Digital Lamang
Pagkakaplag nga Nahisakop diha ni Kristo
Ang tagsulat nagpuyo sa Kanagawa Prefecture, Japan.
Samtang ang mga kalisod sa dili-makiangayong pagtagad kabahin sa mga hagit sa akong anak nga mga lalaki nawagtang, ang akong pamilya nakakaplag og usa ka pagbati nga nahisakop—ug ang dakong kalipay nga nagagikan sa ebanghelyo ni Jesukristo.
Kasagaran kitang makadungog nga ang gugma makaayo sa tanang mga samad, apan wala ako masayod kon unsa kini ka tinuod hangtod nga akong gisinati kini.
Sulod sa mga katuigan, ang akong pamilya nanlimbasog sa pagpangita og usa ka dapit nga mahisakop. Ang akong duha ka batang lalaki nahiling nga may kalisod sa sosyal nga pakig-uban ug may pagbati nga nakulangan sa pagtagad nga sobra kaayo ang pagkalihokan sa batan-ong edad, ug tungod sa ilang dili kapugngan ug kasagarang makasamok nga pamatasan, daghang mga tawo ang walay pagsabot sa ilang sitwasyon. Sa akong nasod nga natawhan sa Japan, 98 porsyento sa populasyon Hapon. Bisan asa nga dapit nga adunay gamay nga pagkalain-lain, mahimong malisod kini alang sa katilingban ang pagdawat niadtong kinsa bisan og gamay kaayo ang pagkalahi.
Kaniadto nga ang akong mga anak gagmay pa, naningkamot ako sa pagpalista kanila sa preschool. Misugod ako sa paghangyo sa mga eskwelahan diha sa lugar, apan sa matag hangyo, ako gisugat sa samang malisod nga tubag: diha dayon nga ang mga magtutudlo nakahimamat sa akong mga anak ug nahibaloan ang mahitungod sa ilang kahimtang, gipahibalo kami nga ang eskwelahan puno na. Sa kadugayan usa ka gamay nga gipadagan nga preschool sa duol nga lungsod miabi-abi kanamo, apan kini human lamang nga gibalibaran kami sa matag preschool sa among siyudad.
Kini dili katuohan ang kasakit.
Ang pagsakay og publikong de-pasaherong sakyanan mas dili sayon. Usahay, kon akong kasab-an ang batang mga lalaki tungod sa paghimo og daghang langas diha sa tren, sila magpabadlong, hinungdan sa mga estranghero sa pagsulti kanako nga ako walay kalooy. Sa ubang mga higayon, pugnan ko ang akong kaugalingon gikan sa pagpahilom sa batang mga lalaki tungod sa kahadlok kon unsaon kaha nila ang pagsumbalik, nga nasultihan na hinoon sa ubang mga pasahero nga ako dili mabinantayon.
Gani adunay mga social worker nga namugos kanako nga akong ibutang ang usa sa akong mga anak diha sa usa ka pasilidad (semipermanent facility), nga mobisita lamang og kausa sa matag duha ka tuig, tungod kay sila mituo nga ako dili gayod makahimo sa pagpadako og duha ka anak nga may kalisod sa sosyal nga pakig-uban ug usa ka may nakulangan sa pagtagad nga sobra kaayo ang pagkalihok isip usa ka inahan nga walay bana. Hinoon, ingon nga adunay personal nga kasinatian sa mga kasakit sa usa ka malisod nga pagkabata—ang akong mga ginikanan nagdiborsyo sa dihang ako usa ka masuso ug tungod sa lainlaing mga rason wala makahimo sa pag-atiman kanako—ako determinado sa pagbuhat sa akong labing maayo sa paghatag sa akong anak nga mga lalaki sa tinuod nga gugma nga angay sa matag bata.
Pagapundukon sa Luwas nga Paagi
Pipila ka tuig ang milabay, mitambong ako og usa ka seminar sa pagtrabaho, ug akong namatikdan nga pipila sa mga lider sa seminar mokyugpos sa ilang mga bukton ug moduko sa dili pa mokaon sa paniudto. Kini nga mga tawohana kasagaran mga maayo kaayo, gihunahuna ko sa akong kaugalingon. Nganong ngil-ad sila og buot sa matag higayon nga sila molingkod nga mokaon?
