“Usahay mobati ko nga ang akong mga gibuhat daw walay hinungdan. Unsaon man nako nga makahimo og kalainan?,” Alang sa Kalig-on sa mga Kabatan-onan, Peb. 2022.
Mga Pangutana ug Mga Tubag
“Usahay mobati ko nga ang akong mga gibuhat daw walay hinungdan. Unsaon man nako nga makahimo og kalainan?”
Hinumdomi
“Bisan kanus-a nga mobuhat ako og bisan unsang serbisyo, isulat nako kini sa usa ka gamay nga piraso sa papel ug isulod sa usa ka garapon. Bisan kanus-a nga mobati ako nga daw dili ako importante, ablihan nako ang garapon ug basahon ang tanang talagsaon nga mga butang nga akong nahimo. Makatabang kini kanako nga makahinumdom nga nakahimo ako og kalainan sa kinabuhi sa usa ka tawo, bisan kon gamay ra kini.”
Alexandra M., 14, California, USA
Mas Sama ni Kristo
“Sa mga higayon sa pagduhaduha, nakakaplag ako og kadangpan sa ehemplo ni Jesukristo. Kon kita molihok ug moserbisyo sama ni Kristo, bisan unsa pa ka gamay, atong gipakita ang atong gugma ngadto Kaniya ug sa Langitnong Amahan. Maghatag kini og malungtaron nga kalinaw ug hingpit nga kalipay.”
Laura V., 18, Chile
Yano nga Serbisyo
“Padayon nga mahimong positibo nga impluwensiya alang sa mga tawo sa imong palibot. Ang pagpaambit og yano nga mensahe sa ebanghelyo o bisan gani ang pagpaminaw lang ngadto sa usa ka tawo makatandog sa ilang kasingkasing sa halawom nga paagi ug mohimo kanila nga malipayon. Mahimong malipayon usab ang atong Langitnong Amahan, ug magmapasalamaton kanato sa pagtabang sa Iyang buhat.”
Daniela M., 15, Honduras
Mga Himan sa Iyang mga Kamot
“Usahay lisod makita ang atong epekto. Apan kon kita mahimong ehemplo isip mga sumusunod ni Jesukristo ug maningkamot sa pagtuman sa atong mga pakigsaad, ang Ginoo mopanalangin kanato. Mahimo kitang mga himan sa Iyang mga kamot aron sa paghikap sa mga kasingkasing sa ubang mga tawo. Makahimo kita og kausaban sa laing tawo, bisan kon wala kita nakabantay nga kini nahitabo.”
José C., 14, England
Mahinungdanon ang Inyong mga Aksiyon
“Mahinungdanon ang tanan ninyong buhaton. Naningkamot gayod ako sa pagbuhat sa tanang butang nga adunay maayo nga katuyoan ug sa pagsunod sa mga lakang ni Kristo. Bisan kon kini mao ang pagpahalipay sa usa ka kauban sa team, paghupay sa usa ka igsoon, o bisan sa pagtimbaya sa usa ka silangan, ang matag gamay nga butang nga atong buhaton dinhi sa yuta makatabang sa paghimo og kalainan sa mahinungdanon nga buhat sa Ginoo!”
Savannah K., 14, Tennessee, USA
Igo Na Kamo
“Ang inyong suod nga pamilya ug mga higala makakita nga kamo igo na—ug sila ang labing nakaila kaninyo. Ang atong Langitnong Amahan nagpakabana kaninyo ug nahigugma usab kaninyo. Hibaloi nga kamo Iyang anak ug nga kamo kabahin sa Iyang plano. Nakaila Siya kaninyo, ug ang inyong mga paningkamot importante sa Iyang panan-aw.”
Matthew W., 14, California, USA
Nakakita ang Langitnong Amahan
“Ang Langitnong Amahan nasayod sa inyong mga aksiyon, mga hunahuna, ug mga katuyoan. Bisan og mabati nga daw walay nakabantay sa maayo nga inyong gibuhat, nakabantay ang Langitnong Amahan ug si Jesukristo, ug makadawat kamo og mga panalangin alang niini. Basta maningkamot gayod kamo sa pagpili sa husto, kamo walay angay nga kabalak-an o kahadlokan.”
Bella R., 14, Arizona, USA
Matag Adlaw nga Superhero
“Makahimo kamo og kalainan sa kinagamyan nga mga paagi, bisan kon kini mao ang pagtupad sa usa ka nag-inusara nga bata sa eskwelahan, pakig-istorya sa usa ka tawo, o pagpadala og email aron ipakita sa usa ka tawo nga nagpakabana kamo. Tingali dili ninyo makita kini dihadiha dayon, apan akong ipasalig kaninyo nga makita ninyo kini sa dili madugay. Tingali mahimo kamong superhero sa adlaw sa usa ka tawo o gani makahimo og bag-o nga higala. Personal akong nasayod niana tungod nasinati nako kana sa akong kaugalingon.”
Ashlyn F., 16, Utah, USA
Gagmay ug Yano nga mga Butang
“Nakakaplag ako og kahupayan sa mga pulong ni propeta Alma: “Pinaagi sa gagmay ug yano nga mga butang ang mga dagko nga butang ipahinabo” (Alma 37:6). Kon maghunahuna ako kon unsa kini nga gagmay ug yano nga mga butang, mag-ampo ako aron masayod sa kabubut-on sa Ginoo alang kanako, ug alang sa tabang sa pagtuman sa Iyang kabubut-on. Nakaplagan nako nga ang pagbuhat sa gagmay nga mga butang mao ang nakapaduol kanako ngadto Kaniya.”
Kaelen R., 18, New York, USA
Mopaambit og Pahiyom
“Mohimo ako og kalainan pinaagi sa pagpaningkamot nga makapahiyom ang usa ka tawo. Bisan kon kini sa usa ka tawo lamang, ang pagpakatawa kanila, pagdayeg kanila, o bisan ang pagpangumusta kanila makahimo og dako kaayo nga kalainan.”
Megan B., California, USA