Kapitulo 24
Kinabuhi nga Nakasentro kang Kristo
“Ang labing maayo nga sukdanan sa tinuod nga kahalangdon mao kon unsa kita ka Kristohanon.”
Gikan sa Kinabuhi ni Ezra Taft Benson
Si Presidente Ezra Taft Benson mikutlo kanunay sa tambag sa Manluluwas ngadto sa napulog duha ka mga disipulo nga Nephite. “Unsa nga matang sa mga tawo kamo mahisama? Sa pagkatinuod Ako moingon nganha kaninyo, gani sama nga Ako mao” (3 Nephi 27:27).1 Kini nga baruganan—ang panginahanglan nga mahimong mas Kristohanon usa ka tema nga gibalik-balik sa pangalagad ni Presidente Benson, ilabi na sa panahon sa iyang serbisyo isip Presidente sa Korum sa Napulog Duha ka mga Apostoles ug isip Presidente sa Simbahan.
Gihalad ang iyang kinabuhi sa pagserbisyo sa Ginoo, si Presidente Benson namulong uban sa gahum ug konbiksyon sa dihang iyang gipakigbahin ang mosunod nga mga pulong sa pagpamatuod:
“Nagpamatuod ko kaninyo nga walay mas dako, mas makalipay, ug mas magantihon nga hagit sa kalag kaysa pagsulay sa pagkat-on kabahin ni Kristo ug pagsunod sa Iyang tunob. Ang atong modelo, si Jesukristo naglakaw dinhi sa yuta isip ‘ang Ehemplo.’ Siya ang atong Manlalaban ngadto sa Amahan. Iyang gihimo ang dakong maulaon nga sakripisyo aron kita adunay kahingpitan sa kalipay ug pagahimayaon sumala sa Iyang grasya ug sa atong paghinulsol ug pagkamatarung. Gihimo Niya ang tanan nga mga butang sa hingpit ug nagmando nga kita mahimo nga hingpit gani sama nga Siya ug ang Iyang Amahan hingpit. (Tan-awa sa 3 Ne. 12:48.)
“‘Unsa kaha ang buhaton ni Jesus?’ o ‘Unsa kaha ang Iyang ipabuhat kanako?’ mao ang pinakaimportanting mga pangutana sa kinabuhi. Ang pagsunod sa Iyang pamaagi mao ang pinakadakong kalampusan sa kinabuhi. Ang tawo tinuoray nga magmalampuson kon ang iyang kinabuhi mahisama sa Agalon.”2
Samtang nag-awhag si Presidente Benson sa mga Santos nga sundon sa hingpit ang ehemplo sa Manluluwas, mipahinumdom siya kanila nga mahimo lang nila kini uban sa tabang sa Manluluwas. Siya mipahayag:
“Nahibalo ako nga ang Ginoo buhi. Nasayud ako nga Siya nahigugma kanato. Nahibalo ako nga kon wala Siya walay makalampos, apan kon kauban Siya walay bisan usa nga mapakyas.
“Ako nahibalo nga ang Dios mas daghan kaayo og mahimo sa atong kinabuhi kay sa atong mahimo.
“Hinaut nga tanan kita adunay moral nga kaisug sukad karon nga maningkamot matag adlaw sa paghunahuna ni Kristo, pagkat-on Kaniya, pagsunod sa Iyang mga tunob, ug sa pagbuhat unsay Iyang ipabuhat kanato.”3
“Si Jesus miingon … , Ako mao ang dalan, ang kamatuoran, ug ang kinabuhi: walay bisan kinsa nga makaadto sa Amahan, gawas kon pinaagi kanako” (Juan 14:6).
Mga Pagtulun-an ni Ezra Taft Benson
1
Ang mga ehemplo ug pagtulun-an ni Jesukristo naghatag og dako nga sumbanan sa tanang katawhan.