Dali akong nakahibalo nga sila nag-ampo—wala mangluod—ug wala ako makapugong sa pagpangutana pa og dugang mahitungod sa ilang relihiyon. Sila hilabihan ka mabination ug adunay usa ka talagsaon nga espiritu diha kanila, ug nangandoy ako nga mahibalo pa og dugang. Akong nahibaloan nga sila mga miyembro sa Ang Simbahan ni Jesukristo sa mga Santos sa Ulahing mga Adlaw, ug dali kaming midawat sa ilang pagdapit sa pagsimba uban kanila.
Tungod sa iyang kalisod sa sosyal nga pakig-uban, ang akong mas manghod nga anak nga lalaki nahadlok nga maanaa sa dakong pundok ug sa pakighimamat og bag-ong mga tawo, apan ang ward mainitong miabi-abi kanamo ug mihimo sa tanan nga ilang mahimo sa paghatag sa among mga panginahanglan. Ang mga miyembro migahin og espesyal nga kwarto sa luyo sa chapel alang lamang sa akong anak nga lalaki, ug ilang gituman ang among hangyo sa paglikay sa pagtinan-away kaniya sa mata hangtod bation niya ang mas ka komportable. Bisan kon ang usa sa akong mga anak makabalda sa miting sa sakramento, kami gitagad uban sa labing pagtahod ug pagkamabination.
Nakita nako ang akong anak nga mga lalaki nga may nindot nga kausaban diha sa mainitong pagtagad sa ward. Dali silang mihimo og bag-ong mga higala, ug gani ang akong anak nga mga lalaki misugod sa pagtambong sa klase sa Primary sa mga adlaw nga ako dili makahimo sa pagsimba.
Kami wala madugay nabunyagan, usa ka panumduman nga nagdala pa gihapon og mga luha sa akong mga mata. Diha sa tulumanon sa bunyag, ang mga miyembro sa ward—nakasabot sa mga kahadlok sa akong mga anak og pundok sa mga tawo—mikinto ngadto sa luyo sa kwarto human ang batang mga lalaki gipalingkod sa paglikay nga mahadlok sila. Pagkahuman, gitanyagan kami og daghan kaayong tam-is nga mga mensahe sa pahalipay, ug ang gugma diha sa kwarto makalipay pag-ayo nga ang akong anak nga mga lalaki miingon, “Gusto ko nga magpabunyag pag-usab!”
Ako walay lain apan pasalamat diha sa akong kasingkasing kon maghunahuna ako mahitungod sa tinuod nga gugma nga gipakita sa mga miyembro sa among ward—usa ka gugma nga sa katapusan mitugot kanamo nga makakaplag sa kahayag sa ebanghelyo. Ang ward sa hingpit mipakita sa unsay gipasabut sa paghimo sa atong “mga kasingkasing nabugkos diha sa pagkahiusa ug diha sa gugma sa usag usa” (Mosiah 18:21). Ang akong pamilya sa tinuod napanalanginan pinaagi sa pagkamabination niining maabi-abihon nga mga Santos sa Ulahing mga Adlaw.
Pagkakaplag sa Kalinaw ug Pagkanahisakop
Kini karon duha na ka tuig sukad ang akong anak nga mga lalaki ug ako nabunyagan. Ang duha nakong anak nga mga lalaki gi-orden na ngadto sa Aaronic nga Pagkapari, ug akong nakita ang dili katoohan nga kausaban sa ilang mga panglihok.
Mapasalamaton ako alang sa daghang maamumahong mga indibidwal kinsa midawat sa akong pamilya ug kinsa mitabang sa akong anak nga mga lalaki sa pagbuntog sa ilang mga kahadlok pinaagi sa gahum sa gugma. Mapasalamaton ako sa ebanghelyo ni Jesukristo, pinaagi diin bisan ang labing lawom nga mga samad sa dili-makiangayong pagtagad mahimong mamaayo. Ug labaw sa tanan, mapasalamaton ako sa usa ka mahigugmaong Langitnong Amahan, kinsa miandam og paagi alang sa akong pamilya sa pagkaplag og kalinaw ug pagkanahisakop, bisan kon ako dili makakita kon unsa nga dalan kana.
Akong nakat-unan nga samtang kita naghimo og luna alang sa atong mga kalainan, kita naghimo og luna alang sa mas dako nga gugma. Ang matag usa kanato usa ka hinigugma nga anak sa langitnong mga ginikanan, ug samtang kita naghinumdom niini nga kamatuoran, kitang tanan makahimo—walay pagsapayan kon hain kita o kon kinsa kita—mahimong usa diha ni Kristo (tan-awa sa Doktrina ug mga Pakigsaad 38: 27).