“Ang Kinabuhi nga anaa ang COVID-19 ug sa Umaabot,” Alang sa Kalig-on sa mga Kabatan-onan, Peb. 2022.
Ang Kinabuhi nga anaa ang COVID-19 ug sa Umaabot
Ang mga butang nausab—apan mao usab kamo.
Ang nangaging duha ka tuig hilabihan kalisod. Atong gisagubang ang usa ka pandemya nga nakapahimo sa kanunayng pagsul-ob og mask, pisikal nga pagdistansiya, ug virtual nga mga miting sa atong mga kinabuhi. Apan karon ang tanang butang sa kataposan makabalik na eksakto nga sama sa unsa kini kaniadto!
Dili ba?!
Nan … tingali, apan kini lagmit dili ingon niana ka sayon. Daghang tawo mibati nga nag-inusara ug walay kasiguroan. Ug ang paglahutay og usa ka pandemya dili lang ang panahon nga nakaangkon kita niini nga matang sa mga pagbati. Kini nga kinabuhi dili kanunayng sayon, ug kini wala gituyo nga mahimo sa ingon. Kitang tanan mag-atubang og mga hagit. Ania ang pipila ka ideya kon sa unsang paagi nga hapsay ang pagtransisyon sa pagbalik ngadto sa kinabuhi human sa COVID-19. Kini nga mga ideya makatabang usab kaninyo sa pag-atubang sa mga hagit sa umaabot.
Pagpakita
Ang pagpakabuhi pinaagi sa online nga mga klase, mga quarantine, ug mga lockdown makapahimong sayon ra nato nga makomportable nga magpuyo sa panimalay ug mao ra sa atong kaugalingon. Apan wala gayod kita gihimo aron mabuhi nga mag-inusara. Ang magpundok sa simbahan, eskwelahan, o sa mga kalihokan gikinahanglan karon nga labaw pa bisan kanus-a. Si Presidente Nelson midapit kanato sa pagtabang sa pagpundok sa Israel,1 ug kana naglakip sa pagpakigpundok sa imong kaugalingon aron makakuyog sa uban.
Mokonektar pag-usab sa mga Karaang mga Higala, Magsugod og Konektar sa Bag-o
Sa uban nga panaghigalaay, kamo mahimong modangat og mga bulan, o bisan katuigan, nga dili magkitaay sa usag usa, apan ang higayon nga kamo magkakita pag-usab mabati nga wala nausab. Apan, dili tanang panaghigalaay sama niini. Usahay human sa taas nga panahon sa panaglagyo (sama sa panahon sa pandemya) murag ang pamati kiwaw kon ang managhigala sa kataposan magkakonektar pag-usab. Ania ang pipila ka ideya kon unsaon sa pagkonektar pag usab sa karaan nga mga higala o paghimo og bag-o:
-
Hatagi og pagtagad ang inyong mga higala. Ang panaghigalaay motubo nga mas lig-on kon kamo mopakita og interes sa unsa gayod ang panghitabo sa kalibotan sa inyong higala. Paningkamot sa pagpaminaw kanila ug batyagi unsa ang ilang gibuhat.
-
Hinumdomi unsa ang ilang gusto. Timan-i ang ilang paborito nga mga pagkaon, mga kanta, mga kolor, mga team sa sport, ug uban pa. Wala kamo masayod kon kanus-a kana nga impormasiyon makanindot sa adlaw sa inyong higala!!
-
Hatagi og bili ang mga panaglahi. Si Elder Dieter F. Uchtdorf sa Korum sa Napulog Duha ka Apostoles miingon, “Ang Simbahan malig-on kon pahimuslan nato … kining panaglahi ug moawhag sa usag usa sa pagpalambo ug paggamit sa atong talento sa pagdasig ug paglig-on sa atong isigka disipulo.”2
-
Paggahin og panahon sa pagserbisyo. Pagpadala og usa ka mahigalaon nga mensahe sa text. Tabang sa mga buluhaton sa panimalay. Pagpaambit og usa ka kahanas. Mahimong usa ka abag sa maayo ug sa dili maayo nga mga panahon. Motabang kutob sa inyong mahimo. Hinumdomi kon unsa ang gitudlo sa Manluluwas mahitungod sa paghatag sa maong serbisyo: “Maingon nga gibuhat ninyo kini ngadto sa usa sa labing gagmay niining … , gibuhat usab ninyo kini kanako” (Mateo 25:40).
