Kapitulo 11

Sunda ang Buhing Propeta

“Ang labing importanting propeta, kutob nga kita may kalabutan, mao ang usa kinsa buhi sa atong panahon.”

Gikan sa Kinabuhi ni Ezra Taft Benson

Usa ka gabii samtang si Ezra Taft Benson 15 anyos ang edad, milingkod siya sa lamesang kan-anan kauban ang iyang pamilya ug naminaw sa iyang amahan nga gibasa ang usa ka sulat gikan ni Presidente Joseph F. Smith ug sa iyang mga magtatambag sa Unang Kapangulohan. Sa usa ka bahin, ang sulat miingon: “Among gitambag ug giawhag ang pagsugod og usa ka ‘Home Evening’ sa tibuok Simbahan diin sa maong higayon ang mga amahan ug mga inahan mahimo nga mopundok sa ilang anak nga mga lalaki ug anak nga mga babaye libut kanila diha sa panimalay ug motudlo kanila sa pulong sa Ginoo. … Kon ang mga Santos mosunod niini nga tambag, isaad namo nga dakong mga panalangin ang moresulta. Ang paghigugmaay diha sa panimalay ug pagkamasulundon ngadto sa mga ginikanan molambo. Ang hugot nga pagtuo mahimo nga mapalambo diha sa mga kasingkasing sa kabatan-onan sa Israel, ug makaangkon sila og gahum sa pagpakigbatok sa dautan nga mga impluwensya ug mga tintasyon nga nagsamok kanila.”¹

Si Presidente Benson wala madugay nahinumdom: “Sa dihang ang [akong amahan] mitapos pagbasa sa sulat, miingon siya, ‘Ang Kapangulohan namulong, ug kini ang pulong sa Ginoo ngari kanato!’ Sukad niana nga panahon, makugihon kaming naghimo og mga family home evening diha sa panimalay sa akong pagkabata.”²

Sa dihang si Presidente Benson may kaugalingon nang pamilya, siya ug ang iyang asawa mipadayon sa tradisyon nga iyang nakat-unan sa iyang mga ginikanan. Miingon siya, “Ako nagpamatuod gikan niini nga kasinatian [diha sa panimalay sa akong mga ginikanan] ug sa kasinatian sa mga gabii sa pamilya diha sa akong kaugalingong panimalay nga dakong espirituhanong mga panalangin ang moresulta.”³

Niadtong1947 ang Unang Kapangulohan misugo sa mga miyembro sa Simbahan sa pagbag-o sa mga paninguha sa paghimo og mga home evening. Si Presidente Benson, sakop pa sa Korum sa Napulog Duha ka mga Apostoles, mihatag og gibug-aton niana nga hilisgutan diha sa pakigpulong sa kinatibuk-ang komperensya. Mipamatuod siya kabahin sa pamilya isip “usa ka balaan nga institusyon,”⁴ ug siya mipahimangno sa mga Santos sa mga panalangin nga moabut kon sila mosunod sa tambag sa propeta sa paglig-on sa ilang mga pamilya ug sa paghimo og mga home evening. Mipamatuod siya: “Ang atong kalipay dinhi ug human dinhi may kalabutan sa atong malampusong pagbuhat niining dakong responsibilidad. Kini takus, akong mga kaigsoonan, sa atong mainampoon nga pagplano ug atensyon, ug ako masaligon diha sa akong kaugalingong kasingkasing nga dagko nga mga panalangin ang moresulta, nga dakong hingpit nga kalipay ug katagbawan ang moabut kon kita mamati niini ingon man sa uban pang mga tambag nga gihatag ngari kanato sa Kapangulohan sa Simbahan.”⁵

