel nga nangalagad ngari kanako sa akong panahon sa panginahanglan.
Kadtong mga nahaunang tuig diha sa templo, ang akong inahan, amahan, mga igsoon, bana ug ako mihimo sa puli [vicarious] nga buhat ug sa puli nga buhat sa ubang mga katigulangan. Nabati nako nga ang kaisog nga akong nadawat ug ang pagbati nga ang akong mga katigulangan anaa sa duol usa ka gasa pinaagi sa gahom ug awtoridad sa Dios.
Sukad niadto, akong gibati ang espiritu sa akong mga katigulangan sa ubang mga okasyon, nga nagtabang kanako ug naggiya kanako isip usa ka inahan ug asawa ug sa ubang importanting aspeto sa akong kinabuhi.
Ako mopamatuod nga ang Dios dili gayod mobiya nato sa dalan sa atong mga kinabuhi. Kon kita mobuhat sa Iyang buhat, mahatagan kita sa tabang gikan sa pikas habig sa tabil. Makadawat kita og gugma, kahibalo, kalig-on, ug ang kalinaw “nga lapaw sa tanang pagsab[o]t” (Mga Taga-filipos 4:7).