Si Jesukristo Nasayod sa Kasakit nga Atong Gibati gumikan sa Dili Makiangayon nga Paghukom
Ang tagsulat nagpuyo sa Gauteng Province, South Africa.
Ang akong tinguha mao nga makakita sa tawo sama sa pagkakita sa Manluluwas kanila.
Didto sa open house sa Templo sa Rome Italy, ang mga miyembro ug mga higala naglibot sa Christus nga estatuwa, sama sa nakita sa bintana sa visitors’ center.
Ako nakasinati og dili makiangayon nga paghukom o diskriminasyon sa usa ka matang o lain sa hapit 20 ka tuig.
Human mipasakop sa Simbahan sa Mozambique, mibalhin ko sa South Africa. Usa kini ka nindot nga nasod, usa sa labing mauswagon sa Africa. Ang iyang katahom gipanindot pa sa panaglahi-lahi sa mga katawhan niini ug kabuhong sa kultura.
Ang South Africa mao ang usa ka nasod nga nagpaayo pa gikan sa kasaysayan nga natabonan sa paglain-lain sa kaliwat. Bisan og ang apartheid [polisiya o sistema sa paglain-lain o diskriminasyon sa Africa tungod sa kaliwat] pormal nga giwagtang niadtong 1994, ang mga uwat sa nangagi nga patakaran sa diskriminasyon sa kaliwat nga giimplementar sa gobyerno nagpabilin gihapon.
Isip usa ka Itom nga babayeng Mozambican nga Santos sa Ulahing mga Adlaw nga nagpuyo sa South Africa sa nangagi nga 18 ka tuig, ako mainampingon nga milihok taliwala sa diskriminasyon ug pagsalikway nga sa kasagaran gipakita isip wala tuyoa nga diskriminasyon. Ang diskriminasyon sa kaliwat, sa kahimtang, sa tribo, sa sekso, ug ang paghukom batok sa mga tawo nga gikan sa laing nasod mao ang pipila ka ehemplo sa mga sakit sa paglain-lain nga giatubang gihapon sa katilingban. Adunay usa ka butang sulod sa kinaiyanhon nga tawo nga daw gusto nga mobahin sa katilingban ug mipatuo kanato nga ang pagkalahi dili maayo.
Ang Among Gipaningkamotan nga Buhaton
Ang mga miyembro ba sa Simbahan mahimong dali nga madala niining paagi sa panghunahuna? Sigurado. Kitang tanan kinahanglan nga mosalikway sa kinaiyanhon nga tawo sa atong tibuok kinabuhi nga paningkamot nga mahimong mga santos pinaagi sa Pag-ula ni Kristo (tan-awa sa Mosiah 3:19).
Sa matag higayon nga ang akong mga anak ug ako mobati nga nag-inusara, napasagdan, giparehas sa uban, o giisip nga kadudahan, mopauli kami ug maghisgot niini. Kami moingon, “Unsay bag-o lang nahitabo? Ato kining tukion. Atong hisgotan nganong ang kinaiya nga gipakita sa katawhan ingon niini.” Ang paghisgot mahitungod niini nakatabang sa pagpugong sa among mga pagbati nga magkagrabe sa sulod kanamo.
Ako naningkamot sa pagtudlo sa akong mga anak nga ang atong kabantogan madeterminar kon giunsa nato pagtratar ang mga tawo nga ubos og bili o gisalikway sa katilingban (tan-awa sa Mateo 25: 40). Nagpasabot kana sa pagpangita og mga paagi sa pagtabang sa uban aron nga kita wala magsalikway kanila.
Maninguha Kong Mahimong Mahisama Kang Jesus
Bisan kon sakit ang pipila sa mga kasinatian, ang mga leksyon nga among nakat-onan naghimo sa akong mga anak nga mas maayong mga tawo. Ug ako usab. Ang among mga kapakyasan nakatabang kanamo nga mopalambo og kapuangod ug kaluoy alang sa uban.
Ang mga kasinatian sa dili makiangayon nga paghukom nakahatag kanako og oportunidad sa pagpili. Mobati ba ko og kayugot ug manimalos, o mohatag ba ko niana nga tawo og dili lamang laing kahigayonan apan ikaduha, ikatulo, ug ikaupat nga kahigayonan? Makita ba nako ang katilingban isip usa ka makuyaw nga dapit, o ako ba mahimong pwersa alang sa positibo nga kausaban?
Ang Manluluwas usab nag-atubang og dili makiangayon nga paghukom tungod kon si kinsa Siya, unsay Iyang gituohan, ug diin Siya gikan (tan-awa sa Juan 1:46). Apan wala Siya motubag uban sa kabangis, kasuko, kayugot, o kasilag. Siya nagtudlo batok sa tanan niini nga mga butang ug milihok inubanan sa gugma ug kamatuoran. Siya mitudlo nga ang gahom ug impluwensya moabot pinaagi sa pagdani, pagkamainant[o]son, kalumo, kaagh[o]p, ug paghigugma (tan-awa sa Doktrina ug mga Pakigsaad 121: 41). Siya mitudlo nga kon kita masilo, kita moadto sa atong igsoon ug mag-istoryahanay niini (tan-awa sa Mateo 18:15). Siya mitudlo kanato nga mag-ampo alang sa mga tawo nga milutos kanato (tan-awa sa Mateo 5:38–48). Ug sa dihang Siya dili makiangayon nga gitaral ug gibitay sa krus aron mamatay, Siya nagtudlo kanato sa pagpasaylo (tan-awa sa Lucas 23:34).
Sa kataposan, ang Iyang gugma mao ang makapausab kanato ug sa kalibotan (tan-awa sa 2 Nephi 26: 24).
Ug Padayon Ko nga Maningkamot
Ako dili hingpit nga tawo; dili ako kanunay nga mopasaylo sa diha-diha dayon human ang usa ka tawo moinsulto kanako. Nagkinahanglan og panahon, nagkinahanglan og pagkaayo, ug nagkinahanglan sa Espiritu Santo nga molihok uban kanako. Usahay ako mopili nga masilo, ug ako dili diha-diha dayon modawat sa Iyang mga pag-aghat. Apan kon ako modawat Kaniya, ang Espiritu mapailobon nga nakigtambayayong uban kanako hangtod nga ako makasabot kon unsa ang gusto sa Langitnong Amahan nga ipabuhat kanako sa sitwasyon.
Ang akong tinguha mao ang tinud-anay nga makakita sa tawo sama sa pagkakita sa Manluluwas kanila. Sa pagbuhat niana, kita kinahanglan nga andam sa pag-ila nga wala kanato ang tanang tubag. Kon kita andam sa pag-ingon, “Dili ko perpekto; ako adunay daghan pang angay nga makat-onan. Unsay akong makat-onan gikan sa mga panglantaw sa uban?” —niana nga kita makahimo gayod sa pagpaminaw. Niana nga kita tinuoray gayod nga makakita.
Samtang ako moagi niini nga panaw, makatabang ang paghinumdom nga ako ania alang sa usa ka katuyoan, nga ang mga pagsulay sa kinabuhi temporaryo—usa ka kinahanglanon nga bahin sa mortalidad—ug nga wala ako mag-inusara. Pinaagi niining tanan, naningkamot ko nga mahisama ni Jesus! Ang pagpaningkamot aktibo, ug kon kita mapakyas, kita makapaningkamot pag-usab.