Duha ka libo ka tuig ang milabay ang hingpit nga tawo nagpakabuhi dinhi sa yuta: si Jesukristo. Siya anak sa langitnong amahan ug yutan-ong inahan. Siya ang Dios sa kalibutan, ubos sa Amahan. Iyang gitudloan ang mga tawo sa kamatuoran, nga sila makaangkon sa kagawasan. Ang Iyang ehemplo ug lagda mao ang talagsaong sumbanan, ang sigurado nga paagi, para sa tanang katawhan.4
Walay lain nga impluwensya nga adunay dako nga epekto dinhi sa yuta nga sama sa kinabuhi ni Jesukristo. Dili nato mahulagway ang atong kinabuhi kon wala ang iyang mga pagtulun-an. Kon wala siya, maglibug kita tungod sa nagkalain-laing sayop nga mga pagtuo og paagi sa pagsimba, resulta sa kahadlok ug kangitngit diin ang kahilayan ug pagkakalibutanon ang nag-impluwensya. Layo ra kaayo kita sa tumong nga iyang gihatag kanato, apan kinahanglang dili nato hikalimtan ang tumong nga atong gipaningkamutan ug dili nato hikalimtan nga ang atong panaw padulong sa kahayag, ngadto sa kahingpitan, walay kahimoan kon wala ang iyang mga pagtulun-an, iyang kinabuhi, iyang kamatayon, ug ang iyang pagkabanhaw.
… Kita kinahanglang padayon nga magkat-on nga pinaagi lamang sa pagdawat ug pagsunod sa ebanghelyo sa gugma nga gitudlo sa Agalon ug pinaagi lamang sa pagbuhat sa iyang kabubut-on kita makalingkawas sa pagkaignorante ug pagduha-duha nga nag-ulipon kanato. Kinahanglang makat-unan nato kining yano, mahimayaong kamatuoran aron kita makasinati sa hingpit nga kalipay sa espiritu karon ug sa kahangturan. Kinahanglan natong hunahunaon ang ubang tawo kon atong sundon ang iyang kabubut-on. I-una gyud nato Siya sa atong kinabuhi.5
Diha sa ika-14 nga kapitulo sa Juan, si Jesus mahigugmaong nanamilit sa iyang mga disipulo human sa katapusang panihapon. Miingon siya kanila nga siya molakaw aron sa pag-andam og dapit alang kanila didto sa balay sa iyang Amahan; nga kon hain siya, sila usab atua. Ug si Tomas miingon ngadto kaniya:
“Ginoo, wala kami mahibalo kon asa ikaw paingon; busa unsaon man namo pagtultol sa dalan?
“Si Jesus miingon ngadto kaniya, Ako mao ang dalan, ang kamatuoran, ug ang kinabuhi: walay bisan kinsa nga makaadto sa Amahan, gawas kon pinaagi kanako.” (Juan 14:5–6.) Ang dalan anaa sa atong atubangan. May klaro kining timailhan.6
2
Atong giduol si Kristo samtang kita nagtan-aw Kaniya sa matag hunahuna ug nagsunod sa Iyang mga hiyas.
Sa gipamulong diha sa Basahon ni Mormon, kita kinahanglan nga “motuo diha kang Kristo ug dili molimud kaniya.” (2 Ne. 25:28.) 25:28.) Kita kinahanglan nga mosalig ni Kristo ug dili sa tawhanong kusog. (Tan-awa sa 2 Ne. 43:34. 4:34.) Kita kinahanglang “[moduol] ngadto kang Kristo, ug paghingpit diha Kaniya.” (Moro. 10:32.) Kita kinahanglang moduol “uban sa masulub-on nga kasingkasing ug mahinulsulon nga espiritu” (3 Ne. 12:19), gigutom ug giuhaw sa pagkamatarung (tan-awa sa 3 Ne. 12:6). Kinahanglan kita nga moduol “magbusog sa pulong ni Kristo” (2 Ne. 31:20), nga atong madawat pinaagi sa Iyang mga kasulatan, Iyang dinihogan ug sa Iyang Balaang Espiritu.
Sa mubong pagkasulti, kinahanglan kitang mosunod “sa panig-ingnan sa Anak sa buhi nga Dios” (2 Ne. 31:16).7
Ang Ginoo miingon, “Paghunahuna ngari kanako sa matag hunahuna.” (D&P 6:36.) Ang pagtan-aw ngadto sa Ginoo sa matag hunahuna mao lang ang posible nga paagi nga kita mahimong mga tawo nga kita angay nga mamahimo.
Ang Ginoo nangutana sa Iyang mga disipulo, “Unsa nga matang sa mga tawo kamo mahisama?” Iya dayong gitubag ang Iyang mismo nga pangutana, “Sama nga Ako mao.” (3 Ne. 27:27.) Aron mahimong sama Kaniya, kinahanglan nga Siya —naa kanunay sa atong mga hunahuna. Sa matag higayon nga kita moambit sa sakrament, kita nagsaad nga “kanunay mahinumdom kaniya.” (Moro. 4:3; 5:2; D&P 20:77, 79.)