Ingon nga nakasinati na og mga panalangin nga miresulta gikan sa pagpamati sa tambag sa pinili nga mga sulugoon sa Ginoo, si Ezra Taft Benson kanunay nga nag-awhag sa mga Santos sa Ulahing mga Adlaw sa paghatag og pagtagad sa buhing propeta. Siya walay kahadlok nga mipamatuod sa balaang calling sa matag Presidente sa Simbahan kang kinsa siya miserbisyo.⁶ Sa diha nga si Presidente Spencer W. Kimball, kinsa gi-orden nga Apostol dungan ni Presidente Benson, mihatag sa iyang unang pakigpulong isip Presidente sa Simbahan ngadto sa usa ka grupo sa mga lider sa Simbahan, si Presidente Benson “mitindog uban sa tingog nga puno sa pagbati, mipahayag sa pagbati sa tanan nga nanambong, miingon, sa kinatibuk-an: “Presidente Kimball, sa tanang mga katuigan nga kining mga miting gihimo, wala pa kami sukad makabati og ingon nga pakigpulong sama sa imo pa lamang nga gihatag. Sa tinuod, adunay propeta sa Israel.’”⁷ Ug sa dihang kana nga balaang calling miabut kang Presidente Benson human sa kamatayon ni Presidente Kimball, gidawat niya kini uban ang pagkamapainubsanon ug determinasyon. Miingon siya: “Ang akong asawa, si Flora, ug ako nag-ampo kanunay nga ang mga adlaw ni Presidente Kimball lugwayan pa dinhi sa yuta ug lain nga milagro himoon alang kaniya. Karon nga ang Ginoo nakapamulong, himoon nato ang labing maayo, ubos sa iyang paggiya, sa pagpadayon sa buhat dinhi sa yuta.”⁸

Inside the Conference Center duing General Conference. October 2011. — Karon, ang mga Santos sa Ulahing mga Adlaw nagpundok sa Conference Center ug sa tibuok kalibutan sa pagpamati sa buhing propeta.

Mga Pagtulun-an ni Ezra Taft Benson

Ang Presidente sa Simbahan mao ang tigpama-ba sa Ginoo dinhi sa yuta.

Pagkat-on sa paghatag og pagtagad sa propeta. Siya mao ang tigpama-ba sa Ginoo ug ang mao lamang nga tawo kinsa makapamulong alang sa Ginoo karon. Himoa nga ang iyang dinasig nga tambag maoy prayoridad. Himoa nga ang iyang dinasig nga mga pulong mahimong maoy basihan alang sa pagtimbang-timbang sa tambag sa tanang mas ubos og mga awtoridad. Dayon puyo paduol sa Espiritu aron kamo mahimong masayud sa kamatuoran sa tanan nga mga butang.⁹

Ang tigpama-ba ug propeta sa Ginoo dinhi ibabaw sa yuta karon midawat sa iyang awtoridad pinaagi sa linya sa mga propeta sugod ni Joseph Smith, kinsa gi-orden ni Pedro, Santiago, ug Juan, kinsa gi-orden ni Kristo, kinsa kaniadto ug karon mao ang pangulo sa Simbahan, ang Tiglalang niini nga yuta, ug ang Dios kang kinsa ang tanang mga tawo mobarug nga may tulubagon.¹⁰

Kini nga Simbahan wala giyahi pinaagi sa kaalam sa tawo. Nasayud ako niini. Ang gahum ug impluwensya sa Labawng Makagagahum nga Dios mao ang naggiya sa Iyang Simbahan.¹¹

Ang labing importanting propeta alang kanato mao ang buhi nga propeta.

Ang Dios nasayud sa tanang mga butang, ang katapusan gikan sa sinugdanan, ug walay tawo nga mahimong presidente sa simbahan ni Jesukristo pinaagi sa wala damha, o magpabilin dinha pinaagi sa sulagma, o namatay sa wala tuyoa nga panghitabo.

