“Nabugkos ngadto sa Manluluwas pinaagi sa mga Pakigsaad,” Alang sa Kalig-on sa mga Kabatan-onan, Peb. 2022.
Dali, Sunod Kanako
Nabugkos ngadto sa Manluluwas pinaagi sa mga Pakigsaad
Ang pagsulod ngadto ug pagtuman sa sagrado nga mga pakigsaad mobugkos kanato sa Manluluwas.
Sa unang mensahe ni Presidente Russell M. Nelson isip Presidente sa Ang Simbahan ni Jesukristo sa mga Santos sa Ulahing mga Adlaw, siya mipasabot sa kaimportante sa sagradong mga pakigsaad sa ebanghelyo. Miingon siya:
“Ngadto sa matag miyembro sa Simbahan moingon ko, pabilin diha sa dalan sa pakigsaad. Ang inyong pasalig nga mosunod sa Manluluwas pinaagi sa paghimo og mga pakigsaad uban Kaniya ug dayon sa pagtuman niadto nga mga pakigsaad moabli sa pultahan ngadto sa tanang espirituhanong mga panalangin ug pribilehiyo nga mahimong maanaa sa mga lalaki, mga babaye, ug mga anak bisan asa.”1
Ang Ginoong Jesukristo nagdapit sa matag usa kanato sa “pag-ambit sa iyang kaluwasan, ug sa gah[o]m sa iyang katubsanan.”2 Ang mga saad, mga panalangin, ug gahom sa sagradong mga pakigsaad nga atong gihimo uban Kaniya makapausab sa atong mga kasingkasing, ug naghimo og espirituwal nga direksiyon ug panalipod, ug makapahimo kanato sa pagbaton og molahotay nga kalipay.
Unsa ang Mga Pakigsaad?
Ang pakigsaad usa ka kasabotan tali sa Dios ug sa Iyang mga anak. Importante nga mahinumdoman nga Siya nagtakda og mga termino ug mga kondisyon sa tanang pakigsaad sa ebanghelyo; ikaw ug ako wala. Kita mogamit sa atong moral nga kabubut-on sa pagkat-on, pagdawat, ug pagtahod sa mga pakigsaad nga gitakda sa Dios.
Daghan kaninyo ang nakahimo na og mga pakigsaad sa dihang kamo nabunyagan. Ug samtang kamo mouswag diha sa ebanghelyo ni Jesukristo, kamo mohimo pa ug dugang nga mga pakigsaad. Ang labing sagrado nga mga pakigsaad madawat lang diha sa balaan nga templo—ang balay sa Ginoo.
Ang mosunod nga upat ka baroganan naghatag og kaimportante sa pipila ka mga saad ug mga panalangin nga moabot gikan sa takos nga pagsulod ngadto ug matinud-anon nga pagtuman sa mga pakigsaad uban sa Dios.
Ang Mga Pakigsaad Makatabang Kanato nga Masayod kon si Kinsa Gayod Kita
Ang Dios naghimo og mga pakigsaad uban sa Iyang matinud-anon nga mga anak sukad sa sinugdanan sa kalibotan. Pananglitan, si Abraham usa ka bantogan nga propeta kinsa mitinguha sa pagkamatarong ug mituman sa tanan nga mga sugo sa Dios—lakip sa sugo sa pagtanyag isip usa ka sakripisyo sa iyang bililhon nga anak nga lalaki, si Isaac. Tungod sa kaligdong ni Abraham sa pagkamasulundon, ang Dios mihimo og usa ka pakigsaad uban kaniya ug misaad sa mahimayaong mga panalangin sa dakong kaliwatan ug nga ang mga nasod sa kalibotan mapanalanginan pinaagi sa iyang “binhi.”3
Ang tanang nasod napanalanginan pinaagi sa binhi ni Abraham tungod kay ang iyang “binhi” adunay responsibilidad sa pagpaambit sa ebanghelyo ni Jesukristo ug modapit sa tanan sa pagdawat pinaagi sa tukma nga awtoridad sa pagkapari ang mga ordinansa sa kaluwasan ug kahimayaan.4 Ang Ginoo sa wala madugay mibag-o niining pakigsaad sa anak ni Abraham, si Isaac, ug sa iyang apo, si Jacob, ug karon pinaagi kanato kinsa nagpakabuhi ug nagserbisyo sa ulahing mga adlaw sa kahingpitan sa mga panahon.