Kon ang hunahuna makapahimo kon unsa kita, ug kon kita kinahanglan nga mahisama ni Kristo, niana kita kinahanglan nga maghunahuna og Kristohanong mga butang. Usabon nako pagsulti: Kon ang hunahuna makapahimo kon unsa kita, ug kon kita kinahanglan nga mahisama ni Kristo, niana kita kinahanglan nga maghunahuna og Kristohanong mga butang.
… Ang atong hunahuna kinahanglang naka-focus kang Kristo. Kita kinahanglang maghunahuna ni Kristo.8
Himoon nato ang atong personal nga kinabuhi, mga panimalay, ug mga binuhatan nga mopakita sa atong Kristohanong kinaiya. Magkinabuhi nga ang uban mosulti kaninyo, “Anaa ang usa ka tinuod nga pagka-Kristiyano!”
Oo, kita nagtuo ni Jesukristo, apan labaw pa—kita nagtan-aw Kaniya, nagsalig Kaniya ug naningkamot sa pagsunod sa Iyang mga hiyas.9
Si Kristo mao ang atong hingpit nga sumbanan. Siya ang atong ehemplo. … Ang labing maayo nga sukdanan sa tinuod nga kahalangdon mao kon unsa kita ka Kristohanon.10
Ang pagkahimong sama sa Manluluwas— dako kaayo nga hagit ni bisan kinsa! Siya sakop sa Diosnong Kapangulohan. Siya ang atong Manluluwas ug Manunubos. Siya hingpit sa tanang aspeto sa Iyang kinabuhi. Walay sayop ni kahuyang diha Kaniya. Posible ba kita … nga mahimong sama Kaniya? Ang tubag oo! Dili lang kita makahimo, apan kana sugo para kanato, atong responsibilidad. Dili Niya ihatag kana nga sugo kon dili Niya tuyo nga ato kining buhaton [tan-awa sa Mateo 5:48; 3 Nephi 12:48].
Si Apostol Pedro, dinhi gihulagway uban sa nabanhaw nga si Jesukristo, mitudlo kon unsaon nga kita makasunod sa kinaiya sa Manluluwas .
Si Apostol Pedro namulong sa pamaagi diin ang usa ka tawo mahimo nga mag-aambit “sa diosnong kinaiya” (2 Pedro 1:4). Importante kini, kay kon kita sa tinuod mahimong mga mag-aambit sa diosnong kinaiya, kita mamahimong sama Kaniya. Atong tukion og maayo unsay gitudlo ni Pedro kanato mahitungod niini nga proseso. Ania ang iyang gisulti:
“Ug tungod niining maong hinungdan, himoa ninyo ang tanang paningkamot, aron nga sa inyong pagtuo ipuno ninyo ang maligdong nga batasan, ug sa maligdong nga batasan ipuno ang kahibalo;
“Ug sa kahibalo ang pagpugong sa kaugalingon; ug sa pagpugong sa kaugalingon ipuno ang pagkamainantuson; ug sa pagkamainantuson ipuno ang pagkadiosnon;
“Ug sa pagkadiosnon ipuno ang pagbati nga inigsoon; ug sa pagbati nga inigsoon ipuno ang gugma” (2 Pedro 1:5–7).
“Ang mga hiyas nga gilatid ni Pedro mga bahin sa diosnong kinaiya, o kinaiya sa Manluluwas. Mga hiyas nga kinahanglan natong sundon kon kita buot nga labaw nga mahisama Kaniya. Atong hisgutan ang pipila niini ka importanting mga kinaiya.