Pagtangtang sa Babag sa Paglambo
Usa ka pagbati nga naangkon sa kadaghanan atol ug human sa pandemya mao ang pagkatanggong. Tingali kamo wala mibati og hingpit nga kalipay ug katumanan sa unsay dagan sa mga panghitabo alang kaninyo. Tingali ang inyong kinabuhi wala nahimutang kon asa ninyo kini gusto.
Mahimong adunay daghang rason alang niini. Kini mahimong tungod sa bati nga mga batasan, napusgay nga mga damgo, napakyas nga mga oportunidad atol sa quarantine, o mga butang nga dili ninyo mausab. Bisan unsa man kini, hinumdumi nga kamo wala matanggong sa kawalay paglaom. Adunay mga butang nga inyong mahimo aron matangtang ang babag sa paglambo.
Hinumdumi kanunay nga si Jesukristo, pinaagi sa Iyang walay kinutoban nga Pag-ula, makahatag kaninyo og kalig-on aron makalingkawas sa pagkatanggong. Siya makatabang kaninyo kon kamo mobalik ngadto Kaniya. Ang Manluluwas makapakita kaninyo sa labing maayong paagi sa pagpadayon sa unahan.
Agi og dugang, ibutang sa hunahuna nga ang pagbati nga natanggong kasagaran nagpasabot nga adunay butang nga wala nagsilbi alang kanimo ug panahon na aron mohimo og kausaban. Dili kini kinahanglan nga usa ka dako kaayong kausaban. Ginagmay nga mga kausaban makahimo na og dakong kalainan. Ikonsiderar ang pagsulat sa mga butang nga inyong mausab, dayon pagpili og usa ug sugdi sa pagbuhat niini sa labing dali nga panahon.
Pagpadayon sa Unahan sa usa ka “Bag-ong Normal”
Ang labing maayong tambag sa pagsugakod sa pandemya o sa bisan unsang hagit nga moabot naggikan sa propeta. Si Presidente Russell M. Nelson miingon:
“Karon kanunay kitang makadungog mahitungod sa ‘usa ka bag-o nga normal.’ Kon gusto gay[o]d ninyo nga modawat sa usa ka bag-o nga normal, ako modapit kaninyo nga ibaling og dugang ang inyong kasingkasing, hunahuna, ug kalag ngadto sa atong Langitnong Amahan ug sa Iyang Anak, si Jesukristo. Himoa kana nga inyong bag-o nga normal.
“Hangopa ang inyong bag-o nga normal pinaagi sa paghinulsol matag adlaw. Pagtinguha nga mag-anam-anam kaputli ang hunahuna, pulong, ug buhat. Pangalagad ngadto sa uban. Pagbaton og mahangt[o]ron nga panglantaw. Buhata ang inyong mga calling. Ug bisan unsay inyong mga hagit, … pagpakabuhi matag adlaw nga ikaw mas andam nga moatubang sa inyong Magbubuhat.” 3
Unsaon ninyo pagkasipyat kon kamo mosunod sa mga pagtulon-an sa propeta? Padayon sa pag-abante sa unahan uban sa hugot nga pagtuo ni Jesukristo bisan kon dili ninyo makita ang mga resulta sa inyong mga paningkamot. Ang Inyong labing maayo moabot pa!
Kinsa ang Inyong Tabangan?
Samtang kamo moatubang sa usa ka pandemya, o bisan unsang lisod nga kahimtang, kinahanglan kamo magpatabang sa uban. Apan, hinumdomi nga kamo mahimong tinubdan sa kalig-on alang usab sa uban!
Mahimong adunay usa ka tawo nga bag-o diha sa inyong branch o ward o eskwelahan kinsa nagkinahanglan sa inyong tabang. Bisan asa pa kamo moadto, adunay tawo kinsa makabenepisyo gikan sa inyong kahayag ug pagpamatuod. Ang inyong mga talento ug personalidad mahimong usa ka panalangin niadtong naglibot kaninyo, busa mainampoon nga magtinguha niadtong mga oportunidad sa pagserbisyo. Samtang kamo mobuhat, kamo mahimong makaamgo nga ang inyong mga hagit ingon og mas sayon ra sa pagdala.
Ang Dios naghatag kaninyo og usa ka abunda nga espirituwal nga mga gasa, bisan kon kamo dili pa kaayo makaila niini. Usa sa labing maayo nga mga paagi sa pagpalig-on niadtong mga gasa mao ang paggamit niini ug ipadan-ag ang inyong kahayag (tan-awa sa Mateo 5:16).
Busa padayon sa paghatag og kahayag!