Unsaon Nako sa Pagtabang nga Mabuntog ang Pagkamahukmanon?

Ania ang unom ka paagi nga kita makabiya sa pagkamahukmanon ug mopasiugda og pagtahod.

Imahe

women sitting in circle enjoying sharing stories in group meeting

Unsay Akong Mabuhat aron Mabuntog ang Pagkamahukmanon?

1. Unaha pagtan-aw sa sulod. Makapasalig kita sa pag-ila sulod sa atong kaugalingon ug sa pagbiya sa bisan unsa “nga mga kinaiya ug mga buhat sa diskriminasyon.”¹

Si Presidente Russell M. Nelson miingon, “Bisan kinsa kanato nga adunay diskriminasyon sa laing kaliwat nagkinahanglan sa paghinulsol!”²

2. Paningkamot nga makasabot. Paggahin og panahon sa pagpaminaw niadtong kinsa nakasinati og dili makiangayon nga paghukom. Kini mahimong maglakip sa kasaligan nga mga libro, mga salida, ug mga balita mahitungod sa hilisgotan.³

Si Darius Gray, usa ka ilado nga African American nga sakop ug lider sa Simbahan, mikomentaryo, “Kon kita naningkamot sa tinuod nga pagpaminaw gikan niadtong atong gikonsiderar nga ‘ang nalahi,’ ug kon ang matinuoron nato nga gitutokan mao nga sila mopaambit sa ilang mga kinabuhi, ilang mga kasaysayan, ilang mga pamilya, ilang mga paglaom, ug ilang mga kasakit, dili lamang kita makabaton og mas dakong pagsabot, apan kini nga praktis moadto og layo padulong sa pagkaayo sa mga samad sa diskriminasyon.”⁴

3. Sulti. Kon kamo makadungog og usa ka tawo nga mopakigbahin og sayop o negatibo nga mga ideya mahitungod sa kaliwat, sulti sa mabination apan klaro nga paagi.

Si Presidente Dallin H. Oaks, Unang Magtatambag sa Unang Kapangulohan, miingon, “Isip mga miyembro sa Ang Simbahan ni Jesukristo sa mga Santos sa Ulahing mga Adlaw, angay natong buhaton ang mas maayo aron sa pagtabang sa pag-ibot sa mga gamot sa diskriminasyon.”⁵

Si Elder Gerrit W. Gong sa Korum sa Napulog Duha Ka Apostoles mitudlo, “Kita gidapit sa pag-usab sa kalib[o]tan alang sa mas maayo, gikan sa sulod padulong sa gawas, usa ka tawo, usa ka pamilya, usa ka dapit sa usa ka higayon.’’⁶

Unsay Akong Buhaton Kon Ako Makasinati og Diskriminasyon?

Imahe

man in wheelchair communicates cheerfully with employees at the office

1. Mopasaylo, ug makaangkon og usa ka higala. Kon kita masakitan sa mga lihok sa uban, kita makatudlo ug makapasaylo ug magtinguha sa pagmugna og usa ka relasyon.

Samtang nagserbisyo isip Area Seventy, si Elder Fred A. ‘Tony’ Parker miingon:“Sa dihang nahimo kong usa ka biktima sa diskriminasyon, ako nakakita og kalamposan sa pag-atubang niini sa direkta nga paagi, pagpasaylo sa indibidwal ug pagtubag sa isyu. Kon ang usa ka tawo nagsulti og butang nga nakapasakit kanako, kinahanglan kong makakita og paagi sa pagtabang kaniya nga makasabot ngano nga sakit kana. Usa kini ka oportunidad dili lamang sa pagpasaylo apan sa pagmugna og usa ka relasyon nga ang tawo dili lamang motan-aw ni Tony Parker isip usa ka African-American apan isip usa ka anak sa Dios. Si Jesus mitudlo sa pagpasaylo (tan-awa sa Mateo 18:21–35), ug Siya mitudlo kanato nga kon kita nasilo makig-atubang kita ngadto sa indibidwal ug sulbaron kini (tan-awa sa Mateo 18:15).”⁷

2. Pagkat-on og makatabang nga mga leksiyon gikan sa sakit kaayo nga mga kasinatian (tan-awa sa Doktrina ug mga Pakigsaad 122:7).

Si Reverend Amos C. Brown naghisgot og istorya mahitungod ni Howard Washington Thurman. Si Howard nagpuyo tupad sa usa ka babaye nga mipasipala sa iyang pamilya tungod kay sila Itom—gani naglabay og iti gikan sa iyang mga tangkal sa manok ngadto sa nataran sa mga Thurman.

Sa dihang nasakit ang babaye, ang inahan ni Howard midala kaniya og sabaw ug mga rosas. Uban sa pasalamat, nangutana ang babaye diin magagikan ang mga bulak. Si Mrs. Thurman mipasabot, “Samtang naglabay ka sa iti sa manok, ang Dios nag-andam sa yuta.”

“Mao kana ang kinahanglan natong buhaton sa taliwala sa daotan,” miingon si Reverend Brown. “Kuhaa ang iti apan pagbaton og hugot nga pagtuo diha sa Dios sa paggamit niini aron makapatubo og tanaman sa mga rosas.”⁸

3. Duol ngadto ni Kristo alang sa pagkaayo ug giya. Ang pagsalig sa imong kasakit ngadto sa Manluluwas ug ang pagsunod Kaniya makahatag og kalinaw.

Si Elder D. Todd Christofferson sa Korum sa Napulog Duha Ka Apostoles mitudlo nga agig dugang sa pagtubos kanato gikan sa sala pinaagi sa pagtagbaw sa gipangayo sa kaangayan ngari kanato, si Jesukristo “nagbayad usab sa utang nga nautang sa kaangayan nato pinaagi sa pag-ayo ug pagbayad nato sa bisan unsa nga pag-antos nga inosente natong gilahutay.”⁹

Ang Manluluwas naghatag sa hingpit nga ehemplo nga aron atong sundon. Siya mitudlo kanato kon unsay buhaton kon masilo (tan-awa sa Mateo 18:15), gilutos (tan-awa sa Mateo 5:38–48), ug gani dili makiangayon nga gihukman og kamatayon (tan-awa sa Lucas 23:34).

Pagdiskobre pa og Dugang

Pagkat-on pa og dugang mahitungod sa unsay gitudlo sa ebanghelyo ni Jesukristo mahitungod sa pagbuntog sa pagkamahukmanon:

Pagkat-on unsa ang gitudlo sa mga propeta sa Ginoo niini nga hilisgotan. Basaha ang sinugdanan sa Hilisgotan sa Ebanghelyo nga “Kaliwatan ug Bahin sa Kultura nga Pagkamahukmanon [Racial and Cultural Prejudice]” sa ChurchofJesusChrist.org.
Pagkat-on gikan sa mga lider sa Simbahan kon sa unsang paagi kita makakaplag og panaghiusa diha sa panaglahi. Basaha ang “Makahimo Kita og mas Maayo: Pag-abiabi sa Uban ngadto sa Panon,” Liahona, Sept. 2017, 22–27.
Tan-awa ang mga kinutlo ug mga video gikan sa usa ka panaghisgot tali ni Elder Jack N. Gerard sa Seventy ug ni Reverend Amos C. Brown sa Third Baptist Church sa San Francisco. Adto sa digital nga bersyon sa Septyembre 2021 nga Liahona sa liahona.ChurchofJesusChrist.org o diha sa Gospel Library nga app.