Ang unang kinaiya, diin ang uban adto idugang, mao ang hugot nga pagtuo. Ang hugot nga pagtuo mao ang pundasyon diin ang diosnong kinaiya gitukod. …
Mipadayon si Pedro sa pag-ingon nga kinahanglan natong dugangan ang atong hugot nga pagtuo og hiyas. … Ang mahiyason nga pamatasan nagpasabut nga ang [usa ka tawo] adunay lunsay nga hunahuna ug limpyo nga mga lihok. Dili siya mangibug diha sa iyang kasingkasing, kay ang pagbuhat niini mao ang “paglimud sa tinuohan” ug pagkawala sa Espiritu (D&P 42:23)—ug walay laing mas importante niini nga trabaho kaysa Espiritu. …
Ang hiyas sama sa pagkabalaan, usa ka kinaiya sa pagkadiosnon. [Kita] kinahanglang aktibo sa pagpaningkamot niana nga mahiyason ug matahum ug kana nga dili makauulaw o malaw-ay. Ang hiyas modayandayan sa [atong] mga hunahuna nga walay paghunong (tan-awa sa D&P 121:45). Ang tawo kaha nga anaa sa kadautan sa pornograpiya, panimpalas, o pagkabulgar makaingon sa iyang kaugalingon nga hingpit siyang mahiyason? …
Ang sunod nga paagi nga gihulagway ni Pedro sa proseso sa pagtubo mao ang pagdugang og kahibalo ngadto sa atong hugot nga pagtuo ug hiyas. Ang Ginoo nagsulti kanato nga “malisud alang sa usa ka tawo nga maluwas diha sa pagkawalay alamag” (D&P 131:6). Sa laing dapit ang Dios nagmando, “Pangitaa ninyo gikan sa labing maayo nga mga basahon ang mga pulong sa kaalam; pangitaa ang pagtulun-an, gani pinaagi sa pagtuon ug usab pinaagi sa hugot nga pagtuo” (D&P 88:118). … Samtang ang bisan unsa nga pagtuon sa kamatuoran mahinungdanon, ang mga kamatuoran sa kaluwasan mao ang pinakaimportanting kamatuoran nga makat-unan sa tawo. Ang pangutana sa Ginoo, “Kay unsa may kapuslanan alang sa usa ka tawo, kon maangkon niya ang tibuok kalibutan, nga pagapildihan sa iyang kinabuhi?” Ang (Mateo 16:26) mahimong magamit sa mga ambisyon bahin sa edukasyon ingon man bahin sa ambisyon sa kalibutanon nga mga butang. Ang Ginoo usab makapangutana, “Unsay kapuslanan sa tawo, kon nakat-unan niya ang tanan dinhi sa kalibutan ug wala makakat-on sa paagi nga maluwas?” …
Ang pagtipon sa atong espiritwal nga edukasyon ngadto sa atong sekular nga pagkat-on makatabang kanato sa pag-focus sa mga butang nga labing importante niini nga kinabuhi. …
Lain nga hiyas nga gihulagway ni Pedro ingon nga kabahin sa diosnon nga kinaiya mao ang pagpugong sa kaugalingon. [Ang ugdang nga tawo] adunay pinugngan nga mga emosyon ug mga pagpahayag sa pulong. Mobuhat siya og mga butang uban sa pagpugong ug dili magpatuyang. Buot ipasabut, siya adunay pagpugong sa kaugalingon. Siya ang agalon sa iyang mga emosyon, dili ang emosyon maoy agalon. …
Sa atong pagpugong sa atong kaugalingon atong idugang ang pagkamapailubon. … Ang pagkamapailubon lain nga matang sa pagpugong sa kaugalingon. Kini mao ang abilidad nga dili magdali-dali sa katagbawan sa kaugalingon ug sa pagpugong sa inyong mga pagbati. Sa iyang pakigrelasyon sa mga minahal, ang mapailubon nga tawo dili mogamit og kapintas nga sa kaulahian iyang pagamahayan. Ang pagkamapailubon mao ang pagkakalma kon anaa sa kaugtas. Ang mapailubon nga tawo masinabtanon sa mga sayop sa uban.
Ang mapailubon nga tawo magahulat usab sa Ginoo. Usahay kita makabasa o makadungog kabahin sa mga tawo kinsa nagtinguha og panalangin sa Ginoo, dayon nawad-an sa pailub dihang wala dayon kini moabut. Ang usa ka bahin sa diosnong kinaiya mao ang pagsalig sa Ginoo igo nga “magmalinawon ug mahibalo nga [siya mao] ang Dios” (D&P 101:16).
Ang usa ka [tawo] kinsa mapailubon mosabut sa mga sayop ug mga kahuyang sa iyang mga gimahal. Tungod kay siya nahigugma kanila, dili siya mangita og sayop ni mosaway ni mamasangil.
