Kahayag sa Pagpanalipod Kanamo
Ang drayber wala gayod migawas sa iyang trak, apan nasayod ako nga siya miabot aron sa pagpanalipod kanamo.
Ibabaw: litrato gikan sa Getty Images; tunga: litrato pinaagi sa maayong kabubut-on sa tagsulat
Sa usa ka tingtugnaw nga gabii sa Pebrero, ang akong duha ka anak nga lalaki ug ako, uban sa akong inahan, si Jo Ann, nagbiyahe paingon sa Idaho. Ang among walo ka oras nga biyahe naglakip sa pagdrayb latas sa duha ka dalan sa bukid. Atol niining panahon sa tuig, mahimong grabe kaayo ang panahon.
Bag-o lang kaming mibiya sa Siyudad sa Baker, Oregon, sa dihang misugod sa pag-ulan og niyebe. Samtang nagbiyahe kami, nagkakusog ang pag-ulan og niyebe. Sulod sa pipila ka minutos, samtang miagi kami latas sa usa ka dalan sa bukid, dili na ako makakita og bisan unsa sa akong atubangan, mao nga mipadaplin ako ug mihunong. Nag-ampo ako sa Langitnong Amahan sa pagtabang kanako nga madala nako ang akong pamilya ngadto sa usa ka luwas nga dapit. Human ako nag-ampo, usa ka semitruck ang mihunong sa among luyo pipila lang ka pulgada gikan sa akong bumper.
Ang drayber wala gayod migawas sa iyang trak, ug wala gayod ako nakakita sa iyang nawong. Apan ako nasayod nianang higayona nga siya miabot aron sa pagpanalipod kanamo. Pinaagi sa paghunong sa among luyo, gigamit niya ang mga suga sa iyang trak aron sa pag-alerto sa ubang mga drayber nga kami mipadaplin ug mihunong. Sa dihang sa kataposan nga nakabaton ako og kaisog sa pagpadayon sa pagdrayb, mibalik kami sa dalan nga nagpaluyo sa lain nga semitruck samtang ang unang semitruck nagsunod sa among luyo. Nagdrayb kami taliwala sa duha ka trak samtang gigiyahan nila kami nga makalingkawas sa peligro.
Samtang mibiya kami sa dalan sa bukid, ang niyebe nahimong ulan. Gusto kong magpasalamat sa drayber sa among luyo, apan sa dihang migawas na kami sa dalan sa bukid, wala na ako makakita kaniya. Nianang higayona, nasayod ako nga kami mahimong OK ra ug makauli nga luwas ug walay kadaot, nga nahitabo gayod kanamo.
Wala pa gayod ako hilabihang nahadlok sukad sa akong kinabuhi. Mapasalamaton ako nga ang Langitnong Amahan mipadala og magbalantay nga mga anghel aron sa pagpanalipod kanamo, paghupay sa among mga kabalaka, ug paghatag kanako og kalig-on ug kaisog nga akong gikinahanglan aron madala ang akong pamilya sa panimalay.
“Wala pa gayod ako hilabihang nahadlok sukad sa akong kinabuhi,” miingon si Chelsey, nga gilitratohan uban sa iyang inahan, si Jo Ann Bressler, ug sa iyang mga anak nga lalaki, sila si Wyatt ug si Adam.
Ibabaw: litrato gikan sa Getty Images; tunga: litrato pinaagi sa maayong kabubut-on sa tagsulat
Unsa ka baliktad, ako anak nga babaye sa usa ka drayber sa trak. Ang Langitnong Amahan mitubag sa akong pag-ampo pinaagi sa pagpadala kanamo og mga tigpanalipod nga mga drayber sa trak. Ang akong pagpamatuod milambo gayod pag-ayo nianang gabhiona—dili lamang sa pag-ampo apan usab nga Siya nagauban kanato kanunay ug sa kahangtoran.