“Mabati Nako ang Iyang Gugma,” Alang sa Kalig-on sa mga Kabatan-onan, Peb. 2022.
Ang Tema ug Ako
Kabatan-onan mipaambit kon giunsa nila sa pagsunod ang mga pulong sa mga Tema sa Young Women ug sa Korum sa Aaronic nga Pagkapari
Mabati Nako ang Iyang Gugma
“Ako usa ka hinigugmang anak nga babaye sa langitnong mga ginikanan, nga adunay diosnong kinaiya ug mahangt[o]rong padulngan.”
Sa akong unang tuig sa hayskol, usa ka problema sa kinan-an ang mikontrolar sa akong kinabuhi. Gisultihan nako ang tanan nga OK ra ko aron dili sila mangutana, apan ako tugnawonon, mahuyang, ug gikapoy sa tanang higayon gumikan sa kakulang sa pagkaon. Nawad-an ako og interes sa mga butang nga akong ganahan kaniadto. Mihunong gani ako sa pag-ampo ngadto sa Langitnong Amahan. Mibati ako nga sad-an sa pagkahimong usa ka tawo nga lahi kay sa akong gidahom.
Sa sinugdanan, midumili ako sa pagtuo nga ako adunay problema. Apan sa kataposan nakabaton ako og lig-on nga pagbati nga kinahanglan nakong sultihan ang akong suod nga higala mahitungod sa akong mga panglimbasog. Wala koy ideya nga ang pagtug-an ngadto sa usa ka tawo nga akong gisaligan makaluwas sa akong kinabuhi.
Ang akong higala misulti sa akong mga ginikanan kon unsay nahinabo, tungod sa iyang kabalaka alang kanako. Sa dihang sa kataposan gisultihan nako sila mismo sa kamatuoran, mas lig-on nakong nabati ang gugma sa Langitnong Amahan kay sa akong nabati sukad. Kini mikaylap pinaagi sa gugma nga gipakita kanako sa akong mga ginikanan ug sa uban nakong mga higala ug pamilya. Ang ilang Kristohanon nga suporta mitabang kanako sa pagdawat nga ako gayod adunay problema sa kinan-an—ug nga, uban sa tabang sa Langitnong Amahan, ako makalahutay niini.
Ang pagsugod sa akong pagkaayo mao ang labing lisod nga panaw nga akong nasinati sukad. Kada adlaw ako anaa diha sa ospital human sa pag-eskwela alang sa pagtambag ug pagtambal. Sa dihang ang proseso sa pagkaayo misugod nga ingon og walay paglaom, nakakaplag ako og kahupayan pinaagi sa pag-ampo ug pagbasa sa akong mga kasulatan.
Nanglimbasog gihapon ako sa akong problema sa kinan-an, apan wala na kini nagkontrolar sa akong kinabuhi. Ang akong Langitnong Amahan nakasabot sa akong mga pagsulay, sa akong kasakit, ug sa akong pagbati nga sad-an, ug ako nasayod na karon nga ako wala milahutay niining tanan nga ako ra. Kon akong makita ang akong kaugalingon pinaagi sa panan-aw sa Langitnong Amahan, mabati nako ang akong mahangtorong padulngan. Mabati nako ang Iyang gugma alang kanako—usa ka gugma nga makatabang kanako sa pagbuntog sa bisan unsang butang.
Ang tagsulat nagpuyo sa Alabama, USA.