Ang labing importanting propeta, kutob nga kita may kalabutan, mao ang usa kinsa buhi sa atong panahon. Kini mao ang propeta kinsa may mga panudlo karon gikan sa Dios alang kanato. Ang pagpadayag sa Dios ngadto ni Adan wala magtudlo ni Noe unsaon pagtukod og arka. Ang matag henerasyon adunay panginahanglan sa karaang kasulatan, dugang sa bag-ong kasulatan gikan sa buhi nga propeta. Busa, ang labing importanting pagbasa ug pagpamalandong nga kinahanglan inyong buhaton mao ang diha sa labing ulahi nga dinasig nga mga pulong gikan sa tigpama-ba sa Ginoo. Mao kana nganong importante nga kamo makagamit ug mabinantayong makabasa sa iyang mga pulong. …

Oo, kami nagpasalamat kanimo, O Dios, alang sa usa ka propeta sa paggiya kanamo niining ulahing mga adlaw [tan-awa sa Mga Himno ug mga Awit sa mga Bata, nu. 36].¹²

Pagbantay niadtong kinsa mogamit sa patay nga mga propeta sa pakiglantugi batok sa buhing mga propeta, tungod kay ang buhing mga propeta kanunay mao ang prayoridad.¹³

Ang matag Presidente gipili sa talagsaon nga paagi alang sa panahon ug sa sitwasyon nga gikinahanglan sa kalibutan ug sa Simbahan. Ang tanan “nagserbisyo sa tukma nga panahon,” ingon sa atong nasaksihan diha ni Presidente Spencer W. Kimball. Hinuktoki ang milagro nianang gi-orden nang daan ug ang pagpangandam! Bisan tuod og gitawag ug gihatagan sa mga yawe sa daghang mga katuigan sa wala pa ang panahon nga ang kupo nahulog diha kaniya, ang Presidente kanunay nga mao ang tukma nga tawo diha sa husto nga dapit nianang mga panahona. Kini lamang nga milagro mao ang usa sa mga ebidensya sa pagkabalaan sa Simbahan.¹⁴

Mangutana ko, nagkinahanglan ba kita og tinuod nga propeta sa Ginoo dinhi sa yuta karon? Ang mga katawhan ba sa panahon ni Noe nagkinahanglan og propeta aron sa pagpahimangno kanila sa espiritwal ug temporal nga paagi? Kon may usa ka tawo nga midumili sa pagsunod ni Noe, maluwas kaha siya gikan sa lunop? Gani ang Biblia nagsulti kanato nga sa katapusang mga adlaw sa atong pagpuyo, ang pagkadautan sa mga katawhan mahimong ikatandi ngadto sa pagkadautan sa mga katawhan sa panahon ni Noe sa dihang ang Dios milimpyo sa yuta pinaagi sa lunop [tan-awa sa Mateo 24:37–39]. Sa inyong hunahuna nagkinahanglan ba kita og propeta karon sa pagpahimangno kanato ug pag-andam kanato alang sa paglimpyo nga gisaad sa Dios nga moabut, niini nga higayon pinaagi sa kalayo?¹⁵

Kon buot kitang mahibalo unsay hunahuna sa Ginoo kanato nan pangutan-on nato ang atong mga kaugalingon kon unsay hunahuna sa Iyang mortal nga pangulo kanato—kon unsa ka duol ang atong kinabuhi mibagay sa dinihogan sa Ginoo—ang buhing Propeta—ang Presidente sa Simbahan, ug uban sa Korum sa Unang Kapangulohan.¹⁶

President Ezra Taft Benson speaking. — Isip Presidente sa Simbahan, si Ezra Taft Benson namulong uban sa dakong gugma ug pagkadinalian.

Ang buhing propeta nagsulti kanato unsay kinahanglan natong mahibaloan, dili kinahanglan unsay gusto natong mapaminaw.

