“Unsaon Naman lang ang Akong Misyon?,” Alang sa Kalig-on sa mga Kabatan-onan, Peb. 2022.
Unsaon Naman lang ang Akong Misyon?
Samtang nangandam ko alang sa misyon, usa ka kalit, makaluya nga balatian maoy usa ka pagsulay sa hugot nga pagtuo.
Paghulagway pinaagi ni Emily Call
Sukad sa bata pa ko, gusto ko nga moserbisyo og misyon. Apan sa akong ikaduhang tuig sa high school, misugod ko og sinati og pamanhod sa akong mga tiil, mga tuhod, ug mga bukton. Sulod sa mga semana, dili nako makalakaw, makadagan, o makasaka sa hagdanan.
Misugod ko og pipila ka mga tambal, naghunahuna nga masulbad ra niini og dali ang problema aron makabalik ko sa eskwelahan ug makaandam alang sa akong misyon. Apan, nagkagrabe naman hinoon ko. Wala magdugay dili nako makahimo og bisan unsang butang sa akong kaugalingon—dili ko makasudlay sa akong buhok o bisan mobarog aron sa pagpunit sa remote sa TV.
Nakadawat na ko og daghang panalangin sa pagkapari, apan ang sakit dili mobiya kanako. Gi-admit ko sa usa ka ospital didto sa Accra diin ang mga batid nga mga doktor mihiling kanako, apan dili nila matino unsay problema. Nagsugod ko sa paghunahuna nga dili na gayod ko makalakaw pag-usab, samot na sa pagserbisyo og usa ka misyon.
Samtang diha ako sa ospital, ang presidente sa misyon ug ang iyang asawa mibisita kanako ug sa akong mama. Gipangutana ko niya kon gusto ba ko nga moserbisyo og misyon. Misulti ko niya nga gusto ko, sa wala pa ko nasakit. Miingon siya, “Ayaw og kabalaka, makaserbisyo ka og misyon.”
Sa adlaw human mi nakauli gikan sa ospital, naglingkod ko tupad ni mama sa dihang nakadungog ko og tingog nga nagsulti nako sa pagbarog ug molakaw. Nahadlok ko nga matumba, apan nasayod ko nga kinahanglan nakong mosulay. Nakabarog ra ko sa akong kaugalingon. Sa hinayhinay, nakahimo ra ko sa unang paglakang, nga nakapadasig sa akong pagsalig. Mipadayon ko sa pagtikang og dugang pa. Bisan og nagkurog ko sa sinugdanan, nasayod ko nga tungod sa akong hugot nga pagtuo ni Jesukristo ug sa mga panalangin sa pagkapari nga akong nadawat, ako makahimo na sa pagserbisyo og misyon karon.
Mibalik ko sa pag-eskwela, ug pagkahuman gyod dayon, gisumiter nako ang akong mga papeles sa misyon. Midawat ko sa akong call pipila ka bulan ang milabay nga moserbisyo sa Nigeria Lagos Mission. Ang pagserbisyo sa Ginoo ug sa pagtudlo sa Iyang mga anak mahitungod sa gipahiuli nga ebanghelyo naghatag kanako og hilabihan nga kalipay. Bisan og dili tanan naayo sama nako, ako nasayod ang Ginoo mopanalangin ni bisan kinsa, sumala sa Iyang kabubut-on, kon kita magbaton og hugot nga pagtuo diha Kaniya.
Ang tagsulat nagpuyo sa Ghana.