Lain nga hiyas nga gihisgutan ni Pedro mao ang kamabination. … Usa ka tawo nga mabination maloloy-on ug malumo ngadto sa uban. Siya masinabuton sa pagbati sa uban ug matinahuron sa iyang batasan. Siya adunay matinabangon nga kinaiya. Ang pagkamabination mopasaylo sa kahuyang ug mga kasaypanan sa uban. Ang kamabination ipaabut ngadto sa tanan—ngadto sa mga tigulang ug mga batan-on, sa mga hayop, sa mga kabus ingon man sa mga adunahan.
Kini mao ang tinuod nga mga hiyas sa diosnong kinaiya. Nakita ba ninyo kon unsaon nato nga kita mahimong mas Kristohanon samtang kita mas mahiyason, mas mabination, mas mapailubon, ug mas makapugong sa atong mga emosyon?
Si Apostol Pablo migamit og klaro nga mga pahayag sa paghulagway nga ang usa ka miyembro sa Simbahan kinahanglang lahi gyud sa kalibutan. Iyang sugo nga kita “kasul-uban og Kristo (Mga Taga-Galacia 3:27), “hukasa … ang daang pagkatawo,” ug “isul-ob ang bag-ong pagkatawo” (Mga Taga-Efeso 4:22, 24).
Ang katapusan ug kinahingpitan nga hiyas sa balaang kinaiya mao ang gugma, o ang tiunay nga gugma ni Kristo (tan-awa sa Moroni 7:47). Kon kita tinuoray nga nagtinguha nga mas mahimong sama sa atong Manluluwas ug Agalon, niana ang pagkat-on sa paghigugma sama sa Iyang paghigugma mao ang atong pinakatumong. Gitawag ni Mormon ang gugmang putli og “labing mahinungdanon sa tanan” (Moroni 7:46).
Ang kalibutan karon naghisgot og daghan mahitungod sa gugma, ug kini gipangita sa kadaghanan. Apan ang tiunay nga gugma dako og kalainan gikan sa unsay gihunahuna sa kalibutan kabahin sa gugma. Ang gugmang putli dili gayud mangita og hinakog nga katagbawan. Ang tiunay nga gugma ni Kristo magtinguha lamang sa mahangturong pagtubo ug hingpit nga kalipay sa uban. …
Ang Manluluwas mipahayag nga ang kinabuhing dayon mao ang pag-ila sa bugtong tinuod nga Dios ug sa Iyang Anak nga si Jesukristo (tan-awa sa Juan 17:3). Kon kini tinuod, ug kay ako mopamatuod kaninyo sa akong ligdong nga saksi nga kana maoy tinuod, kita kinahanglan gayud mangutana kon unsaon pagkaila sa Dios. Ang proseso sa pagdugang og usa ka diosnong kinaiya ngadto sa uban, sama sa gihulagway ni Pedro, nahimong yawe sa pag-angkon niini nga kahibalo nga naggiya ngadto sa kinabuhing dayon. Timan-i ang saad ni Pedro, nga gihulagway diha sa sunod:
“Kay kon kining mga butanga inyong mabatunan, ug magatubo, kini magapahilayo kaninyo sa pagkataspukan o sa pagkadili mabungahon diha sa inyong kahibalo sa atong Ginoong Jesukristo” (2 Pedro 1:8; mga italic gidugang).
… Nag-ampo ko nga kining mga kalidad ug mga hiyas sa Manunubos unta maanaa kanato aron kon kita mobarug sa Hukmanan ug Siya mangutana kanato, “Unsa nga matang ka sa pagkatawo?” nga kita makahangad uban sa pasalamat ug kalipay ug motubag, “Gani ingon nga ikaw mao.”11
3
Ang Manunubos mohupay ug mobayaw kanato sa atong mga paningkamot aron magpabilin kita diha sa dalan nga Iyang gibutangan og timaan alang kanato.
Kon kita mahisalaag sa dalan nga gibutangan og timaan sa Tawo sa Galilea, niana pakyas kita sa atong indbibidwal nga pakiggubat. … Mao nga kita walay mahimo kon wala ang iyang tabang. Gibalik-balik niya og sulti sa iyang mga disipulo, ug sa tanan kanato, “Kinahanglan nga dili magkaguol ang inyong kasingkasing. …”
“Kon pinaagi sa akong ngalan mangayo kamog bisan unsa, kini akong pagabuhaton.”