Usa ka dayag nga kinaiya sa usa ka tinuod nga propeta mao nga siya nagpahayag og mensahe gikan sa Dios. Dili siya mangayo og pasaylo alang sa mensahe, ni siya mahadlok sa bisan unsa nga sosyal nga mga sangputanan nga mahimong moresulta ngadto sa pagbiay-biay ug pagpanggukod.¹⁷

Usahay aduna niadto kinsa mobati nga ang ilang yutan-ong kahibalo sa piho nga hilisgutan superyor sa langitnong kahibalo nga gihatag sa Dios ngadto sa iyang propeta sa samang hilisgutan. Sila nagtuo nga ang propeta kinahanglan gayud nga adunay sama nga yutan-ong mga kredential o pagbansay nga sila aduna sa dili pa nila dawaton ang bisan unsay isulti sa propeta nga mahimong mahisupak sa ilang yutan-ong edukasyon. Unsay yutan-ong edukasyon ni Joseph Smith? Bisan pa niana mihatag siya og mga pagpadayag sa tanang matang sa mga hilisgutan. … Nag-awhag kita og yutan-ong kahibalo sa daghang mga matang, apan hinumdumi nga kon aduna may kasungian tali sa yutan-ong kahibalo ug sa mga pulong sa propeta, dapigan ninyo ang propeta ug kamo pagapanalanginan ug sa kaulahian makita nga kamo naghimo sa husto nga butang.

… Ang propeta dili kinahanglan nga moingon, “Sa ingon ang Ginoo namulong” aron hatagan kita og kasulatan.

Usahay adunay makiglantugi mahitungod sa mga pulong. Sila mahimong mosulti nga ang propeta mihatag kanato og tambag apan nga kita dili mapugos sa pagsunod niini gawas kon siya moingon nga kini usa ka sugo. Apan ang Ginoo miingon kabahin sa Propeta, “Ikaw maminaw ngadto sa tanan niya nga mga pulong ug mga sugo diin siya mihatag nganha kanimo.” (D&P 21:4.)

… Ang propeta mosulti kanato kon unsay kinahanglan natong masayran, dili kanunay kon unsay gusto natong masayran.

“Ikaw nagpahayag kanamo og malisud nga mga butang, labaw kay sa kami makalahutay,” pagmulo sa mga kaigsoonan ni Nephi. Apan si Nephi mitubag pinaagi sa pag-ingon, “Ang nakasala naghunahuna nga ang kamatuoran malisud, kay kini mopasakit kanila ngadto sa ilang kasingkasing.” (1 Ne. 16:1–2.)

Miingon si Presidente Harold B. Lee:

“Tingali dili kamo makagusto sa unsay naggikan sa awtoridad sa Simbahan. Kini mahimong mosukwahi sa inyong politikanhong panan-aw. Kini mahimong mosukwahi sa inyong mga sosyal nga panglantaw. Kini mahimong makababag sa pipila sa inyong sosyal nga kinabuhi. … Ang inyong kaluwasan ug ang amo nag-agad kon kita mosunod o dili. … Hatagan nato og pagtagad ang Presidente sa Simbahan.” (Conference Report, Oktubre 1970, p. 152–153.)

Apan ang buhing propeta mao gayud ang makapaguol sa kalibutan. “Bisan sa Simbahan,” miingon si Presidente Kimball, “daghan ang hilig modayandayan sa mga lubong sa karaang mga propeta ug sa hunahuna mobato sa mga buhing propeta.” (Instructor, 95:257.)

Ngano? Tungod kay ang buhi nga propeta mohatag sa unsay kinahanglan nato nga mahibaloan karon, ug ang kalibutan gusto nga ang propeta patay o mabalaka mahitungod sa ilang kaugalingong mga kalihokan. …

Unsaon nato pagtubag ang mga pulong sa usa ka buhing propeta kon siya mosulti kanato unsay kinahanglan natong mahibaloan, apan dili hinoon mamati, usa ka pagsulay sa atong pagkamatinud-anon. …

Ang maalamon mahimong maghunahuna nga ang propeta nadasig lamang kon siya nag-uyon kanila, kondili ang propeta naghatag lamang sa iyang opinyon—nagsulti isip usa ka tawo. Ang mga adunahan mahimong mobati nga wala nila kinahanglana nga maminaw sa tambag sa usa ka ordinaryo nga propeta. …

… Ang propeta dili kinahanglan nga inila sa kalibutan o sa kalibutanon.

