“Paghimo sa Kapakyasan ngadto sa Kalamposan,” Alang sa Kalig-on sa mga Kabatan-onan, Peb. 2022.
Tabang sa Kinabuhi
Paghimo sa Kapakyasan ngadto sa Kalamposan
Tingali kamo mapakyas usahay, apan kana sa pagkatinuod makatabang kaninyo sa pagpadayon sa paglambo.
Mga paghulagway pinaagi ni Alyana Cazalet
Kon kamo mosulat og usa ka libro mahitungod sa inyong kinabuhi, unsa kaha ang mahimong ulohan? Mao ba kaha kini Ang akong Hingpit Kaayo ug Malamposon nga Kinabuhi o Ang Akong Maanindot Kaayo, Walay Kapakyasan nga Kinabuhi?
Ang kalagmitan mao nga, dili kamo mahimutang niana nga mga ulohan tungod kay kini dili tinuod. Ang inyong kinabuhi dili hingpit o walay kapakyasan. Ang akoa dili usab. Gani, walay usa ka kinabuhi nga hingpit. Ang makahimo og kasaypanan ug ang mapakyas maoy kabahin sa kinabuhi, apan adunay usa ka dakong kalainan tali sa pagkapakyas ug mahimong usa ka pakyas. Kamo dili usa ka pakyas, ang pagkapakyas dili kanunayng daotan. Ania ang tulo ka ideya sa pagtabang kaninyo nga mahimo ang kapakyasan ngadto sa mga kalamposan.
Kahigayonan alang sa Umaabot nga Kalamposan
Usahay ang mapakyas mahimong makapabati nga kataposan na sa kalibotan. Apan ang pagkapakyas kasagaran usa ka talagsaong paagi aron kamo makakat-on. Kini mahimong usa ka kahigayonan sa “[pagpamalandong sa] inyong mga dalan” (Haggeo 1:5), pag-usab sa direksyon, ug mosulay pag-usab. Kini makatabang sa pagpahimutang kaninyo nga mahimong mas malamposon sa sunod higayon.
Likay sa Laang sa Pagtandi
Sayon ra ang pagtandi sa atong kaugalingon ngadto sa uban. Kita kanunay gayod nga gipaulanan sa mga mahinamon ug mga maanindot nga butang nga ingon og gihimo na sa tanan—ilabi na gayod sa social media. Kini makapahimo kanato nga mobati nga dili kita igo.
Imbes motutok sa mga butang nga anaa sa ubang tawo nga wala ninyo, hunonga ang mga pagtandi ug sugdi ang pag-ihap sa inyong mga panalangin. Si Elder Gary E. Stevenson sa Korum sa Napulog Duha ka Apostoles miawhag usab kanato nga “[mokonektar] sa makahuluganong paagi ngadto sa uban ug [modugang] og kahayag ngadto sa ilang mga kinabuhi.”1 Sauloga ang mga kalamposan sa uban ug magsugod sa pagplano sa mga paagi nga kamo molambo. Kini mas epektibo kaayo kay sa motutok kon sa unsang paagi ang inyong kinabuhi itandi ngadto sa laing tawo.
Ang Tanang Butang Nagabuhat Alang sa Inyong Kaayohan
Kitang tanan mag-atubang og kapakyasan. Imbes makaminos sa atong kaugalingon ug maghunahuna nga dili igo o dili takos, adunay usa ka paagi nga kita makabangon, paphaan atong kaugalingon, ug mopadayon sa paglambo.
Ang mga kasulatan nagtudlo kanato sa “[pag]pangita nga makugihon, pag-ampo sa kanunay, ug pagmatuohon, ug ang tanan nga mga butang maghiusa sa paglihok alang sa inyong kaayohan” (Doktrina ug mga Pakigsaad 90:24). Si Elder Gerrit W. Gong sa Korum sa Napulog Duha ka Apostoles miingon nga kini tinuod tungod kay ang Langitnong Amahan ug ang atong Manluluwas, si Jesukristo, “nasayod kon sa unsang paagi ang tanang butang magtambayayong, ug Sila nasayod unsay maayo alang kanato.”2 Sila nasayod ug nahigugma kanato sa hingpit. Kon kita mosalig Kanila, ang atong hugot nga pagtuo makadasig kanato sa pagpadayon kon kita mapakyas.
Kita dili mahimong hingpit sa atong kaugalingon. Ang kahingpitan anaa diha ni Kristo ug moabot kon kita mopakita og hugot nga pagtuo diha Kaniya ug mosunod Kaniya. Kon kamo maghunahuna nga kamo napakyas ug kamo dili makahimo niini nga husto, duol ngadto sa Langitnong Amahan ug sa Manluluwas ug tan-awa kon sa unsang paagi nga Sila makatabang kaninyo usa ka adlaw sa usa ka higayon.