“Dili ko kamo pagabiyaan nga daw ilo. …”
“Kaninyo ibilin ko ang kalinaw, kaninyo ihatag ko ang kalinaw. …” (Juan 14:1, 14, 18, 27.)12
Paklion na sab nato ang Basahon ni Mormon … alang sa pagkat-on og pipila ka mga baruganan mahitungod sa pagduol ngadto ni Kristo, isip tawo nga may pasalig Kaniya, nakasentro Kaniya, andam mosakripisyo alang Kaniya. Mokutlo kita og diyutay sa daghang mga tudling kabahin niining butanga.
Una, kinahanglan kitang mahibalo nga si Kristo nagdapit kanato sa pagduol ngadto Kaniya. “Tan-awa, siya midapit sa tanan nga mga tawo, kay ang mga bukton sa kalooy gitunol ngadto kanila, … Oo, siya miingon: Duol ngari kanako ug kamo moambit sa bunga sa kahoy sa kinabuhi” (Alma 5:33–34).
Duol, kay siya nagbarug “uban sa bukas nga mga bukton sa pagdawat kaninyo” (Mormon 6:17).
Duol, kay “siya mohupay kaninyo sa inyong mga kasakit, ug siya mohangyo alang sa inyong katuyoan” (Jacob 3:1).
“Duol ngadto kaniya, ug ihalad ang inyong tibuok nga mga kalag ingon nga usa ka paghalad ngadto kaniya” (Omni 1:26).
Sa pagtapos ni Moroni sa rekord sa sibilisasyon sa Jaredite, misulat siya, ako modasig kaninyo sa pagpangita niini nga Jesus diin ang mga propeta ug mga apostoles misulat” (Ether 12:41).
Sa panapos nga mga pulong ni Moroni nga gisulat sa hapit na matapos ang sibilisasyon sa Nephite, miingon siya, “Oo, duol ngadto kang Kristo, ug paghingpit diha kaniya, … ug kon kamo molimud sa inyong mga kaugalingon sa tanan nga dili diosnon, ug mohigugma sa Dios uban sa tibuok ninyo nga gahum, hunahuna ug kusog, niana ang iyang grasya igo alang kaninyo” (Moroni 10:32).
Kadto kinsa may pasalig kang Kristo “mobarug ingon nga mga saksi sa Dios sa tanan nga mga panahon ug diha sa tanan nga mga butang, ug diha sa tanan nga mga dapit” nga sila mahimo nga maanaa “bisan hangtud sa kamatayon” (Mosiah 18:9). Sila “nagbaton sa ngalan” ni Kristo” nga nahisulat kanunay sa ilang mga kasingkasing (Mosiah 5:12). Sila “modala diha kanila “sa ngalan ni Kristo, adunay usa ka tinguha sa pag-alagad kaniya hangtud sa katapusan” (Moroni 6:3).
Kon kita nagpakabuhi nga nag-sentro kang Kristo, “[kita] naghisgot kang Kristo, [kita] naglipay diha kang Kristo, [kita] nagsangyaw kang Kristo” (2 Nephi 25:26). Kita “[makadawat sa] makapahimuot nga pulong sa Dios, ug [mag]busog sa iyang gugma” (Jacob 3:2). Gani sa dihang nagsubo ang kalag ni Nephi tungod sa iyang mga pagkadautan, siya miingon, “Ako nasayud kang kinsa ako mosalig. Ang akong Dios mao ang akong kaabag” (2 Nephi 4:19–20).
Atong hinumduman ang tambag ni Alma: “Himoa nga ang tanan nimo nga mga buluhaton himoon ngadto sa Ginoo; ug bisan asa ikaw padulong himoa kini diha sa Ginoo; oo, himoa nga ang tanan nimo nga mga hunahuna ipunting ngadto sa Ginoo; oo, himoa nga ang tanan nga mga pagbati sa imong kasingkasing ibutang diha sa Ginoo sa kahangturan. “Pakitambag uban sa Ginoo sa tanan nimo nga buhaton” (Alma 37:36–37).
“Hinumdumi, hinumdumi,” miingon si Helaman, “nga kini diha sa lig-on nga sukaranan sa atong Manunubos, kinsa mao si Kristo, … nga kamo kinahanglan gayud motukod sa inyong tukuranan; nga sa panahon nga ang yawa mopadala sa iyang mapintas nga mga hangin, … [sila] walay gahum ibabaw kaninyo sa pagbitad kaninyo ngadto sa bung-aw sa pagkauyamot” (Helaman 5:12).