Samtang ang propeta nagpadayag sa kamatuoran kini nagbahin sa mga tawo. Ang matinuoron sa kasingkasing maminaw sa iyang mga pulong apan ang dili matarung mobaliwala sa propeta o makig-away kaniya. Kon ang propeta mopaila sa mga sala sa kalibutan, ang kalibutanon buot motak-um sa ba-ba sa propeta, o hinoon molihok ingon og walay propeta, kay sa maghinulsol sa ilang mga sala. Ang pagkabantugan dili gayud maoy sukdanan sa kamatuoran. Daghang mga propeta ang gipatay o gisalikway. Samtang kita nagkaduol sa ikaduhang pag-anhi sa Ginoo kamo makapaabut nga samtang ang mga katawhan mahimong mas dautan, ang propeta mahimong dili kaayo inila diha kanila.¹⁸

Kita mapanalanginan samtang kita nagsunod sa buhing propeta.

Sa pagtabang kaninyo sa paglampos sa malisud nga pagsulay nga nagpaabut sa unahan, ako mohatag kaninyo og … mahinungdanong yawe diin, kon inyong pasidunggan, mopurong-purong kaninyo uban sa himaya sa Dios ug mopalingkawas kaninyo nga madaugon bisan pa sa kasilag ni Satanas.

… Isip usa ka Simbahan kita nag-awit sa himno, “Salamat, O Dios sa Propeta” [Mga Himno ug mga Awit sa mga Bata, nu. 36]. Ania ang mahinungdanong yawe—Sunda ang propeta. …

… Ang propeta mao lamang ang tawo kinsa mamulong alang sa Ginoo sa tanang butang.

Diha sa seksyon 132 bersikulo 7 sa Doktrina ug mga Pakigsaad ang Ginoo namulong kabahin sa propeta—ang presidente—ug nag-ingon:

“Wala gayud gawas sa usa sa ibabaw sa yuta sa matag higayon kang kinsa kini nga gahum ug mga yawe niini nga pagkapari natugyan.”

Dayon sa seksyon 21 mga bersikulo 4–6, ang Ginoo namahayag:

“Busa, nagpasabut sa simbahan, ikaw maminaw ngadto sa tanan niya nga mga pulong ug mga sugo diin siya mihatag nganha kanimo ingon nga siya nakadawat kanila, maglakaw sa tanan nga pagkabalaan diha sa akong atubangan;

“Kay ang iyang pulong ikaw makadawat, ingon og gikan sa akong kaugalingon nga ba-ba, sa tanan nga pagpailub ug hugot nga pagtuo.

“Kay pinaagi sa pagbuhat niini nga mga butang ang mga ganghaan sa impyerno dili makabuntog batok kanimo.”¹⁹

Ang propeta dili gayud mopahisalaag sa Simbahan.

Si Presidente Wilford Woodruff namahayag: “Moingon ako ngadto sa Israel, ang Ginoo dili gayud motugot kanako o ni bisan kinsa nga tawo kinsa nagbarug isip presidente sa Simbahan nga mopahisalaag kaninyo. Kini wala sa plano. Kini wala sa hunahuna sa Dios.” [tan-awa sa Mga Pagtulun-an sa mga Presidente sa Simbahan: Wilford Woodruff (2004), 220].