Sa unsang paagi kining mga saad ug mga panalangin may kalabotan diha kanimo? Mahimong pinaagi sa literal nga kaliwat o sa pagsagop, kamo ang usa nga may katungod nga sumusunod sa mga saad sa Dios ngadto ni Abraham. Kamo angay nga mopanalangin sa mga anak nga lalaki ug anak nga mga babaye sa Dios pinaagi sa pagpamatuod sa kabalaan ni Jesukristo, mamahayag sa mensahe sa iyang gipahiuli nga ebanghelyo, ug nagdapit sa tanan sa pagdawat sa sagradong mga pakigsaad ug mga ordinansa sa pagkapari.
Kita mga anak nga lalaki ug mga anak nga babaye sa Dios ug ang “binhi” ni Abraham. Kita gi-ordinahan nang daan didto sa pre-mortal nga kahimtang aron moanhi sa yuta ug motabang sa pagtuman sa pakigsaad ug mga saad nga gihimo sa Dios ngadto ni Abraham. Mao kini kita, ug kana mao ang hinungdan nganong ania kita dinhi—karon ug sa kanunay.
Ang Mga Pakigsaad Mas Mopaduol Kanato ngadto sa Manluluwas
Ang mga saad ug mga panalangin sa pakigsaad dili mahimong posible kon wala ang atong Manluluwas, si Jesukristo. Siya nagdapit kanato sa pagtan-aw ngadto Kaniya,5 moduol ngadto Kaniya,6 magkat-on diha Kaniya,7 ug bugkoson ang atong kaugalingon ngadto Kaniya8 pinaagi sa mga pakigsaad ug mga ordinansa sa Iyang giphiuli nga ebanghelyo.
Ang mga pakigsaad ug ang mga ordinansa mao ang mga sukaranan nga atong gamiton sa pagtukod sa atong kinabuhi diha sa “tukuranan sa atong Manunubos”9 ug sa Iyang Pag-ula. Tungod gayod kay ang matinud-anong pagtahod sa sagradong mga pakigsaad nagbugkos kanato ngadto sa Manluluwas, Siya nahimong labing mahinungdanong tinubdan sa espirituwal nga direksiyon ug kalig-on sa atong mga kinabuhi.
Isangon ang Iyang Yugo diha Kaninyo
Ang Manluluwas miingon: “Umari kanako, kamong tanan nga nabudlay ug nabug-atan, ug papahulayon ko kamo.
“Isangon ang akong yugo ug sunda ninyo ako kay malumo ako ug mapaubsanon sa espiritu ug makapahulay kamo.
“Sayon ang yugo nga akong isangon kaninyo ug gaan ang ipapas-an ko kaninyo.”10
Ang usa ka yugo usa ka kahoy nga gibabag, kasagarang gigamit taliwala sa pares nga baka o lain nga mga hayop, nga makahimo kanila sa pagbitad og dungan sa luwan. Ang usa ka yugo nagbutang sa mga hayop nga mag-abay aron sila makalihok og dungan aron mahimo ang usa ka buhat.
Ang pagsulod ug pagtuman sa sagradong mga pakigsaad nagbugkos kanato ngadto sa Ginoo. Kini nagpasabot nga kita mosalig Kaniya, mag-agad Kaniya, ug modala sa atong mga palas-anon uban Kaniya atol sa panaw sa kinabuhi. Ang atong labing maayo nga mga paningkamot dili ikatandi sa Iyaha. Apan kon kita gisangonan og yugo ug uban sa Manluluwas, kita makadawat sa makalimpyo, makapahimo, ug makadugang nga gahom sa Iyang Pag-ula diha sa atong kinabuhi.
Ikaw Wala Gayod Mag-inusara
Laing dako nga saad ug panalangin sa pagbugkos sa atong kaugalingon ngadto sa Manluluwas mao nga pinaagi sa mga pakigsaad kita dili, ug dili gayod kinahanglan, mag-inusara. Makapadayon kita sa unahan nga malipayon sa atong mga kinabuhi uban sa langitnong tabang. Pinaagi sa Pag-ula sa Manluluwas ug sa atong mga pakigsaad, kita makadawat og kalig-on sa pagbuhat ug pagkahimo sa dayag nga dili nato mabuhat ug pagkahimo kon mag-agad lang sa atong limitado nga kapasidad sa kinabuhi.
Kita napanalanginan og maayo kon kita gibugkos ngadto sa Ginoo pinaagi sa sagradong mga pakigsaad. Ug Ako mopamatuod nga kining pamahayag sa Ginoo tinuod, “Busa padayon sa inyong panaw ug himoa ang inyong kasingkasing nga malipay; kay tan-awa ug sud-onga, Ako mouban kaninyo gani ngadto sa katap[o]san.”11