“Gikan sa Wala ngadto sa Usa ka Butang,” Alang sa Kalig-on sa Kabatan-onan, Peb. 2022.
Home Evening nga Leksiyon nga Maggamit og Butang [Object Lesson]
Gikan sa Wala ngadto sa Usa ka Butang
Kon mabati ninyo nga daw napakyas ang inyong mga paningkamot, dangop ngadto kang Jesukristo aron sa paghimo sa inyong mga paningkamot ngadto sa usa ka butang nga mas mahinungdanon.
Kapakyasan. Dili makaabot sa tumong. Makahimo og sayop. Gani makasala. Bisan unsa man kini, tingali kamo adunay kasinatian nga mibati nga daw dili sarang alang sa usa ka butang. Isip mga sumusunod ni Jesukristo, gusto kitang kanunay nga nagbuhat sa atong labing maayo, apan usahay ubos kaayo ang atong pagtan-aw sa atong kaugalingon tungod kay menos pa kita sa pagkahingpit.
Ang kamatuoran mao nga walay paagi nga kita mahimong hingpit sa atong kaugalingon lang. Ang pagkahingpit anaa diha kang Jesukristo (tan-awa sa Moroni 10:32–33). Kon moduol kita ngadto Kaniya, magmapainubsanon, maghinulsol, ug magpakita sa atong hugot nga pagtuo, Siya mohimo sa atong “mahuyang nga mga butang nga mahimo nga malig-on” (Ether 12:27). Ingon sa gitudlo ni Presidente Russell M. Nelson, “Uban sa hugot nga pagtuo diha Kaniya, kita makabalhin sa mga bukid sa atong kinabuhi.”1
Uban niini nga leksiyon nga maggamit og butang, kamo ug ang inyong pamilya mahimong maghisgot mahitungod kon sa unsang paagi ang Langitnong Amahan ug si Jesukristo makatabang kaninyo sa paghimo sa inyong mga pagkulang ngadto sa mas maayo nga butang kay sa inyong gihunahuna.
Unsa ang Buhaton
-
Hangyoa ang usa ka sakop sa pamilya sa pagkuriskuris og yano nga butang diha sa piraso sa papel gamit ang bolpen. Hangyoa sila nga tuyoon nga dili magdrowing og bisan unsa nga butang nga mailhan ni bisan kinsa.
-
Ipasa ang papel ngadto sa laing sakop sa pamilya ug hangyoa sila sa paggamit sa mga pentel pen o de kolor nga mga lapis aron sa paghimo og bag-o nga butang gikan sa gikuriskuris diha sa papel—usa ka butang, usa ka tawo, usa ka buhat sa art. Mahimo nga bisan unsa kini nga ilang mahunahunaan. Pagmamugnaon!
-
Sa dihang mahuman na sila, hangyoa sila sa pagpaambit sa ilang bag-o nga binuhat ngadto sa uban nga mga sakop sa pamilya. Mahimong makalingaw kini alang sa ubang mga sakop sa pamilya nga mosulay.
1
2
3
Tugotan ang Dios nga Motabang
Sama sa usa ka gikuriskuris diha sa papel, usahay ang atong mga paningkamot sa paghimo og maayo wala kaayoy epekto. Mahimong hapit nato matuman ang atong mga tumong, ug sa ubang higayon mahimong dili lang gayod mailhan ang resulta sa atong mga paningkamot.
Apan kon atong isalig ang atong mga paningkamot ngadto sa Ginoo, makabuhat Siya og talagsaon nga mga butang! Si Presidente Ezra Taft Benson (1899–1994) mitudlo: “Ang mga kalalakin-an ug mga kababayen-an kinsa mosalig sa ilang mga kinabuhi ngadto sa Dios makadiskobre nga Siya makahimo og daghan pa sa ilang mga kinabuhi kay sa ilang mahimo. Siya makapadaghan sa ilang mga kalipay, mas makapalambo sa ilang panglantaw, makapaabtik sa ilang mga hunahuna, makapalig-on sa ilang mga unod, makapabayaw sa ilang mga espiritu, makapadugang sa ilang mga panalangin, makapadaghan sa ilang mga oportunidad, makahupay sa ilang mga kalag, makahatag og daghang mga higala, ug makabu[bo] og kalinaw. Bisan kinsa ang mawagtangan sa iyang kinabuhi diha sa pagserbisyo sa Dios magapatunhay og kinabuhing dayon.”2
Mahimong masagmuyo kita kon ang atong mga paningkamot sa pagbuhat og maayo dili moresulta sa paagi nga atong gilaoman, apan kinahanglan dili kita mawad-an og kadasig. Kon kamo “[m]ag-ampo ngadto sa Amahan diha sa ngalan ni Kristo, aron siya mopahinungod sa inyong binuhatan nganha kaninyo,” ang inyong mga paningkamot mahimo nga “kaayohan sa inyong kalag” (2 Nephi 32:9). Bisan pa man sa atong mga kahuyang, kon kita magmapainubsanon ug magbaton og hugot nga pagtuo sa Dios, Siya motabang kanato nga mahimong mas sama Kaniya!