Si Presidente Marion G. Romney nag-asoy kabahin niini nga hitabo nga nahitabo kaniya:

“Nahinumdom ako sa katuigang milabay sa dihang ako usa ka bishop nga si Presidente Heber J. Grant akong gipasulti sa among ward. Human sa miting gihatud nako siya sa balay. … Nagbarug tupad kanako, giagbayan ako niya ug miingon: ‘Akong anak, kanunay nimong hatagan og pagtagad ang Presidente sa Simbahan ug kon ugaling mosugo siya kanimo sa pagbuhat bisan unsa, ug kini sayop, ug imong gibuhat, ang Ginoo mopanalangin kanimo tungod niana.’ Dayon uban sa kidlap sa iyang mata, miingon siya, ‘Apan dili ka kinahanglan nga maguol. Ang Ginoo dili gayud motugot sa iyang tigpama-ba nga mopahisalaag sa mga katawhan.’” (Conference Report, Oktubre 1960, p. 78.)²⁰

Ang istorya giasoy kon sa unsang paagi si Brigham Young, nagmaneho ngadto sa usa ka komunidad, nakakita og usa ka tawo nga nagtukod og balay ug sa yano misulti kaniya sa pagdoble sa gibag-on sa iyang mga bongbong. Gidawat si Presidente Young isip usa ka propeta, giilisan sa tawo ang iyang plano ug gidoble ang mga bongbong. Wala madugay human niana usa ka lunop ang miabut ngadto niana nga lungsod, nga miresulta sa dakong kadaut, apan ang mga bongbong niini nga tawo nagbarug. Samtang nagbutang sa atup sa iyang balay, siya nadunggan nga nag-awit, “Salamat, O Dios sa usa ka propeta!”²¹

Isip mga miyembro sa Simbahan kita adunay mga kalisud nga agian kon kita gustong mobalik sa atong Langitnong Amahan. Hatagan kita og higayon sa pagpili tali sa nagsungi nga tambag nga gihatag sa uban. Mao kana nganong kita kinahanglan gayud nga magkat-on—ug kon mas dali kitang makakat-on, mas maayo—nga maghatag og pagtagad sa Propeta, ang Presidente sa Simbahan.²²

Mga Sugyot alang sa Pagtuon ug Pagtudlo

Mga Pangutana

Si Presidente Benson miingon, “Pagkat-on sa paghatag og pagtagad sa propeta” (seksyon 1). Unsa ang kahulugan niini nganha kaninyo?
Ngano sa inyong hunahuna ang labing importanting propeta alang kanato mao ang bag-ong Presidente sa Simbahan? (Tan-awa sa seksyon 2.) Unsa nga tambag ang atong bag-ong nadawat gikan sa buhing propeta?
Samtang kamo magribyu sa seksyon 3, paghanduraw og panahon nga kamo misunod sa tambag sa propeta bisan tuod kamo wala makasabut niini sa hingpit. Unsa ang atong makat-unan gikan sa mao nga mga kasinatian?
Hunahunaa ang “mahinungdanong yawe” nga gipaila ni Presidente Benson diha sa seksyon 4. Unsa ang pipila ka mga panalangin ang inyong nadawat sa dihang kamo nagmatinuoron ngadto niining mahinungdanong yawe?

May Kalabutan nga mga Kasulatan

2 Mga Cronicas 20:20; Amos 3:7; Mga Taga-Efeso 2:19–20; 4:11–15; D&P 1:14–16, 37–38; 107:91–92; Mga Artikulo sa Hugot nga Pagtuo 1:6

Tabang sa Pagtudlo

“Ayaw kahadlok sa kahilom” Ang mga tawo sa kasagaran nagkinahanglan og panahon sa paghunahuna ug sa pagtubag sa mga pangutana o sa pagpadayag unsay ilang mga gibati. Mahimong mohunong ka human ka makapangutana, human mapaambit ang espirituhanong kasinatian, o kon ang usa ka tawo naglisud sa pagpasabut sa iyang kaugalingon” (Pagtudlo, Walay Labaw Ka Mahinungdanon nga Tawag [1999], 67).