Nahaunang Kababayen-an sa Pagpahiuli
Si Caroline Andam nga Mopakigbahin
Unsa kadako sa salapi ang andam ihatag ni Caroline Tippets aron sa pagtabang og palit og yuta sa Zion?
Paghulagway pinaagi ni Toni Oka
Si Caroline Tippets ug ang iyang pamilya mitrabaho og maayo, sa pisikal ug espiritwal nga paagi. Ang mga igsoon nga lalaki ni Caroline mitrabaho sa mga bansohan [sawmills], nga nagtabang og porma sa mga kahoy nga abunda sa estado sa New York, USA, diin sila nagpuyo. Ang ilang pamilya mipasakop sa Simbahan niadtong 1832. Karon usa sa iyang mga igsoon nga lalaki, si Alvah, nangulo sa branch sa mga Santos sa ilang dapit.
Niadtong 1834, si Alvah misulti kanila mahitungod sa usa ka pagpadayag nga gihatag sa Ginoo ngadto ni Propeta Joseph Smith nga naghangyo sa mga miyembro nga mohatag o magpahulam og kwarta aron sa pagtabang og “tukod sa Zion” (Doktrina ug mga Pakigsaad 101:74). Nasayod nga ang Simbahan nagkinahanglan nga mopalit og yuta diin ang mga Santos magkapundok, si Caroline, edad 21, miuyon nga mohatag og $150 sa kwarta ug $107 sa kabtangan, nga mas labaw pa kay sa gihatag sa bisan kinsa sa branch.1
Si Caroline, iyang manghod nga lalaki, si Joseph, ug usa sa ilang mga ig-agaw mihunong sa Kirtland, Ohio, sa ilang pagpadulong ngadto sa Missouri. Nakighimamat sila kang Joseph Smith ug sa high council sa Kirtland. Ang Simbahan niining higayona daghan kaayo og utang, ug ang high council nangutana kon si Caroline andam ba nga magpahulam sa Simbahan og gamay sa iyang kwarta. Sama sa gipahayag sa mubo nga mga sulat sa miting, “Kini natino sa konseho [nga] si Sister Caroline Tippets naghupot og $149.75 nga kwarta. … Mao nga gipatawag siya ngadto sa konseho ug mipadayag og kaandam sa pagpahulam sa ingon.”2
Nakita ni Caroline ang kasabotan sa pagpahulam nga gipirmahan ni Joseph Smith, Oliver Cowdery, ug Frederick Williams. Apan siya tingali wala makakita ni Joseph ug Oliver nga nagluhod sa pag-ampo pagkasunod nga adlaw, nga naghatag og “pasalamat alang sa kahupayan nga bag- ohay lang nga gipadala sa Ginoo.”3 Salamat sa kaandam ni Caroline sa pagpakigbahin sa iyang mga kapanguhaan, ang Simbahan nakabayad sa ubang utang ug nakapadayon sa pagtukod sa Kirtland Temple.