“Gitawag sa Pagserbisyo sa Iyang mga Katigulangan,” Alang sa Kalig-on sa mga Kabatan-onan, Peb. 2022.
Gitawag sa Pagserbisyo sa Iyang Katigulangan
Si Elder Morris moserbisyo og layo gikan sa panimalay. Apan ang tanan nausab.
Mga litrato pinaagi ni Kaui Wihongi
“Anak, ayaw kinig buhata,” miingon ang iyang mga ginikanan. “Imoha lang giusikan ang imong kinabuhi.”
Dili kana ang mga pulong nga gilaoman nga madungog sa kasagaran sa mga misyonaryo—diha mismo sa airport—sa ilang pagbiya aron mo-report na ngadto sa missionary training center (MTC).
Si Elder Morris, gikan sa New Zealand, nasayod kon unsa siya ka mahal sa iyang mga ginikanan. Sila anaa alang kaniya sa kaharuhay ug kalisdanan. Miabiba sila kaniya sa iyang mga sangka sa rugby. Gikalipay nila ang iyang desisyon sa pag-eskwela og abogasya. Sila mipadako kaniya uban ang gugma ug sa paglaom nga siya adunay hayag nga kinabuhi sa iyang umaabot.
Ang ilang mga pulong sa pagpangamuyo tungod sa gugma. Para nila, ang ideya sa ilang pinangga nga anak nga magserbisyo og duha ka tuig sa misyon alang sa iyang bag-ong tinuohan dili ingon og makalibog lang, apan hulga usab sa mga tumong nga iyang gitrabahoan og maayo aron makab-ot.
Kahibalo mo, si Elder Morris usa ka talentado nga atleta nga padulong na nga mamahimong usa ka propesyonal nga magdudula sa rugby. Sa iyang pag-eskwela, ang mga butang nagmalamposon gayod sa iyang legal nga karera.
Ah, ug siya naghunahuna mahitungod sa pagminyo!
Si Elder Morris nakig-istorya na bahin niini uban kanila sa daghang higayon kaniadto. Siya mitubag sa bugtong paagi nga iyang nahibaloan. “Ako misulti kanila nga gimahal nako sila. Gigakos nako sila. Ug akong gipaambit ang akong pagpamatuod nga ako nasayod nga gikinahanglan nako kining buhaton.”
Dayon siya nanamilit kanila ug misakay sa eroplano alang sa MTC didto sa Provo, Utah, USA, aron sa pag-andam sa iyang misyon ngadto sa Pilipinas.
Diin nianang higayona ang COVID-19 mitumaw ug miusab sa tanang katilingban.
Mga Nagsingabot nga Kausaban
Ang COVID-19 anaa na sa mga ulohang balita sa mga pamantalaan sa tibuok kalibotan sulod sa mga semana sa wala pa si Elder Morris misulod sa MTC. Gani, ang iyang grupo mao ang kataposang batch sa mga misyonaryo nga mo-report ngadto sa MTC sulod sa lain na usab nga 16 ka bulan. Ang mga grupo human niya gisultihan sa pagpabilin diha sa panimalay ug magpaabot sa dugang nga mga instruksiyon.
Ang pagsulti nga ang mga butang walay kasiguroan sa sulod sa MTC dili igo lang. “Daghang tawo nabalaka mahitungod sa unsay mahitabo,” miingon si Elder Morris. “Alang nako, mibati ko og kakalma. Wala pa gihapon ko masayod kon unsay dangatan sa mga panghitabo. Ang ako lang nahibaloan nga kini mohimo ra alang sa labing maayo.”
Sa dihang ang mga balita miabot nga si Elder Morris mabalhin og destino ngadto sa iyang kaugalingong nasod sa New Zealand, ang iyang reaksiyon tingali dili mao sa inyong gilaoman.
Siya mas mahinamon kaayo!
“Ako nakaamgo nga daghang misyonaryo ang nagtinguha sa pagserbisyo sa layo kaayong dapit,” miingon si Elder Morris. “Alang nako, bisan pa man, kanunay nakong gihunahuna nga pribilehiyo kini aron makatudlo sa akong kaugalingong katawhan sa akong kaugalingong nasod. Gusto ko nga mopaambit sa ebanghelyo sa New Zealand.”
