Digital Lamang
Nag-atubang og Dili-Makiangayong Pagtagad diha sa Trabahoan
Ang tagsulat nagpuyo sa Zacatecas, Mexico.
Lisud kaayo kini sa dihang gibalibaran ako og trabaho tungod kay ako usa ka miyembro sa Ang Simbahan ni Jesukirsto sa mga Santos sa Ulahing mga Adlaw.
Kaniadtong ako mas batan-on pa, mi-eskwela ako og usa ka pribado nga unibersidad sa akong natawhan nga estado sa Mexico. Kanunay akong magkasinabot og maayo kaayo sa mga magtutudlo ug sa direktor sa unibersidad. Ako usa ka hawod nga estudyante ug nakakuha og maayong mga grado, ug ang direktor ug ako mipadayon sa among pakigkontak human ako makatapos sa akong kurso.
Usa ka adlaw niadtong 2010, nakig-istorya ako sa direktor. Siya miingon kanako nga ang unibersidad nakulangan og pipila ka mga magtutudlo, ug siya mitanyag kanako og trabaho tungod sa akong mga kahanas ug kasinatian.
Kini ingon og usa ka panalangin ngari kanako. Ako walay trabaho niana nga panahon, ug kami naglisud bisan sa pagkaon. Kini usa ka damgo alang kanako nga magtudlo aron ako makabuhi sa akong asawa ug mga anak.
Miingon ako, “O, sige. Kini akong ikalipay.”
Miingon siya, “Maayo kaayo! Ang sunod nga semester magsugod sa 15 ka adlaw. Kami nagkinahanglan kanimo sa pagsulat og mga tubag niini nga mga papeles ug sa pag-anhi sa miting sa pagsinati sa mga kalihokan [orientation] aron ikaw makasugod sa pagtrabaho.”
Wala Damha ug Dili Angay
Sa dihang miadto ako aron sa pagsulat og mga tubag sa papeles, laing magtutudlo nakakita kanako ug nangutana unsay akong ibutang diin kini nangutana mahitungod sa akong relihiyon.
Ako miingon, “Ako usa ka miyembro sa Ang Simbahan ni Jesukristo sa mga Santos sa Ulahing mga Adlaw.”
Siya miingon, “Ako mosugyot nga dili nimo kana isulat. Kon imong buhaton, dili nila dawaton ang imong mga papeles diha-diha dayon.”
Nangutana ako sa akong kaugalingon, Sa unsang paagi nga kini maingon niini? Kini ang ika-kawhaan ug usa nga siglo. Sa unsang paagi nga ang relihiyon usa ka isyu? Gawas pa, akong gibati nga ako kinahanglan nga magmatinuoron, busa ako mao. Akong gihuman ang mga papeles ug gi-email kini. Sa pagkasunod adlaw, akong gipaabut nga makadawat sa impormasyon sa akong iskedyul sa pagtudlo. Walay nahitabo.
Sa adlaw human niana, akong gikontak ang direktor ug nangutana kaniya kabahin niini. Miingon siya, “Kahibalo ka unsa, dili kini mahinayon.”
Nangutana ako, “Ngano, unsay nahitabo?”
Siya miingon kanako, “Ang kurikulom sa imong klase wala makatuman sa akademik nga mga panginahanglan.”
Kini dili masabtan tungod kay siya mao ang tawo kinsa mitanyag kanako sa trabaho una sa tanan. Ang mga tigdumala sa wala madugay misulti kanako sa kamatuoran: Nawala kanako ang trabaho tungod sa akong relihiyon.
Tungod kay walay sinulat nga mga lagda o mga palisiya kalabot sa mga pagtuo o relihiyon sa mga magtutudlo sa unibersidad, ako wala tagda sa patas nga paagi. Kini malisud kaayo alang kanako sa personal nga paagi, apan ilabi na kay ako wala masayod kon sa unsang paagi ako makabuhi sa akong pamilya.
Pagduol ngadto sa Dios alang sa Panabang
Usa sa mga butang nga mitabang kanako mao ang paghunahuna mahitungod kon sa unsang paagi si Nephi nakahimo og barko nga wala masayud kon unsaon sa paghimo niini sa wala pa siya misugod (tan-awa sa 1 Nephi 17:7–55; 18:1–4). Nasayud nga ang Dios makagiya kanako ug makahatag sa mga butang nga gikinahanglan sa akong pamilya mitabang kanako sa paglahutay niining mahagiton nga panahon. Samtang akong gihunahuna ang akong sitwasyon, ang Langitnong Amahan mitabang kanako nga ako dili gayud mobati og kasuko, ug ako mihukom nga kinahanglan nakong kalimtan kini. Mitabang Siya kanako sa paghatag og importansya sa akong pamilya ug sa pagpangita og laing trabaho isip usa ka reporter, ug nga kana usa ka dakong panalangin.
Pagtabang sa Uban
Si Jesukristo naghatag kanato sa hingpit nga ehemplo. Imbis magbuhat og dili makiangayong pagtagad ngadto sa uban, kita makatagad sa uban sama nga Siya naghimo.
Sa akong calling isip usa ka magtutudlo sa institute, ako bag-ohay nga mitudlo mahitungod sa sambingay sa Maayong Samarianhon (tan-awa sa Lucas 10:25–37). Ang kinabuhi makadala og kasakit nga kita dili angay, ug daghang mga higayon nga kita tingali mobati sama sa tawo kinsa gibunalan ug gikawatan, naglaom lamang nga usa ka tawo motabang kanato. Apan niini nga sambingay, ang atong Manluluwas, si Jesukristo, gusto kanato nga mahimong mas mahisama sa Samarianhon o sa tag-iya sa paabangan, kinsa miatiman niadtong kinsa nasakitan. Mao kana ang gihimo sa Manluluwas bisan sa Iyang kaugalingong grabing pagkasalikway ug kasakit. Akong naamgohan nga imbis magpili nga mahimong ang biktima, ako makapili sa pagbuhat sa tahas sa tig-ayo.
Kitang tanan makapaningkamot nga mahimong maayong mga silingan, buotang mga higala, maayong mga tawo, ug maayong mga lungsuranon. Kana mahimong mas masayon samtang kita naghigugma sa atong mga silingan ug naningkamot sa pagsabot nga ang mga tawo makahimo og mga kasaypanan. Usahay kini nga mga sayop tingali dili angay alang kanato. Apan ang pagpakita sa pagsabut ug pagpasaylo motabang kanato sa paghigugma sa uban, pagsuporta niadtong kinsa nanginahanglan, ug pag-usab sa kalibutan.
Ang Dios naglig-on kanato nga aron kita makatabang sa uban kon sila nanlimbasog. Kinahanglan lamang kita nga andam aron Siya makatudlo kanato kon unsaon sa pagbuhat niini.