Si Nephi miingon, ang Ginoo “mitagbaw kanako sa iyang gugma, gani hangtud sa pagkaugdaw sa akong unod” (2 Nephi 4:21). Kadto kinsa andam sa pagsakripisyo kang Kristo “nahimo nga buhi diha kang Kristo” (2 Nephi 25:25). Sila “dili mag-antus sa bisan unsa nga matang sa kasakit, kay kini mabuntog diha sa hingpit nga kalipay ni Kristo” (Alma 31:38). Sila “gakson diha sa mga bukton ni Jesus” (Mormon 5:11). Si Nephi miingon, “Ako mihimaya sa akong Jesus, kay siya nagtubos sa akong kalag” (2 Nephi 33:6). Si Lehi miingon, “Ako iyang giliyokan sa kahangturan sa mga bukton sa iyang gugma” (2 Nephi 1:15). …
… Kana nga mahinungdanong tawo si Mormon [misulat] ngadto sa iyang pinalanggang anak, si Moroni, niini nga mga pulong:
“Akong anak, pagmatinud-anon diha kang Kristo; ug hinaut pa unta nga kini nga mga butang diin ako misulat dili makaguol kanimo, aron dili makaingon sa imong kamatayon; apan hinaut unta nga si Kristo mobayaw kanimo, ug unta ang iyang mga pag-antus ug kamatayon, ug ang pagpakita sa iyang lawas ngadto sa atong mga amahan, ug sa iyang kalooy ug pagkamainantuson, ug ang paglaum sa iyang himaya ug kinabuhi nga dayon, moabut sa imong salabutan sa kahangturan.
“Ug unta ang grasya sa Dios nga Amahan, kansang trono anaa sa kahitas-an sa mga langit, ug sa atong Ginoong Jesukristo, kinsa naglingkod sa tuo nga kamot sa iyang gahum, hangtud nga ang tanan nga mga butang mahimo nga alagad ngadto kaniya, ug magpabilin uban kanimo hangtud sa kahangturan.” (Moroni 9:25–26).
Akong pag-ampo para sa tanan nga kita usab mosunod niining madasigong tambag: “Pagmatinud-anon kang Kristo.” Dayon Siya mobayaw kanato ug ang Iyang grasya maanaa kanato hangtud sa kahangturan.13
Mga Sugyot alang sa Pagtuon ug Pagtudlo
Mga Pangutana
-
Mipahayag si Presidente Benson, “Walay lain nga impluwensya nga adunay dako nga epekto dinhi sa yuta nga sama sa kinabuhi ni Jesukristo” (seksyon 1). Sa unsa nga mga paagi nga ang kinabuhi sa Manluluwas nakaapekto sa yuta? Sa unsa nga mga paagi ang iyang kinabuhi mi-impluwensya kaninyo?
-
Unsaon pagkausab sa atong kinabuhi kon kita “maghunahuna ni Kristo”? Unsaon sa atong mga hunahuna pagkonektar ngadto sa atong mga hiyas? Samtang kamo magtuon sa seksyon 2, palandunga unsa ang inyong mabuhat aron hingpit nga molambo ang Kristohanon nga mga hiyas nga gisulti dinhi.
-
Sa unsang paagi ang mga pagtulun-an sa seksyon 3 naghatag kanato og paglaum samtang kita naningkamot nga mas mahisama sa Manluluwas? Giunsa sa Manluluwas pagtabang kaninyo sa inyong mga paningkamot sa pagsunod Kaniya?
May Kalabutan nga mga Kasulatan
Marcos 8:34; Mga Taga-Filipos 4:13; 1 Juan 3:23–24; 2 Nephi 25:23, 26; Mosiah 3:19; Alma 7:11–13; Moroni 7:48
Tabang sa Pagtuon
“Pagplano og mga kalihokan sa pagtuon nga kanang makapahugot sa imong pagtuo sa Manluluwas” (Isangyaw ang Akong Ebanghelyo [2004], 25). Sama pananglit, samtang kamo nagtuon tingali makapangutana mo sa inyong kaugalingon sama sa mosunod: “Sa unsang paagi kining mga pagtulun-an mas makadugang sa akong pagsabut sa Pag-ula ni Jesukristo? Sa unsang paagi kining mga pagtulun-an makatabang nako nga mas mahisama sa Manluluwas?