Wala siya makahibalo kon sa unsang paagi kini makausab sa iyang kinabuhi—ug sa kinabuhi sa babaye kinsa importante kaayo ngadto kaniya.
Ang Bag-ong Katuyoan ni Nan [Lola]
Ang apohan nga babaye ni Elder Morris (ang iyang nan) nagsagubang og seryoso nga mga hagit sa panglawas. “Dili gayod maayo iyang kahimtang nga siya miingon nga anaa na siya sa punto diin andam na siyang mamatay. Wala siya mobati nga aduna pa siyay butang nga gikawilihan pa.”
Sa wala pa ang iyang misyon, si Elder Morris adunay higayon nga makasugod sa pagtudlo sa ebanghelyo ngadto sa iyang lola. Apan karon, siya usa na ka full-time nga misyonaryo nga nadestino sa mao gayod nga area diin nagpuyo ang iyang lola.
“Gimahal nako pag-ayo ang akong lola,” miingon si Elder Morris. “Ug akong nakita ang ebanghelyo nga nakapausab gayod kaniya.”
Ang iyang lola mipili sa pagpabunyag ug nahimong miyembro sa Ang Simbahan ni Jesukristo sa mga Santos sa Ulahing mga Adlaw. Siya ang unang miyembro sa direkta nga pamilya ni Elder Morris (gawas sa iyang kaugalingon) nga mipasakop sa Simbahan.
Ang iyang kinabuhi, miingon si Elder Morris, lahi na kaayo karon. “Sa dihang nakaplagan ni lola ang ebanghelyo, nakaamgo siya kon nganong buhi pa gihapon siya. Karon gusto siyang mabuhi! Matag buntag momata siya sa alas 4 o 5 sa buntag ug mokanta og mga himno. Mag-ampo ug magbasa siya sa iyang mga kasulatan matag adlaw. Siya mibuhat niini tungod kay ang ebanghelyo mipanalangin kaniya og katuyoan nga mabuhi pa.”
Sa matag karon ug unya, si Elder Morris nakakita sa kahayag nga gidala sa ebanghelyo ngadto sa mga kinabuhi niadtong iyang mga gitudloan. Siya adunay kahigayonan sa pagtudlo sa uban nga mga higala ug mga sakop sa pamilya. Iyang nakita mismo kon sa unsang paagi sila milambo. “Ang ebanghelyo ni Jesukristo naghatag nato og katuyoan,” miingon si Elder Morris. “Naguol kaayo ko alang niadtong walay ebanghelyo sa ilang mga kinabuhi. Wala nila mahibaloi ang ilang tinuod nga pagkatawo.”
Sa laing bahin, bisan ang iyang mga ginikanan nagsugod nga nakabantay sa kausaban sa lola ni Elder Morris. Nakita na nila karon nga ang ebanghelyo mipanalangin sa iyang kinabuhi sa daghang paagi.
Si Elder Morris uban sa iyang nan (apohan).
Imbitasyon ni Elder Morris ngadto sa Kabatan-onan
Walay bisan unsang pagduhaduha si Elder Morris nga ang pagserbisyo og misyon mao ang husto nga pagpili. Siya usab nasayod nga sa sinugdanan sa iyang misyon, sa dihang ang COVID-19 misugod sa pagkuyanap sa tibuok kalibotan, nga ang Dios mogiya gihapon sa Iyang buhat. “Ang buhat sa tawo mapakyas, apan ang buhat sa Dios dili gayod,” miingon siya.
Matag higayon nga siya makabaton og oportunidad sa pagbuhat sa ingon, siya nag-awhag sa kabatan-onan sa pagpakabuhi nga takos sa pagserbisyo og misyon. Alang ni Elder Morris, walay laing desisyon nga adunay mas dakong epekto sa iyang kaugmaon—ilabi na sa iyang mahangtoron nga kaugmaon. “Ang kinadak-an nga tambag nga akong mahatag ngadto sa kabatan-onan mao ang pag-andam sa pagserbisyo og misyon. Makausab kini sa inyong kinabuhi.”
Siya nakaamgo nga ang pagpili sa pagserbisyo mahimong moabot inubanan sa sakripisyo. Apan usab, siya nasayod og daghan mahitungod sa sakripisyo, ug sa mga panalangin nga moabot gikan niini.