“Akong Dakong Sorpresa sa AKK [FSY],” Alang sa Kalig-on sa mga Kabatan-onan, Peb. 2022.
Akong Dakong Sorpresa sa AKK [FSY]
Sa unsang paagi ang lima ka adlaw sa mga sayaw, mga dula, ug ubang mga kalihokan makapalig-on sa inyong pagpamatuod?
Motambong kita og daghang miting sa Simbahan, ug usa ka miting nga akong natambongan pipila ka tuig ang milabay adunay gamhanan nga epekto kanako. Usa kadto ka miting sa pagpamatuod didto sa usa ka ward sa Barcelona, Spain.
Sa akong kasorpresa, mga 10 ka batan-on ang mipaambit sa ilang mga pagpamatuod human sa usa ka FSY nga komperensiya nga ilang giapilan. Unsay labing nakadani kanako mao nga silang tanan mipaambit og lunsay, gamhanan nga mga pagpamatuod sa Manluluwas, si Jesukristo, sa Iyang maulaong sakripisyo, ug sa Iyang gugma alang kanatong tanan. Natingala ako nga human sa lima ka adlaw sa makalingaw nga mga kalihokan uban sa laing kabatan-onan, pagkaon, mga dula, ug mga sayaw, ang hingpit nga kalipay nga aduna sila diha sa Manluluwas mao gayod ang nagpabilin kanila. Nakapahunahuna kini kanako kon ngano kaha.
Sa wala madugay mibalhin ako sa Brazil. Nahibaloan nako nga ang mga lider sa area nangandam alang sa usa ka FSY nga komperensiya. Isip usa ka Area Seventy, giimbitar ako sa pagtabang og organisar sa komperensiya ug sa pagsalmot sa tibuok lima ka adlaw kauban ang kabatan-onan.
Sa wala pa ako mibiya, gihangyo ako sa Kapangulohan sa Area sa pag-andam og report bahin sa akong kasinatian sa FSY sa akong pagbalik. Ang akong asawa ug ako mitambong sa komperensiya, ug alang sa unang tulo ka adlaw nalingaw kami sa giplano nga mga kalihokan, lakip ang pagtuon sa kasulatan sa buntag, mga debosyonal, mga klase, mga kalihokan sa gawas, lamian nga pagkaon, family home evening, ug mga sayaw. Ang tanan nagpadayon sumala sa giplano, ug nabati nako nga igo na ang akong nakit-an aron sa pagkompleto sa akong report.
Pagkasunod gabii, mipahigayon kami og maanindot ug makatandog nga programa sa musika. Ang Espiritu hilabihan ka talagsaon nga ang tag-iya sa dapit sa komperensiya, dili usa ka miyembro sa Simbahan, misulti kanako nga ganahan siya nga ang among grupo motambong sa FSY diha sa iyang dapit matag tuig.
Human sa programa sa musika, ang kabatan-onan nagpundok diha sa ilang mga grupo alang sa usa ka miting sa pagpamatuod. Ang akong asawa ug ako miadto gikan sa usa ka grupo ngadto sa laing grupo ug nakadungog og makatandog nga mga pagpamatuod. Makaingon kami nga ang mga partisipante sa komperensiya nakasinati og lig-on nga espirituhanon nga mga kasinatian. Ganahan gayod kami nga nakadungog sa kabatan-onan nga gawasnong nagpahayag sa ilang mga pagbati sa kalipay. Nabati namo nga ingon og kabahin sa usa ka dako nga espirituhanon nga pamilya. Nabati namo ang gugma sa Manluluwas alang sa matag usa kanamo.
Mitan-aw ako sa akong asawa ug nangutana, “Unsa may nahitabo dinhi?” Wala siyay ikasulti nga pulong. Apan nasayod kami nga daghan kaayo ang nakasinati og espirituhanon nga gutlo ug nakadawat og dili malimtan nga pagpamatuod sa Ginoo, si Jesukristo.
Miadto ako sa akong lawak nianang gabhiona ug misulat og lahi gayod nga report! Pagkasunod tuig, ang akong asawa ug ako miadto sa FSY pag-usab ug nakatagamtan sa samang kasinatian. Karon nakasabot na ako kon nganong ang mga kabatan-onan diha niana nga miting sa pagpamatuod didto sa Spain mipaambit og ingon ka makahuloganon nga mga pagbati alang sa Manluluwas imbes sa pag-istorya bahin sa ilang makalingaw nga mga kalihokan.
Ang akong tinguha mao nga kamo makabaton og daghang susama nga mga kasinatian sa inyong kinabuhi, kon kini man diha sa FSY, sa kiliran sa inyong higdaanan samtang kamo mag-ampo, kon kamo mobasa sa mga kasulatan, o kon kamo mopaambit sa inyong pagpamatuod ngadto sa inyong mga higala.
Nagpamatuod ako nga kita mga anak nga lalaki ug mga anak nga babaye sa usa ka mahigugmaon nga Langitnong Amahan. Mianhi kita sa yuta gikan sa Iyang presensiya, ug kitang tanan sakop sa Iyang dakong espirituhanon nga pamilya. Ang atong kinamagulangan nga Igsoon nga Lalaki mao ang Ginoo, si Jesukristo. Siya mao ang atong Agalon, ug gikan Kaniya kita makakat-on ug molambo “sa lawas ug sa kinaadman ug [kahimut-an] sa Dios ug sa mga tawo” (Lucas 2:52), sama sa Iyang gibuhat.
Detalye gikan sa Christ and the Rich Young Ruler [Si Kristo ug ang Adunahan nga Batan-ong Magmamando] ni Heinrich Hofmann
Si Jesukristo mao ang atong Manluluwas. Ang Iyang gahom walay kinutoban, ug andam Siya sa pagluwas kanato gikan sa bisan unsang makapasakit nga kahimtang nga mahimong maanaa kita. Siya atong higala—usa ka higala nga nahigugma kanato, nakaila kanato, ug mitanyag sa Iyang kinabuhi aron sa pagluwas kanato. Ang Iyang maulaong sakripisyo alang kanato mihimong posible alang Kaniya sa pagkahibalo kon unsaon sa pagtabang kanato, sa paglig-on kanato, ug sa paghingpit kanato. Dawaton unta natong tanan ang Iyang imbitasyon: “[Dali,] sunod kanako” (Lucas 18:22).